市場根本冇好恐慌，SVB 驗屍報告 (Patreon)

驚港紙爆煲香港銀行出事外匯儲備冇晒—結果美資歐資銀行死先

爆鑊？VIX 30都未到呀。而美股港股上星期齊齊升！

別人恐懼時我貪婪—講就易，實行上嚟五個問題

史上第一次「智能手機年代金融危機」

資訊爆炸，人就更加驚，又更加貪婪　—　照計係機會

唔使跟車咁貼，「試下一個星期後先睇報紙」

SVB驗屍報告

SVB嘅資產「投資比例高　—　六成買美債又有錯？

話Duration長：但唔買長債，又點夠回報？

「大部分資產需持有至到期才能套現」—梗係唔係

左翼又話係侵侵放鬆監管，右翼又話SVB係左膠銀行 —　大家一樣咁廢

SVB CEO 太老實？咁唔通講大話？要坐監喎

1. 講一個唔好笑嘅笑話：之前個個話，驚港紙爆煲，驚香港銀行有問題，驚外匯儲備清零，驚銀行體系結餘冇晒。結果？率先爆煲係美國嘅銀行，然後歐洲一大堆都唔係好掂。再次證明，你網上睇到嘅，多數都係垃圾。好多好多所謂「分析」，全部係自己情感投射。

爆鑊？VIX 30都未到呀。而美股港股上星期齊齊升！

2. 近來Silicon Valley Bank（SVB）爆煲，幾間其他銀行都大跌，甚至連瑞信都傳唔掂，都引起唔少讀者關注。

3. 但你話係咪好驚？當然有啲人加息又驚減息又驚，但我地睇事實。正如早排講過，你睇VIX連30都未到，有乜驚？唔好話同雷曼爆煲或疫情爆發時比，就連舊年10月VIX都見過30，而你肯定已經唔記得發生過咩事。你驚唔驚就係你好主觀嘅事，但市場不見得有幾驚。

4. 但又搞清楚，呢啲不一定係「好事」，唔驚即係可能仲未夠恐慌。差不多每次都係最恐慌時就係最好買嘢時間，就真係冇乜錯。

別人恐懼時我貪婪—講就易，實行上嚟五個問題

5. 只係難在五樣嘢：第一，你唔知幾時係「最恐慌」，40時你覺得會見50，50時你覺得會見80，就算去到史上冇見過水平，你一樣會自己嚇自己，「今次唔同」。況且，根本如果個VIX去到史上最高，你自己就已經會搵解釋，「肯定係好大鑊先會咁高」。第二，亦都真係一定有好大件事先會見到VIX咁，你一定係覺得世界末日，所有朋友同事都叫你唔應該買。當然仲有第三，去到呢啲最恐慌嘅位，往往只係單日掂一掂。你瞓覺時50，你覺得未夠驚，中間80，瞓醒又50。「你又想等下次」。當然就去到第四：太早仆入去（例如見30就買）你又往往要驚多幾日，或者未係最好時間。但個標準set得太嚴，例如見80先買，又永世都打唔中，等足十幾廿年，「然後到hit中時你就去咗旅行冇睇」。

6. 當然仲有第五：別人恐懼時你冇錢。有人都認真問過，呀埃汾你唔留現金喎，咁到呢啲位又何來會有錢呢？答案係：所以我唔會奢望在最恐慌時買到。但當然，好多讀者係唔認同我唔留現金嘅做法的。你唔係我嘛，所以我講返你地嘅情況。

7. 以上種種，應該冇耐之前講心法先講過。幾時都話平時學嘅嘢，到有危機時就大派用場。

史上第一次「智能手機年代金融危機」

8. 經常有讀者問我邊啲人寫嘅嘢好，我都好似成日有提，但讀者往往都係唔理。無論如何，吾友高天佑早排寫咗篇文，你唔睇內文都睇標題。叫做「iPhone時代的銀行危機」。

9. 的確，今次由SVB到瑞信嘅金融危機，係史上第一次「智能手機年代金融危機」。雷曼爆煲時？已經有Facebook，但我都好似未用iPhone。即使有人用緊，智能手機都未係十分流行。至於肺炎疫情，係「智能手機年代第一次股災」，但整體唔算係「金融危機」（雖然都一度引發金融市場恐慌，但源頭唔係銀行系統）

資訊爆炸，你就更加驚，又更加貪婪

10. 見到嘅係，資訊爆炸，日日不同嘅嘢向你轟炸。我已經係長熄notification，亦都冇再打金融工，而家連Facebook 都少上（除咗自己Page），Twitter直頭唔上。但朋友send畀我嘅嘢，我email收到嘅breaking news，都已經夠多。

11. 如果你係打金融工嘅，或者誤以為「要好貼市」嘅，資訊有幾氾濫，可想而知。鍾意上社交媒體，或者多損友嘅（會WhatsApp send畀你），更加大鑊，因為除咗「資訊」，你仲會收到好多不同嘅「見解」。當中可能有少量係有見地嘅，但相信大多數都係垃圾。

12. 有理由相信，正因為咁，恐懼係更加易擴散，只係爆間SVB，個個以為雷曼2.0，草木皆兵，而冇留意上星期美股仲要有得升。但同樣地，貪念亦都擴大咗，個個見到人買Tesla 買meme股搵大錢，全部跟風衝入去。

13. 所以，理論上，只要你能夠控制自己嘅情緒，照計機會比以前更多。

唔使跟車咁貼，「試下一個星期後先睇報紙」

14. 唔想再重覆多次金句系列，但首先，再講一次，你網上見到嘅，好多都係垃圾。要睇就睇傳統媒體。另外，多數人，就多數係錯嘅。仲有，除非你係打金融工，否則，根本係唔使咁「貼市」的。

15. 以前聽唔知邊個講，其中一個令你生活好嘅方法，就係「將報紙留到下星期先睇」。不過而家啲人連報紙都唔睇，實行上有啲難度。但當中嘅精神冇變。我亦都真係試過，有時去旅行返嚟，先睇返上星期嘅新聞　—　好多你會發現得啖笑。

16. 我在明報寫左篇文，今日（星期一）會出，Attachment有。入面就係講「唔好咁短視」。因為你真係會跟車太貼，上星期特別精彩，你睇瑞信之類，又想死又唔想死，又話爆又話唔爆，你咁樣「跟住消息」去做嘢，只會畀人左一巴右一巴。今日又話驚銀行有事，聽日又話唔驚。你就永遠係升咗去買，跌咗就嚇走。

SVB驗屍報告

17. 另外，今日同大家推介啲「驗屍報告」。係喎，講SVB。瑞信未死得，反而冇咁易講。SVB就頭七過埋，可以蓋棺定論。幾時都話，回顧重要過展望。

18. SVB嘅死因，之前我寫咗四篇文，照計睇完實明。懶睇嘅？咁你可以睇我在「經濟一周」寫嘅文，Attachment有，千二字嘅SVB死因研究，夠精簡。雖然一般我在經一嘅文，都係相當垃圾（配合返佢地嘅作風，加上，係冇稿費的）

19. 時間多少少嘅，可以睇下明報嘅呢個專題報導。唔長，五至十分鐘應該點都睇完。我唔算完全同意，但大體上講嘅嘢都算啱（其實佢地都係整理外電啫）。

20. 與其睇埋網上啲垃圾，不如你分少少時間，睇下呢啲正常啲嘅文。

21. 至於你問，明報個專題，有邊啲嘢我唔多同意？以下舉啲部份例子

SVB嘅資產「投資比例高　—　六成買美債又有錯？

22. 例如入面會有講，話SVB嘅資產「投資比例高」，六成係買美債（或MBS之類），其他銀行唔會咁高，多數兩成幾（亦即係，多數係貸款）—但，扯，咁又錯？事後講你當然易，但借錢出街咪好似仲大風險？至少當年，你好難同人講，「唔好買咁多債券，借多啲錢出去先安全」。借錢又話有壞帳，買美債又話跌價（而其實根本唔係呢個問題），咁想點？

23. 同樣地，入面有批評SVB拎短錢放長錢。但邊間銀行唔係咁做？存款差不多就實係短期，活期，頂多去到一年，你有幾可見有五年定期？但銀行借錢出街，做個樓按，二三十年起碼。呢種拎短錢拆長錢，本質上唔見得有乜特別問題。

話Duration長：但唔買長債，又點夠回報？

24. 況且，SVB買美債嗰時，正係最低息嘅時間（因為啲初創資金嗰時湧入嚟）。你唔買夠長啲嘅債券，息口仲低。佢咁做，你當時要批評嘅又可以話佢笨，做乜買咁低息嘅嘢，「唔通買美債你驚爆煲咩」

25. 諗諗下，SVB啲存款好多都唔畀息，平一平嘅成本，然後走去買美債。再利用銀行嘅槓杆去加大個回報，都真係好似好多人諗嘅「借錢買高息股」咁。

「大部分資產需持有至到期才能套現」—梗係唔係

26. 至於入面講，「大部分資產需持有至到期才能套現」，亦係唔啱嘅—你要沽出街邊個阻到你？HTM嘅嘢一樣可以沽出街（反而貸款就難好多）。問題係，SVB沽出去嗰時，蝕錢嘛！但點解蝕錢都要沽？因為要應付存戶呀

27. 所以，講到尾，最錯就係擠提。而正如高天祐篇文講，而家資訊咁「發達」嘅年代，恐慌情緒都易擴大，同埋，轉錢走都快好多。

左翼又話係侵侵放鬆監管，右翼又話SVB係左膠銀行 —　大家一樣咁廢

28. 順帶一提，雖然我唔鍾意特朗普，但坊間有啲講法，話佢年代放寬監管所以種下禍因，我覺得相當唔公道。完全係政治行先，左翼（民主黨）嘅論述

29. 但同樣地，你亦見到好多人講SVB係「左膠銀行」，爆煲都仲掛住LGBT（詳情可以Google下咩叫Go woke Go broke），呢啲指控亦都荒謬之極（更有趣係，好多講呢啲嘢嘅人，本身就迷戀啲科技股，而成個矽谷都係左傾Woke Culture 盛行）

30. 各打五十大板？係喎。再講一次，網上你見到嘅嘢，好多都係垃圾。包括美國。

SVB CEO 太老實？咁唔通講大話？要坐監喎

31. 不過最後仲有一個幾有趣嘅點，就係有人批評，話矽谷銀行嘅CEO太過「老實」，「唔掂都唔好話人知嘛」—呢個真係一個幾大爭議嘅課題。咁到底應該開誠佈公好？定係講大話好？但提提你，虛假陳述，就真係會坐監的。如何在「唔講大話」同「唔好講晒啲嘢畀人知」中間平衡而又唔犯法，就唔係咁易了。

32. 講到尾，最大鑊，始終都係擠提。問題就係點防止。舊文都寫咗，首先你啲存款咁多都係「大戶」係比較危險嘅，另外，集中晒在一個行業，就更加危險。當然仲有，好多存款都係活期，話走就走，亦都係危險

33. 至少事後睇係咁。