[101文] 債券系列：到底債券係乜？點解叫Fixed income？既然收幾多，幾時收都定晒，做乜格價又會大升大跌？「點解債息升，代表債價跌」。「點解利息升，債價往往會跌」。債息其實即係乜？又點計出嚟？之前內房債，又話百幾厘息，咁係咪即係佢一年畀百幾厘息？ (Patreon)

債券是甚麼東西？

點解債券叫Fixed income？

咁既然收幾錢又知，幾時收入知，點解仲會升升跌跌？

「點解債息升，代表債價跌」。「點解利息升，債價往往會跌」

其實乜嘢係債息？根本債息，咪即係債價咯！

真實例子：教你睇債券報價

隻嘢90.6 但3年後還100蚊  然後債息3.8厘，我咪一年執7厘？

記住，「債息」唔係票息，其實係「債價」嘅一個表達手法

但，啲債息點計出嚟？

之前內房債，又話百幾厘息，咁係咪即係佢一年畀百幾厘息？

1. 美債債息舊年已經勁升，但今年到SVB爆煲，先忽然好多人關心啲債息債價。實情平時就應該做功課，臨急臨忙問嘢搵答案係大忌。因為往往係啲嘢最貴又當炒又人人講時你先去搵資料說服自己買，又或者人人都驚時你先去自己嚇自己。點解好多人會高買低沽，呢啲係原因之一。

2. 無論如何，好多人都唔係好清楚「債券」係乜東西，就呢個系列講。呢篇先講咩係債券，以及債息債價係乜東西，到底兩者有乜關係。唔識唔使覺得唔好意思，睇完文咪會明。至怕你唔識又以為自己識。

債券是甚麼東西？

3. 簡單嚟講，債券借據一張，用美債為例，就係你借咗一舊錢畀美國政府，到期佢會還返畀你。呢度你要留意兩樣嘢：第一，多數債券都派息，半年一次，呢個叫做票面息率，coupon rate（但唔係全部都派，唔派嘅叫zero coupon bond，零息債券）．第二，一般嚟講，呢啲派息係定死咗，即係定息（有浮息債，例如iBond同綠債都係，但更煩，唔討論）。

點解債券叫Fixed income？

4. 所以債券先叫fixed income，我放咗100萬出去，6厘票息，10年期。除非佢違約，否則我一定知道，每半年我就收返3萬，然後10年後我就收返100萬（嚴格嚟講係103萬，最後一期息一齊畀埋你）。留意呢啲借據，一般任你買賣，即係到收息嗰日，或者到期日，邊個拎住張票，個債仔（美國政府）就畀錢邊個。

5. （又，你估到了，「咁如果我臨收息前嗰日沽咪好白痴？臨之前嗰日買咪好so？」。當然唔會有啲咁嘅發財大計。同股票類似，都係要計返除息，但債券嘅計法再煩啲，計accrued interest）

咁既然收幾錢又知，幾時收入知，點解仲會升升跌跌？

6. 咁既然收幾錢又一早定咗，日子又定晒，點解仲會升升跌跌？點解會輸到人爆煲？你可以諗下，之後會答。短答案：首先，個債仔會唔會走佬？仲有，出面嘅息口，通脹，都會影響。

「點解債息升，代表債價跌」。又或者唔明「點解利息升，債價往往會跌」

7. 另外，我仲會解一樣嘢：好多人其實唔明，「點解債息升，代表債價跌」。又或者唔明「點解利息升，債價往往會跌」。請你十分細心，睇清楚呢兩句嘢嘅每一隻字！千萬唔好含糊過骨，唔明嘅就接受自己唔明，諗到明，或者聽我解。切忌「以為自己明」。若果你唔明兩句嘢有乜分別，就即係你都唔多明。

其實乜嘢係債息？根本債息，咪即係債價咯！

8. 最基本嘅問題，就係最重要嘅問題。好多人日聽夜聽，甚至日講夜講，但到底「債息」即係乜？我成日講，或你睇報導聽到嘅，美國10年債息係3.5厘，實情代表乜？唔係定實票息咩？做乜日日會升升跌跌？

9. 畀個短答案你：債息，即係你買落去隻債度，「相等於」收到幾多息。點解講「相等於」？點解明明票息定死，但債息會日日唔同？因為雖然票息一早定實，但債價日日唔同！債息，就係反映債價，你唔同位買，咪會有唔同嘅「等價回報」。唔係好明？正常，陣間再解。

10. 我先答講第一個問題「點解債息升，代表債價跌」—因為兩樣嘢係同一樣嘢嘅兩面！所以你見我寫「債息升代表債價跌」，而唔係「債息升令到債價跌」。兩者唔存在因果關係，因為根本係同一樣嘢嘅兩面！我用另一個比喻講，就即係「速度高代表行得快」「溫度高代表熱」。又或者，睇一場足球或籃球比賽，你可以計打咗幾多分鐘，亦可以計仲有幾多分鐘完場（計法定時間唔計補時啦下，唔好煩）

11. 債息，就係代表債價，係同一回事。只不過你多數會見到人quote債息，比較少見到人quote債價。

真實例子：教你睇債券報價

12. 比個現成例子你，真quote，美債，新鮮滾熱辣（我在FSM ONE搵，你上你間銀行網頁都應該會見到差不多嘅嘢）。

13. 最左邊寫住，發行人美國政府，明啦。2026年1月31日到期，明啦，咁所以咪剩返2.841年。最左邊都寫住0.375%，就係票面息率，右邊都有重覆一次。講明半年派一次。即係你買100萬的話，每半年，就會收到1875蚊息（會係1月31日，同埋7月31日收到）。然後到期，即係2026年1月31日，如果美國政府冇違約，你就收返本金100萬，同埋最後一期息1875蚊。呢堆嘢都好易明。

14. 順帶一提，我其實唔係好肯定「最低認購量」嘅1000係乜。但應該唔係1000蚊，又唔係1000萬1000球，應該係1000X100即係十萬美金啩。因為一般債券都係用100做單位。

15. 所以，問題係剩返嗰兩格。就係，債價，同埋個債息（又叫收益率，孳息率，YTM，yield to maturity）。另外，你會見到有買入同賣出，bid ask啫，等於你換外幣咁，小問題。

隻嘢90.6 但3年後還100蚊  然後債息3.8厘，我咪一年執7厘？

16. 好啦，實情係之前有個朋友，問咗我一個類似嘅問題。我呢度可以問返你。我貼多次個圖

17. 你見隻嘢，債價90.6，然後債息率係3.8厘。咁，聽落咪好似好抵！我90.6買，3年唔夠（2.841年）拎返100蚊本金，只計本金即係三年執佢10.4%（100/90.6），複合一年執佢3.3%（100/90.6 開立方根減1）。然後債息3.8厘，我再每年拎3.8厘息喎　—　咪就係傳說中嘅穩穩陣陣7厘息？！美國政府唔會違約啩（唔會的，除非外星人侵略，或者中國佔領咗美國啦下）

18. 好啦，結論你都知，梗係計法有問題啦。點會有咁著數嘅嘢。但，錯在邊？

記住，「債息」唔係票息，其實係「債價」嘅一個表達手法

19. 錯在double count咗。債價90.6係真嘅，到期收返100都係真嘅，但你一年收嘅息，上面咪寫咗，只係0.375嘅票面息。唔係嗰個3.8厘嘅東西！

20. 戲肉啦喎，咁嗰個3.8厘嘅「債息」，既然唔係你年年收到嘅票息，咁其實係代表乜？其實佢就係代表以下嘅事：

21. 「我90.6買張2.841年後收返100然後再每半年收到0.1875息嘅紙，咁樣埋單大約我就相等於一年收3.8厘息！」

22. 換言之，呢個係一個equivalent yield．你平時聽到嘅「債息」，就係等於「總之我用今日呢個價買入坐到尾計埋中間啲票息咁就等於一年幾多厘息」。

23. 亦都換句話講，你見到例如話10年美債債息3.5厘，唔係話你知佢每年派3.5厘畀你。而係你用今日嘅價去買，坐到尾，計埋收票息，就「等於」一年收3.5厘息。至於佢票息係幾多？你真係可以唔使理的。

但，啲債息點計出嚟？

24. 然後你應該會問：咁但，呢個3.8厘，點計出嚟的呢？呢個係一個極深嘅問題！短答案，有人會幫你計，網上都有計數機。

25. 你可以開我個Excel嚟睇，但我都唔係好肯定我有冇計錯。唔知係中途有嘢計錯咗，定未計上面講嘅accrued interest定乜，同佢個數有啲唔同。

26. 但個大原則不變，就係你每次收嘅錢（票息同最後本金），用個「債息」折現返去今日（例如1年後嘅10蚊，債息係5厘，咁舊錢今日值10/1.05 = 9.52），加埋晒，就會係今日嘅債價。

27. 仲有另一個大原則：正如我之前講，債券嘅票息，同埋幾時派，全部定好晒。所以根本個Excel所有綠色嘅嘢都唔會變。所以會變嘅，就只係橙色格嘅債息，同埋黃色格嘅債價，成條方程式就得呢兩個數會郁。

28. 換句話講，兩個數根本係對應，郁一個就自然會郁咗另一個，條式先會平衡（數學上，即係 y= f(x)咁，而又同時可以掉轉迫返出嚟）。你有咗個債價，就迫到個債息出嚟。相反，你有咗個債息，就計到債價（現實上，就當然絶大多數情況下你見到個債價，然後有人計返個債息畀你）

29. 都唔太明嘅，咁畀個好簡單嘅例子你。當有間勞蘇銀行，債券剛好一年後到期，票息率係零（zero coupon bond是也）。咁你好易計到，如果債價係90蚊，咁即係個債息係11.08%。相反，你3厘債息嘅，債價就係97.09．見到冇？債息升，債價跌。

30. 因為在呢個咁簡單嘅例子，債價＝　100/(1+債息)。點解咁計？咪話將個一年後嘅錢折現返去今日嘅價值。其實其他例子都係咁計，只係條算式會複雜好多倍。

31. 重點記住係：債價即係債息，一一對應，同一樣嘢嘅唔同表達手法啫。

之前內房債，又話百幾厘息，咁係咪即係佢一年畀百幾厘息？

32. 睇到呢度，再畀啲實戰例子。之前你咪聽日講，啲內房債，十幾厘息嘅。留意，十幾厘係個「票息」，即係啲傻仔走去「穩穩陣陣十幾厘息咁」　—　但拎唔拎得返個本先？

33. 咁記住，之前講嗰啲，十幾厘係「票息」。實際上，唔少「債息」已經升到幾十厘—甚至100厘都有—呢個唔代表佢地真係一年畀100厘你，而係代表啲債價殘到不堪，100蚊可能剩返幾十，大家都唔會預佢到期可以全部還得返，可能只係傾重組七折甚至三折找數。

34. 又係睇實例，建業地產呢隻債，7.75厘票息，唔知最初有幾多人因為「穩穩陣陣收8厘息」去買，聽聞有啲仲嫌8厘息都少，仲要借孖展去買，做大幾倍槓杆（私人銀行當然樂於送條繩畀你）。

35. 好啦，你見債價，廿蚊多啲。但一年後到期，「拎得返就一年賺幾倍」。即係點？即係根本冇人估佢會全數找到。債息300厘呀！咁但唔等於真係公司一年畀300厘息嘅。

36. 同樣地，舉個大家會熟啲嘅例子。海航。2020年嘅新聞，話債息抽到上50厘，而講個債價一日跌咗26%　—　留意，係講緊同一樣嘢。債價，就係債息嘅另一種表達手法。明冇？

37. 好啦，講到呢度。一個問題：「咁既然債息同債價一一對應，我quote個債價咪得咯，90.6，好似股票咁之嘛，做乜債券要quote個債息？」

38. 你可以諗下答案，下篇文我會答你。不過提定你，的確有債券會quote 價格。例如乜？iBond同埋綠債！但留意，兩者都係浮息債，同上面講嘅嘢就唔多同。