［101文］債券之四．點解加息債券跌？角度二：債券就係借據，你張借據冇以前咁值錢啦。明明本金又冇少到，票息又冇收少到，亦都冇遲收。點解債息會郁？答案係：機會成本。即係「蝕章」，「原本可以更好」，「走寶」．Duration：加3厘息，一年勞蘇債先跌3%—但如果係十年債，就跌25%！ 點解明知加息下長債會跌得多啲，又要耐啲先拎得返錢，SVB仲買咁多？ (Patreon)

點解加息債券跌？角度二：債券就係借據，你張借據冇以前咁值錢啦。

勞蘇債券，4厘債息，一年到期。出面忽然由2厘加息加到5厘，會點？

即使你間公司冇因為加息而利息成本升，債價都係會有影響的

明明本金又冇少到，票息又冇收少到，亦都冇遲收。點解債息會郁？

答案係：機會成本。

機會成本，即係「蝕章」，「原本可以更好」，「走寶」

有人話等於太早做定期鎖咗個低息。但，定期冇得轉手。債券可以！

出面加息，咁你張借據會發生乜事？

點解加息債價會跌？第三個角度：投資者要求回報

出面2厘息，勞蘇債4厘債息一年到期價值96.15。如果出面加到5厘呢？

Duration：加3厘息，一年勞蘇債先跌3%—但如果係十年債，就跌25%！

點解明知加息下長債會跌得多啲，又要耐啲先拎得返錢，SVB仲買咁多？

1. 債券101系列，頭兩篇嘅（第一篇，第二篇）summary我不再重覆，你鍾意嘅可以睇上一篇（第三篇），初段有sum up返頭兩篇

2. 第三篇，開始講一個好簡單嘅問題：點解加息，啲債價就跌，然後搞到啲銀行輸錢。我用咗第一個角度，law of one price，既然個債仔在出面嘅借錢成本高咗，債券嘅回報都應該會一樣拉高。冇錯，啲票息本金定死晒，但債券唔係定期存款，可以自由買賣。多數會拉到啲借據嘅回報（即係債息），同債仔上升咗嘅借錢成本差不多。

點解加息債券跌？角度二：債券就係借據，你張借據冇以前咁值錢啦。

3. 呢篇講角度二，其實就十分簡單，first principles．債券係乜？借據一張之嘛，而可以自由買賣。

4. 咁我地假設，勞蘇銀行有隻債券，而家債息係4厘，即係你渣住佢坐到尾，就等於4厘回報。為求方便，當佢係零息債券，1年後到期收返100蚊（實務上，呢啲嘢你全部唔使知，你只需要知「債息4厘」，即係坐到尾你就相等於有4厘回報）。

5. 順手話埋你知，呢隻債嘅債價，應該就係100/1.04，96.15。

6. 另外，我地假設出面嘅息口，2厘息咁話，即管當係美債債息或者聯邦基金利率。咁勞蘇銀行作為冇咁好嘅債仔，當然畀貴啲息。

勞蘇債券，4厘債息，一年到期。出面忽然由2厘加息加到5厘，會點？

7. 而家忽然間，出面大手加息喎，一加加到5厘！我地諗下，對呢隻勞蘇銀行嘅債券，有乜影響？

8. 認真啲諗喎，因為呢個正係呢兩年在美國發生嘅事。出面大手加息，啲債券會點？點解？

即使你間公司冇因為加息而利息成本升，債價都係會有影響的

9. 首先固然，加息會令有啲公司嘅利息開支大升，甚至輸錢，甚至爆煲，例如啲內房。咁你話會爆煲梗係影響債息，極之合理。但呢度我地甚至唔係討論呢樣嘢。你就當啲公司頂得住，或者對佢財務冇影響，甚至啲公司係債主，收人地錢嘅。但加息，一樣會影響啲債券嘅債息。證據？你睇美債咪知！

明明本金又冇少到，票息又冇收少到，亦都冇遲收。點解債息會郁？

10. 我地再諗下，勞蘇銀行債券。到期你收到嘅本金會唔會少咗？唔會，都話假設佢全數還得返。中途啲票息有冇影響？亦都唔會，一早定死晒嘛（我知，呢個例子我簡化咗做零息債，但即時有票息，都唔會有任何影響）

11. 咁，做乜會有影響？

答案係：機會成本。

12. 答案就係：機會成本。唔知係乜嘅，讀返經濟101，甚至有話所有成本都係機會成本。但唔好話冇讀經濟嘅人，即使有讀嘅，好多都不求甚解。

13. 不過唔緊要，我唔係背定義打發你嘅人。我用例子答你。機會成本，至少在呢個情況下，即係「蝕章」「走寶」「原本可以更好」（教科書講：Highest-valued Option Forgone）

機會成本，即係「蝕章」，「原本可以更好」，「走寶」

14. 即係點？好簡單。你隻勞蘇債，4厘債息丫嘛。但，出面加晒息啦喎，我借畀美國政府都5厘息啦，你張借據，回報先4厘，肯定做傻仔啦，蝕晒。

15. 呢個情況，其實大約同於你2厘息時做咗定期存款，點知出面係咁加息—做定期存款，咪即係借錢畀銀行咯。你太早鎖定個低嘅息，出面係咁加，你咪蝕章。好易明丫。

有人話等於太早做定期鎖咗個低息。但，定期冇得轉手。債券可以！

16. 不過有樣嘢唔同：你嘅定期存款，一般冇得轉讓，一般你不能今日七折賣畀人套現。但，債券就可以！借據一張之嘛

17. 實則上會發生嘅嘢，咪張勞蘇銀行嘅借據，在呢啲位，冇人肯再買。96.15一年後先收返100蚊？唔制，我買美債都唔止啦。平啲啦。

18. 咁即係，債價跌啦，亦即係債息會升咯！就係咁簡單。

出面加息，咁你張借據會發生乜事？

19. To sum up，亦即係話，債券就係借據，鎖定晒啲嘢。出面加息嘅情況，你咪蝕章，所以個債價多數都會跌。咁債價跌，咪即係債息升咯。

20. （順帶一提，因為存款一般冇「市場」，所以永遠係嗰個價。然後你睇到一樣好奇怪嘅嘢：我係銀行，1厘債息買咗10億債券，之後大加息，我就輸錢。但，1厘嗰時，個戶做咗1億定期，之後點加息，我都唔會輸錢。你唔覺得十分搞笑？性質差不多一樣，就只係因為定期存款冇市價）

點解加息債價會跌？第三個角度：投資者要求回報

21. 然後第三個角度睇，亦最簡單。「債息」咪就係你買隻債，得到嘅「埋單回報」。咁如果出面加晒息，買債嘅人，當然要求有更高回報（否則我去做定期得啦），所以你個債息都要跟住升，咁債息升，亦就即係債價跌（所以點解之前啲文強調幾十次）。

出面2厘息，勞蘇債4厘債息一年到期價值96.15。咁如果出面加到5厘呢？

22. 然後仲有，可能你會問嘅問題。你話，你明白加晒息，隻勞蘇債96.15冇人買，4厘債息搵鬼買。所以債息要升，債價要跌，你應該明（唔明就由頭再睇多次我篇文）。

23. 但，咁佢債價要跌到幾多？亦即係債息會升到幾多？

24. 短答案係：冇人知！即係等於你問領展宣佈完供股會跌到幾錢。或者問我中移動年尾會幾錢。鬼知咩，冇確定嘅答案。

25. 不過長答案啦喎，都可以「估算下」嘅。

26. 記住，原本我地嘅例子，出面係2厘息，勞蘇債係4厘息。呢個4厘減2厘嘅2厘，術語叫做yield spread．大約就代表勞蘇債嘅風險，你危險過出面嘛（順帶一提，啲「信貨評級」有時都影響呢啲東西）

27. 咁一個比較合理嘅假設，假使所有嘢唔變。出面加到5厘息，個yield spread照樣係2厘，咁隻勞蘇債就要去到7厘債息先有人買，亦即係債價會變到100/1.07，93.45咯。

Duration：加3厘息，一年勞蘇債先跌3%—但如果係十年債，就跌25%！

28. 96.15跌到93.45，好似唔係好多，跌3%左右。不過因為呢隻係1年債，如果係10年嘅，就甘好多，你可以自己計。即係100/1.04^10，同埋100/1.07^10嘅分別　—　就係25%嘅分別！

29. 你會見到，長期債，價格（同債息！因為價格就係債息！）對息口係敏感好多嘅。你最好抄低呢個例子，遲下我會再用，十分好用。例如點解SVB啲長債會輸好多錢，例如點解同樣都係美債ETF，TLT舊年嘅跌幅大過SHY好多（因為前者長債，後者短債）

30. 術語上，叫做Duration存續期。中英文名稱都有啲誤導，留意唔一定係隻債券仲有幾多年到期，而係計晒佢啲票息，你當係一個weighted average。但如果零息債券，呢個Duration 就係等於債券幾多年到期。

31. （順帶一提，Duration亦適用於股票，雖然深好多。但簡單嚟講，之前好多科技股就係long duration，今日冇錢賺甚至蝕錢但有人相信之後會賺好多錢。咁一加息，就跌到九彩。除咗驚佢爆煲，亦同上面嘅機制有啲關係。因為，股票一樣係discounted cashflow．拿！之前兩篇肯定講過呀下！都話環環相扣）

點解明知加息下長債會跌得多啲，又要耐啲先拎得返錢，SVB仲買咁多？

32. 然後可能你仲會問，嘩，咁點解仲有人買長債咁笨？風險大好多喎，而且要咁耐先拎得返錢。

33. 先答後半：「要咁耐先拎得返錢」，完全係錯嘅。債券唔係定期存款，你渣嘅係2年債又好，30年債又好，要拎返錢嘅，沽咗佢，過幾日就拎得返錢！亦唔存在啲價會唔靚，例如SVB嗰啲，好多係美債或啲高級按揭抵押債，流動性好高，買賣差價好窄的。

34. 至於頭半嘅問題？點解加息啲長債肯定跌多啲，但佢仲要渣咁多長債？好簡單，首先，因為好多時長債嘅債息高啲，至少SVB買嗰時係（但近排就唔係，所謂嘅「債息倒掛」，yield curve inversion）

35. 另外，係丫，如果加息啲長債肯定跌多啲，但，「如果減息呢？」—當然，你可以話SVB之類，冇判斷到聯儲局咁快重手加息。咁但，「買科技股嗰啲都係咁上下」，況且，今年啲美債債價咪又要升返晒。（仲有個教訓：銀行都往往好難估到大手加息嘅時機，我唔明做乜你覺得自己會估得好準，記住要預備：如果我錯呢？）

36. 下篇（應該星期二日頭出）再同你講，到底債息（即係債價！），除咗受加息影響，仲受乜影響？點解？