［插播］年初至今少少回顧：債息升，美金強。但納指強，但普遍歐洲日本韓國跑贏美股港股。兼講啲ETF，同埋個股 (Patreon)

年初至今股市表現幾好　—　但好多人唔覺得好，點解？

只係3月頭，納指今年雙位數升幅，又有幾差呢？

泛歐指數升成12%，計埋匯價都仲係雙位數回報，點會唔好？

日本股市同韓國股市都有雙位數回報，扣埋匯價就差啲，但仲係相當不錯

加息預期升，美匯指數同美債債息，都高過年頭嘅位了

明明加息預期升溫，但美債債息仲低過舊年10月，點解？

美匯指數高過年頭嘅位，但同舊年九月仲爭好多。點解？

ETF 檢閱：價值股麻麻地，新興市場走中國麻麻地，點解？

ETF 檢閱：已發展市場走美國幾好，小型股都好

個股檢閱：Tesla, Nvidia, Facebook

個股檢閱：歐洲股ASML，LVMH，愛馬士，全部幾好

個股檢閱：渣打，匯豐，中移動，電訊盈科，香港電訊，騰訊

1. 呢篇原本係星期二晚嗰篇嘅延續，嗰篇講咗少少俄烏戰爭嘅「啟示」，主要就係講「天災人禍政治事件對資產價格影響短暫」，同埋「啲影響可以同你最初以為嘅走向爭好遠」

2. 篇文用咗俄羅斯盧布做例子。原本仲諗住寫多兩個例子（油價，金價），但因為有少少突發嘢嘅，所以之後兩日先寫呢兩個例子。

3. 咩突發嘢？星期二晚聯儲局主席鮑威爾出嚟講咗啲嘢，都令市場跌咗啲。

4. 鮑威爾嘅講話，我會開篇新文講。但，呢篇文下面嘅數字同圖，都係星期二晚美股未開市前整的，亦即係鮑威爾未講嘢之前。講話後，港股美股跌多咗1-2%，對下面講嘅嘢唔係極大影響。但如果我再遲兩日寫，啲指數再郁多啲，就唔係太好了。

5. 所以，趁而家快手回顧下年初至今嘅市況。

年初至今股市表現幾好　—　但好多人唔覺得好，點解？

6. 首先，問下大家，覺得今年股市暫時表現點？我估十個有九個都話唔掂。但，似乎你嘅印象同現實係唔多同，今年股市暫時都係做得幾好的！

7. 以前都講過，如果指數表現好，但你自己好似完全分享唔到成果，就往往係有啲嘢出咗問題。可能係配置，可能係時機。如果經常係咁嘅，就不如買多啲指數ETF，等自己唔好偏離市場太多。

8. 我唔一一cap圖，但會同你睇返數字。另外再講一次，下面啲數字去到星期二晚美股開市前，但我不能因為完到一半美股跌2%就成篇由頭寫過。

只係3月頭，納指今年雙位數升幅，又有幾差呢？

9. 道指就叫做持平，但標普指數今年仲升緊6%，而納指升咗12%—係相當難得的。同你嘅「印象」似乎好唔同，今年股市暫時完全唔差！

10. 至於港股，就差啲啦，計埋星期三嘅跌幅，應該恒指國企指數科指都只係同年頭差不多位。但呢個當然亦同美金強有啲關係。

11. 但更值得留意嘅，其實係「其他股市」，普遍都好過港股美股，亦同我年頭估美股跑輸嘅預計差不多。

泛歐指數升成12%，計埋匯價都仲係雙位數回報，點會唔好？

12. 例如睇歐元區股市，泛歐指數Stoxx 50，升咗12%！我知，你又講匯價嘛，但年初至今歐元對美金大約持平。非歐元區嘅？英國股市早前一樣創新高，今年富時100指數都升6%，英鎊對美金都大約持平。歐洲股市表現絶不失禮。

日本股市同韓國股市都有雙位數回報，扣埋匯價就差啲，但仲係相當不錯

13. 亞洲呢？其實都唔錯，日經指數同埋韓國KOSPI都升近10%，固然日圓同韓圜對美金都要跌4%，但扣除匯價因素，表現依然幾好。反而你睇話咩「經濟好」嘅印度越南之類，今年就麻麻地了

14. 留意，股市表現真係比我想像中好，都幾難能可貴。因為接下嚟就會講，美匯同美國債息年初至今嘅走勢，原本以為係會幾不利股市。

加息預期升，美匯指數同美債債息，都高過年頭嘅位了

15. 睇下美匯同埋債息先。即使在鮑威爾講話前，加息預期都升緊，原因係因為之前啲就業數字勁，通脹數字又有啲反彈嘅先兆。

16. 咁你見到了，10年債息，之前已經去到差不多4厘嘅水平，年頭先係3.8厘。不過有趣地，都仲未去到舊年10月尾時嘅4.3厘水平。

明明加息預期升溫，但美債債息仲低過舊年10月，點解？

17. 你話明明加息預期升咗，點解債息反而仲低過舊年10月咁多？好簡單，因為10年債息，有名你叫，從來唔只係睇一兩年嘅息口水平（或者個預期）。呢個亦係唔少人嘅盲點，以為加息（或預加息）10年債息就一定跟住升—可能有啲時間係，但肯定唔會跟得好足。我衡量十年借錢嘅成本，不能只睇一兩年嘅前景。

18. 如果你去睇2 年債息，就破晒頂了

美匯指數高過年頭嘅位，但同舊年九月仲爭好多。點解？

19. 美匯指數嘅情況，亦都差不多，而家去到105，亦都高過年頭104咁嘅位。但，同舊年九月尾嘅高位114，仲有好大距離。一樣，「又話加息預期升？」。但，唔只係美國加息嘛，仲要睇埋其他地方，大家你追我逐咁。例如如果其他地方冇美國咁快停止加，咁你美金咪會弱返啲。所以你不能只睇美國嘅息口同預期。

20. 在呢啲咁嘅環境下，股市都仲有得升，特別係納指咁強，都係有啲意外。

ETF 檢閱：價值股麻麻地，新興市場走中國麻麻地，點解？

21. 另外亦可以睇下幾隻我一直有買嘅ETF。首先係IWD，一隻價值股嘅ETF，今年升3%左右，麻麻地。特別你見到，同系嘅IWF，增長股，就升10%。但其實既然上面我都講過，納指咁強，咁明顯納指同IWF都有唔少重叠，最重磅都係啲科技股，今年做得幾好嘅

22. 另一隻，EMXC，新興市場走中國，亦係做得普普通通，升4%。今年暫時新興市場並非特別好。台灣OK，台積電不錯，但印度嗰啲拖累咗。

23. 相當有趣地，你見今年大陸滬深300指數，回報都係差不多4%，而人民幣亦大約持平。就真係走唔走中國，都係差不多。

ETF 檢閱：已發展市場走美國幾好，小型股都好

24. 另一方面，隻IDEV表現就不錯，升7%。上面都提咗，今年日本歐洲股市表現都幾好，好過美股添（除咗納指）

25. 最後，可能最估唔到，隻VB都升咗9%。咩東西？呢隻係一個小型股嘅ETF

26. 基本上，你見上面呢堆嘢，拉勻晒，都係跑贏港股美股（除咗納指）的。以前都寫過下，一般總係有啲嘢升嘅，美股港股唔掂嘅，可以睇其他嘢。

個股檢閱：Tesla, Nvidia, Facebook

27. 至於你講個股嘅，我只能講我有買嘅（都一大抽），又買得多，表現又較好嘅出嚟講

28. 幾肯定嘅係，今年科技股整體都唔錯，特別係部份舊年大跌嘅二線科技股。例如Tesla今年升返八成，Nvidia 今年升近七成，Facebook 今年都升五成。頭兩間都主要係估值太貴，舊年可能跌多咗，而家又回復返。當然前題係公司啲盈利依然正常。Facebook 就有啲唔同，估值唔算貴，但之前啲數字倒退，不過而家似乎啲人又唔係咁悲觀。

29. 至於你講最大嗰幾間科技公司，反而麻麻地（亦因為冇跌咗好多）。蘋果係唯一一間比較好嘅，升兩成幾。其他幾隻，都普遍跑輸納指（但會好過標普指數）。Google Amazon就高單位數回報，微軟再差啲。

個股檢閱：歐洲股ASML，LVMH，愛馬士，全部幾好

30. 另外，正如上面講，堆歐洲股普遍都幾好。愛馬士　LVMH都兩成回報，ASML都一成幾（台積電都差不多，不過我冇買）

個股檢閱：渣打，匯豐，中移動，電訊盈科，香港電訊，騰訊

31. 最後，如果講港股嘅，今年我渣住嗰啲，普遍都係啲比較悶嘅嘢跑出，年頭都未必估到。渣打就升足30%，都仲可以話係因為傳被收購。但匯豐都升兩成喎（仲要已經除咗淨，之後仲有息收），正如中移動都升兩成，呢排日日新高。其他嘅？騰訊都升一成，還不錯。

32. 另外，同樣係比較高息（但係咪一路派到呢？）嘅電訊盈科8，同埋香港電訊6823，都升近10%，雖然我買得唔多。

33. 留意上面已經提咗納指，同埋啲科技股跑出。另外，亦都見啲高息股跑出，又唔係完全好似話仲有排加息嘅環境喎。

34. 以上啲名單，就比你參考下。當然唔係全部我買嘅嘢，亦有啲輸得比較多嘅，例如領展。但拉勻晒，今年當然暫時都係贏錢。實情唔係太難

35. 今年暫時都冇乜新買嘅個股，亦因為唔係太多閒錢。但我依然都係有錢就放晒落去買股票（而家ETF為主），呢個就真係冇乜需要變。