阿里巴巴馬雲搞邊科？王維基HKTV Mall 業績（有埋Excel） (Patreon)

阿里巴巴，搞邊科？

馬雲忽然現身，係咪彭博報流料？

阿里巴巴自願拆骨，保唔保到平安？

其實之前已經有螞蟻股權變動

而家提都冇提螞蟻

「咁即係買唔買得？

「一放就亂，一亂就收，一收就死，一死就放」。

其實由頭到尾都冇打得好死

王維基HKTV Mall 1137：純利升十幾倍，即係好？

好多科技股高位都跌七八成，但1137近乎冇彈過！點解？

今年個GMV目標，好保守喎

難請人，而啲客又移咗民。

不過，估值就OK的

1. 返咗香港，又繼續出文，特別係會寫返多啲要數字要Excel嘅文，因為在香港用部Desktop加埋兩個Mon比較好寫。今日會寫王維基隻HKTV Mall 1137．

阿里巴巴，搞邊科？

2. 不過首先，應該係好多人關心嘅阿里巴巴。馬雲。除咗阿里巴巴大升外，亦帶埋其他中資科技股。照計星期二你見到佢在大陸現身，就應該飛入去買，不過都好似買唔切。

3. 個故事唔係太複雜，唔使太多陰謀論，用常識同公開資料都大約判斷到。同你快手回顧一次。2020年尾，螞蟻上市臨門一腳撻Q後，馬雲好長時間都好似「流亡」咗咁，一時在香港，有時又泰國日本西班牙。

4. 一如大陸好多嘢一樣，螞蟻上市點解撻Q，都仲係一個謎。但相信都不外乎因為「功高蓋主」，大陸唔想民企或者個別富豪影響力太大，仲要係在金融領域，更加敏感。

馬雲忽然現身，係咪彭博報流料？

5. 然後，早兩日忽然鬼媒彭博報導，話大陸想「邀請」馬雲返去云云，但馬雲唔制咁話。不過就差不多同一日，南早就證實咗（其實張相係咪肯定係真？），馬雲在杭洲現咗身。介紹返，南早都係馬雲嘅，咁照計冇乜可能錯。

6. 順帶一提，有啲人以為彭博「報流料」，我就認為唔係。甚至你又應該諗下，到底乜嘢先叫做「流料」。馬雲要改變主意，可以係好短時間嘅事。一般嚟講，去到彭博呢啲層次嘅鬼媒，好少無中生有作故仔。但你亦同時留意，邊啲係Fact，邊啲係Opinion，而家鬼媒有時會撈埋一齊的。（至於呢啲係咪叫「假新聞」，就係一個更加深嘅問題）

阿里巴巴自願拆骨，保唔保到平安？

7. 然後？就係阿里巴巴宣佈「改革」，你可以話係「自願拆骨」。分返開六個業務，可能分開六間公司上市（聽住先），六個獨立CEO咁。

8. 之後，阿里股價就大升了。

9. 成件事嘅發展，係幾符合「邏輯」嘅，甚至我有啲覺得「太過符合」—都不排除係夾埋晒做畀人睇。要釋放返個訊號，政府仲係「歡迎創新/民企/商家」

10. 好簡單，在馬雲同阿里巴巴方面，就係「自閹」，話畀你知「我求財，甚至唔係求大財，唔謀政治，唔會威脅政府地位」。又，呢啲東西在中國史上一路都有，富不與官鬥，你再拉遠啲當然係中國冇發展過好似西方嘅資本主義同保護私人產權嘅制度。雖然有人「商而優則仕」，但其實只係「交保護費」，一般都係因為你朝中有人，先畀你搵錢，絶對要分莊閒。

其實之前已經有螞蟻股權變動

11. 留意在呢壇咁嘅自我拆骨之前，今年年頭，我都有寫過，螞蟻嘅重組。簡單嚟講，馬雲直頭放棄埋控制權（但依然有相當大嘅財務權益）。釋出嘅訊息亦係一樣。

而家提都冇提螞蟻

12. 特別你可以留意：阿里最新嘅自我拆骨，係提都冇提螞蟻嘅！點解會咁？好簡單，因為根本唔再當螞蟻係「自己業務」，只係一項投資。甚至之前都講，會開放競爭，唔會將阿里嘅嘢同螞蟻綁埋一齊，劃清界線（但官方信唔信？就另一回事了）。目的？當然都係為咗官府安心。就係呢一舊嘢官方最唔安心，所以分拆出嚟都未夠，最好你就只係財務投資。

「咁即係買唔買得？

13. 講咗一大輪，即係點？當然係對阿里巴巴，甚至成個股市有利的。固然好難答你「反映咗幾多」，但我相信現價買阿里巴巴都係OK嘅。

14. 因為你回想返，2020年11月螞蟻撻Q的確係一件大事。後來你就見到係一連串對科技公司嘅整改，再加埋美股啲科技股又香埋，然後仲要加息，你見啲中資科技股勁跌。

15. 但，其實之前已經見到又去咗轉向點，今次只係更加明確話你知。馬雲返得大陸，即係有得傾，甚至已經傾掂數。

「一放就亂，一亂就收，一收就死，一死就放」。

16. 而背後嘅原因，不外乎係因為「新中國」近幾十年以嚟嘅一個定律。資深讀者一定聽過：「一放就亂，一亂就收，一收就死，一死就放」。你見中國近幾十年，有唔少嘢都轉過向，甚至轉向再轉向，但呢樣東西，真係冇變過。

17. 互聯網公司嘅情況，亦係一樣。之前有一輪嘅「野蠻增長」，造就咗馬雲馬化騰（佢就低調好多）甚至劉強東雷軍之類，你睇馬雲真係呼風喚雨，在中國在外國都係萬人迷，亦都好自然開始不可一世，呢啲就係「一放就亂」，至少在政府心中係。咁當然之後就發生螞蟻撻Q嘅事，就係「一亂就收」，然後啲科技公司死晒，甚至經濟都差晒，就係「一收就死」。

18. 咁而家肯定係進入咗「一死就放」嘅階段，去到某個位政府發現唔對路，不能打死呢啲科技公司，要靠佢地請人，要靠佢地推動經濟，甚至要樹立返個「仲係對生意人友善」嘅形象（或假象）。況且，在外國對中國極不友善嘅情況下，呢班人更加重要。你近來睇好多例子都可以睇到。

19. 咁所以，照計未來一段時間，啲科技公司又會可以自由返啲。不過大陸嘅嘢，就只係你唔知幾時又去返「一放就亂　一亂就收」咁解。

20. 但，而家買阿里巴巴騰訊，應該係不錯嘅。舊年年尾已經咁講，而家都係咁睇。

其實由頭到尾都冇打得好死

21. 況且，你當我半講笑都好，「試下正面啲睇」。可能而家嘅政府都文明啲，又或者呢啲公司真係太有影響力，又或者只係政府驚打得太死反而做成社會不穩。乜都好，總之你見到，由頭到尾都真係冇「打死」呢啲公司。

22. 你睇騰訊阿里，莫講話冇執笠，年年都仲有錢賺。阿里巴巴玩到咁，最盡都「只係」高位跌八成，三百蚊變六十蚊（而家一百）。你睇騰訊嘅，咪七百蚊跌落兩百蚊，你計美國嘅大科技股，其實有啲都係差不多跌幅。亦可以見到，中資科技股啲跌幅，並唔係完全只係因為政府嘅打壓（當然都有一定部份係）

23. 咁但當然，你話「唔知幾時又嚟過」　—　咁就真係冇得保證的。正如「唔知幾時又衰退」「唔知幾時又加息」「唔知幾時又金融風暴」。但難道你乜都唔買？日日沽空？你買得夠早嘅，甚至分段買嘅，都仲係賺到錢嘅。至少我啲騰訊都係在水面的。

王維基HKTV Mall 1137：純利升十幾倍，即係好？

24. 一寫寫到咁長，講埋隻1137。有買的，百份比上輸唔少，好彩銀碼唔大。原來而家得返四個幾。高位見過15蚊，又係跌咗七成幾。咁食得鹹魚抵得渴啦，之前炒嗰時個個如痴如醉，同佢講估值鬧返你轉頭添。

25. 不過值得留意嘅係，1137低位係4蚊，而家5蚊都未夠。你見同例如Facebook Nvidia甚至騰訊之類跌七八成但低位彈返一個開，又好唔同。1137真係冇乜點彈過。原因？因為真係冇乜錢賺。之前盈利都冇乜，係比較危險嘅。

好多科技股高位都跌七八成，但1137近乎冇彈過！點解？

26. 不過最新業績，就見到好啲了。我呢度可能都只係快講，可能過兩日詳細講。但個Excel已入好

27. 份嘢在呢度。你睇媒體報嘅，會見到話純利升13倍。但稍為資深啲嘅讀者，都知呢樣嘢本身冇意思，你舊年一個唔該賺得幾萬純利嘅（可以的），按年升幾萬倍都得添。

28. 所以留意另一樣嘢，公司今年嘅純利，已經係「轉型」做網購之後嘅新高。雖然，其實都只係第三年賺錢。2020年（疫情下）賺1.8億，2021年上半年好好下半年蝕錢，全年先賺千幾萬。咁2022年全年賺2.1億，還不錯。

29. （然後你見到一樣嘢：盈利新高，但股價得返高位三份一都冇。亦真係見到幾個基本原則：估值，同埋炒預期。不過「長遠」嚟講，股價都係會跟返盈利）

我覺得業績麻麻地

30. 然後再細睇下，業績得唔得？其實有啲難睇，但粗略咁講，我覺得麻麻地。

31. 最簡單嘅方法，你睇下最近四次半年咁。舊年下半年，收入同上半年比，已經冇乜增長。毛利更加係倒退（雖然好過2021年嗰兩個半年）。你睇純利，亦見到舊年下半年係差過上半年嘅，甚至不及2021年上半年

32. 但當然，影響純利可以有好多嘢。咁公平少少，睇返公司自己講嘅「經調整後的扣除利息、稅項、折舊及攤銷前盈利」。乜嚟？你當係adjusted EBITDA，「核心盈利」咁話。好啦，呢個數，舊年全年係3.2億，但上半年已經佔咗2億，即係舊年下半年只係1.2億　—　而2021年上半年都講緊1.4億。

今年個GMV目標，好保守喎

33. 仲有可以留意下公司嘅目標，今年GMV目標增長，只係設定在6-11%，都係近年最低，2021年雖然有2020年嘅高基數，但都仲有10%增長。市場係開始「成熟」同「飽和」嘅。

34. 我同意公司所講，唔會話因為疫情過去，就對網購造成好大打擊。的確習慣係唔會點返轉頭的。問題係，仲有幾多增長空間，或者點加價？而同時間，唔好忘記難請人，啲倉呀送貨呀司機呀，人工成本相信都會升得幾快。

難請人，而啲客又移咗民。

35. 而掉轉頭，人口收縮（啲友移咗民嘛），對公司都係一個打擊　—　你移咗民去英國都仲會睇Patreon，照睇香港嘅報紙，但1137嘅業務，係十分「在地」嘅。

不過，估值就OK的

36. 聽落好似好悲？但，估值就真係合理。而家44億市值，一年2億純利，廿倍市盈率左右。以一家細公司嚟講，點都唔算太過份，「賣盤都唔止呢個價」。

37. 不過你見到，唔少公司都好似係咁（亦同加息有關）。Neflix，Tesla，Amazon，Zoom—冇錢賺嗰時，反而升得最勁，估值貴到過份。但到有錢賺時，股價就大跌，然後就反映返個「合理」嘅價值。講到尾，就係唔係冇增長，但啲估值過晒龍。而真係好難事前睇得到的。