鮑威爾話會加快加息速度，係真唔係？到底幾時先停減息？估極都唔中，不停食詐糊，股市升完又跌返，係咪有排都冇運行？ (Patreon)

聯儲局好多時啲官都出嚟七嘴八舌，「但今次唔同了」

可以留意下主席講嘢嘅時機

剛剛先75-50-25，話咁快又上返50？玩嘢乎？

其實講到尾，都係睇數據啫

有排未加完息，股市唔會有運行？我就唔多同意啦

到底幾時先停加息？呢個期望好似係冇乜點大變過嘅

點知幾時停加息？有個Excel教埋你計

有排未停加息？炒得嚟差不多啦！

「無了期咁等減息，次次食詐糊。升完，又跌返原位，得個桔」。係咪真？

你睇美股舊年見底後，到而家走勢係點？

到底舊年係「因為」打仗跌，定「因為」加息？點判斷？

上篇講咗年初至今，各地股市，以及債息，美匯之類嘅情況，兼且講咗啲個股ETF。為免拖到太長，所以鮑威爾星期二個講話，另外開篇新嘅講。

以後如果有必要，啲文可能短少少，而唔係夾硬塞埋落其他嘢度一齊，反正太長讀者又唔鍾意。

聯儲局好多時啲官都出嚟七嘴八舌，「但今次唔同了」

1. 講返鮑威爾段講話。留意聯儲局啲官成日出嚟講嘢，唔同官員又有唔同意見，公開打對台都見過，因為佢地始終係獨立嘅人，有唔同睇法，議息時投票取向都唔同。

2. 好多時啲官員，亦係講咗等於冇講，只係市場夾硬演繹，升又話「放鴿」，跌又話「放鷹」，唔使太認真

3. 不過今次有啲唔同，坊間認為「放鷹」，我都算同意，甚至我最初認為股市比想像中跌得少（雖然睇真啲又未必好大件事）

可以留意下主席講嘢嘅時機

4. 特別留意嘅係，首先係主席親自出馬（雖然唔係突發，一早定咗時間去國會）。另外，亦留意今次係3月底（21-22號）前最後一次有官員公開講話

5. 普遍嘅演繹，都話鮑威爾「警告」會加快返加息速度，都真係有啲驚嚇。仲要係3月議息之前，難免畀人覺得，可能3月就會「加快返加息速度」。

6. 聽落都幾差又幾混吉，回帶睇返，11月加0.75，12月加0.5，1月加0.25，擺明放慢　—　然後3月又再加返0.5？就真係幾令人意外，亦打擊晒之前嗰啲估「會放慢加息」嘅期望（至於「會減息」嘅期望一早打散晒）

剛剛先75-50-25，話咁快又上返50？玩嘢乎？

7. 咁，照舊，睇CME Fed Watch嘅圖，而家市場估七成幾機會會加0.5。留意一個星期前完全掉轉，七成估會加0.25。一個月前更加近乎估一定加0.25，亦可能因為咁，主席先要出嚟調整下大家期望，呢個係聯儲局常用嘅做法。

8. 不過，我自己就覺得一半半。雖然不能話鮑威爾「講咗等於冇講」，但其實佢都只係話「必要時準備提速加息」（必要時先係），同埋「維持0.25厘的加息步伐並非定案」—　可能只係唔想你太過老定，以為一定只係加0.25，話返你知有0.5嘅可能性

其實講到尾，都係睇數據啫

9. 所以，講一大輪，其實好大程度都係睇數據。就留意返星期五嘅就業數據，同埋下星期嘅CPI數字了。回帶講返，上次2月時公佈啲數字係已經相當有「燶味」，就業數據好強，而通脹數字都有啲強。過幾日就知上次嘅數字係咪只係「個別事件」。

10. 不過，有啲「謹慎」（或「悲觀」）嘅，會覺得，又再加過息，仲要加快加息，股市實冇運行，我就唔多同意。「首先你記住俄羅斯盧布嘅教訓先」。

有排未加完息，股市唔會有運行？我就唔多同意啦

11. 另外，都真係留意返，其實「幾時停加息」呢樣嘢，市場預期有冇大變？好似都係冇的

到底幾時先停加息？呢個期望好似係冇乜點大變過嘅

12. 幾時停加息？你睇其他source可能會有啲複雜啲嘅圖，但萬變不離其宗，都係由CME啲嘢整出嚟。呢度我教你一個比較容易睇嘅方法

13. 呢度係9月嘅圖。咁你大約見到，六成機會係5.5-5.75或以下，四成機會係5.75-6.00或更高。咁其實，拉勻，就大約5.70左右

14. 同樣地，睇11月嘅圖。咁你大約見到，都係六成幾機會去到5.5-5.75或以下，大約四成機會5.75-6.00或更高—咪同9月差不多？亦即係，去到9月就見頂了

點知幾時停加息？有個Excel教埋你計

15. 想精細啲咁計，亦都得，其實唔太深，只係計weighted average，計下9月同11月，街邊估嘅「平均」水平出嚟。照計好易解，唔明嘅開埋個Excel睇。見到，9月平均係估到5.70，11月係估到5.66。差不多一樣，亦即係，暫時市場係估加埋9月就停。

16. 首先，呢個「加埋9月就停」，同鮑威爾未講嘢前嘅期望，分別不大。

17. 更重要嘅係，幾時都係炒預期。若果真係9月就停嘅，咁其實往往股市幾個月前升定。當然冇得保證，但我意思係：你話如果估到下年9月先停加息，咁就遙遙無期。但如果係今年9月停嘅，真係炒得嚟差不多，一定係股市行先的。

有排未停加息？炒得嚟差不多啦！

18. 所以，我又真係唔會睇到好淡。更何況，上面都講咗，你睇今年啲科技股都做得幾好。「估就快停加息」呢樣嘢，絶對仲係存在，甚至就快見到終點。

有人話：無了期咁等減息，次次食詐糊。升完，又跌返原位，得個桔。係咪真？

19. 最後可以睇返一樣嘢：好多人有個錯覺，以為一路估停加息，一路估通脹見頂。但通脹好似死嚟死去都唔斷氣，而一路估停加息又一路都唔停。好似跌完又升返，升完又跌返，無了期咁等咁。

20. 呢種想法有兩個問題。首先，明顯地呢個唔會係無了期嘅，總會見到停嘅一日，相信亦未必會太遠。

你睇美股舊年見底後，到而家走勢係點？

21. 然後你可能心諗，喂，舊年年中夠以為去到舊年年尾會放慢甚至停啦，結果又係落空，搞搞下就由2022等到2023

22. 不過你留意一樣嘢。你睇返，由美股舊年9月見底後，低位都升返超過10%，納指更加近20%．而你睇個走勢，大約係一浪高過一浪嘅。你話一路都未等到，市況好似升完又跌升完又跌咁，但你見到，係升嗰時升得多，回調就回少少嘅。

23. 所以好多時，你聽故事，同真正有數字去睇，就唔係同一回事。實情，股市就係咁，升下跌下，但一般都係升得多，跌得少，成個趨勢向上的

到底舊年係「因為」打仗跌，定「因為」加息？點判斷？

24. 呀最後順帶一提，上面個標普指數圖，係一年圖，所以個頭係舊年3月—3月呢個唔係標普指數歷史新高，個新高係1月頭創的。

25. 不過留意，見唔見3月仲升咗一浸？實情俄烏打仗後，美股好快收復失地，彈返去開戰前嘅位。幾時開始再跌？就係聯儲局開始加息嗰時（正係3月中）

26. 所以，雖然我成日話股市唔會話你知點解跌。但到底舊年係「因為」打仗所以股市跌，定「因為」加息？照計幾明顯