最好唔好買銀行。KRE買唔買得過？存款保障加大會點？別人恐懼時我貪婪點解唔適用於銀行股？聯儲局議息前瞻（兩句） (Patreon)

唔好買銀行，「除咗呢兩間」

KRE買唔買得過？你話呢？

迷思：銀行唔死，有政府救，你就應該買？「你睇瑞信？」

有人話要美國調高存款保障，甚至無上限添。會有乜後果？

香港人咁Q有錢都只保50萬港紙，美國保25萬美金仲話唔夠？

點解要有「專業投資者」制度？你以為係「有錢就可以買SPAC？」

本身買匯豐中銀UBS JP Morgan嘅，唔使沽咗佢

「但唔好問我　花旗又點　Barclays又點  Socgen又點　BNP又點」

「別人恐懼時我貪婪」，往往唔適用於銀行股。點解？

你買股票，係想改善生活，定想look smart？

標指今年升5%，納指升14%，恒指跌3% —　而你輸錢？你話有乜問題？

而你發現，升市時跑贏都唔係太難，但跌市時跑贏極難

隻KRE，低位先彈7%。Something is wrong

聯儲局議息前瞻兩句

唔好買銀行，「除咗呢兩間」

1. 長氣再提一次，唔好買銀行股。冒住阻人發達嘅危險我都咁講。我亦唔會買，真係要買你不如買坡國銀行，OCBC甚至我舊公司DBS。原因？都唔難估。

2. 當然並唔係任何銀行股都不能買，亦冇話叫你沽晒佢，但想見到「好抵」去買，「別人恐懼我貪婪」，「銀行有事政府唔會唔救嘅」，Think again．

3. 畀多次瑞信嘅股價圖你睇。係呀，原則上係救咗間銀行的。但你任何位買，九成九都係輸錢（唔好話我知你2020年3月買一年後沽贏七成，呢啲虛妄我早排先講過）。

4. 邊啲唔買得？「會有問題」嘅銀行，就唔好買。雖然聽落好似有啲廢，事前你點會知？但又係咪完全唔知？自己問心，瑞信呢啲，早早已經知有問題。正如德意志銀行一樣（唔好買）。而你好似冇乜聽過人話匯控有問題，嘈嚟嘈去都係講咩分拆呀搬呀彈弓手呀嗰啲。

5. 再講白啲，近嚟嗰啲咩地區銀行，甚麼FRC PACW WAL，一概唔買。甚至去到德意志，以及啲乜鬼意大利銀行，全部唔買。係，「垃圾都有個價」，但你可以再睇瑞信嘅例子，可以多多錢都唔夠你輸，跌一半再跌一半再跌一半再畀人四折收購。

KRE買唔買得過？你話呢？

6. 有人問，「買銀行ETF得唔得？」。點知你講邊隻ETF？但，如果有隻熱門嘅，KRE，我都係唔會。咁當然好過你去捉個股，至少佢都夠分散（雖然，全部同一個行業）。咁正路，真係冇乜可能隻隻死晒嘅。入面死幾隻，佢都唔會輸死。

迷思：銀行唔死，有政府救，你就應該買？「你睇瑞信？」

7. 問題係，之前都講過，啲嘢唔死，唔等於唔會大跌。長氣都好，睇多次瑞信！

8. 而呢種現象，差不多係銀行獨有嘅。正係因為「救存戶唔救股東」嘅玩法。政府每次都會全不遲疑地wipe out 晒啲股東（AT1嘅情況，啲低級債主都wipe埋—仲要累埋其他銀行）。

有人話要美國調高存款保障，甚至無上限添。會有乜後果？

9. 而家甚至有人話要調高個存款保障上限，甚至好似有人話要無限擔保　—都痴Q線。留意，香港人咁有錢，香港都只係保50萬港紙，而美國已經保25萬美金。

香港人咁Q有錢都只保50萬港紙，美國保25萬美金仲話唔夠？

10. 有機會我會細寫，應該留返我在越南時寫。但最好你再反思下，銀行係甚麼回事，點解要有存款保障，如果無上限又會有乜後果。點解呢啲保障會有上限。冇上限嘅不如政府run算數。

11. 你甚至可以諗埋，點解香港要有PI Professional Investor嘅制度（世界各地都有類似嘅制度）。表面上係「你有800萬先可以買啲古靈精怪嘢」，但唔好咁易畀人昆—實際上嘅意思係：你有800萬政府就話知你死。點解會咁呢，可？特別留意埋，專唔專業，唔係睇你有冇大學學位　係咪CFA，而係睇你有冇錢！

點解要有「專業投資者」制度？你以為係「有錢就可以買SPAC？」

12. 再講一次，多啲諗下世界上嘅事，背後係乜原因！

13. 無上限存款保障會有乜後果？我已經即時諗到。我係啲「大戶」，例如SVB啲創投基金或者初創公司，存款億億聲嘅。你估我會點？銀行一有風吹草動，甚至冇風吹草動都好，我一定上網叫人拎錢走。總之我一定會整到間銀行擠提　—然後我會一早沽空間銀行。近乎冇得輸（好似係？），存款阿公就保晒，沽空嘅利潤我就袋晒。

14. 呢啲就係「救存戶唔救股東」嘅後果，而家你已經見到銀行嘅股價多數都死（其實2008已經試過一次），搞到存款保障無上限嘅，更加永無寧日。好多人真係以為「越保就越安全」，實情可能係，「越保就越唔安全」，因為人係貪婪嘅，人係食腦嘅。

15. （FYI，我之前只係快睇，原來不停叫提高上限嘅，其中一個係Elizabeth Warren—此人就唔係普通政客，相當有份量。我並不對民主黨反感，但此人啲經濟金融立場，真係相當亂嚟的。）

本身買匯豐中銀UBS JP Morgan嘅，唔使沽咗佢

16. 你話月供開渣打匯控中銀恒生嘅（即係我）就唔怕，本身買咗JP Morgan（又係我）甚至瑞銀UBS（之前有諗過買）嘅都唔使而家沽咗佢。但就唔好諗住而家衝入去搏啲擺明出問題嘅銀行。

「但唔好問我　花旗又點　Barclays又點  Socgen又點　BNP又點」

17. 但你就真係唔好問我，「匯豐你OK，咁花旗呢？Barclays呢？美銀呢？Wells Fargo呢？」「德意志唔好，咁法巴呢？Socgen呢？BBVA呢？」—我真係答你唔到，條線在邊。

18. 但都提多你一樣嘢，其實邊啲銀行「有問題」呢，去到呢刻你應該係分到嘅。當然股價唔等於一切，好多都跌，但匯控渣打嗰啲跌，同FRC PACW WAL之類咁瀉，或者意大利銀行嗰啲，明顯係兩回事。

「別人恐懼時我貪婪」，往往唔適用於銀行股。點解？

19. 唔好學一半唔學一半，「別人恐懼時我貪婪」，都請你不忘分散，而呢句嘢往往係不適用於銀行股嘅（係咪冇人話過你知呢！）。點解？講咗啦，因為政府會使橫手令你輸錢！好少行業政府會咁樣干預。正係一街都講嘅，「救存戶唔救股東」。

20. 「畢菲特金融海嘯都買喎」　—但佢收人10厘息拎優先股喎。唔好睇一半唔睇一半，人地唔係一注獨贏上富途襟掣嘛。

你買股票，係想改善生活，定想look smart？

21. 況且，都仲有講完又講嘅一個問題。到底你買股票，係想改善生活，定想sounds smart？你買隻FRC，你買得幾多錢？唔好只係睇回報，注碼都重要。但你買得大，你又肯定驚。所以呢啲東西，頂多嚟過下手癮，唔會亦唔應該影響大局。好似我個「垃圾股倉」咁（仲有冇人記得呢樣嘢？查Index可以睇返個故事，「亦睇到當時市況幾咁貪婪」），我買三萬蚊，輸晒都冇感覺。

22. 同你網上見到嘅氣氛好唔同，市場，真係冇乜點驚。證據？上星期，美股係升嘅！（冇呃你）。唔止，連港股都係升嘅！係咪同你想像中好唔同呢。證明你「以為」嘅氣氛係一回事，現實又係另一回事。

標指今年升5%，納指升14%，恒指跌3% —　而你輸錢？你話有乜問題？

23. 唔止，年初至今，標普指數係升5%嘅！恒指跌些少，但納指升咗14%。即係點？即係，拉勻晒，你今年好應該仲係贏錢。你輸錢嘅，又真係檢討下，到底係咪應該買咁多個股。亦檢討下你啲眼光係咪真係有你想像中咁好。同埋到底，個市有幾災難咁大把？

24. 煩氣講多次，個股當然過癮，我都買，但適可而止。零食同正餐咁，唔好本未倒置。

而你發現，升市時跑贏都唔係太難，但跌市時跑贏極難

25. 仲有一樣嘢好似冇講過：升市時，你大可以買多啲個股，反正升市時你夠搏，買個股跑贏大市並不太難（難在跌市時你啲垃圾會跌成點啫）。但掉轉，跌市時，多數買個股都跑輸的。原因亦好簡單：跌市時跑得贏嘅，多數係啲悶到七彩嘅公司，多數人都唔鍾意。叫你買太古匯控中移動，有邊個會理？

26. BTW，你見到上個星期雖然美股升港股升，但上上落落下，啲細銀行都係累跌唔少。即使係KRE都大幅跑輸大市。當然上星期唔等於將來都係，但，年初至今都跌咗兩成幾，真係不見得「分散」幾間就值得買。咁當然總好過你買著間total loss嘅細銀行嘅。

隻KRE，低位先彈7%。Something is wrong

27. 另一個角度睇，所謂「銀行危機暫時受控」，但你見隻KRE，低位彈到高位，先好似7%（我仲係講即市高低位，你計day close應該冇）．我個「感覺」上覺得，真係唔係嗰回事。講到死過翻生先彈7%，「而Facebook Nvidia 舊年10月低位到而家先咗一個開」。覺得唔覺得件事唔係好對路？你走去「搏銀行唔爆煲」，搏到，先得嗰7%回報。（雖然你可以估之後仲有排升，咁就答唔到你）

聯儲局議息前瞻兩句

28. 至於今個星期嘅焦點，當然係聯儲局議息。照計你睇到篇文時就有咗結果。今次仲係一年四次嘅「大會」，會有埋啲經濟數字預測，點陣圖之類，萬眾期待。可惜嘅係，星期四我早機去越南，所以最快都要星期四晚先寫到。可能會在Facebook 快寫幾句

29. 睇返最新嘅CME Fed Watch，眾望所歸加0.25，唔會有意外。「有就買定花生」。但其實即使係早幾日，仲係五五波嗰時，我都覺得加0.25係適當嘅做法，甚至聯儲局講乜我都可以幫你諗埋（到時睇下我中幾多？）。拿，局方已經意識到呢，金融流動性開始收緊，見到有一定壓力，亦都留意到有啲銀行有問題。但相信只係個別事件，未構成系統性風險。咁由於就業仲係強勁，通脹仲係高，所以局方相信繼續加息，都係適合嘅。但如果只係見到金融流動性開始有問題，局方都會兩手準備嘅。

30. 睇下係咪咁講？