俄烏戰爭一周年　資本市場回顧，兼略講「中資行同你對賭聯匯脫勾」（上） (Patreon)

俄烏戰爭一周年又好，2022回顧又好，都係一句

俄烏戰爭對資產價格嘅影響，極之輕微

打到趴街都好，影響都同聯儲局狂加息冇得比

有冇諗過點解加息會打擊股市？

俄烏戰爭最大教訓：you know nothing

俄羅斯陷入泥沼，又畀人制裁，但盧布仲高過未打仗前，邊位估到？

點解俄羅斯盧布咁強？

統計數字可以造假，但匯價好難造假

有人話「因為」俄羅斯頂住個匯價　—　此乃廢話

順手快寫傳說中嘅「中資行同客對賭匯聯脫勾」

脫勾可以唔穿7.85，正如唔脫勾都可以穿7.85

re peg 去7.85-7.95又得，放大個range 7.5-8.5亦得。「咁當唔當脫勾？」

仲有，「邊個話脫勾港紙實會跌？」—你夠估盧布一定跌啦。

你可以搵到好多理由話脫勾港紙會跌，正如你可以搵到理由話盧布實跌

香港Big Mac咁平，港紙脫勾梗係升啦！好似係！

其實，你邊忽然到中資行同客「對賭」呢？

「銀行梗係昆客啦」—　其實我係同意的

咪話銀行食差價，使Q同你「對賭」

the house always wins，我使鬼自己「睇好」「睇淡」

1. 早一兩個星期成日講個股，而且成日講港股。主要原因係之前美國出業績，就日日講美股，所以平衡下。況且又有港股業績，又有領展供股（都未講分拆匯控）

俄烏戰爭一周年又好，2022回顧又好，都係一句

2. 今次呢兩篇你可以當係少少回顧，反正最後都冇寫到2022回顧。新讀者固然要睇，舊讀者都應該睇下。雖然本質上有啲似以前寫101，但今次呢兩篇風格有啲唔同。

3. 至於展望嘛……實情回顧重要過展望，展望就之後一路睇住我啲文，見步行步吧。冇可能年頭諗完啲嘢然後全年唔去修正的。

俄烏戰爭對資產價格嘅影響，極之輕微

4. 首先，雖然話係俄烏戰爭一周年，但講定你知，呢篇文同打仗關係不大。實情根本過去全年嘅資產走晒樣同打仗都冇乜關係。一路都話你知，絶大多數人高估咗政治事件，天災人禍對資產價格嘅影響。911，日本地震都係咁。呢啲事情對政治上可能好有影響，但股市係另一回事。

5. 911，日本地震，股市都係一個月唔夠就返返之前嘅位（實情俄烏打仗都係，文章後啲會講）

打到趴街都好，影響都同聯儲局狂加息冇得比

6. 如果你講舊年對資產價格最大影響嘅，相信真係絶大多數都知，係美國加息。我都同意（順帶一提：又話大多數人多數錯？留意，係指判斷將來。對於事後講，就「準」好多，雖然有時都未必準。正如有啲人堅持係因為打仗所以美股跌）

有冇諗過點解加息會打擊股市？

7. 實情有冇諗過加息點解拖低股價？對於絶大多數股票，並唔係因為利息開支大咗拖低咗盈利，就算係拖低咗，都冇咁大影響。答案係高息會拖累估值（當然你亦可以話會拖累經濟，但經濟同股市向來唔係同一回事，你睇2020年疫情時經濟唔得，但利息夠低，一樣升到你唔信）

8. 所以，真係主要唔係講打仗。純係咁啱覺得想做啲回顧。咁當然我可以等到3月尾做第一季回顧，但可能到時又唔得閒，所以而家寫咗先。

俄烏戰爭最大教訓：you know nothing

9. 真正同俄烏戰爭嘅嘢，只在呢段仔講。你應該學到最大嘅教訓：就係世事難料，唔好以為有乜係必然，唔好直線思維。

10. 而我唔係講俄羅斯完全佔唔到上風之類（雖然呢個係事實，但呢個Patreon唔係講軍事政治），而係講資產格價。市場嘅反應，大家一樣估唔到。

俄羅斯陷入泥沼，但俄羅斯盧布仲高過未打使前，邊位估到？

11. 好啦，包你估唔到。第一，俄羅斯盧布，而家仲貴過打仗之前。邊個舊年2月估到嘅，請舉手，我相信冇人估到。特別係如果話你知俄羅斯陷入泥沼，你更加估唔到盧布會咁強。

點解俄羅斯盧布咁強？

12. 點解咁強？我都唔知。好多嘢你就係唔會知。個人估計，好可能因為俄羅斯經濟並冇真係點重創，傷害遠比想像中低。中國印度照樣大買特買俄羅斯啲油。

統計數字可以造假，但匯價好難造假

13. 留意，統計數字可以造假，俄羅斯而家啲數字都有可能假假地。但匯價呢啲好難有得假。

有人話「因為」俄羅斯頂住個匯價　—　此乃廢話

14. 有人話俄羅斯頂住個匯價　—　此乃廢話！幾時都係頂住架啦！但你話頂就頂得到？索羅斯狙擊英鎊時英倫銀行唔想頂？亞洲金融風暴時泰國印尼唔想頂？頂到先得架！如果俄羅斯話頂就頂，你就唔會見到個匯價開頭大插咗一輪

15. 好啦，俄烏開戰一年，盧布仲高過開戰之前，保證冇人估到。你舊年同人講，一定畀人笑你唔識，叫你唔識就唔好講。

16. 所以，資產價格嘅嘢，邊係你估到？

順手快寫傳說中嘅「中資行同客對賭匯聯脫勾」

17. 順帶一提，可能之後會詳細寫，之前有人講過一排嘅咩「中資行同客對賭匯聯脫勾」—但，其實未詳寫我都可以話定你知，好多盲點。第一，technically 嗰隻嘢根本唔係賭「脫勾」，係賭7.85。我唔脫勾一樣可以掂7.85，正如我脫勾一樣可以唔掂到7.85。第二，而家港紙一樣可以去7.8501，亦都唔係冇見過，唔代表一去到7.8501金管局會響警鐘，唔代表唔理佢就會爆炸，第朝食埋個包先玩都仲得。

脫勾可以唔穿7.85，正如唔脫勾都可以穿7.85

18. 第三，所謂「郁個制度」都有好多玩法，可以re peg，而家7.75-7.85，我搬去7.85-7.95又得，搬7.55-7.65亦得。甚至，我拉大個range，7.50-8.00，亦得。

re peg 去7.85-7.95又得，放大個range 7.5-8.5亦得。「咁當唔當脫勾？」

19. 唔好以為講笑，而家你見嘅7.75-7.85，都唔係最初代版嘅聯匯有的。2005年先出現，咁當年冇人覺得係「脫勾」，本地外國都冇，事實亦唔係。但今日再做多次？可能啲廢柴KOL又話你知「明明就係脫咗勾搬咗龍門」，narrative嘅嘢

仲有，「邊個話脫勾港紙實會跌？」—你夠估盧布一定跌啦。

20. 而當然仲有最重要嘅一樣嘢：即使真係玩完全脫離美元，邊個話你知，港紙實會跌？好多人覺得脫勾港紙一定會跌。如果一賠一我都會買跌。但，你估唔估到俄烏打仗打足一年，盧布會升？唔好咁自大，唔好以為有乜係必然。再講一次，唔係自然科學實驗，唔係歷史遠因近因導火線。金融市場，就係人嘅遊戲，所以有自己嘅規則。特別係短期，好多嘢根本好似完全「冇道理」。

21. 好多人「覺得」脫勾港紙實會跌。你當然可以講100個理由，好多可能係幾合理嘅理由　—　正如你一樣有好多好合理嘅理由估盧布會跌，好多好合理嘅理由估疫情後會股災。但，市況發展，仲要短期，往往冇乜理由。

你可以搵到好多理由話脫勾港紙會跌，正如你可以搵到理由話盧布實跌

22. 你話人人冇信心呀，外資撤離呀咁。係。但，難道俄羅斯就冇呢啲嘢？俄羅斯又打仗又畀人制裁都可以頂住個匯價頂咗咁耐，你話我知香港同中國會流過俄羅斯？我就唔係好信（但，呢個都係冇保證！）

香港Big Mac咁平，港紙脫勾梗係升啦！好似係！

23. 順帶一講，根據呢個「Big Mac Index」，港紙對美金，係嚴重被低估嘅。當然呢個東西「準唔準」我地得閒再討論，甚至乎，我地應該討論咩叫「準」。話港紙對美金被低估，咁係咪如果自由郁，咁一個月內就大升？一個月內唔大升就唔算準？定一年先算？又或者，其實會唔會雖然係「被低估」，但即使自由浮動都永遠唔會升？（正如好多人以為自己嚴重underpaid，但永世都加唔到人工。）

其實，你邊忽然到中資行同客「對賭」呢？

24. 最後一提，其實好多人真係文盲嚟的。

25. 個講法話，中資行同啲客對賭喎，唔脫勾就14厘。但，銀行梗係昆客啦，點會有咁著數畀你？肯定係昆你入局殺你。亦即係中資行有內幕肯定好大機會脫勾。

26. 好啦，呢段看似咁簡單嘅學能測驗式推論（後生讀者應唔知係乜），錯漏百出。但呢種思維上嘅問題，其實好常見。

27. 首先，最technical 嘅一部份，上面我提咗。隻產品賭7.85，但穿咗7.85唔等於脫勾，正如脫勾亦可以唔穿7.85。呢部份你理解錯，係好正常嘅，因為真係有啲technical

「銀行梗係昆客啦」—　其實我係同意的

28. 而仲有，「銀行梗係昆客」，呢部份呢，我都大約係認同嘅。雖然咩叫「昆」都真係有啲難定義，而你總不能話銀行sell你做按揭，你去供樓銀行就昆你三十年。不過在賣畀私人銀行客戶嘅嘢，的確好多係「昆人」嘅，呢度我唔會反對。

29. 拿，就係咁先大鑊。因為啲傻仔嘅論述，唔會全錯嘛。呢部份係啱嘅，銀行就真係多數昆客。

咪話銀行食差價，使Q同你「對賭」

30. 之不過，以前寫文都寫過多次，你不妨再記住一次：銀行，本質上就係左手交右手，過河濕腳，你路過佢摸你籮柚嘅一個行業。因為個量太大，摸得多就好係嘢（某程度上，賭場，港交所，VISA Master都係咁上下玩法）

31. 銀行賺息差就固然。但銀行賣嘢都係。我做銀行唔使「睇好樓市」同你對賭。正如我做輪商我計晒數，我根本唔使「睇好」隻港交所先出隻輪畀你，根本點都食硬你，the house always wins．

the house always wins，我使鬼自己「睇好」「睇淡」

32. 我以前寫文嘅比喻：你去銀行，唱兩百萬南非蘭特　—　唔通銀行自己賭白頭片？問下自己個分析員睇唔睇好南非蘭特？梗係唔會啦！鬼知升定跌咩！實際上銀行做嘢嘅好簡單。你要買兩百萬南非蘭特，佢咪搵間南非嘅銀行問價！人地收我一對七，我咪一對七個半賣畀你！我根本唔使睇好定睇淡，我食你個差價。

33. 講咗咁多，同個聯匯產品有乜關係？好簡單。中資行，唔通自己出期權同客賭？唔好玩啦。一來冇咁嘅expertise，二來冇咁大膽。而冇咁大膽又有兩個層面，第一個就係上面講嘅「我使乜同你對賭」嘅問題。第二，外資行夠膽做我都仲信，中資行同客對賭港紙脫勾，相信都冇咁大膽。

34. 所以，即係點？即係南非蘭特咯！

35. 出面有其他人會賭嘛，銀行咪幫你line up。一班賭脫勾嘅，一班信唔會嘅。我咪賺你個差價，你兩班人，自己賭飽佢。脫又好，唔脫又好，the house always wins．

36. 之後我會再細講，但重點都講得七七八八。

37. 切記住一樣嘢：呢啲乜都以為人地要同你「對賭」，真係窮人賭仔嘅心態。銀行賣accumulator 使Q同你對賭，銀行賣雷曼債券使Q同你對賭咩，食硬你的（後來玩到變政治事件又另一個問題了）。

38. 以前講過《天才殞落》When Genius Failed呢本書，講對沖基金LTCM（Long term capital management）爆煲。留意佢地最初成功嗰時，根本亦係玩類似嘅東西。就係玩啲convergence trade：做個比喻，好似睇住太古A同太古B嘅差價咁。佢地就只係玩呢啲嘢，大大注咁買落去（你估到了，同「推土機前執銀仔」有啲似）。

39. 我賭太古A同太古B差價之嘛。至於港股升定跌？經濟好定差？零售得唔得？人地先唔得閒理，亦都冇興趣take呢啲view，根本犯不著。成班拎諾貝爾奬嘅鬼佬，亦未必畀香港一個師奶識得多。

40. 人地先唔會得閒同你「對賭」。

41. 寫寫下寫到半離題，十分有我Facebook Page嘅風格。唔緊要，下半篇聽日出埋佢，就真係回顧返過去一年嘅股市債息外匯之類，睇下有乜啟示，順手講些少展望