加多次息就收工！下年減息！叫咗唔好買細銀行股。一路加息美金一路跌，債息都回。騰訊業績差照升，愛馬士歷史新高。仲有乜股好買？ (Patreon)

今次點陣點好易睇，就係加一次收工

差不多講到明：下年減息

唔使驚加息啦，但又話驚衰退

不過美股係照跌嘅，點解？

咁剩低嗰一次加息，幾時加？

大師冇點你：叫咗你唔好買啲細銀行啦

日升日跌，但彈得少跌得多，幾套動作後，必輸三四成

跌咗落嚟就買？咁唔通件XX甩咗拖你又飛埋去咩

十分重要：美匯指數，跌到6星期低位。其實呢半年一路加息一跌跌

咁一路加息債息一路跌，就唔奇怪啦

騰訊業績差照升，愛馬士破頂。　仲有乜股好買？

1. 好啦，人在越南，但文都仲係會寫（不過星期六日就實冇了）。何況係相當重要嘅聯儲局會議？今次仲要係一年四季嘅四次大會之一，有埋經濟預測同點陣點圖。

今次點陣點好易睇，就係加一次收工

2. 開心嘅係，今次係出奇地易解易睇。所以分享下。照舊，有興趣睇成份嘢嘅，畀原文你。但你睇我呢個圖都已經好夠。最重要，睇同12月嗰時佢地估嘅嘢相比。咁經濟增長預測調低咗呀，通脹預測調高咗少少呀，呢啲睇圖都明，不一一細講

3. 重點當然係睇利率水平。難怪市場嘅演繹十分簡單一致，就係「加多一次息收工」。

4. 因為你連點陣點都唔使睇，睇上面個表，都見到。介紹返，剛剛呢次加咗0.25厘，加完嘅聯邦基金利率（Fed Fund Rate）係4.75-5，用聯儲局「一個數字」嘅計法，即係4.875。好啦，2023年底嘅聯邦基金利率水平，係5.1厘。話埋你知即係5-5.25—即係加多一次，收工。

5. （當然你可以拗，可能係加兩次然後減一次，或者加十次減九次，隨你）

差不多講到明：下年減息

6. 仲有，可以望下2024年，明顯會減息了。雖然唔知年尾定年頭。但，炒得嚟差不多。話說回頭，鮑威爾有講明今年唔打算減息（所以上面估加十次減九次嘅可以死心）

7. 所以？正如之前講，點講都係加息已經去到下半場—而家基本上去到補時。加多一次收工。當然，如果通脹失控嘅，可以補上補嘅，「加時射埋十二碼都得」

唔使驚加息啦，但又話驚衰退

8. 所以？之前驚加息嘅，照計唔使再驚。但當然你又會話，唔係喎，而家驚衰退，驚銀行危機。咁就幫你唔到，加息又驚，唔加又驚。而其實你會驚時先最好買，你都唔驚覺得唔買正執輸時，多數出事，例如2021年中

不過美股係照跌嘅，點解？

9. 不過，你見美股係跌嘅。而且仲要係議息結果後由跌轉升，但尾段再大跌。啲友就會話「因為」耶倫話唔會擴大存款保障，引發銀行股跌喎，隨你。但我早兩日都寫咗，個存款保障再擴大，照計唔係好事。

10. 而一日半日嘅走勢，唔使去演繹。去到港股時段咪又照升，暫時（星期四晚）美股都反彈返丫。

咁剩低嗰一次加息，幾時加？

11. 至於到底剩返嗰次息幾時加？都唔係好知。原本有人估下次（即係 5月頭），但最新CME數字又似乎話你知等一等先，未必5月會。但當然呢啲只係參考，成個幾月嘅事，啲期望要變，兩三日可以大變，大家都見識過。

12. 關鍵當然就係睇住嚟緊啲CPI同就業數字咁咯

大師冇點你：叫咗你唔好買啲細銀行啦

13. 又再講下先，早幾日不停叫你唔好去撈啲細銀行股。拿，話口未完，你見議息當晚，呢啲乜鬼FRB，PACW之類，又再插過。係呀，有時又反彈。但你真係見到，往往日升日跌，但跌多多，彈少少，幾個動作後，你已經輸咗三四成起碼。

14. 順手睇埋，買ETF係咪好啲？咁見KRE，都一樣同以上嘅情況差不多（因為入面就係呢啲嘢），當然程度係冇咁嚴重嘅。

日升日跌，但彈得少跌得多，幾套動作後，必輸三四成

15. 叫咗你唔好買架啦。實情，咁多股票買，點解要買呢啲公司？你話有啲公司你一路想買，嫌貴，見到跌咗落嚟而好似有啲無辜，覺得唔係基本因素差咗（但好難判斷！）只係估值或情緒，咁你見跌去買，OK（諗起有讀者一路都想買麥當勞，等極都唔跌）

16. 但老細，唔好玩啦。邊位之前聽過呢堆銀行？我就冇乜聽過啦。更何況，呢啲肯定唔係「無辜」。所以想飛入去嗰啲，心態動機同「一路想買卒之等到跌」而去買嘅，就唔同的

跌咗落嚟就買？咁唔通件XX甩咗拖你又飛埋去咩

17. 講到尾，再問一次，你係想財富增值，定係look smart先？

18. 一隻股票跌咗好多落嚟，似乎唔應該係你買佢嘅主要原因（可以係次要）．年中咁多股票大跌，你隻隻仆去買？

19. 個不倫不類嘅比喻，就係好似追女仔追男仔咁　—　你原本鍾意人嘅，人地甩咗拖，咁你飛埋去當然合理　—　但都要你原本鍾意人先得架！唔通隔離件卡啦蘇甩咗拖，你又飛埋去咩，咁咪好唔得閒！

20. 順手又講埋，頭先同你講，仲有好多好股票，就呢度講少少。好耐冇講冧把。

十分重要：美匯指數，跌到6星期低位。其實呢半年一路加息一跌跌

21. 首先都係講返宏觀。留意留意一樣十分十分重要嘅嘢：美匯指數，跌到去6個星期低位。好重要好重要。真係唔該你諗清楚。呢個好好嘅例子，畀你睇到資產價格係點行嘅。

22. 明嘅，你唔應該感動意外。唔會奇怪「點解美國加完息美金仲會跌」「點解之後仲會加息都仲跌？」　—　實情，一路加一路跌添。咪寫過，美匯指數一路都冇上返舊年9月嘅高位，十分有可能係呢個周期嘅頂。但你望下9月之後加咗幾多次息？

23. 有啲人，會以為加一次息，美金就升多啲。加50再升多啲。錯！唔係咁運作的。係預期，資產價格一定行先。

24. 順手回應返，之前有個讀者，問開我講買外國股地理分散，當然係老問題嘅「匯率風險」。但佢提出話「而家美金強勢」—　其實你睇上面張圖，點會覺得美金強勢？可能只係早排望住3月頭嗰下　—　所以點都要睇長少少。

咁一路加息債息一路跌，就唔奇怪啦

25. 明白咗呢樣嘢，咁同時你見到美國10年債息，落返去3.5厘樓下，更加唔會意外。

26. 而呢兩者加埋，當然係利好股市的。

騰訊業績差照升，愛馬士破頂。　仲有乜股好買？

27. 唔信？你睇愛馬士？又新高啦。美金跌歐元反彈嘛。但當然呢個唔係唯一原因，愛馬士巴黎同ADR都一齊新高的。匯率嘅嘢，一般都係配角。

28. 另一方面，騰訊700業績應該係唔得嘅，但照升8%。點解？唔多唔少都係美金跌，人民幣強，然後再加埋債息跌利好科技股。

29. 事實上，使乜搞嗰啲騎呢銀行股？你睇瑞士嘅例子，都知政府可以打橫嚟。

30. 再講一次，Nvidia，Facebook，Tesla，騰訊之類，舊年秋天低位已經彈咗一個開！幾個月嘅事。而我唔係講緊啲細公司，呢幾間係全世界頭十幾大嘅公司（但嗰時個個話二十大外資撤離嘛美國又通脹失控嘛）

31. 所以而家，如果有錢我會買乜？我會買QQQ，其實一路都買緊。唔好買TQQQ，解過N次，唔好咁爛賭，唔好做槓杆，真係要槓杆寧願借孖展都好過TQQQ

32. 而啲人嘅想法好搞笑，佢地真係問：「如果係睇好嘅，做乜唔大啲？」—你買馬買波都係睇好佢先買喎，「如果好，點解唔買大啲？」。點解只係買TQQQ？不如借財仔碌爆卡去買丫 —　因為，五個字：如果你錯呢？

33. 嫌太過行貨嘅，咁睇個股啦。Nvidia係勁但升晒，Facebook之前殘到笑而家就冇咁殘（但我覺得都搏得過）。咁不如還原基本步，Microsoft Apple Google啦，香港嘅，咪阿里巴巴。