Silvergate Silicon Valley Bank 爆煲之謎，同影響（最終回） (Patreon)

上篇寫咗AFS  unrealized loss，但其實唔係致命死因！

舊年AFS先輸25億，本book 160億，點會今年忽然冇晒？

1700億證券，得260億AFS，Book 160億  — AFS跌一半都未資不抵債喎

舊年AFS輸25億，今年第一季冇理由忽然多咗喎？成160億book點輸？

其實，就係因為擠提，打靶，Fire Sale，蝕賣啲嘢去應付提款

SVB死因，係存款流失。但成個行業都係咁，點解佢特別勁？

SVB，一年走咗13%存款。咁你話大唔大鑊？

點解存款走得咁快？點解沽債券輸咁多錢？你睇返佢幾時興起咪知

早幾年初創好景，呢啲銀行水浸，借都借唔晒出街，唯有買晒美債

留意：啲存款湧入嚟之時，正係債息最低，美債最貴之時。摸晒頂

偏偏到水緊，啲客又拎存款，而美債就跌晒　—　即係高買低沽

點解存款走晒？初創唔掂。出面又高啲息。你股價又係咁跌

存款結構：冇乜定存，人地話走就走。仲有，大客多。細客唔會咁易走！

SVB 93%嘅存款都唔受保，咁啲友梗係走。

自我實現預言：一日畀人提咗25%存款，點頂得住？

大銀行，就真係冇咁易死嘅。多啲貸款，資金來源多，又夠分散

小小後續：加密幣監管。聯儲局加息路線

1. 寫咗三篇（第一，第二，第三），今篇最後。就話你知，到底點解債息升，人人都有unrealized loss，唯獨有啲銀行特別大鑊。仲有，點解某啲銀行特別容易流失存款。

2. 畀埋啲參考資料你，SVB全年業績Earnings Release ，仲有全年報告 ，以及第三季報告。在Attachment 都有呢三個PDF。

上篇寫咗AFS  unrealized loss，但其實唔係致命死因！

舊年AFS先輸25億，本book 160億，點會今年忽然冇晒？

3. 上一篇寫咗，債息升，美債跌價，咁雖然唔會在P and L睇到，但會直接hit落個Book。不過，明咗以上嘅會計處理後，成件事係更加奇怪的。因為，呢個唔係SVB嘅死因！

4. 上面兩個圖我重貼，SVB舊年年報。 AFS舊年都係輸25億之嘛，係多多地，但未死得的。你見個book只係縮少少咋。我當你今年一季都整多25億好未？但成160億book，點解咁快消失晒？

5. 有位讀者仲勁，應該表揚下（表揚就唔打格仔了）。以上係佢嘅留言。佢問咗個好好嘅問題。前半指出咗個好有趣嘅事實，啟發咗我去睇啲嘢（至於後半？我想講，點對沖風險？好多人真係以為乜都可以「對沖」，客戶要拎錢你點對沖？即係有人擠提有保險公司賠畀你？冇呢回事的）

1700億證券，得260億AFS，Book 160億  — AFS跌一半都未會資不抵債喎

6. 好啦，睇下SVB年報嘅Balance Sheet，的確係咁上下（都係95頁）。

7. 1200億入面，大多數都係HTM，得260億係AFS

8. 順帶講埋，現水咪現水，包埋在其他銀行嘅存款，呢啲當然唔會有價值變動。另外，發唔發現冇FV嘅嘢？我都唔係好肯定點解，可能就係Others嗰27億。

舊年AFS先輸25億，今年第一季冇理由忽然多咗喎？成160億book點輸？

9. 好啦，問題嚟啦喎。舊年年尾260億嘅AFS，而你仲有160億book．我堆AFS跌一半都好，輸130億都好，都應該未資不抵債啩？更何況，舊年都只係輸25億，今年啲債息唔係升得特別誇張咋喎。

10. 咁點解，只係250億嘅AFS，都會拖到資不抵債？

11. 答案：因為，就係唔只係AFS呢堆嘢咯！就係因為擠提呀！

其實，就係因為擠提，打靶，Fire Sale，蝕賣啲嘢去應付提款

12. 擠提，銀行邊度拎錢出嚟？你咪要沽貨。咁就死啦，唔沽好地地，沽親嘅，全部都計P and L．而咁啱，佢地嗰啲全部都蝕錢。點解？陣間解。

SVB死因，係存款流失。但成個行業都係咁，點解佢特別勁？

13. 好早講過，SVB嘅死因，係因為存款流失。

14. 然後呢度要講一講，SVB同埋其他幾間嘢出問題，肯定唔係今日嘅事。固然我話一早知爆煲就呃你，但呢堆嘢財困，肯定唔係今日先知。你睇啲股價已經知，之前已經瀉個不停。

15. 因為，上面講嗰啲債券減值問題，大家都知，唔係咩大秘密

16. 而仲有，去到戲肉，就係呢啲銀行流失存款。流失存款亦都係一個成個行業嘅問題，有圖你睇到。收水嘛。（另外，你可以睇下2020年印咗幾咁多錢）

SVB，一年走咗13%存款。咁你話大唔大鑊？

17. 好啦，睇睇earnings release，因為有過去五季嘅數。一睇你就知，有幾大件事。過去五季，存款係咁跌，一年走咗13%嘅存款，十分驚人。計金額，即係冇咗250億存款。

18. 好啦，走咗250億存款，但你點畀錢呢啲人？當然就要沽債券。所以，問題唔止係堆AFS嘅unrealized loss，係今季要沽啲債出街，一大堆realized loss ！（即使你沽HTM都要即時計數—雖然其實公司如果頂到尾反而唔使蝕）

點解存款走得咁快？點解沽債券輸咁多錢？你睇返佢幾時興起咪知

19. 於是乎，最後你可以拆解去到兩個問題：第一，點解佢地啲存款走得咁快？第二，點解沽貨會輸咁多錢？兩個問題，都同呢幾間銀行點興起有關。

20. 呢幾間銀行，或多或少，都係專服務啲初創科技公司，同埋啲創投基金，借錢畀佢地。最初大銀行根本唔多會理呢啲又唔賺錢，又冇往績，又冇嘢抵押嘅公司。咁呢幾間銀行就做呢啲生意。

21. 然後早幾年初創好景，呢啲公司本身大把錢，亦都存返入去呢幾間銀行。

22. 留意嘅係，好多時呢啲銀行甚至唔使點畀利息，例如SI之類，好多存款都係唔畀利息嘅。你睇SVB Balance Sheet（唔貼圖了），見到一大截係no interest bearing deposit．咁就發，零成本。但收咗啲錢，放去邊度好？正係因為啲初創都有錢，呢幾間銀行實在唔係好知放錢放去邊。

23. 於是出現咗個問題：存款好多，但啲錢唔知拎去做乜。咁幸好，呢幾間銀行，唔係拎去買垃圾，係拎晒去買債券之類。

早幾年初創好景，呢啲銀行水浸，借都借唔晒出街，唯有買晒美債

24. 睇數字，例如SVB，2017-2021年間，存款由440億升到1890億。但貸款就只係由230億升到660位。剩低啲嘢去咗邊？當然去咗投資債券。

25. 聽到呢度都冇乜問題，幾好，零成本嘅存款，拎去買美債．不過，市況逆轉時又點？

留意：啲存款湧入嚟之時，正係債息最低，美債最貴之時。摸晒頂

26. 留意嘅重點係：啲存款幾時吸返嚟？正係早幾年，零息環境之時。亦即係啲債息最低嗰時，又即係啲債價最高嗰時！

27. 冇錯，問題就係，呢啲銀行，買債券嘅時間，係摸晒頂的。點解？因為啲存款就係嗰啲時間湧晒入嚟嘛！

偏偏到水緊，啲客又拎存款，而美債就跌晒　—　即係高買低沽

28. 然後，就係左一巴右一巴。偏偏就係呢啲時間，存款就大量流失，銀行要沽咗啲債去應付存款走。但就正係呢啲位，債價就跌晒。即係，高買低沽，咁明白未？

29. 當然事後睇，如果呢啲銀行有多啲貸款，唔係全部高位買晒債券，問題又冇咁大。雖然致命傷始終係擠提

點解存款走晒？初創唔掂。出面又高啲息。你股價又係咁跌

30. 然後去到第二個問題，點解啲存款走晒？因為而家啲初創自己都唔掂，當然拎錢走人。況且，你唔畀利息，但出面可能高啲息，啲友一定走。仲有，人地見到你啲股價係咁跌，原本唔走都變走。啲存款就好似食咗瀉藥咁走

存款結構：冇乜定存，人地話走就走。仲有，大客多。細客先唔會咁易走！

31. 仲有，頭先咪話公司好多存款係唔畀利息嘅？定期存款係好少嘅（你可以睇返Balance Sheet）。好景嗰時梗係冇嘢，仲覺得好叻添，使乜畀利息咁笨。但，定期存款你就可以鎖住啲客．佢冇咁易拎走。你一大堆都係活期存款嘅，話走就走，冇buffer的

32. 而上篇文都講過，你啲客，全部係大額存款，又係好危險。如果我做一大堆細存戶，反而佢地未必走，因為有存款保障，我存款少過25萬美金嘅，真係唔怕。但大存戶，真係會走，人地放一億幾千萬去你度，你爆煲我真係出事喎，梗係走。事實上，SVB差不多93%嘅存款，都係不受存款保障機制保護嘅。

SVB 93%嘅存款都唔受保，咁啲友梗係走。

33. 如果在SI嗰啲情況，更加係因為FTX爆煲，所謂「幣圈」人人自危。

34. 所以講到尾，今次就唔係槓杆問題，而係asset liabilities mismatch，存款增長太快，又借唔到出街。另一方面，啲存款結構有問題（至少事後睇落係咁），啲客又有問題（類型太集中），同埋，呢啲銀行，只靠存款冇其他資金來源，都係問題。

35. 不過話說回頭都要講，以上呢啲，你睇之前Balance Sheet都見到。股價亦都一路跌。但，都真係估唔到點解去到3月忽然極速惡化嘅。可能真係自我實現預言，成班友上星期見唔到落，一齊去提，咁就真係整死間銀行

自我實現預言：一日畀人提咗25%存款，點頂得住？

36. 所以你睇年報，都係冇乜用，最多事後驗屍，學到啲嘢。但唔好諗住睇年報就見到人「出古惑」—係呀，擺明見到啲存款走，但你冇諗過忽然加速嘛。同埋，之前存款走都頂多住，估唔到去到今季就頂唔住了。點估？（好似話上星期單日就提咗420億，即係四份一存款，咁點頂得住？）

37. 所以，都真係老教訓，分散。

大銀行，就真係冇咁易死嘅。多啲貸款，資金來源多，又夠分散

38. 至於出現在SVB嘅問題，部份細銀行都會出現。.但大銀行真係冇咁易出問題。首先，大銀行一般會多啲貸款，唔會側埋太多在債券。但最重要係，大銀行嘅資金來源多，有長有短，有大客有細客，有定期有活期，亦唔會集中晒全部一兩個行業背景嘅客，又唔會一大堆存款係好短期湧入嚟的。咁比較冇咁易一次過畀人拎走晒。

小小後續：加密幣監管。聯儲局加息路線

39. 好啦，其實仲會有啲後續，但真係太長，留返下次先講。

40. 畀定重點你：你可以想像，打後啲人，照計對加密貸幣之類更加冇信心。同樣地，政府肯定更加嚴格監管。最多啲支持加密貨幣嘅argument，應該越嚟越弱

41. 仲有，聯儲局當然意識到，唔多唔少呢啲銀行執笠都同佢加息有關（雖然導火線係擠提）。未必即時停加息，但肯定開始多考慮。

42. 不過偏偏通脹即使好似見咗頂，但仲未真係壓到低，甚至有啲驚會死灰復燃。所以，真係未必敢咁快停加息。

43. 於是乎，似乎真係一個幾壞嘅情況：通脹高，但又有經濟危機。點收科？我都唔知。但，總有走出困局之時。壞消息啲嘢跌時唔買，唔通好消息升晒先買？