聯儲局話加多次息，今次唔會減。但有冇人信？市場估七月就減息。另外，睇遠少少，美匯見頂，債息見頂，衰退使乜驚？德意志銀行，未必有想像中咁危險。季季賺錢，存款又冇流失。主要只係因為CDS Spread大升。咁又係咩回事? (Patreon)

聯儲局話加多次息，今次唔會減。但有冇人信？

主流暫時估五月唔會加息

然後有人估六月減息

七月直頭大部份人估減息

即係，市場預期，同官方講法好唔同。當佢死嘅。驚驚

其實，睇遠少少嘅，債息點都見頂啦啩

德意志銀行，又未必有想像中咁危險嘅

SVB就急病，瑞信就長期病，德銀就大病初癒

SVB因為擠提，瑞信就長期蝕錢，兩樣嘢德銀都冇出現

其實點解驚？因為CDS升就驚，因為股價跌就驚。有啲本末倒置

CDS有人話係「買保險」，但有啲唔同

德銀贖返自己嘅次級債，明明好消息，點解仲跌？

你爭人100萬，張借據街度只係賣50萬，你贖到當然會贖

你睇德銀嘅股價，完全同舊年瑞信就好唔同嘅

另外，德銀最近四季都賺錢，存款亦冇乜點走嘅

1. 昨日（星期日）唔得閒寫，今日整返篇長啲嘅。好可能星期二三就冇文了。實情呢排好似差不多日日都有文。

聯儲局話加多次息，今次唔會減。但有冇人信？

2. 上篇講完聯儲局議息，局方基本上話你知今年會加多一次息就收工，然後主席都出嚟講今年唔會減息。但，市場信唔信？似乎唔係幾信。又或者問，真係加嘅，咁嗰次幾時加？唔知

主流暫時估五月唔會加息

3. 照舊，睇CME Fed watch． 首先你可以睇下一次（五月），星期五時近乎冇人估會再加息！而家估加嘅期望高返少少，但都仲係少數人。唔多唔少，當然同近來嘅銀行危機有關。

然後有人估六月減息

4. 然後你可以睇下六月，仲搞笑。已經有人賭到時聯邦基金利率水平，仲低過而家（4.75-5），雖然只係少數人。亦即係話，市場暫時主流估五月唔加之餘，仲有少數人估六月要減息。

七月直頭大部份人估減息

5. 至於去到七月嗰次，九成幾人估個聯邦基金利率低過而家嘅水平（我個圖係星期六嘅，見到最新跌返啲，但都仲係七成幾人咁估）。

6. 諗落，都幾驚。唔係驚在減息，而係同聯儲局嘅講法好唔同。

7. 睇多次上面講五六七月嘅嘢，咁，即係幾時加息？冇噃。「仲有得加息」，完全唔係主流意見。

8. 另一方面，主席講明，今年唔會減息嘛。但市場相當大部份人，覺得去到七月就會減。

即係，市場預期，同官方講法好唔同。當佢死嘅。驚驚

9. 見到冇？市場嘅預期，同官方嘅講法，都爭幾遠。呢啲一般並唔係太好嘅現象。睇文耐嘅都知，一係聯儲局「屈服」（你可以話剛剛嗰次只加0.25已經算係，但亦可以話因為有銀行爆咗煲），一係就出嚟講嘢引導返個期望。不過，主席剛剛先講完「今年加多次，唔會減」，但市場話咁快就對著幹，都真係少見。

10. 但，正面啲諗，可能未使主席出嚟講嘢，市場期望都會慢慢轉嘅。我上面講嗰堆嘢（市場估唔會加息，七月掉頭減），見到星期一時段個市場期望開始轉返，稍為接近返聯儲局劇本嘅（雖然仲係爭唔少）

11. 咁而唔多唔少，應該因為SVB死完，瑞信死埋，但都未見真係釀出咩大件事。而仲有，原本以為「下一個受害者」嘅德意志銀行，似乎情況唔係咁差。呢篇文最尾會講德意志銀行

其實，睇遠少少嘅，債息點都見頂啦啩

12. 不過，一大堆銀行，又死又唔死，沒完沒了（但市又唔跌喎）。仲有聯儲局呢啲，又加息又唔加息，其實你都睇到頭暈。

13. 但，真係未必有所謂的。呢幾日嘅文都成日講，「睇遠啲」。真係無論如何，加息點都係去到最後一次（除非之後啲CPI數字太差），減息就未必有市場預期咁快。

14. 但，好多人就係陷入呢種迷思，以為要「等減息」，股市「先會升」。有啲仲煩，減埋息都仲「唔信」（其實邊個care你信唔信？），係都要「確認」乜乜（例如「確認」壞消息過晒）。

15. 長期讀者當然知道核心在邊：炒預期！或者話，資產價格一定行先。好簡單嘅例子，美匯指數，舊年9月已經見頂，之後美國一路加息，美匯指數都冇再破到位，並唔係有啲人以為嘅「加一次息就彈高啲，大力啲加就大力啲彈」

16. 明呢個原理嘅，你睇10年債息，落到去3.3 3.4咁水平。未必好快落，但正路都係睇落。呢啲絶對係好消息，有利估值

17. 固然，懷疑嘅會覺得，「係擔心衰退呀」「擔心銀行危機呀」。係，某程度上係！但，總有衰退的，未見過咩？股市會唔會跌多浸？可能架。但到時如果真係「驚衰退」或「真衰退」，好可能股市再跌返兩三成（好出奇咩？），債息又再跌。

18. 到時，股票就變得好吸引了！

19. 問題係，冇人話到你知，跌到幾時先「確認見底」（史上最大廢話之一），亦冇可能等到「衰退結束」先買。

20. 唔信？你參考下2020年3月嘅經驗。你等到「疫情過去」，「復常」（外國咋下，你講香港更加蚊瞓），就肯定係摸頂。

21. 雖然呢，正路地，今次呢個過程唔會嚟得咁急，即係唔會見到好似2020年3月咁，咁短期時股市跌咁多債息又跌咁多。

德意志銀行，又未必有想像中咁危險嘅

22. 最後講講德意志銀行，一路叫大家唔好買。不過睇真啲，情況好似唔係十分差的。雖然，我都係覺得唔好買。但個睇法冇之前咁負面。

23. 睇睇德銀個情況，個「恐慌」何來？或者話，點解SVB瑞信香完後，大家就驚佢？佢又唔係啲地區銀行。

SVB就急病，瑞信就長期病，德銀就大病初癒

24. 答案好可能因為，同啲意大利銀行一樣，往績唔係幾好。以前我比喻話瑞信長期病，SVB急病，咁德銀就係大病初癒，啲人驚佢會「翻發」，或者仲有咩暗病。至於德銀之前咩病？寫瑞信AT1時咪寫過，德銀早幾年爆過啲CoCo Bond危機（所以叫你平時睇文，呢個世界嘅嘢係環環相扣，唔好因為「我冇興趣」「我冇買」就唔睇，個個都只係有興趣賺錢，但會唔會咁簡單？）

25. 事實上對德銀嘅擔心，同SVB同瑞信又係有唔同的。所以唔好成日懶人包，以為次次一樣，都真係各有唔同病況。

SVB因為擠提，瑞信就長期蝕錢，兩樣嘢德銀都冇出現

26. 之前寫過，SVB主要因為存戶擠提，而瑞信就因為不停蝕錢，存款走（速度冇SVB咁快，但規模有過之而不及）。

27. 但呢兩樣嘢，在德銀身上冇發生嘅

其實點解驚？因為CDS升就驚，因為股價跌就驚。有啲本末倒置

28. 對德銀嘅恐慌，都有啲無辜。點解驚？就係因為股價跌啲人就驚，「梗係有啲嘢」。Wag the dog，倒果為因。

29. 另外，仲有啲CDS Spread急升。CDS嚟講，credit default swap．出面多數人用人話講，就係「買保險」，間嘢死咗（違約）你就有得派彩咁。

CDS有人話係「買保險」，但有啲唔同

30. 不過，魔鬼幾時在細節。首先，CDS市場相當唔透明，交易量少，易「操控」，有時啲有心人可以夾高啲CDS，掉轉頭令市場驚間嘢有事，然後就預言自我實現，冇事變有事。所以歐債危機時，歐洲政府一度係想禁咗呢啲嘢佢。因為你一路夾高啲CDS一路沽啲國債，啲國家好易跌入惡性循環　—　財政差，大家驚，CDS升，舉債成本再高，財政會仲差，然後返返第一步。

31. 仲有，「保險」嘅比喻，有一個唔同嘅地方。大家應該知，你不能亂咁幫人買保險（然後做埋受害人），不能夠你見埃汾食日打邊爐估佢短命種，咁就去買保險，埃汾死咗你有賠。因為當中涉及太多倫理道德嘅問題（例如我同你食飯你會不停夾肥肉畀我之類）。但在CDS，冇喎，冇呢回事，你可以買人仆街然後收錢。呢個一路都係有爭議嘅。

德銀贖返自己嘅次級債，明明好消息，點解仲跌？

32. 講遠咗，講返德銀嘅情況，今次大跌，其中一個「觸發點」，令人啼笑皆非。就係因為德銀回購咗自己嘅次級債！

33. 拿，講AT1嗰時有講次級債架下！叫咗你平時要聽書，唔好又嚟叫我寫篇次級債。次級債，咪就係賠錢後過高級債嘅東西。但呢啲次級債係純債，唔係Coco唔係AT1，唔會變做股票。

34. 至於贖返次級債呢樣嘢，好多銀行都試過。往往係出面市場情況差，隻債跌，而銀行自己又有實力贖返，就會咁做。

你爭人100萬，張借據街度只係賣50萬，你贖到當然會贖

35. 你諗下成件事，市場嘅擔心根本唔make sense。德銀見自己隻次級債跌，回購返佢，即係主動還埋錢畀你，擺明就係實力嘅表現。換一種講法，你爭人100萬，但出面市場，張「憑票可以追100萬」嘅借據只係值50萬，因為人人睇死你好快破產—　咁但原來你有錢，你梗係贖咗佢。

36. 但，你可以諗下，市場啲「解釋」，係亂嚟的。見到跌，就好消息都當壞消息。「梗係隻嘢有啲問題佢先回購返啦」，我真係見有人咁講，佢應該當咗好似食品公司回收可可米咁。

你睇德銀嘅股價，完全同舊年瑞信就好唔同嘅

37. 好啦，再認真啲睇。首先睇股價。德銀嘅情況，唔係咁差。冇錯係高位跌咗三成，但大把嘢高位都跌三四成。同早幾年嘅插水，冇得比。又或者，佢嘅股價走法，同瑞信之前一兩年，或者SVB爆煲前，都係冇得比。

另外，德銀最近四季都賺錢，存款亦冇乜點走嘅

38. 另外，睇存款，見德銀呢幾年嘅存款，年年都升。呢幾季都冇乜大減，都係上上落落，就肯定唔係瑞信或SVB嗰啲情況。

39. 當然仲有，你睇德銀嘅盈利，自從2019年大蝕後，近幾年都有錢賺。最近四季都係有錢賺嘅

40. 當然冇得保證，人人驚，人人擠提，同業全部唔借錢畀佢，再強嘅銀行都好易死。但暫時睇落嚟，德銀嘅情況，又會比瑞信或SVB好好多

41. 但當然，呢個唔代表股價唔會跌，亦唔代表你應該飛入去買嘅。記住，銀行唔會死係一回事，你賺到錢又一回事，你應唔應該買又係再另一回事。