大師冇點你：渣打2888入北水名單。順便講何謂「外國公司」，何謂「第二上市」 (Patreon)

大師冇點你：渣打入咗北水名單！

之前日日創一年新高了

有乜公司可以入北水名單？

北水名單標準相對透明，但相當複雜

上星期渣打入咗恒生綜合指數，所以就應該入到北水名單了

但另一方面，外國公司原本係不能入北水名單的

但，咩叫外國公司？睇註冊地？咁長實長和都一早係北水名單啦

好啦，但點解匯控英國註冊，又一早入到北水名單？

但點解到渣打都得，保誠友邦都得，宏利又唔得？

宏利在香港「第二上市」，所以唔得？但渣打保誠呢？

咩叫「主要上市」？點解仲有人揀「第二上市」？

1. 假期兩日，今日又再有文，今晚返香港，之後亦會密啲出文。

大師冇點你：渣打入咗北水名單！

2. 首先講渣打，都算係「大師冇點你」，週末大陸交易所公佈，渣打入咗北水名單。實情唔止渣打，仲有其他，但再上個週末我就有同大家渣打會入名單。

3. 因為渣打我有，所以主要講渣打。況且，渣打個情況都係比較特別。我就冇乜見有人講，所以都真係值得攞下威。

之前日日創一年新高了

4. 渣打入北水名單，3月13號起生效。咁但你見今日（星期一）股價唔算太強。梗係啦，預先炒定嘛，之前都創咗好多日一年新高了。當然話說回頭，係咪入咗北水名單就一大堆大陸佬仆住買，係另一個問題。一大堆人買係咪即係勁升，又係另一個問題。

5. 講到尾，呢啲其實同公司「基本價值」完全無關，只係好短期嘅所謂「供求」，而係咪真係多咗好多需要都係一個問題。

6. 但其實成個故事係好有趣的，值得你再去留意下。同埋睇下點「分析」一件事。再講一次，到啲嘢急升急跌先嚟問先嚟搵，就多數有問題。況且到急升急跌時，你搵嘅資料都會偏頗。而急升急跌下，你做錯決定嘅機會都大好多—呢個所有人都會，我都一定會，只係程度上分別（例子？你睇舊年10月尾，你去搵「分析」應唔應該買股票，你會搵到乜？你去問朋友意見，佢會同你講乜？）

有乜公司可以入北水名單？

7. 滬港通底下嘅南向「北水」玩咗差不多十年都有，相信大家大約知係乜回事。但有乜公司會入到名單？過程就有啲複雜。

8. 正如估恒指成份股一樣，亦都會有人估北水名單有邊啲新貴，有邊啲出局。你想像到會對股價有一定影響，特別係啲市值比較細成交比較少嘅公司。

9. 亦都有啲公司想game the system，令到自己入到名單。如果有啲想出古惑嘅大陸公司固然會方便好多，我當係「微信女」股亦都易好多昆人入局。

10. 但即使係「正派」公司都好歡迎，有時唔止係股價原因。例如當時友邦保誠入啲乜鬼名單，咁你見啲保險經紀都大鑼大鼓話你知，潛台詞就係「我公司好大好穩陣」咁，有助銷售。

北水名單標準相對透明，但相當複雜

11. 同好多人嘅直覺估計唔同，北水名單嘅標準，相對地算幾透明，主觀或黑廂作業嘅成份比較低，甚至我覺得比恒指成份股更透明。只不過，個機制「複雜」。記住「複雜」同不透明係兩回事。

12. 你可以Google搵到個準則，官方同各大券商都會話你知。但包保你睇完仲係唔係好明。

13. 例如當中有一個所謂嘅「50億市值」標準。但，就唔係計一日的，係計每個月嘅月尾，然後拎平均咁。其實就係為咗防止你最尾嗰日最尾幾分鐘頂一頂個市值，mark上50億就散水。

14. 雖然好似有啲公司結果係每個月尾嗰日就頂一頂，你夠得閒夠細心可以研究下係咪有異動，試下每逢29號買嗰啲想搏入名單嘅公司，1號沽走佢咁。嗰時我都好似拎嚟寫報告。

15. 順帶一提，其實所謂「收市價」，入面有一定嘅隨機成份！就係等你不能最後一秒鐘mark 價。

上星期渣打入咗恒生綜合指數，所以就應該入到北水名單了

16. 好啦，今次個故事係點？話說，再上星期篇Patreon我就話你知，恒指季檢結果。我都有講，本身恒指國指啲名單唔係我最關心。順帶一提，有啲人以為入咗恒指就會狂升一輪，是錯的。一如好多嘢，一般只係炒預期，到入恒指時直頭散水。亦都有啲研究做過，往往入咗就跑輸，甚至宣佈完而未入已經跑輸

17. 但，恒指季檢時，同時仲有做埋「恒生綜合指數」季檢。呢個就好似新城勁爆榜咁，幾百隻，人人有份。而渣打就入咗。

18. （至於呢個恒指綜合指數嘅準則又係點？官方都有講，主要都係睇返成交同市值）

19. 咁但有乜特別？因為，入到恒指綜合指數，係入北水名單嘅先決條件之一。咁渣打入到，就有資格了。之前點解入唔到？可能係因為成交未夠？我都未深究。

但另一方面，外國公司原本係不能入北水名單的

20. 但另一方面，仲有個故事。話說之前，外國公司係不能入北水名單的。但到舊年就放鬆咗呢個條件。當時話今年3月就行。咁渣打作為一間外國公司，亦都符合晒呢啲條件了。

但，咩叫外國公司？睇註冊地？咁長實長和都一早係北水名單啦

21. 好啦，睇到呢度，應該會有個小小問題：咩叫「外國公司」？睇上市地點？當然唔係，by definition 全部都香港上市啦。睇「註冊地」？答案都係yes and no，你見一大堆公司開曼群島註冊（例如長和長實），但一樣入到名單。

好啦，但點解匯控英國註冊，又一早入到北水名單？

22. 然後仲有另一個問題：匯控好似一路都在北水名單喎！明明「英國公司」。同渣打有乜唔同？點解匯控一早入到，渣打就未入？你可能估因為市值，但渣打市值一早都過50億

23. 答案係：好似話匯控因為「主要業務」在中國同香港。渣打，就應該唔係。

24. 係咪好複雜呢！

但點解到渣打都得，保誠友邦都得，宏利又唔得？

25. 唔止，仲有更複雜嘅東西。話說你會見到，點解宏利保險945都咁大間，一路都入唔到北水名單？保誠2378友邦1299就有份？今次連新秀麗歐舒丹都有，但點解宏利冇？

26. 呢度除咗同外國公司有關，仲涉及多一樣嘢：「第二上市」

27. 睇返舊年嘅媒體報導，都會有話你知，雖然「外國公司」可以入北水名單。但只限在香港「主要上市」嘅。宏利唔係「主要上市」，自然就唔得

宏利在香港「第二上市」，所以唔得？但渣打保誠呢？

28. 之但係你又會諗，咁匯控呢？保誠呢？渣打呢？全部在英國都有上市喎。難道唔係香港「第二上市」？唔通英國先係「第二上市」？

29. 呢度就有一個盲點：實情，你間公司，係可以同時在多個地方「主要上市」的（所以你見我上面寫「主要上市」，唔係「第一上市」）

30. 即係點？即係，雙重主要上市。阿里巴巴都係咁玩。冇話要二選一，冇話一定英國（或美國）同香港，一個要係第一，一個要係第二。可以兩個都「主要上市」

咩叫「主要上市」？點解仲有人揀「第二上市」？

31. 咁但，宏利嘅情況就唔同，在加拿大「主要上市」，但在香港冇「主要上市」，只係「第二上市」。

32. 睇到呢度，又會問問題。「咁點解宏利又唔雙重主要上市」。同埋，「咁我鬼知邊間公司係第二上市邊間係雙重主要上市」？

33. 先答第一個問題，就簡單啲。點解唔間間都搞「雙重主要上市」？有啲要「第二上市」？因為，「第二上市」嘅門檻低好多，詳情你可以自己睇下。

34. 第二個問題，點知係咪「第二上市」？好簡單，你會見到，宏利個報價，寫住個S字，S for Secondary．就係咁去識別。實情呢啲公司都唔係死剩好多間，你可以去睇下。比較出名嘅仲有Fast Retail 6288，即係Uniqlo同GU嘅母公司（嚴格上嚟講呢間係HDR，仲煩，唔解了）

35. 順帶一提，年紀夠大嘅聽過「納指七雄」（而家得返六雄，因為隻Dell在美國已退咗市），都係唔會入到北水名單嘅。所以北水係唔會經香港買到Starbucks 同Microsoft 嘅。

36. 順手講埋，實情呢個「外國公司可以入北水名單」，本身冇乜吸引力。匯控都一早入咗。咁搞嚟做乜？好大程度上，應該都係度身訂造。想吸沙特阿美嚟香港上市。可以入到北水名單，照計係多一個賣點。但係咪一個大賣點就唔知了。