［101文］債券之五　—　講到尾，債息債價，其實受乜影響？你話「供求」。但金融資產嘅「供求」嚟自乜？　有冇諗過？ (Patreon)

101中嘅101：其實債券價格，受乜影響？

「供求定律」喎，即係講咗第於冇講。

不如諗下，金融資產嘅「供求」嚟自乜？

恒指升5%，但有條傻仔質到盈富基金跌5%，有乜後果？有乜「供求」？

通脹，債仔狀況，經濟，點影響債價？

股市點影響債市，債市又點影響返股市？

10年債息，其實對聯儲局加息唔係太敏感嘅。

「但唔係喎，舊年狂加息，10年債息又大升喎」

後記：小小個人感想

節目預告：既然加息債價跌，點解話加息對銀行保險公司有利？

節目預告：咁其他銀行保險公司有冇好似SVB咁輸錢？會唔會有事？

1. 繼續呢個債券系列。第一篇，第二篇就唔再重溫了。第三篇同第四篇，用咗相當長嘅篇幅，去解點解「利息升跌」會影響債價。

101中嘅101：其實債券價格，受乜影響？

2. 咁但其實返返去101中嘅101，到底債價係由乜影響？

3. 有啲好垃圾嘅人，會答你「供求」。Sounds so smart，但即係冇答過。甚至有啲人以為「多咗股票流通就會跌」。「供求定律」嘛，唔係咩？

「供求定律」喎，即係講咗第於冇講。

4. 呢啲，就係讀一半書嘅人嘅問題。照計你本教科書一定有教你，「供求定律」，仲有個附註，叫做Ceteris paribus – other things unchanged. 教科書都應該有教你，Demand 同 Quantity demanded 係兩回事（呢度唔解了）。

5. 仲有，你要記住一樣嘢：金融資產嘅「需求」，嚟自乜？係嚟自貪念！講得白啲，有著數嘅嘢，多多需求都有。

6. 我唔會在呢篇文詳細講，但如果本身比較熟金融嘅讀者，會聽過啲金融衍生工具定價（埃汾Master專讀呢味）。例如你唔熟但都可能聽過人講，期權定價嘅Black Scholes Formula—你唔使知點解有呢條式，甚至你唔識用都唔緊要。你只需要知，啲期權嘅合理價，係有條式計。

7. 好啦，咁你話，如果偏離咗呢條式，會有乜後果？如果只係值1蚊，但「供求」，好多人沽，隻嘢落到1毫，咁會點？

8. 答案：好簡單，就會有更多嘅錢在1毫買，一路買到上去近1蚊為止。點解會咁？套利呀！有著數嘅，啲人當埋條底褲都借錢嚟狂買。啲「需求」係咁嚟的，同你買樓或要用石油，完全唔同。

9. 諗到尾，可以用一個更加簡單嘅例子：好似領展供股權咁。供股價44.5蚊，咁我當嗰日領展50.5蚊，你隻供股權就大約係值6蚊。如果「供求」，忽然間有條友不停沽，質到隻供股權去1蚊。咁你可以估下發生乜事？就係自然會有大量嘅「需求」買返上去。呢啲「需求」嚟自套利，貪念，多多都有。

10. 類似嘅東西，其實在第三篇講「盈富基金」同恒指都有提過。兩樣嘢大約同步，唔會忽然間一隻升10%一隻跌10%，如果出現咗，你就知會發生乜事。啲「供求」係由貪念決定的

不如諗下，金融資產嘅「供求」嚟自乜？

11. 再畀個其他例子，例如美國政府忽然發1億嘅特別美債，10年到期，但10厘債息，10蚊賣畀你，歡迎你平價認購，賣完即止。咁你估會點？梗係個個仆去買啦，肯定搶高債價壓低債息　—　定你覺得會因為「多咗債券所以跌價」？「供求定律」喎

12. OK，有人會反駁，唔係喎，畢菲特抬啲比亞迪嚟香港沽，咪會多咗股票，咪會壓低股價。錯錯錯！咁係因為佢大手沽啫！本身「多咗股票」係唔會影響股價的。事實上，根本冇「多咗股票」，只係有人在櫃桶拎出嚟之嘛！更加唔好忘記，所有股票交易，都係有買賣兩邊，有咁多錢沽，就有咁多錢買，何來「供應多咗」？係睇邊個狠啲，邊個力度大。

恒指升5%，但有條傻仔質到盈富基金跌5%，有乜後果？有乜「供求」？

13. 講遠咗，但無非要解你知，你平時聽到嘅咩「供求定律」，往往充滿誤解。正如好多嘢一樣，股價又好，樓價又好，債價（咪即係債息）又好，都係受「供求」影響。但講咗第於冇講。

14. 之前兩篇嘅例子，好清楚咁解咗你知，其中一個好影響「供求」（亦即係影響債價同債息嘅），就係出面嘅息口。啲「供求」就係嚟自「我出面可以拎幾多息」，亦即係機會成本。

15. 債券就係借據，每張借據嘅市價（債價），代表你嘅回報（債息）。咁你出面息口升嘅，你張借據自然冇原本咁值錢啦，平啲先有人肯要，就係息口升債價跌債息升。相反，出面減到零息嘅，你張借據咪值錢，就係息口跌債價升債息跌。

16. 舉一反三，實情好簡單，好多現象你都會明白。

通脹，債仔狀況，經濟，點影響債價？

17. 首先，通脹。通脹升，甚至只係通脹預期升，債價跌，債息升。原因？除咗因為通脹往往導致加息外，亦因為購買力。我放咗數出去，點知原來到時收返嚟嘅錢越嚟越唔值錢（一早定咗本金嘛），咁肯定通脹對債主不利，即係對債券持有人不利，所以通脹升債價跌，債息升。

18. 另外，你個債仔嘅情況。最簡單咪啲內房債，原本諗住收得返嘅，點知唔對路，全世界都知呢條友好唔掂，好可能走數。咁我拎住張借據嘅，咪好唔著數？原本值90蚊嘅，我60蚊快手沽咗佢今日套現算啦，仲得閒到時估佢會唔會走數要唔要債務重組咩。所以債價會跌，亦即係債息會升，亦即係啲人要求更高嘅回報先肯拎住問呢位債仔收數嘅借據。

19. 另外，當然就係經濟環境。一般嚟講（但不能保證），你發現經濟差，或者投資者對經濟預期悲觀，債券表現比較好。首先因為經濟差會預減息，又會預通脹低。

股市點影響債市，債市又點影響返股市？

20. 另外，就係「機會成本」，股票嘅回報對經濟敏感好多　—　因為除非你執笠，否則好景唔好景，債券都係收咁多錢，但股票唔同，好景時分好多股息，差嗰時一個仙都冇。所以預期經濟差的話，咁啲友覺得買股票冇著數，自然就多啲人想買債券，多人買咪債價升，咪壓低個債息。呢啲先係「供求」。

21. 同樣地，「避險情緒」高漲下，亦係人人買債，咪推高債價，壓低債息。兵荒馬亂啦仲買股票？我梗係買美債，至少到期拎得返本。

22. 當然了，呢啲係成個債市嘅嘢。如果你去到個別嘅債，仲複雜。例如啲國債，咪睇你國家嘅通脹失唔失控呀，財政情況呀，會唔會違約呀之類。企業債嘅，咪睇你公司賺唔賺到錢，會唔會好高槓杆。嗰啲咩按揭抵押債嘅，咪睇樓價，睇息口。但原理都係差不多。

23. 講咗咁多，咁其實你見到，平時嘅10年債息，由乜推動？就係「供求」！

24. 但即係乜？就係一大堆投資者，大家對於以上一大堆因素，嘅一個「總的睇法」。其實，個原理就同股票差不多。唔止，留意啲「睇法」，要有真金白銀back up，你一萬個話「我睇淡美股」但冇股票沽又冇沽空嘅廢柴網友，影響力及唔上一個拎2萬蚊買盈富基金嘅師奶。所以「大多數人」嘅睇法，未必係有用嘅。睇嘅係乜嘢人，肯用幾多錢去back up，先係重點

25. 講實在啲，10年債息，其實主要真係由「經濟前景」「通脹前景」去帶動。但記住係一個長期嘅睇法。

10年債息，其實對聯儲局加息唔係太敏感嘅。

26. 所以10年債息對「聯儲局議息」，並唔係極之敏感嘅。以前見過多次，聯邦基金利率升，但債息跌（其實今年都係！）。

27. 但你話，唔係喎，舊年聯儲局加息，啲債息係咁升喎。係，但好大程度因為舊年加得急同重。你見之前啲周期，加息時債息未必係咁升的。

28. 至於你話：唔係喎埃汾，上面你唔係話息口升，債價會跌，債息會升咩？上面講嘅係好簡單嘅例子。兩樣嘢，首先，實際世界，係仲會有其他因素，全部炒埋一碟，通脹經濟前景之類。仲有更重要嘅係年期嘅配對：10年債息係睇息口，但應該係睇10年嘅息口。不過你頭兩年加得咁急，點都會反映下嘅。

29. 用返我地具體嘅例子，你張勞蘇銀行借據，4厘債息，但係10年到期。好啦，出面開始加息，咁表面好似就你冇著數啦，拎出面嘅高息好過。但，出面嘅高息維持到幾耐？如果你未卜先知，或者好有信心，知道加得一年息，之後九年就會勁減到零息，咁個玩法又唔同啦喎？我呢張嘢一年收4厘喎。

「但唔係喎，舊年狂加息，10年債息又大升喎」

30. 講咗咁多，無非話你知，留意返個年期配對。其實10年債息，真係主要唔係睇聯邦基金利率。不過咁啱舊年就係史上其中一次最急嘅加息，然後10年債息都急跌，咁好多人先以為「全部」係關加息事啫。

31. 不過另一方面，你睇2年債息，就會對聯邦基金利率好敏感了。道理亦好簡單，甚至由第一次加息嗰時，你都知唔會加三個月就停。往往加足一年，甚至幾年。就唔存在10年債息咁要大家估埋之後咁多年嘅情況

後記：小小個人感想

32. 寫咗一大輪，其實以上好多東西，你大學讀金融101會讀。不過首先，唔係人人讀過。另外又講真，叻嘅學生就好易明，普通嘅學生往往只係知其然而不知其所然，加息咪債價跌咯，但未必知點解。而當然，最重要係，你發現學校就唔係咁教你的，照計我啲例子清楚啲。但冇法，一來你學校教嗰啲，有啲就呃飯食。我寫得差就讀者起身走喎，但教得差係冇乜事嘅。二來，唔呃飯食嘅，亦未必有心教，大家都知學者主力做研究出paper，而唔係教金融101。三來，好多教嘅學者，就太過象牙塔，自己都冇做過金融。

33. 所以呢，之前有朋友話，我唔去教書，真係個社會嘅損失。不過如果我去咗教書，就應該係我本人嘅損失。

節目預告：既然加息債價跌，點解話加息對銀行保險公司有利？

節目預告：咁其他銀行保險公司有冇好似SVB咁輸錢？會唔會有事？

34. 好啦，節目預告。既然加息會債價跌，咁點解啲人（包括我）又話加息或者債息升對銀行對保險公司有利？明明輸錢喎。另外，咁到底啲銀行保險公司輸咗幾多錢？會唔會有事？就之後講

35. 不過我仲未肯定，會唔會插播幾篇第一季回顧先。睇下市況有冇大波動，有冇突發嘢，甚至睇下我本人有冇突發嘢要做。