領展威士已經到咗你手，記住查下。俄烏戰爭一周年：說好了的打仗油價糧價金價大升呢？ (Patreon)

領展供股權已到手，記得查下你戶口

俄烏戰爭一週年教訓：You know nothing

謙卑啲，唔好直線邏輯

所以我經常會提一句：如果你錯呢？

問題係：雞仔注就高回報都冇用，但買得大又會出事。咁點兩全其美？

說好了的打仗油價會勁升　糧價會勁升

說好了的「打仗投資者會避險金價會大升」

真係要賭，都最好買股票，唔係買商品外匯

下篇預告：點解我好少叫人投資商品同外匯。

又，其實乜嘢係「投資」？

領展供股權已到手，記得查下你戶口

1. 提提你，領展隻威士應該已經到咗你嘅戶口，編號2915。好短命，下個星期四（16號）就最後買賣。

2. 你應該check一下，如果你持有領展跨過除權日嘅，就應該戶口已經見到。一手100股領展，就只會收到20隻威士，因為5供1。冇嘅，就去問下你間券商咩回事，定你自己搞錯咗。同樣地，如果你一早沽咗嘅，都望多次會唔會有威士，有嘅，即係九成九你記錯咗，你沽嗰時已經過咗除權日。

3. 做法都係好簡單，要沽嘅，就下星期四或之前沽咗佢。等供股嘅，就準備錢。唔知準備幾錢？一隻威士，就準備44.2蚊（供股價）。我嘅情況，就係301隻威士，即係13400左右。

4. 稍後（過兩日）會同大家再講少少關於領展供股嘅問題。但記住，唔供股嘅，記得沽咗佢，雖然你發現真係唔多值錢。

俄烏戰爭一週年教訓：You know nothing

5. 講返正題，呢篇叫做係「俄烏戰爭一周年」嘅下集，但關係唔算極大，你冇睇上篇都冇乜大問題。特別係上篇我用咗一半篇幅講「中資行出期權同客對賭聯匯脫勾」嘅故事。

6. 講返上篇文嘅後續。之前篇文，舉咗個例子，就係而家盧布嘅匯價，仲高過俄烏開戰之前。經濟數字等等可以造假，但係但凡市場格價，都幾難造假，仲要造足成年。你當然事後可以好多「解釋」，可能呢一刻你都可以話好「合理」，例如講俄羅斯用黃金頂住個匯價，例如講中國私下有援助，例如講西方制裁唔到位，任你。但，舊年2月你會唔會估到？

7. 特別留意，我好相信，往年2月尾，會有啲人諗「打仗喎，盧布匯價一定跌」，然後你可以畀一百個理由支持呢樣嘢，甚至認為質疑你嘅人「唔識」。但結果呢？

謙卑啲，唔好直線邏輯

8. 當然事實上，好少人可以直接賭盧布匯價，所以你有咁嘅想法，都唔會拎去實行。但呢個故事嘅教訓好重要：you know nothing，謙卑啲好。仲有，市場嘅嘢，唔係直線邏輯。

9. 我見絶大多數讀者，經常嘅諗法都係：發生咗某啲事，然後就會咁，然後就會咁，我就咁買。不幸地，呢啲想法往往都係錯。你話你睇三五七年都仲好啲，偏偏個個都冇耐性。咁幾日甚至一年半載嘅資產價格走勢，就往往唔係跟嗰種「A然後B然後C」嘅框架

10. 我可以舉好多例子。包括「疫情封城股市實會死」（結果美股當年創新高）「中國經濟增長好股市實會掂」（中國經濟增長差不多年年都好過美國，但股市呢？）「零售死晒收租股實會死」（舊年太古升咗六成幾）「內房爆危機股價一定死」（舊年中海外同華潤置地大幅跑贏港股美股）

11. 你唔留意呢種思維嘅問題，就會不停咁犯錯。幾時都話，好多人成個基本思維，都係錯嘅。你再去做烏克蘭專家半導體專家，都係冇用的。

所以我經常會提一句：如果你錯呢？

12. 然後你可能會諗，唔係喎，埃汾你啲想法有時都係咁喎　—冇錯係！我都會犯錯。但你見好多時我都會「有保留」，我經常都會提你同提自己，五個字：「如果我錯呢？」。

13. 你問我我當然有我嘅見解，但我唔會當呢推論一定會發生。所以，就係分散，同埋控制注碼。你錯係唔緊要的，估錯盧布匯價有幾閒？就算你買咗落去，你買得唔大都問題唔大。但你瞓咗身家問題就大！

問題係：雞仔注就高回報都冇用，但買得大又會出事。咁點兩全其美？

14. 但又同時間，金句系都寫過，回報高不如買得大。「但買得大又好易出事」。咁點？有冇兩全其美？有，就係分散！時間上，地理上，資產類別上。

說好了的打仗油價會勁升　糧價會勁升

15. 好啦，你仲唔信「直線思維」嘅為禍，畀多兩個例子你，正係同俄烏戰爭有關（而我廢事講10月「二十大」嗰啲例子，更加經典，但當時寫咗好多篇金句系列，你有興趣去睇下，在個Patreon Index找到，12月中左右寫嘅）

16. 兩個例子，其實有啲相似，都係同商品市場有關。

17. 首先，說好了的俄烏戰爭會令商品價格大升，特別係油價。你估有冇發生？

18. 你可以睇圖，以上係CRB商品指數。又，話埋你知，啲商品指數，大多數比重都係石油天然氣。你鍾意亦可以搵個油價嘅圖嚟睇，都係差不多。

19. 視乎你由邊日去度起（呢個叫做time frame bias，之後我會詳細講），但當你真係計2月24日，咁個指數到而家都係升，但，只係升少少，肯定唔係大升。真係大升係2月24日之前，咁到底係當時已經估會打仗丫，定因為其他原因？就任你講。

20. （認真答：我相信，兩樣都有啲。2月24號之前，已經好多傳聞話可能會打仗。而同樣地，2月24日前，啲通脹都升緊了，唔多唔少係2020年疫情下無限QE又派錢嘅後遺症）

21. 見到冇？又係「炒預期」。你諗一大輪，「戰事有排未結束所以油價有排升」，在三至六月飛入去買嘅，全部輸錢添。「說好了嘅冬天油價會大升」

22. 然後最初嘅「打仗油價實大升」邏輯，講到理直氣壯，但經唔經得起實證考驗？升，頂多就係最初2月24號臨打嗰浸。

說好了的「打仗投資者會避險金價會大升」

23. 同樣地，所謂嘅「打仗投資者會避險金價會大升」，結果呢？打仗後你去買，多數位都要輸錢。仲可以加多樣「通脹利好金價」，一樣冇發生　—　反而係舊年十月開始，通脹開始好似有啲受控跡象，啲人估暫停加息甚至減息，金價就有個反彈。

24. 咁，到底係「通脹升利好金價」，定係「通脹會跌利好金價」？都真係任你講。

25. 記住啦，由俄羅斯盧布，到油價，到金價。好多你以為「一定跌」嘅嘢，就冇跌。你以為「一定升」嘅嘢，就冇升。You know nothing，啲「專家」亦係。

26. 投資充滿不確定，只能見步行步。冇咁多心血嘅，就唔好試圖去捉，分散入市算。

27. 最後一提，所謂嘅「全球糧荒」，有冇發生？睇你點定義。但幾肯定嘅係，啲糧食價格，係連跌十個月嘅。就只係打仗最初颷咗一浸上去。

28. 我諗呢度最大嘅得著，都係嗰幾樣嘢。唔係你唔可以有想法，但首先，你啲想法往往已經慢咗幾拍。仲有，你嘅想法啱，同你真係賺到錢，又係兩回事　—　因為往往啲嘢都係反映晒預期。你見到坦克車開入去，再睇到啲KOL分析，已經遲咗十幾拍。

真係要賭，都最好買股票，唔係買商品外匯

29. 實務上嘅做法，應該係兩個。首先，分散，分散，分散。你有閒錢可以去咁樣考自己眼光，但你大大注買落去，可以輸得好甘。而如果你只係拎少少錢去買呢啲嘢，倒不如你平時將大大舊錢買ETF或者大公司算。

30. 仲有，真係要賭呢啲嘢，都係應該買股票。唔計買樓，股票已經係最「易玩」。債就難少少但都還可以。走去估商品估匯價嘅，我真係冇乜見到有幾多人長期贏到大錢。

下篇預告：點解我好少叫人投資商品同外匯。又，其實乜嘢係「投資」？

31. 下篇我會再講，點解我好少叫人投資商品或外匯（而好似寫過，外匯根本唔係「投資」，商品都未必係）。

32. 你可以諗下，到底乜嘢叫「投資」？好肯定，唔係「贏到錢嘅就係投資」，你去買場波，都可以贏到錢，但冇乜人當係投資。而掉轉，雖然唔少人買股票都輸錢，但好似冇乜人會話股票唔係投資。

33. 咁你話，唔係喎，我買上下盤，兩隊波我買邊隊晉級，binary event，二選一。咁同我買期指賭升定跌，有乜分別？

34. 答案係：冇。所以，你去買期指，一樣唔係「投資」

35. 你可以諗真啲，到底乜嘢先係「投資」。唔一定要教科書嘅答案，但值得你諗下。