［101文］債券之三．點解聯儲局加息，會搞到SVB爆煲，搞到外匯基金勁蝕錢？順手解下咩係QE量化寬鬆，同印銀紙有少少分別。又點解會壓低債息？加息令債價跌，第一個角度：law of one price．點解倫敦匯控同香港匯控就同價，但上海工行同香港工行唔同價 (Patreon)

快手回顧返頭兩篇嘅Summary

明明票息本金日期全部定好晒，但點解加息，債價又會跌？

又同你重溫：債息，票息，拆息，聯邦基金利率

點解聯儲局加息，會搞到SVB爆煲，搞到外匯基金勁蝕錢？

順手解下咩係QE量化寬鬆，同印銀紙有少少分別。又點解會壓低債息？

加息令債價跌，第一個角度：law of one price

我拆錢畀JP Morgan，同買佢嘅債，應該係差不多成本嘅

Law of one price：冇兩樣嘢係一樣，Ship of Theseus

點解倫敦匯控同香港匯控就同價，但上海工行同香港工行唔同價

1. 雜務繁忙，但都會盡量keep住出文。之前兩篇101系列講債，反應出奇地好。我一路都擔心會講得太淺，結果讀者反應幾好。可能係嫌淺嘅讀者就冇出嚟講啦，但我嘅整體作風都係寧願講得淺畀你嫌煩，好過睇完你都唔明。而由好多讀者問嘅問題嚟睇，似乎有啲基本概念大家都係唔多識。呢個係冇問題的，最緊要虛心學習，亦係我呢個Patreon存在嘅原因

2. 另外，我仲想寫篇（甚至兩三篇）關於第一季回顧同之後展望（主要係回顧）。你見我Facebook都有貼呢張圖。我自己就唔覺要急嘅，但至怕呢幾日市況又大變化，又或者有啲突發嘢，所以都希望盡快出咗佢。所以可能呢個債券101系列中間要插播個第一季回顧

快手回顧返頭兩篇嘅Summary

3. 快手同你回顧下前兩篇講過乜，想重溫嘅可以睇，嫌太簡單嘅唔使睇。第一篇就由零開始，教你債券係乜，幾時收息，收幾多息，全部定晒，但點解啲債價都仲會大上大落。仲有話埋你知，票息同「債息」（又叫孳息，Yield to maturity，YTM）嘅分別。債息點解又會受利息影響？好簡單，因為債價受利息影響，而「債息」即係「債價」嘅一體兩面。

4. 第二篇同你睇實例，你成日聽人講債息幾多厘，其實係乜意思？其實係講債價。咁點解唔直接講債價？有埋實例畀你。仲有，話你知點解債息升，即係債價跌

5. 以上如果唔明嘅，請返去再睇。記住，基本功打得差，之後啲嘢就往往一路越嚟越錯。呢個系列，原本只係因為有讀者問「香港啲銀行保險公司會唔會都因為加息輸錢」，但我地由基本開始解。提埋你，「明明埃汾之前好似話加息對保險公司對銀行有利」，咩回事？都會在呢個系列講

明明票息本金日期全部定好晒，但點解加息，債價又會跌？

6. 今篇同你講一個相當簡單嘅問題：點解一般「加息」會令債價跌，債息升。

7. 聽落簡單，但真係要好好好清晰，三個唔同概念。你隻嘢嘅「票息」，一早定實，冇得郁的。至於我地上次講「債息」，就只係債價嘅另一種表達手法。無啦啦冇得「加」。

又同你重溫：債息，票息，拆息，聯邦基金利率

8. 我地平時講嘅「加息」，在美國嘅情況，就指個Fed Fund Rate聯邦基金利率，一年議息8次嗰個。千萬唔好同其他嘢搞亂。

9. 然後我亦講過，聯邦基金利率，係短息嚟嘅，所以佢只會影響短期嘅拆息—但係通過一個間接嘅機制。拆息就係銀行之間借錢嘅息，咁當我由聯儲局借返嚟（聯邦基金利率）嘅成本高咗，我拆出去自然就收貴啲，大約係咁。況且聯儲局實現「聯邦基金利率」嘅方法，亦包括自己直接入市。

10. 然後，短期嘅拆息（隔夜或一星期）跟聯邦基金利率跟得最貼，長期啲嘅（半年一年）冇咁貼。長期拆息就即係我睇over the period嘅成堆短期拆息走勢，例如大家都估半年後減息，你啲一年拆息自然會不停跌。

11. 呢啲以前解過，唔太詳細解。仲有，在香港你就仲要涉及港美拆息係咪同步。然後去到講定存利息，供樓利息，prime rate等等更加間接。所以真係好多人講「加息」，都未知自己講緊乜，有時你講緊一樣，佢講另一樣。

點解聯儲局加息，會搞到SVB爆煲，搞到外匯基金勁蝕錢？

12. 講返，咁點解聯儲局加息，會影響債息？亦即係，你最關心嘅，點解聯儲局加息，會拖低債價，搞出SVB爆煲之類嘅事？唔止，其實你見香港外匯基金（好多國家都係）都輸到七彩，都係因為咁原因。

13. 你必定要記住，債息，就即係債價（背熟呢句）。咁所以其實好大程度係市場機制，聯儲局不能直接影響債息債價，至少長債不太能。

順手解下咩係QE量化寬鬆，同印銀紙有少少分別。又點解會壓低債息？

14. （當然聯儲局有時通過QE量化寬鬆就可以影響長債倀息，但係另一個課題。順手講埋，QE即係乜？就係聯儲局直接買債！嚟啦喎，咁佢不停買，「供求定律」，自然搶貴。債價貴，咪即係債息低咯。所以買債咪會壓低債息！就係咁機制。但，聯儲局邊度搵錢嚟買債？其實都係記數，即係印出嚟，所以QE又名印銀紙。但當然有少少分別，因為銀紙印咗好難收返，但QE理論上可以收返）

加息令債價跌，第一個角度：law of one price

15. 有關「加息」令到債息升債價跌，可以有好多個角度睇。但記住，上次嗰兩篇，我咪有個Excel？或者記唔記得上面呢條式？我咪同你講個YTM大咗，分母自然大，計出嚟嘅債價自然低？

16. 記住！係另一回事！完全唔同。呢條式講「債息」，我地講「加息」。

17. 點解加息會令到債息升債價降？可以用三個角度睇。

18. 角度一其實我自己覺得呢個解法冇咁清楚，但好似幾有創意，所以分享下。放心，睇完唔明仲有角度二同三。

我拆錢畀JP Morgan，同買佢嘅債，應該係差不多成本嘅

19. 角度一，law of one price．既然聯儲局加息會影響拆息。咁拆息即係銀行之間拆借嘅價錢啫。咁問題嚟啦喎，正路地，如果我係匯豐咁話，我在拆借市場放錢畀JP Morgan一年，同我買JP Morgan嘅一年債券，應該係一樣價（或者至少差不多）嘛？係咪？對手又同一間，年期又一樣。咁既然拆息會因為聯儲局加息而郁，咁當然債息都會郁。

20. 舉例，如果我係匯豐，拆錢畀JP Morgan原本3厘息一年，後來拆息變到4厘息。但JP Morgan隻債券嘅「債息」原本仲係3厘，咁會有乜後果？咁梗係冇人買啦（記住，「債息」就係你實收嘅回報），冇人買價咪跌，價跌咪債息升！直到扯到去差不多4厘為止。

21. 以上當然係個好簡化嘅例子，實際上你唔係匯控，銀行之間拆借嘅息，同你普通人同銀行拆借（存款同借錢）嘅息係兩回事，「但在債市就認錢唔認人」，你拎住隻債，同匯豐拎住嘅價係一樣的。但大原理就係咁

Law of one price：冇兩樣嘢係一樣，Ship of Theseus

22. 順帶一提，Law of one price，最好唔好濫用，學藝不精亂用會好大鑊。因為哲學層面，冇兩樣嘢完全一樣。咁要去到幾唔一樣先係「唔一樣」，就係千古難題。

點解倫敦匯控同香港匯控就同價，但上海工行同香港工行唔同價

23. 但，倫敦匯控同香港匯控就law of one price，上海工行A股同香港工行H股就唔！但明明兩隻工行投票權一樣，佔有嘅嘢一樣，派息又一樣。咁你話貨幣唔同交易所唔同？匯控夠係啦！亦唔係大唔大陸嘅問題，你見紐約阿里巴巴，同香港阿里巴巴，都係同價的。

24. 所以個關鍵係：你有冇得互換？倫敦匯控同香港匯控嘅股票可以互換，A股工行同H股工行唔得。而你見到，好多時在金融上，有冇law of one price，就睇有冇呢啲「套利」。呢個概念成日出現，例如以前解盈富基金都解過，唔存在你恒指跌10%但盈富基金跌2%的。亦都唔會因為換管理人「外資撤離」而令盈富大跌。

25. 但其實，關於「加息」令債債跌，仲有角度二，一個比較「正統」嘅解法。仲有角度第三，最簡單嘅講法。下篇續講，即時會出埋畀你。