領展威士最後買賣日。瑞信爆煲未？聯儲局下星期會點？長江基建1038 連續26年加派息！ (Patreon)

領展供股權今日最後交易

瑞信跌兩成幾，驚未？驚呀！

SVB死咗冇事，唔等於爆多間冇事。最初貝爾斯登都冇事，但到雷曼呢？

介紹返：瑞信唔係美國嘅銀行。

講你都唔信：美股今年仲係有得升的

聯儲局收晒口　—下星期想加0.25，定直頭唔加？

長江基建業績：有埋Excel

26年嚟，年年加派息。有冇一間香港公司做得到？

今年跑贏晒港股美股。不過，5年前買，要輸三成幾

下年仲係咪派到先？

公司單位數 net debt to equity 咋喎

人地做咗幾十年生意，年年都食住啲「匯率風險」架啦

明明公司收入係英鎊加紙澳紙紐元，做乜美金強，公司會有「匯兌收益」？

領展供股權今日最後交易

1. 提定你，領展供股權，今日（星期四）最後交易，要沽要買最後今日，之後冇得玩。仲有，要上網襟掣供股嘅，好快手啦，應該17號就會截。我就襟咗了

2. 遲下我會再寫，如果跌穿供股價，有乜後果。同埋之前一啲管理層嘅分享。

瑞信跌兩成幾，驚未？驚呀！

3. 另外，好多人都擔心瑞信嘅情況。大股東唔再注資，股價跌兩三成，驚。雖然瑞信財困都唔係今日先知，我亦都在SVB嘅文講明叫你唔好買，而瑞信而家嘅市值跌到同Signature Bank停牌前差不多

SVB死咗冇事，唔等於爆多間冇事。最初貝爾斯登都冇事，但到雷曼呢？

4. 但係，瑞信爆煲，相信都會係一件幾大件事嘅事情，就不能以為SVB死咗都冇乜大衝擊，就以為死多間都冇所謂。正如你不能見到貝爾斯登香咗都冇乜大件事，就以為到雷曼死埋都冇乜大件事。

5. 瑞信雖然市值跌咗好多，但資產規模仲係大過SVB幾倍。況且，瑞信同其他銀行嘅連繫，亦都多過SVB好多好多。即係瑞信有乜依郁，就真係可能雷曼2.0，誰也不敢說（但當然，事後睇返，當年雷曼因為無序破產先咁大件事，如果政府早早救又可能唔同）

介紹返：瑞信唔係美國嘅銀行。

6. 成件事更複雜嘅係：瑞信唔係美國嘅銀行。你見近排雖然跌得最多係啲美國嘅細銀行，但去到大銀行層面，就係歐洲嘅跌得多過美國。原因一固然係堆歐洲銀行好多本身都身子弱。但唔多唔少亦係因為親疏有別，我唔會陰謀論到話美國好想呢啲銀行死然後又收割全世界，但隔咗一重就係隔咗一重架啦，美國優先擔心嘅問題，就唔係歐洲嘅銀行了。

7. 咁瑞信即係會唔會有事？好難講。況且，有事都睇係有序定無序咁出事，亦真係往往「爆咗先知」。你見美股嘅走勢，又唔似真係好驚。

講你都唔信：美股今年仲係有得升的

8. 結論？回歸基本步，不變應萬變。如果話你知其實標指今年仲有得升，你應該唔信，但真係事實。只要你唔係太集中銀行股，實情近日嘅情況，並唔係特別差。

聯儲局收晒口　—下星期想加0.25，定直頭唔加？

9. 另外亦要一講，聯儲局嘅情況，下個星期就議息。得閒你可以去睇個 CME Fed Watch，但唔睇你都估到，冇人再賭加0.5，此路已封，聯儲局冇乜可能咁樣夾硬做。

10. 但十分惡搞嘅係，估加0.25同估唔加嘅機會，似乎都幾接近，往往去到六四比甚至五五波。以前都講過，聯儲局唔會畀啲驚嚇你，多數都會引導市場。但今次搞邊科？開邊瓣？

11. 你見聯儲局，係靜得好緊要嘅，仲未出嚟暗示你知會加0.25定0。但我覺得都合理嘅，就真係睇定啲先。反正以往都試過議息前兩日先搵「線人」放風。太早暗示定反而未必好。我估聯儲局都見步行步，呢兩日唔見真係有咩銀行大災難嘅，可能都會加返0.25 —但如果Lets say真係又整間大銀行倒下，就不能咁做啦。

長江基建業績：有埋Excel

12. 最後夠晒反高潮，同你講隻港股。正係長江基建1038出咗業績，原文在呢度。睇信報報導更簡單。仲有我係幫你整咗個Excel的，不太複雜，所以我已經update埋，Attachment 有。

13. 長江基建係一間好奇怪嘅公司，一大堆嘢都係聯營合營，甚至渣幾個巴仙。入面啲細數就唔解（你睇啲格嘅顏色有幫助），點入數舊文有解，或者我遲下得閒先解。

26年嚟，年年加派息。有冇一間香港公司做得到？

14. 睇返段報導，你睇到嘅重點，應該係26年嚟，年年加派息。記憶中香港冇一間上市公司做到。26年嚟經歷過政權轉移，亞洲金融風暴，911，沙士，雷曼爆煲，歐債危機，疫情。公司年年可以加派息。固然不能保證下年唔減，甚至不能保證下年唔會忽然唔派，呢個世界冇保證。但呢種往績，已經極好。

15. 你大可以「假設」佢下年都唔會減。咁先快手計數，股價44蚊，全年派息2.53，正路地有加冇減（但當然可以「唔正路」），5.75厘股息率，照計不錯。特別係而家好可能見到債息見頂。10年債息都4厘，你就覺得5.75厘都唔多吸引。到10年債息跌到2厘1厘？你飛埋去啦。但到時先飛當然會遲。

今年跑贏晒港股美股。不過，5年前買，要輸三成幾

16. 睇股價，今年就升咗7%，跑贏美股港股。問題係，即使係呢間26年嚟年年加派息嘅公司—如果你5年前買，你都要輸三成幾（雖然你都收咗十幾厘息嘅）。

17. 原因？當然係買嗰時太貴，同埋因為之後債息升。但呢個講法都有啲馬後炮，當時你未必會知道係貴，而家跌咗先知。由頭到尾「估值」都係咁嘅一回事。所以最好嘅方法，當然係「壞消息」時買，但你都係好難判斷到個底位。退而求其次，想買就買，唔好集中晒「好消息」，升晒，人人買人人講你先買。我都係分段買的，呢隻都有錢贏。

下年仲係咪派到先？

18. 另外，但凡一啲所謂「防守股」「公用股」「高息股」，除咗估值，美債債息，仲要睇一個問題：你下年係咪派到先。股價唔係睇一年，甚至兩三年嘅派息，而係成個income stream．你今年有十厘息，下年打後即時冇嘅，一樣冇乜用。

19. 咁就睇返公司本身。我只同你睇啲大數。首先你見到，純利按年只係升3%，但派息只係升1%（升1%都係升！），還好，唔係夾硬谷到好盡。你要明白派息都係要靠盈利支持，一兩年你可以盈利唔升都加派息，長遠不能。

20. 不過留意嘅係，疫情下，當然公司經營難。近年派息比率已經整到幾高下，超過八成。疫情前你見到只係六成。都有少少吃力。

21. 另一方面，你睇最新業績，其實麻麻地，半年你見到收入倒退。另外，利息開支升啦（加息嘛），仲有下半年有啲匯兌虧損。

公司單位數 net debt to equity 咋喎

22. 不過你見到嘅係，公司財務狀況幾好。最重要係，多咗現金。你見個net debt to equity，跌到9%，單位數。講得白啲，即使盈利倒退，要頂住個派息都仲頂到。甚至想做收購（好明顯李澤鉅會諗）亦有機會。

23. 可以預計嘅係，除非情況真係極極極差，否則公司點都想保住呢個加派息嘅招牌（你見佢地自己都好自豪，會寫落業績）。借錢都借到派到。長期係咁當然唔得，但一路頂到環境好轉，係可以嘅。

24. 不過，你同時亦可以預期，如果之後盈利升返　—其實派息都唔會升好多。就係呢幾年頂住嘛，咁我當你之後兩年，盈利多而家兩三成都好，個派息都只係會加少少　—　咁會拉返個派息比率去比較低嘅水平，比較可持續。

25. 所以，照計未來幾年（唔係講太長遠啦），佢維持住目前水平嘅派息，應該OK嘅。但掉轉，你要個派息幾年內有好多增長，似乎冇乜可能。而家你再諗下，就明白點解有5.75厘息 —　太低就冇人肯買

人地做咗幾十年生意，年年都食住啲「匯率風險」架啦

26. 最後一提，又講下啲所謂嘅「匯率風險」。首先，呢隻係港股，但你買一樣係有匯率風險，因為你啲資產係海外，英鎊澳元加元紐西蘭元都有。我以為好基本，但真係再講多幾次，問題係你隻嘢背後嘅資產係乜。而唔係隻股票用乜貨幣埋數，或者在邊個交易所交易，或者你用乜貨幣買。

27. 剛剛有個讀者想買日本銀行，同我話想「食埋匯水」，所以唔買ADR。呢個想法係錯嘅。無論你買ADR定係買日本上市嗰隻，背後嘅資產都係一樣。正如你買香港匯豐，倫敦匯豐同美國ADR，背後係同一間公司，根本乜分別。唯一你可以去研究交易費用呀，多唔多成交呀之類。

28. 另外，人地玩咗咁多年，見過咁多風浪，都係可以年年加派息。我到而家都唔明啲讀者點解咁擔心「匯率風險」　—　你買Nvidia你買Apple全部都有「匯率風險」，只係你唔知之嘛。匯率當然會影響佢地生意

明明公司收入係英鎊加紙澳紙紐元，做乜美金強，公司會有「匯兌收益」？

29. 呢度就帶到去一個好常見嘅誤解：你睇啲業績，包括長江基建今次，你見到嘅「匯兌損失」，同你平時諗嘅東西，唔係同一回事。實際嘅「匯率風險」，你根本見都見唔到。

30. 例如點？好簡單，之前一路美金強嘛，長江基建啲收入係英鎊澳紙紐元加元　—　咁，換埋你美金條數，咪自然少咗錢！原本10億英鎊係12億美金（舉例），後來10億英鎊變咗10億美金！

31. 呢啲「損失」，就係直接在你個收入度反映咗咯。點解見到「收入」跌？正係因為匯率。

32. 至於你見到P and L入面嘅「匯兌損失」item，係另一樣嘢嚟的。涉及你啲外國資產同負債升升跌跌。

33. 明白呢樣嘢，你先會明，點解明明話2022年美金好強，澳紙英鎊紐元加紙跌（係丫），但長江基建反而錄得「匯兌收益」　—　澳紙英鎊加紙紐元跌嘅影響，係在「收入」度直接縮咗呀。