SVB執笠兩星期，瑞信頭七。港股美股歐股日股都升。佛系投資，莊子哲學。香港冇跟加prime ，兼講樓市。聯儲局會唔會停一陣又再加？ (Patreon)

SVB執笠兩星期，瑞信頭七，而港股美股當然係升嘅

固然呢刻你可以話因為估停加息。但，咁最初又做乜咁驚？

佛系投資，莊子故事

一般人應該減少交易，而唔係增加

唔係打金融工嘅，真係唔使咁貼市

Myth buster：我認為打金融工嘅人，投資回報係低過非金融人

香港冇加prime

既然香港有條件唔跟，即係水頭足。說好的走資呢，可？

不過，可能之後人地唔加香港加呢？

樓市嘅嘢

但，美國會唔會停一陣又再加息？

1. 週末整篇短少少嘅。可能星期日都仲會有一篇，會講德意志銀行。但星期一二就可能冇了。

SVB執笠兩星期，瑞信頭七，而港股美股當然係升嘅

2. 首先可以快講市況。SVB執笠兩個星期，瑞信就剛好「頭七」。估下過去兩星期股市表現點？你估到了，當然係升。美股升，港股亦都升。歐洲日本都升，愛馬士歷史新高添。

3. 同好多人嘅「直覺」好唔同，講咗幾十次，股市唔係咁「直線邏輯」的。

固然呢刻你可以話因為估停加息。但，咁最初又做乜咁驚？

4. 股市不跌反升，唔多唔少都係因為SVB甚至去到瑞信，都未真係做成系統危機。當然仲有，估停加息，甚至減息。呢啲事後解釋，都係有道理嘅。

5. 不過同時間，你以為銀行被救，去買銀行股，就出事。唔好話買瑞信，事實即使好多人問嘅KRE，都係連跌兩個星期，跑輸大市唔少。

佛系投資，莊子故事

6. 在投資上，我係比較「佛系」嘅。又或者，睇莊子嘅故事，好多故事都係講「善泳者溺」，亦即係股市專收叻仔。啲貓跳嚟跳去，咪踩正陷阱。

7. 我唔係咩都唔做，但你見我真係比較「老定」，一動不如一靜，人人好驚時我唔係好驚（但唔係完全唔驚），人人好貪心時我又唔係好貪（但唔會完全唔貪）

8. 當然有啲人對於呢啲「不作為」嘅做法有啲懷疑，絶對明。但呢個我相信亦係人性嘅弱點，人係唔鍾意「不作為」嘅。不過，第啲領域我唔敢講，但不妨撫心自問諗下，在投資上面，做嘅決定，係咪好似錯嘅多，啱嘅少？至少我都應該係咁。

9. 或者再講白啲，又返去核心嘅問題：有幾多人真係可以長期跑贏大市？咁不如買多啲指數ETF，個股就過下癮算。

一般人應該減少交易，而唔係增加

10. 一般我都認為，大家應該減少交易嘅次數，唔係增加。以前仲有一個原因，就係交易成本貴。咁但而家交易成本低咗好多：不過反而令啲人更加心雄咁成日trade，不見得係好事。一個二個小朋友，拎住一百幾廿萬港紙，書又唔讀多啲，個個當自己索羅斯，研究埋啲乜鬼「神級交易員」，浪費時間。

唔係打金融工嘅，真係唔使咁貼市

11. 我認為，若果你唔係打金融工嘅，真係唔使咁貼市。你睇住SVB又死瑞信又死又話雷曼2.0，可能自己嚇自己。放兩個星期假去北韓，上唔到網，返嚟睇返，「個市咪幾好，不過啲銀行股差啲」。

12. 亦都同好多人想像中唔同，我自己都係唔貼市嘅。買股票我固然連市況甚至股價升跌都唔睇。但即使平時寫文都好，我都只係睇印刷版報紙。即時新聞我都睇，但當然長off notification，好多時我係積埋半日甚至一日先睇。至於email啲breaking news，都係差不多。除非真係有好大件事啦（咁自然Whatsapp會有人話我知）

Myth buster：我認為打金融工嘅人，投資回報係低過非金融人

13. 如果打金融工嘅？咁冇計。老細會問你，客會問你。就算佢地唔問你，同事食飯吹煙開口埋口都會討論，避唔到的。所以，做金融工嘅，「記住點都再狠啲爬高啲」，否則不如不做。有機會再寫，但我幾相信，做金融嘅人，投資成績係差過非金融嘅人。所以，除非份糧補返啦，否則冇乜so．

香港冇加prime

14. 順手提埋你，香港嘅銀行，再一次係冇跟加最優惠利率（Prime，P）嘅。關於香港銀行同業拆息（Hibor，H），P，同美金拆息，美國聯邦基金利率，同埋美國債息（全部唔同嘅嘢！）點互動，舊文寫過，不再重覆，自己搵Index

15. 但可以討論幾樣嘢。首先，嗰啲同你講「香港行聯匯「所以」美國加息香港要跟」嘅KOL，明顯係識少少扮代表。完全唔識分唔同嘅息。

既然香港有條件唔跟，即係水頭足。說好的走資呢，可？

16. 另外，聯邦基金利率升後，香港銀行可唔可以選擇「唔跟」，唔多唔少睇一樣嘢：就係資金緊唔緊，畢竟利息就係「price of money」。咁由香港銀行幾次都可以唔跟美國，咁請問聲，到底啲傻仔講嘅「銀行資金好緊」，係咪事實？所謂「走資」，走的是乜資？（不過，唔加，就真係有機會引致啲資金外流嘅，到時咪又7.85扯返高啲拆息）

不過，可能之後人地唔加香港加呢？

17. 第三樣，你會見到「業界」出嚟講，料港加息周期見頂。乜鬼業界？留意唔係銀行，係按揭中介。咁按揭中介當然係想做生意，當然想你買樓。本身佢講嘅嘢未必錯，但以前講過，其實打工嘅人，就根本冇得講真話。所以啲乜乜「專家」嘅分析，好多我都唔會睇。

18. 再之後，美國就應該加多一次息。咁香港P又係咪頂多加多一次？又唔係喎！兩樣野唔係完全一一對應的。人地加你可以唔跟，相反地，人地唔加可能你之後亦會追加。呢啲冇乜咁特別，但真係唔好以為「一定冇得再加」（雖然我一向覺得，加多兩三厘息就話供唔到樓嘅人，最初買樓就係個錯誤）

樓市嘅嘢

19. 最後，成日有人叫我講樓市，我覺得真係冇乜好講，好似講咗兩三年都係嗰啲立場。咁但，你話「驚加息樓價跌」嘅，咁你可以驚少樣嘢。但可能你又變咗「驚衰退」（同之前講股票一樣）。

20. 仲有，我從來都唔認為香港樓價升跌同利息水平有好大關係。講到尾，兩樣嘢，亦即係同一樣嘢。第一，就係人口流動，咁你見呢幾年香港人就賣樓移民，大陸人就冇落嚟，樓價當然跌。之後會點呢？就你自己判斷下。第二，當然係政府政策。咁但，政府政策，都係因為人口流動嘅嘢推動啫。之前成堆大陸人嚟買樓，香港人又買幾層，咪出啲唔同嘅辣招。

但，美國會唔會停一陣又再加息？

21. 早兩日篇文，引咗自己嘅明報專欄（今日Attach多次），叫你「睇遠啲」。我始終相信一樣嘢：停加息還會遠嗎？減可能未有耐（通脹仲高），但停應該好快（好快係指半年，唔係下個月）。

22. 會唔會停一陣再加？真係好問題，史上好似冇乜見過，咁但今次呢個問題，你真係可以講「過去不代表未來」。我只會答你，「應該唔會啩」，但我絶對唔會抹殺呢個可能性。你話「可能停一陣再加喎」，我都唔會覺得你杞人憂天。

23. 詳情遲下講，但的確，聯儲局好似冇乜試過在通脹都仲相當高嘅水平下，又同時面對金融危機。實在好考功夫，所以真係不能抹殺停一陣再加　—　雖然呢個照計點都唔係「好可能出現」嘅劇本。正路當然係停一陣，到衰退時減。

24. 事實上，最新局勢發展，啲友已經甚至估下一次（5月）根本唔會加息，仲睇死6月（再下次）好大機會減息，7月（再再下次）必定減！

25. 呢個可以留返聽日再講。