理文化工 746 業績意外地差：賣樓賣到蝕錢，搞乜？ (Patreon)

理文化工，業績完全唔得！（有埋Excel）

平日幾萬股成交，出業績300萬股，跌6%。即係點？

「上次見遲遲唔發盈喜已經覺得有啲怪」

另外，仲可以睇化工產品價格

化工廠居然去賣樓！仲要輸錢！成億幾！（「其實贏錢就冇人理的」）

點解賣樓會輸錢？在邊度賣？同你計下數

「賣66個單位先1億收入咋」「仲要嘔突」

化工方面呢？下半年收入，毛利率，純利率都大倒退！點解？

「睇下啲哥羅芳　哥士的　同　雙氧水　價先」

人民幣又點影響公司？「我見冇乜匯率虧損喎」

咁有冇正面嘢？梗有。一路keep住派四成息！

「加息喎，會唔會供股？」—公司而家debt to equity係單位數！

仲有乜新嘢？有新廠！

然後睇下估值，「保守估計，5厘息點都有，5倍市盈率」-

最差情況就當然係loss

展望：係咪不務工業？化工業務會唔會再差？

1. 首先唔好意思，上次篇領展個Excel Attach錯咗嘢，雖然照計你可以就咁睇圖都計得返啲數。

2. 照舊，email版就改唔到，但多數你稍後再睇返篇文就會改咗（我而家都改咗）。另外，今次我改完大家應收到個email通知你，但我費事每次出多個email話你知改返嘢

理文化工，業績完全唔得！

3. 今篇講理文化工嘅業績，冇買都可以望下。因為份業績易睇得嚟又算多嘢睇。亦都有埋個Excel

4. 好，萬眾期待，理文化工業績，係唔得嘅！我只能實話實說，完全唔得，差得都令人幾意外。當然業績唔得同係咪會一路跌就兩回事，你係咪應該沽晒亦係兩回事。陣間詳細講，但你要快答案嘅：渣得多嘅不妨沽一半先。

平日幾萬股成交，出業績300萬股，跌6%。即係點？

5. 首先睇股價反應，當然唔呃人，跌6%。我甚至覺得少。原本以為會跌十幾個%。

6. 係咪冇人沽所以跌得少？又似乎唔係。免費嘢嚟講，Yahoo finance 真係好東西。公司平時幾萬股成交，出業績呢日就300萬股！咁固然出業績多成交正常，但之前幾次業績都只係百幾兩百萬股。當然你另一個角度睇，成300萬股成交都冇推散晒個股價，證明係有啲承接力

「上次見遲遲唔發盈喜已經覺得有啲怪」

另外，仲可以睇化工產品價格

7. 另外，半馬後炮，上次講佢會唔會發盈喜篇文，都懷疑有少少燶味，係出嘅就冇理由遲遲未出。而上次都望過下啲化工產品價格，見到下半年都麻麻地。但當然望格價呢啲嘢都只係估估下，產品有好多種，網上睇嘅價亦未必完全準，睇完價又要睇量，況且仲有成本等等。都只係……有啲參考。除非你好認真咁做（我個Excel之前有齊啲產品價格同量的）

化工廠居然去賣樓！仲要輸錢！成億幾！（「其實贏錢就冇人理的」）

8. 好，正題。第一個幾震憾嘅係：公司居然賣樓！仲要輸錢（因為減值1.6億）！死未！呢度都部份拖累咗業績，但當然本業化工亦係差，而家雙重打擊咁解。

9. 首先講，公司就唔係「忽然」賣樓嘅，當年都聽過下。而你見個Excel，2021年中公司已經有披露賣樓嘅收入，只係佔得唔多（而家都唔多）。

10. 而其實2022年半年業績，公司在「分部資料」都有分開化工同賣樓。只係未有在份Income statement度寫明兩瓣嘢嘅收入同銷售成本，今次就有（份嘢第2頁，我估你唔會懶到只睇第一頁嘅summary 啩—雖然第1頁已經話你知賣樓揩咗嘢）

11. 邊度有「分部資料」？今次在第7頁，一般公司業績堆 remark就會有，正如有線都會分開電視同埋上網嘅業務分別，電訊盈科亦會分開電訊同埋電視業務

12. 嚟啦喎，睇睇2022年，化工收入58億，分部業績16億。賣樓呢？9000幾萬，1億唔夠—但分部業績輸咗1.7億！

13. 至於之前一年（2021），賣樓大約係2億收入，5000萬分部業績咁

點解賣樓會輸錢？在邊度賣？同你計下數

14. 點解賣樓忽然輸錢？公司第一頁已經有提你，係減值1.6億，商用物業減值。但留意呢部份商用物業應該唔係賣的，好似話招緊租。大約係當投資物業減值咁。

15. 順手解埋，咩係「分部業績」？就收入減埋啲成本。但當然未計稅，稅就一般在最top阿媽層面先交。另外，仲未計啲阿媽層面嘅「企業費用」。所以，兩個分部業績加埋，並唔完全就等於間公司嘅「稅前利潤」，但你見個數字大約接近（但小心有啲公司舊「企業費用」好大的，一大堆嘢在「中央」，冇assign去特別一味業務—例如太古，你亦可以當係啲「中央冷氣房高層」之類嘅人工）

16. 順手一提，計下數。首先，啲樓在邊？在江蘇常熟。唔知在邊？都有啲難答你，「咪江蘇」。我都去過，公司間廠在嗰度。一百萬人鬆啲，算幾富有，唔係窮鄉僻壤。

「賣66個單位先1億收入咋」「仲要嘔突」

17. 公司個項目我冇見過，叫做昕悦溪，自己上網搵圖。留意公司有講，賣咗66件—好似都唔少嘢？但，大陸樓點同香港！咪話總共先1億，66件喎！即係一件150萬港紙咁上下。講緊差不多100平方米一隻，即係1000尺（你估香港咁細咩）。尺價即係…..1500蚊港紙，差不多啦。你睇返網上啲數，當地樓價，都係咁上下。

18. 之後點？商用物業，咪招緊租，應該之後有啲收入。呢個昕悦溪，都賣咗一半，照計唔會賣唔去。順帶一提，你見啲經紀賣樓廣告有寫明係香港上市公司，聽聞對啲銷情有幫助。

化工方面呢？下半年收入，毛利率，純利率都大倒退！點解？

19. 好啦，睇返條「大數」，我冇拆返開化工出嚟，但反正賣樓佔嘅唔大。

20. 最緊要睇下半年同上半年比，之前估佢「如果下半年做到上半年咁就可能盈喜」，但當時都有講應該有啲難，因為啲產品價格跌緊。

21. 然後見到，果然下半年大幅走樣。收入固然大跌，但你見毛利率同純利率都大跌，再加埋啲賣樓減值，所以你見毛利同純利下半年走樣程度更大。不過如果你睇全年嘅毛利率純利率，同歷史最差相比，又唔係算差。

22. 另外留意，一般幾樣嘢都係一齊郁：產品價格升，收入就升，毛利率就升，純利率都升，跌就又一齊跌咁。

「睇下啲哥羅芳　哥士的　同　雙氧水　價先」

23. 下半年點解業績走樣？點解毛利率縮？就當然係啲產品價格跌。點睇？可以睇下公司其中一隻重要產品嘅價，就係三氯甲烷（即係哥羅芳）。公司在業績都有提，下半年，特別係第四季，啲價大跌。

24. 舊年五月頭，五千幾人仔一噸。六月跌到三千！十一月至到今年年頭甚至去到二千。不過好消息係，呢排已經上返近三千水平。同舊年高位仲爭好多，但至少可以話走出咗低谷。至於點解價格起起落落？好多原因，但舊年第三四季封城令到經濟差就當然係主要原因，今年開始正常化，照計啲價會彈返上嚟（而家已見到）

25. （但再次強調，網上啲價未必準，其他人嘅價又未必同你一樣，公司亦唔止得一款產品，唔同產品可以週期唔同，仲有要睇埋量，睇埋成本，所以只係參考　—　雖然多數都大約估到成件事）

26. 你有興趣嘅，可以搵埋公司其他產品嘅價。除咗「三氯甲烷」（即係哥羅芳，仲有隻二氯甲烷，兩者在盤數中合稱甲烷氯化物），仲有「過氧化氫」（即係雙氧水），同埋燒鹼（即係哥士的！）．哥士的同雙氧水賣幾錢，網上都搵到，但因為有唔同濃度規格之類，有時未必可以直接比較。

27. 雪上加霜嘅係，公司有提到高通脹令啲原材料價格貴咗，咁但當然，你加價係會滯後的。

人民幣又點影響公司？「我見冇乜匯率虧損喎」

28. 下半年收入走樣，當然仲有一個唔少人會冇留意嘅重點：人民幣！公司收入當然係人民幣，但盤數係用港紙，你人民幣跌，變到做港紙自然再少啲。留意呢啲東西，係你唔會在盤數到見到有「外匯損失」的　—　咪就係原本20億生意，可能變咗19億。

咁有冇正面嘢？梗有。一路keep住派四成息！

29. 講咗咁多負面嘢，咁有冇正面？有！首先，公司一路派到息。雖然你睇銀碼減咗少少，但留意下個全年派息比率去到39%，叫做咁多年都維持30-40%（但當然冇得保證下年都會）

30. 咁但，上次篇文都有討論過，頂住個派息，會唔會有財政壓力？重工業好多都負債重，加緊息喎。

「加息喎，會唔會供股？」—公司而家debt to equity係單位數！

31. 呢度就要睇到，公司2021年底嘅net debt（爭銀行貸款減現金）7億，而家變到3億。爭銀行嘅貸款，亦由10億跌到7.5億。個net debt to equity，由2021年13%，跌到而家6%（舊年年中係4%，下半年反彈少少）。

32. 而公司嘅利息支出，仲要係細咗嘅，因為少咗貸款。所以呢方面，都幾穩健，不用點擔心。

仲有乜新嘢？有新廠！

33. 好啦，然後留意，公司有講「報告後事項」，就即係呢份業績後，即係2023年呢兩個月發生嘅重要事。公司就成功投咗地，在江西瑞昌（我都去過！就窮好多了）。唔係賣樓，用嚟起廠的。咩廠？「高端氟聚合物及鋰電池新材料」，其實唔係新嘢，而家公司都有做緊，再加大個產能咁解。

34. 咁不過，「未畀錢嘅」，6200萬啦。齋地咋喎，仲要之後起廠。但，問題不大嘅，公司一路都係咁玩，到啲廠投產，咪開始有收入，然後個負債低返，咪再起新廠。都話而家個debt to equity 好低，6200萬加埋啲起廠嘅嘢，都仲冇乜問題（你見最高時公司嘅debt to equity 去到超過50%）

35. 到呢度啲生產線投產，咪又有新收入同盈利咯。但而家爛地一片，以往經驗大約等兩三年啦。

然後睇下估值，「保守估計，5厘息點都有，5倍市盈率」-最差情況就當然係loss

36. 股價啦喎，跌咗6%，而家5.74。實情，隨住大陸都復常，啲化工產品價格又好返，照計2023年上半年嘅業績，應該唔會差過2022年下半年（仲要冇咗個減值喎）。

37. 十分粗略地，舊年下半年2.6億純利。勾返1.6億減值出嚟，即係4.2億化工純利咁上下。我當年今全年，可能就係8.4億咁上下，都唔好睇太遠。

38. 又嚟啦喎，派三至四成息，當保守啲估三成。即係派2.5億息。而家市值45億—真係相當保守估計，都仲有5厘股息以上（亦即係5倍市盈率咁上下）

39. 但當然，照舊了，實際情況比我粗略估計嘅差，係有可能的。就算盈利唔差，都可以忽然減派息比率，甚至完全唔派。所以照舊，只係畀你大約睇下個情況，唔好諗住「點我都至少收5厘息」「最壞情況我都有5厘息收」—大家要知道，最壞情況，當然係公司total loss，你嘅錢化為烏有。可能性當然好低，但你總不可能話「收5厘息」係最壞情況，頂多只係「相當保守」嘅情況

展望：係咪不務工業？化工業務會唔會再差？

40. 好啦，賣樓減咗值，照計唔會再減。化工價格呢？一來大陸已經復常，另外亦真係見到啲價格彈返。人民幣亦都定返啲（同舊年下半年比）。公司負債又唔高，即使計埋新廠都係。點睇，今年上半年都唔差過舊年下半年啩？估值亦唔係貴

41. 問題係個業績真係差，只係插咗半日，可能都仲有啲人乜都未睇未沽。而平時成交極少，所以再跌多一截，係可能嘅。如果驚嘅，咪走住一半先咯。

42. 至於公司「不務正業」，你可以咁講，但之前都己經係咁，冇防礙到股價升上11蚊丫。蝕錢咪有人關心，但只係一次性啫