瑞信危機驗屍：同SVB比較下異同。又，唔好買銀行股！ (Patreon)

唔！好！買！銀！行！股！（原因之後解）

財報101：比較下瑞信同SVB嘅異同（有埋個Excel）—其實異多於同

骨牌效應？我唔同認同。甚至common cause我都唔多認同

瑞信係長期病，SVB係急症

舊年冇人聽過SVB，但好多人都知瑞信財困，Debit Suisse嘛

SVB就季季賺錢（直到剛剛），瑞信就長蝕

瑞信嘅資產，兩年間8000億縮到落5300億。SVB冇咁嘅現象

瑞信差不多不季走咗四成存款！SVB全年都只係十幾巴仙

瑞信嘅情況，唔完全因為「存款走所以要沽債券」

最後點收科？都係賣畀瑞銀。但係咪就一天光晒？就未必了

瑞信得救，但股價再跌一半。「銀行有事政府會救所以我去買銀行股」下話？

呢篇文老幼咸宜，人畜無害，好基本嘅101財務報表分析。但當然只係事後驗屍，不過都夠你拎嚟學嘢。

唔！好！買！銀！行！股！（原因之後解）

1. 你有幾可見我叫人唔好買股票？但，個題好清楚啦？

2. 即使你冇心機睇都好。提定你，唔好買銀行股！月供嘅OK，已經買咗嘅亦唔使沽（返多啲教會拜多啲神希望唔好爆到你嗰間吧）。但唔好自作聰明去撈啲銀行股。聽日我會詳細解，但唔好自作聰明以為政府會救銀行「所以」我就去買銀行股。

3. 亦唔好自作聰明咁覺得，「咁埃汾即係覺得銀行會爆煲所以叫我唔好買」—係兩回事嚟的！手術成功，病人一樣可以死亡。銀行得救，股東一樣可以輸死。你睇瑞信咪知！

4. 再唔明嘅，我下篇會詳細講。但留意，我個人嘅特色，係寫嘢會寫到好白，畫出盲腸（唔止係金融）。我唔多興玩「等讀者自己get到」—因為啲人就係會get錯。

5. 離題一講，我呢啲畫出盲腸嘅手法，當然係唔太好嘅story telling，你見我寫影評成日都講「show，don’t tell」呢個法則—但，咪叫咗你唔好自作聰明。我呢度嘅文唔係電影小說創作，我寫文畀你唔係談情調節，我嘅文係「說明文」，一定有咁清楚講咁清楚，唔會「你自己get到」—因為啲用家真係會整到部機爆炸，或者伸隻手指入電掣的。

財報101：比較下瑞信同SVB嘅異同（有埋個Excel）

6. 都好似冇正式講過瑞信，今篇可以正經講下。或者拎嚟同新鮮滾熱辣嘅SVB比較下。個Excel十分簡單，但你可以拎嚟比較埋其他銀行

7. 我唔想太廢咁講「每次危機都唔同」，或者太過嘩眾取寵咁講「完全冇可比性」，但的確唔係好同，異多於同

骨牌效應？我唔同認同。甚至common cause我都唔多認同

8. 你話係骨牌效應，我唔多認同。甚至話係common cause（美國急加息，存戶擠提），我都覺得唔係好一樣。不過你可以話，係恐慌情緒蔓延，原本擔心嘅嘢，更加擔心。

瑞信係長期病，SVB係急症

9. 瑞信嘅問題，似乎係更加結構性嘅，長期病。SVB就比較似係急症，若果唔係成班友急急提款，分分鐘唔使死（正如之前嘅文都寫過，SVB之前季季都仲賺錢，160億book，做乜忽然今年3月頭會出事？就只係因為極速擠提）（而同時間Signature Bank仲好笑，好似話被接管時仲係正數book的，個CEO係咁鬧政府，話Signature Bank係史上第一間正數book而「被破產」嘅銀行）

舊年冇人聽過SVB，但好多人都知瑞信財困，Debit Suisse嘛

10. 由新聞層面，我地都會見到。雖然我寫過，SVB唔係今年先開始「有問題」。但問題都有輕同重，今年3月之前，照計多數人都冇乜點聽過SVB，遑論覺得有間大大地嘅美國銀行會爆煲。但瑞信嘅問題，舊年已經不停見報。Debit Suisse呢個名，舊年已經有師奶同我講。雖然，同樣地冇人覺得佢會忽然倒下。

11. 當然，你可以話因為瑞信大好多（其實計市值都唔係爭好多），或者至少知名度高好多，早早引起關注合理。

睇個股價圖，咪一清二楚

12. 但再睇下股價，呢個圖十分好。疫情前嘅2018年，到而家。疫情下當然乜都跌。但你睇下打後，SVB就得益於大放水以及之後嘅tech boom，生意盈利股價都大升，到2022年先開始急回（正係加息！）。但瑞信呢？你見，根本冇返過2018年嘅位，之後一浪低於一浪。明顯係長期病。

13. 齋睇瑞信股價，方便起見就睇每年3月。2018年15蚊，2019年10蚊，2020年3月正值疫情好波動費事計。但2021年都差不多水平，之後就一路跌跌跌了。

14. 再遠少少比嘅，即使唔好計金融海嘯前係80蚊，即使你計2009年都見過50蚊。但，今年年頭，都只係3蚊有找。可以見到，問題真係積咗好耐。

15. 然後再多詳細啲啲數字，又係可以睇Yahoo Finance，SVB嘅數我都在嗰度搵（你亦可以搵MacroTrends，歷史再長啲，但似乎唔會好仔細咁話你知到底Asset 或Liabilities 入面係乜，所以各有各好，而你見我真係搵最好嘅嘢畀你）

16. 留意下面瑞信嘅數字應該係瑞士法郎，SVB係美金，是但了，反正不影響大局，除非你想我不停咁每個數都要重覆講兩次。

SVB就季季賺錢（直到剛剛），瑞信就長蝕

17. 第一樣嘢，點解瑞信股價咁唔掂？或者點解之前已經一路上頭條？因為輸錢！2020年佢都仲賺錢，但去到2021年已經輸錢（都幾失敗），蝕17億。去到2022年更加係輸夠73億。事實上，2022年嗰四季，全部都係輸錢。

18. 相比之下，SVB情況好得多。雖然個個講乜鬼「聯儲局加息搞到債價跌搞到銀行輸錢」。呢個唔係錯，但十分表面。咪講過咯，SVB之前年年都賺錢，甚至之前四季每一季都賺錢。點知3月忽然就執咗（都有啲「羅素雞」嘅影子，唔知係乜嘅，搵舊文）（點避免？以前寫過啦，分散。一間美資銀行死，唔會間間美資銀行都死。間間美資銀行都死，唔會所有美股行業都死。全部美股行業都死，唔會全世界所有股市都死）（你堅持話有咁可能嘅，幫你唔到，多啲返教會吧）

瑞信嘅資產，兩年間8000億縮到落5300億。SVB冇咁嘅現象

19. 然後再睇睇個Balance Sheet，睇睇瑞信，都縮得幾勁。2020年尾有8000億，2021年尾仲有7600億，去到2022年尾得返5300億，見到2022年縮得好多。實情2022年第三季仲有近7000億，就真係舊年第四季開始極速縮。

20. 而你見到，SVB相對地冇乜出現咁嘅情況

21. 普通公司出現咁嘅資產收縮情況，可能有人以為係「去槓杆」，甚至「減債」。但銀行出現呢啲情況，九成都係因為存款流失。陣間我會詳解。會計101，資產＝負債＋股東權益。而除非你供股或配股，或者賺大錢蝕大錢，否則個「股東權益」唔會一季之間擴大或縮細好多。所以資產同負債，往往同脹同縮。留意，銀行嘅「負債」，就係客戶存款。

22. 睇埋個book先，留意瑞信呢幾季一直都維持在450億咁上下，甚至係高過2019年嘅。但，又話輸錢嘅？哦，其實中間有引過新股東的，應該係沙地阿拉伯，好似2022年第四季，15億左右，唔算太多。睇Macrotrends睇股數亦會見到2022年第四季多咗。又學到嘢了。唔好成日嚟問我「點樣睇到乜乜乜」，平時啲文咪會有活學活用嘅例子

23. 同時間你亦見到，大約講緊16倍asset/equity 槓杆左右。咁對其他公司嚟講當然極高，但以銀行嚟講，都係高高地，但唔係痴線地高（當然實際上會睇啲更複雜嘅嘢，例如你啲資產係乜，唔在呢度解）

24. 同時睇下SVB嘅情況，見到就係120億book，2000億資產。都係十幾倍咁。另外，細心嘅留意到，明明之前啲文我寫160億book　—　呢度涉及SVB有啲優先股嘅問題，不詳細解

25. 順帶一提，都話咗，SVB之前季季都賺錢。但見唔見2022年第三季忽然個book 縮咗啲？就係因為啲「AFS unrealized loss」—人話講，即係債息升，債價跌，拎住啲美債大跌價，冇賣都要同你每季計數。雖然唔會影響你賺蝕，但成個數會在你個book消失咗。拿，肯定之前SVB文講過，唔好又話悶啦。

瑞信差不多不季走咗四成存款！SVB全年都只係十幾巴仙

26. 最重要係：存款。

27. 瑞信2021年尾仲有4000億存款，去到2022年第三季都仲有近呢個數，但去到年尾得返2450億。即係，走咗四成！都咪話唔誇張。至於係咪因為要應付啲存款流失，所以瑞信都要沽走啲債券因而輸錢？我都未細睇，但都有啲可能。

28. 但留意返，瑞信作為一間國際大行，拎funding 嘅渠道亦多好多。同業借，發債，發存款證都仲得。

29. 至於SVB呢？22年一一季有2000億存款，第二三季1800億左右，年尾1730億，走咗14%—都幾誇張，但冇瑞信咁誇。不過到3月忽然一日走咗400億，即係四份一存款，就收得工

30. 睇完一大輪數字，即係點？好簡單，兩間銀行嘅情況，真係有啲唔同

瑞信嘅情況，唔完全因為「存款走所以要沽債券」

31. 瑞信嘅問題，唔完全係因為「存款走所以要沽債券」—你見存款未走已經開始蝕錢了。就真係本身都有唔少問題。

32. 而你又見到，瑞信即使走咗成四成存款，居然都仲未見到話告急，就真係去到SVB死埋先開始恐慌情緒蔓延

33. 另一方面睇，存款走，點都係問題，對任何銀行嚟講都係問題。所以瑞信之前先要希望瑞士央行出嚟派定心丸，甚至提供流動性。就係希望啲存款可以止血。甚至之前你見到瑞信出高息吸存款（留意，去到瑞信咁情況都只係畀7厘息—可想而知你嗰啲咩「穩穩陣陣8厘息」，背後有幾大風險）

34. 計計數，以瑞信成450億book，一年蝕幾十億，都未真係好到肉嘅。所以，都係希望穩住啲存款，奈何近期似乎已經失控。

最後點收科？都係賣畀瑞銀。但係咪就一天光晒？就未必了

35. 點收科？我都唔知。之前傳BlackRock買，佢地未澄清我都已經覺得可能性唔大。你好少會見到一間非銀行嘅機構，可以成間買起另一家銀行，你個Balance Sheet點食到咁大槓杆都係一個問題。但當然，之前都估BlackRock好可能只係買佢嘅資產管理業務（即係BlackRock自己嘅同類生意），咁就講得通。無論如何，好快BlackRock就澄清咗冇打算買

36. 而家最後點收科？似乎就係瑞銀（UBS）去買。但其實亦唔係第一次講，不過兩間銀行最初都反對。

37. 點解？先講瑞信方面，唔想賤賣。因為合併得就多數炒人，特別係炒啲高層同舊人，啲股票option可能變晒廢紙。

38. 瑞銀又點解唔想買？當然係驚黑洞。唔好忘記，瑞信投行業務都大，渣住啲資產係乜，都未必咁易知（SVB啲國債MBS相對地可信啲）。

39. 況且，根本連瑞信之前啲數有冇問題都冇人敢包，之前瑞信又遲出業績，核數師都話否定意見。再加上，瑞信都面對唔少官司（遲下解），你買咗就梗係你包埋上身。

40. 不過冇嘢嘅，「都係睇個價」，再垃圾都有個價。呢啲咁嘅刁，當然係瑞士政府撮合，最好就唔好自己上身。但你係瑞銀，個玩法會點？梗係有咁平壓到咁平，然後仲要埋瑞士央行包底，「有乜問題到時你保我」。大約就係咁拉拉扯扯。

41. 最後，當然係講價。側聞最初瑞銀開10億，瑞信死都唔制。介紹返，上星期五，雖然瑞信已經跌咗好多年，但都仲有75億左右。用股價講，即係之前1.86，瑞銀開0.25買。「一折多啲」。瑞信當然唔制

42. 然後當然繼續講價，見過講到20億，最後應該係30億成交。上星期五嘅價，再打個四折。0.76．

瑞信得救，但股價再跌一半。「銀行有事政府會救所以我去買銀行股」下話？

43. 仲會有幾個後續，聽日先再講。但，得救嘅瑞信，股價都係再跌一半。你可以反思下。特別係嗰啲「銀行有事政府實會救」，「所以我去撈銀行股」嘅勇士。

44. 再講一次，「別人恐懼時我貪婪」，唔係咁理解的。如果你學句金句就可以乜都識，我可以執笠啦。亦都所以話，點解明明幾句講完，係都要寫咁長。好多嘢係要浸的，唔好咁懶。你係懶嘅，就唔好自作聰明。