Silver gate Silicon Valley Bank 爆煲之謎，同影響（三） (Patreon)

後續：Signature Bank都收埋檔。爆多幾間不足為奇

聯儲局緊急會議，唔會減息嘅。

加息預期又急降溫了，債息亦都大跌

記得留意聽晚CPI 數字

加息債息升債價跌銀行輸錢資不抵債。但，點解第間冇事？因為擠提

點解得呢幾間擠提，其他唔擠？點解擠提會搞到銀行輸錢？

到底證券投資，會計上點處理？

Trading，AFS，HTM嘅證券有乜分別？

realized 同unrealized又點？係咪一日唔沽一日都唔蝕錢？

AFS同Trading，唔沽都可以搞到你資不抵債

SVB舊年所謂「盈利」16億。但AFS unrealized loss都25億啦

但，其實成個行業都有呢啲AFS unrealized loss，點解SVB特別大鑊？

1. 拿，寫咗兩篇（第一，第二），今篇就真係到重點，講到SVB點解爆煲（上篇都講咗少少）。至於SI都大同小異，略講。

2. 但冇法，你地一定最想知「之後會點」「會唔會骨牌效應」「係咪雷曼2.0」，所以我唯有一早寫咗先，放到最頭。因為寫得太長你又冇心機一次睇晒，寫得太短咪變咗同你問ChatGPT一樣，其實冇內容。所以呢，我嘅角色係好難做的。已經星期六日都寫啦，有啲讀者仲要不滿嘅，我都冇計

3. 再講一次，認真睇，包你睇埋呢兩篇有好大得著。

後續：Signature Bank都收埋檔。爆多幾間不足為奇

4. 首先都要講下上兩篇文後嘅後續。話口未完，你見Signature Bank都爆埋煲。仲有幾間小型銀行，甚麼FRC WAL PACW，幾間盤前都大瀉，再有一兩間出事不足為奇。而上篇文都同你講咗，千萬不能沾手。

5. 好多小朋友唔明白，銀行即使生存，受政府打救嘅，必然係政府或白武士極大折讓極低價拎極大股權，即係將現有股東攤到薄一薄。你睇金融海嘯AIG花旗都冇死到，但啲股東近乎輸晒。

6. 所以，你不能因為「聯儲局唔會見死不救」，而走去亂咁買呢啲銀行股。

聯儲局緊急會議，唔會減息嘅。

7. 另外，聯儲局會有個緊急會議，但唔似有乜好特別嘅嘢，亦唔似會緊急減息。其實都冇必要。拿，你有睇上兩篇文，文就知點解。因為幾間銀行出事最主要原因係擠提，唔係加息（只係次要原因）

加息預期又急降溫了，債息亦都大跌

8. 另外，亦可以留意下，好似一個星期前先講緊3月可能會加0.50。話咁快，而家冇人再估加0.50。八成機會加0.25，甚至兩成機會唔加。當然數字不停有變。

9. 另一邊廂，又見到10年債息急跌，真係急跌。幾日前講緊4厘，而家3厘半，好似係三四十年嚟最大單日跌幅。原因？除咗估加息力度放慢，亦都避險情緒。

10. 又，債息跌，即係債價升返啦。即係原本SVB頂多幾日就冇事？但，佢唔死，就唔會有債息急跌啦。你見次次都係殺左啲最進取嘅人先，正如股災一定係啲做大孖展嘅人死晒，就會升，令佢地冇仇報，左一巴右一巴。

記得留意聽晚CPI 數字

11. 聯儲局月尾會唔會放慢加息甚至唔加，關鍵係乜？關鍵除咗係仲有幾多銀行爆煲，就係星期二晚仲會出個CPI數字！咁如果唔係比預期差太遠嘅，就可能月尾都係加住0.25。但同預期差太多嘅，［　呢啲期望就又會轉。

加息債息升債價跌銀行輸錢資不抵債。但，點解第間冇事？因為擠提

12. 好，入正題。今次幫你驗屍。記住，個故事係「聯儲局加息令到債價跌銀行輸錢輸到資不抵債」。但你仲會有好多嘢唔明的。

13. 點解唯獨係SVB之類死？唔係因為佢地太重槓杆，而係因為擠提。但，點解呢啲銀行會擠提？其他又會唔會？而點解擠提明明只係liquidity 嘅問題，但會令到銀行輸錢？就係今篇要講嘅嘢。

點解得呢幾間擠提，其他唔擠？點解擠提會搞到銀行輸錢？

14. 畀埋啲參考資料你，SVB全年業績Earnings Release ，仲有全年報告 ，以及第三季報告。在Attachment 都有呢三個PDF。

到底證券投資，會計上點處理？

15. 首圥容許我快講啲會計處理，都講過幾次，但總有人唔聽書，或者有新讀者。

16. 就係講，到底啲「證券投資」，係點處理的。證券包括股票同債券，香港同美國會計方法有少少唔同，但大原理一樣。而你見到，金融公司就特多呢啲嘢，銀行保險公司都係拎啲錢去買債券（保險公司會有少量股票）

Trading，AFS，HTM嘅證券有乜分別？

17. 啲證券會分做三種，Held to Maturity（HTM），Available for Sale（AFS），Trading（有時就咁叫FV）。點分唔太重要（有一定準則），點處理先重要。另外，股票應該不能HTM，只能另外兩款。債券就三樣都可以。

realized 同unrealized又點？係咪一日唔沽一日都唔蝕錢？

18. 然後，我地再要分realized 同unrealized．Realized嘅好簡單，你賣咗，當然計賺蝕，計入你嘅Income Statement（又叫P and L），影響你盈利。任何嘢都係，好簡單。

19. 煩在未賣嘅，unrealized，點計？係咪一日未沽都未賺未蝕？「你認為」係冇意義嘅，會計師點處理先重要。

20. FV嘅東西，債券股票都好，每季（香港就每半年）同你計一次價，mark to market（MTM）。咪同你計賺蝕，話知你未沽都好，賺蝕幾多，同你埋數，當然影響你P and L。

21. HTM嘅東西，十分美好，唔使MTM，中途升升跌跌都冇事，除非到期真係隻嘢拎唔返本金。另外，如果中途跌得太多，例如你隻係恒大債，會計師就會幫你強制當係「impair」咗，醫返都嘥藥費，幫你 write off，但呢啲係特例

22. 最煩嘅，當然係AFS。一樣要每季（香港就半年）MTM，一樣同你計數，未賣都計。咁同FV嘅有乜分別？AFS嘅賺蝕，就唔會計落P and L．「咁計嚟把托？」。係好有影響的，因為啲賺蝕，就直接去咗你嘅book（又叫股東權益）！

23. 即係話，可能間保險公司，AFS堆債券跌好多（正係友邦嘅情況），但你發現未必影響個盈利，因為唔入P and L　—　但就會個book冇咗一大堆嘢（實務上，有份叫做Statement of Comprehensive Income嘅東西，在P and L後面，你會見到）

AFS同Trading，唔沽都可以搞到你資不抵債

24. 咁所以，如果你嘅焦點係公司係咪會搞到「資不抵債」，咁話你知，無論你FV定AFS，影響都係一樣！　—　我輸200億FV嘅，咪P and L 輸大錢，然後最後P and L整走咗個book。但我輸200億AFS嘅，係呀，你睇P and L見唔到的，可能公司仲幾賺錢，但你個Book直接縮咗200億 —　在資不抵債嘅concern下，差不多係一樣，只係有經過P and L先打中book，定唔經P and L就直去book

SVB舊年所謂「盈利」16億。但AFS unrealized loss都25億啦

25. 嚟啦喎，睇數字。SVB年報，97頁（正係個Statement of Comprehensive Income），見唔見到？AFS unrealized loss都25億，而公司嘅「盈利」，只係16億（最頂）

26. 所以，表面「賺錢」，但其實睇個book已經係要縮。證據？睇Balance Sheet，95頁。

但，其實成個行業都有呢啲AFS unrealized loss，點解SVB特別大鑊？

27. 事實上，呢啲現象唔係SVB特有。睇圖，隨住美國聯儲局極狠咁加息，債息狂升，啲銀行拎住嘅債，當然大跌。藍色係HTM（即係唔沽應該唔影響任何嘢），紅色AFS

28. 不過要講明嘅係，其實如果你講國債，債價跌，就只係因為出面息口加。亦即係「你張借據鎖咗2厘息但而家人地出面可以收到6厘息啦，你張借據咪冇咁值錢」。不過，只要去到尾，債仔（即係美國政府）找數的話，根本呢啲「損失」就會逆轉晒。實務上就係差不到到期時，就會變返「賺」，反正最後你都係收返本金。

29. 但，如果啲公司去得太盡，中途已經資不抵債，就比較澤洗啲。

30. 順帶一提，你見香港外匯基金嗰啲「虧損」，其實都係咁嘅一回事。只要到期，自然拎返晒。當然你見網上啲人就完全理解錯晒，覺得係買咗內房債，覺得投資失利。

31. 下篇就最後一篇，解答你嘅問題：點解人人都拎住美債，但唔係人人有事？點解其他銀行又唔擠提？擠提又點影響到輸錢？