SVB風波後市況。領展供股教學（提你要上網搞啦！） (Patreon)

市況話咁快平靜返，其實由頭到尾都冇好擔心過。唔知係咪好事

你睇VIX，甚至舊年十月嘅位都未掂到

除咗睇VIX，仲可以睇乜？

出完CPI數字，都仲係估月尾只加0.25

領展要供股啦，點供？教埋你

提埋你幾時要上網落指示，幾時要扣錢

全數供又點？唔供晒又點？想超額供又點？超額供股有乜著數？又有乜代價？

香港精神：順手講埋咩係「碎股黨」，點玩法。

威士價格當然大上大落，但冇乜必要就唔好買啦

1. 寫咗四篇SVB，相信大家應該幾滿意（第一，第二，第三，第四），趕時間嘅就齋睇第四篇了解乜事（但，趕時間就唔會訂我呢度啦？）。可能之後我都要休息返一兩日，星期六日都冇停過

市況話咁快平靜返，其實由頭到尾都冇好擔心過。唔知係咪好事

2. 見到嘅係，市況平靜返，唔似係擔心咩爆大鑊。雖然永遠冇人可以保證係咪只係「下一場風暴之前嘅平靜」，永遠唔會知，正如你唔會知SVB點解忽然兩日就收咗檔

你睇VIX，甚至舊年十月嘅位都未掂到

3. 可以睇到嘅係，首先，市場由頭到尾都唔係好恐慌。冇錯係啲小型銀行狂跌，但大銀行跌得唔算好誇張，非銀行更加唔大影響。你見到真係只係擔心個別細銀行，唔係金融大災難。

4. 另外，你睇VIX亦都睇到。最驚嗰時，甚至都未夠30。唔好話同雷曼，歐債，肺炎疫情時比。根本同舊年10月比都不如，而你應該根本唔記得舊年10月美股乜事，可見今次根本真係冇好驚。（同時間亦見到，好多當時以為好驚嘅嘢，幾個月後你連發生過乜事都唔記得）

5. 另一個角度睇，你又可以話「未夠驚」，啲嘢根本冇大平賣。以前我都寫過，有個rule of thumb，VIX 30時代表夠驚，結果連30都未到。

除咗睇VIX，仲可以睇乜？

6. 除咗睇VIX，你仲可以睇埋啲銀行拆息，似乎冇乜點急升，可見真係唔係一個系統問題，大銀行之間冇互相唔信任。亦見到唔係有極大嘅流動性問題。第時你都可以睇呢啲指標。睇LIBOR OIS Spread，睇TED spread 之類。

出完CPI數字，都仲係估月尾只加0.25

7. 仲有，美國出咗個CPI數字，詳情可能之後先講，但整體冇驚喜，又冇驚嚇，大約都預期之中。

8. 咁即時睇下CME嘅利率期貨（唔貼圖了），睇下月尾嘅加息預期，結果依然係八成機會預加0.25，兩成機會估唔加。留意嘅係，而根本冇人再估加0.5，而只係一個星期前，加0.5先係主流睇法 —可見即使真金白銀嘅賭注，都可以話變就變。何況你平時睇嗰啲只講唔落注人嘅「意見」「預料」「睇法」，根本係浪費時間。

9. 呢個轉變，當然係因為爆咗鑊。然後剛剛出嘅CPI又冇特別差。不過你可以密切留意下，聯儲局使唔使又要出嚟出下口術。如果冇人講嘢嘅，即係月尾就會加0.25了。

10. 另一方面，只係一星期前，10年債息講緊4厘。一爆鑊，變咗3.5厘，債息早兩日嘅單日跌幅係1987年以嚟最大。除咗係因為估放慢加息甚至提早停之外，亦都有啲係因為避險情緒。市場定返啲後，債息好快彈返上近3.66。但都仲係低過年頭嘅3.8厘。會唔會再見到4厘？都有啲成疑問，有機會最高位已見。

領展要供股啦，點供？教埋你

11. 另外，就要講下領展。首先提提大家，領展隻供股權（威士，2915）仲有兩日交易，星期四（16號）最後，要買要賣就快手，過後就乜都冇。

12. 順手講埋，威士應該到咗手（舊文教咗你點check），你本身係領展股東嘅，戶口應該有呢隻2915，就算沽咗領展嘅都望下，確保自己冇唔記得沽或搞錯日子。

13. 好啦，不厭其煩講多次，唔想供嘅，沽咗隻威士佢（仲有兩日畀你做）。想供嘅？準備錢。而家教埋你點供，幾時供。

14. 以下我講係Ebanking 嘅做法，我用匯豐。其他銀行券商都大同小異，搵唔到點做嘅，打去問佢。另外，當然填form寄信之類都得嘅（如果你有收過信），但因住唔夠時間。

15. 好啦，第一步，登入你嘅戶口。咁你應該會搵到有一欄，叫做「公司行動」。實有的，唔會冇，頂多你搵唔到，或者要Desktop版先有（匯豐恒生好似手機都係做唔到的）。你間券商網上平台冇嘅，打去問佢，可能要經電話。總之煩到佢應你為止，券商係有義務幫你做的。

16. 入到去「公司行動」，就會見到領展。冇嘅，又係打去問你券商。順手一提，見唔見到我有Paypal？耐唔耐美股都會收到有啲古怪嘅「收購建議」，mini tender offer，多數唔使理，純粹有人想平價同你買，你冇理由咁笨。

提埋你幾時要上網落柯打，幾時要扣錢

17. 講返領展，特別留意，截止接受日期係3月17號。就唔好同我（或券商）拗3月17號23:59得唔得，請你3月16號或以前就搞掂佢。做人唔好咁煩。

18. Click到入去，不用多講，見到你有幾多威士（記住，5股領展先有一隻威士呀下）。仲有留意，3月20號先扣錢的。但你3月17日就要落指令。

全數供又點？唔供晒又點？想超額供又點？

19. 再落去，都冇乜特別。特別留意，Default就係全數，我渣301隻威士（係呀，碎股，so what？），咪Default 301隻．到時就同你扣301 X 44.2（供股價嘛）咁多錢

20. 但，唔Default得唔得？係得嘅！即係話，冇錢嘅，咁我唔供晒301股，都係得嘅。不過你諗真啲，就笨咗咯。因為你唔行使嘅威士，就變廢紙

超額供股有乜著數？又有乜代價？

21. 咁你可能見到，個圖有寫「超額認購」，係得的。好似話話事啤咁，301股，大多佢3000股，係可以的。不過，唔係包生仔，而且有成本。

22. 講成本先。有乜成本？答案就係，會扣多啲錢。你301股大多人3000股，就扣你3301 X 44.2 咁多嘅錢。冇得篤手指賭白頭片的，要畀咗錢先。

23. 另外，唔係包生仔。點解？你諗下，股數得咁多，威士又得咁多，邊度變啲超額畀你？就只係例如有啲人唔供，咁嗰啲唔供嘅嘢，就有機會拎出嚟畀大家幸運大抽獎，瓜分咗佢。

24. 點分配？如果我冇理解錯（唔敢100%肯定），好似同抽新股有啲唔同。就唔會有咩「一人一手」之類嘅嘢。好多時就係跟比例，你拎10萬蚊，人地拎100萬，咁佢分嘅就係你10倍，類似咁。

25. 最後分唔到嘅？就會退返錢畀你。你超額申請3000，最後分得10隻，就扣你442蚊，除返2990 X 44.2嘅錢畀你。

香港精神：順手講埋咩係「碎股黨」，點玩法。

26. 以前有啲公司，會盡做到整夠一整手畀你，優先處理，等你唔使碎股咁慘，但近年好似冇乜呢啲歌仔。而以前啲人會出術，做碎股黨。即係一手100股，然後自己拆做100個地址分身，8座8樓A，8座8A-2之類，咁就可以食盡啲價，人地1股補99股畀你，呢啲操作十分反映香港精神，任何原本出於好意嘅嘢，都有人走精面，最後玩爛個遊戲。

27. N年前我都試過申請超額供股，以往嘅經驗，係分得好少的，只怪自己冇錢。當然你錢多嘅可以試下，到時報告我知。仲有，今次領展股價你見啲網友反應都比較負面，而隻嘢又真係跌得幾多（幾乎穿供股價），可能真係比較多人唔供，變相可能超額供股分多啲。但我就唔玩了，你玩我又唔會阻止，到時話我知分得多唔多。

威士價格當然大上大落，但冇乜必要就唔好買啦

28. 另外應該有人發現，隻威士嘅價格大上大落　—好合理啫，因為佢嘅本質等於一隻領展嘅期權/輪，就係放大咗領展正股嘅升跌。撇除啲「時間值」之類嘅技術細節，隻威士嘅價值大約就係「領展正股價格—　44.2」。

29. 咁舉例，如果領展50蚊，隻嘢價值係5.8。如果領展升一成呢？領展55蚊，隻嘢價值就係10.8，升86%。但如果領展跌一成呢？領展變咗45蚊，隻嘢只值0.8，跌86%。

30. 咁我知梗有啲爛賭嘅，又會諗住，「咁我拎嚟賭領展股價咪好爽」—你捉得中就係。況且，隻威士得嗰幾日交易，時間不在你嗰邊。唔好咁爛賭啦。

31. 如果跌穿供股價會點？聽日解下。