［供股財技101］（有Excel）「個供股價點定出嚟？」「點決定供股比例？」 「點解要咁大折讓？」「折讓大細其實有乜影響？」 一般都係三四成折讓，點解？ (Patreon)

「個供股價點定出嚟？」「點決定供股比例？」

「點解要咁大折讓？」「折讓大細其實有乜影響？」

一般都係三四成折讓，點解？

又睇返個Excel，同你拆解晒供股每個數字點影響，冇買都值得睇

一切都係左袋入右袋出，朝三暮四，只睇一樣嘢：要cap幾多水！

集幾多錢　＝　供股價　＊　要發幾多新股

再教你計多次宣佈完供股會跌幾多，同埋計除權價（兩樣嘢嚟的！）

教埋你計隻威士值幾錢

大折讓啲供得唔得？但留意，你抬嘅錢，都係咁多的！係咪好奇妙呢！點解？

2供1，咪17.6，折讓七成添呀！但股東係咪損失慘重？yes and no

無論你十供一折讓少少，定一供十折讓大大，都係抬咁多錢的！明冇？

但唔係喎，折讓大，供股比例大，唔係攤薄多咗？唔係拖低股價多啲咩？

有冇諗過，折讓大，即係你隻威士值錢咗？

蝕頭賺尾：折讓細，咪股票值錢威士唔值。折讓大，咪掉轉！加埋一樣的！

讀者玩樂時間：如果我六股一，折讓15%供股，咪好開心？你估係咪？

點解一般供股都折讓三四成？因為，要搞兩個月！

「個供股價點定出嚟？」「點決定供股比例？」

1. 都不只一個讀者問過，「個供股價點定出嚟？」「點決定幾供幾？」（即係「供股比例」）「點解唔可以細啲折讓」「點解要咁大折讓？」「折讓大細其實有乜影響？」—呢啲其實都係同一個問題。好值得你去了解。冇買領展都要睇下

「個供股價點定出嚟？」「點決定供股比例？」

2. 首先畀個短答案你：折讓個邊個定？就當然係公司同投行傾出嚟，冇其他嘢規定，冇監管，股東冇say．但，你可以留意下，大型啲嘅供股，差不多都會係三四成折讓。呢個係有原因嘅，就係之後我會長答案解。

3. 咁而「幾供幾」，供股比例，就可以話係由個「折讓」迫出嚟。

一般都係三四成折讓，點解？

4. 睇返呢個表，我費事列晒出嚟，你有心機可以慢慢查。但我望過下，呢啲供股，差不多折讓都係三四成左右（或者去到五成）。證明真係一個常態，然後用呢個三四成折讓去「就」個供股比例，咁你見出到嚟有啲供股比例就各有不同，有2供1，又有10供0.7

5. 好啦喎，長答案，就真係好長，但保證你學到嘢。

又睇返個Excel，同你拆解晒供股每個數字點影響，冇買都值得睇

6. 我會用返上次個Excel，開多咗個tab，上次冇睇嘅問題都不大。記住，你冇領展都好，你都係會可以識咗多啲嘢，亦可能對你返工有幫助。

7. 仲有，即使你買嘅股票永遠唔供股，你又唔會打金融工，識咗呢啲嘢仲有一個好重要嘅好處：咁你就知道邊啲KOL係識，邊啲係唔識扮識，邊啲係根本錯晒。成日有人問我點知睇咩人好，唔知咩人有料到，就係靠呢啲嘢。未必個個得閒好似我咁整，亦未必個個會教你，但，如果完全唔曉，完全解錯嘅當然好打有限。

一切都係左袋入右袋出，朝三暮四，只睇一樣嘢：要cap幾多水！

8. 首先畀個好重要嘅嘢你記住（唔明可以之後諗）：其實最最關鍵嘅，就係公司決定要拎幾多錢。公司就係由呢個數開始，然後一般再整個供股價，折讓三四成。最後，就迫返個供股比例出嚟。

9. 而對於股價嘅影響，最最關鍵，亦係「到底要拎幾多錢」呢個數字。其他東西，只係左袋右袋，朝三暮四，蝕頭賺尾，最後都係同一條數！

10. 唔係好明？正常。下面就解

集幾多錢　＝　供股價　＊　要發幾多新股

11. 你可以開住個Excel，睇到啲數點計。唔太難。分開左右兩邊。留意我做咗三個情況，一個係現實情況base case，第二個係「大折讓」，最尾係「小折讓」

12. 首先我地重溫一次個base case，話你知啲數點嚟。公司先係決定咗要拎186億。然後你諗真啲就知，集幾多錢　＝　供股價　＊　要發幾多新股（黃色嗰三格）。而供股價，就係決定咪個「折讓」咯。同時間，要發幾多新股，就決定咗「供股比例」

13. Base case，睇左手邊先。好簡單，集186億嘛。咁如果想折讓三成左右，咪44.2蚊供股，自然計到大約五供一（實務上係大約整到個比例齊頭，所以個折讓唔係真係30%）。點計？186億錢，44.2蚊供，咪迫到係要發4.22億新股！咁原本21.1億股，咪就係發水20%，每五股發多一股新股，五供一。就係咁！留意埋，供完後，咪25.3億股。而一手100股嘛，五供一，即係供20股，44.2，即係一手領展你供884蚊。呢堆數應該不難計，唔明嘅睇多次個Excel

14. 然後睇右手邊，都係Base case。公司原本嘅股東權益（或者叫帳面值），1705億。舊股數21.1億股，一除即係舊每股帳面值係80.86。咁你供股拎多186億，全部都係股東權益，新帳面值就係1892億，新股數25.3億，所以新每股帳面值係74.75。

15. 同舊每股帳面值相比，縮咗8%。留意雖然股數發大咗20%，但每股帳面值唔係攤薄咗20%，因為你有拎到新錢嘛，個帳面值大咗。

16. 上次寫過，極粗淺咁講，如果市場畀嘅「每股市帳率」估值不變（但呢個假設甚有問題），股價就大約跌8%。上次篇文我仲計埋個每股派息大約點影響（個Excel都有），就再多啲，可能去到十幾巴仙，你見最後宣佈供股後嘅跌幅都係十幾巴仙。但呢度不詳解

再教你計多次宣佈完供股會跌幾多，同埋計除權價（兩樣嘢嚟的！）

17. 然後，除權前一日股價就51.7。之前我有教計除權價，就係（除權前一日收市價　Ｘ　幾多供一　＋　供股價）／（幾多供一　＋ 1）。Base case就係（51.7 X 5 + 44.2）/（5+1） = 50.5。至於點解係咁計，你可以慢慢研究下。最緊要明白就係「除權前後啲嘢應該一樣價值」嘅道理。

(“更正：除權前價格係53.2，51.7係除權後價值，但唔影響以上概念”)

教埋你計隻威士值幾錢

18. 好啦，最後教你計隻威士值幾錢。一般就係個股價，減返供股價。在呢個情況咪50.5- 44.2。留意呢個只係講除權之後嗰日開市嘅情況，但打後領展繼續交易有升有跌，個威士嘅價值亦跟住郁。同埋留意，五供一，你一手領展100股，只係派20隻威士，值百幾蚊港紙

19. 請務必明白以上嘅數點計，然後下面我就加快，我地睇另外兩個情況。

大折讓啲供得唔得？但留意，你拎嘅錢，都係咁多的！係咪好奇妙呢！點解？

20. 好啦，如果大啲折讓，得唔得？得。但記住，拎嘅錢一般定死咗，唔會變，都係嗰個數，186億。咁如果我玩到2供1，好易計到，發多10.6億新股啦。咁嘅股數拎186億，自然計到供股價17.6，折讓七成呀！

2供1，咪17.6，折讓七成添呀！但股東係咪損失慘重？yes and no

21. 咁你心諗，會點？折讓大好多喎。係。供股比例又大好多喎。咁有乜後果？係咪跌多啲？答案：yes and no！

無論你十供一折讓少少，定一供十折讓大大，都係抬咁多錢的！明冇？

22. 首先留意第一樣嘢：公司可以決定折讓幾多，然後迫到供股比例。但只要一日公司拎嘅總資金唔變，你就會發現，你拎一手領展，係都係供咁多錢的！其實唔使計都大約諗到！公司要拎多咁多錢，咪就係每手拎多啲錢出嚟，個總數同你入面點玩折讓同供股比例冇關！

23. 實務上睇，係，供股比例大多咗，原本五供一，一手100股供20。而家二供一，一手100股供50—　但，同時個供股價又平咗嘛！所以你每手總共拎出嚟嘅錢，係一樣的！！分別只係平價供，但供嘅股數多啲，定係供嘅股數少啲，但個供股價貴啲之嘛。都話左手交右手，朝三暮四，蝕頭賺尾，get到冇？

但唔係喎，折讓大，供股比例大，唔係攤薄多咗？唔係拖低股價多啲咩？

24. 但你話，唔係喎，折讓咁多，然後供股比例又高左，攤薄多啲喎。唔係會拖低個股價更多？上面都答咗，yes and no

25. 用我地上面計每股帳面值嘅方法，你一定計到個每股帳面值縮得更大（去到26%）。因為你多咗好多新股嘛。咁係咪應該跌多啲？係！跌三四成都唔奇（但留意，唔會跌七成去到個供股價。Base case嘅現實情況，我到而家都唔明點解有人覺得44.2供股價就即係股價會跌到嗰個位，你見啲友真係唔識的）

26. 咁但，點解仲話yes and no？明明會跌多啲喎？

27. 因為，正係由於你個供股價平咗，供股比例又高咗，所以個除權價會再低啲。「咁咪衰咯，仲話yes and no？」

有冇諗過，折讓大，即係你隻威士值錢咗？

28. 因為，你供股價低咗，咁隻威士會值錢咗嘛！！！！！

29. 最右下角我會同你計咗，除權之後，你一手領展值幾錢，同埋你嘅威士值幾錢。

30. 一樣，左手交右手，朝三暮四，蝕頭賺尾。供股價折讓大嘅，供股比例高嘅，當然除權後個股價會更低。你拎住啲領展咪值少啲錢　—　但，就剛好會在你隻威士度補返的！

蝕頭賺尾：折讓細，咪股票值錢威士唔值。折讓大，咪掉轉！加埋一樣的！

31. 因為，威士價值＝領展除權後股價　—　供股價　嘛。冇錯，因為大折讓同埋供股比例大，所以個股價更低過base case．但，我個供股價平咗好大喎，在條算式，夠冚個股價跌多咗嘅幅度有突！

32. 最後埋單，根本係一樣咁嘅錢！一係供股價高啲，威士冇咁值錢。一係供股價低啲，但威士值錢啲！

33. 在我呢個假想嘅情況，隻威士由值百幾蚊，變值千幾蚊咯

讀者玩樂時間：如果我六股一，折讓15%供股，咪好開心？你估係咪？

34. 消化下，你可以自己玩一次，甚至刪咗我個column自己砌一次。你要個折讓細，供股比例更低，一樣得。六供一，53.4，折讓15%，好似都得

35. 不過，有個問題：你見到除權後嘅價，就仲低過供股價。除權後51.9，但我供股價53.4。咁根本冇人會去「行使」個威士—我點會畀53.4，去買市場上只係51.9嘅嘢。所以你見威士嘅價值係負數（實際上唔會，只係變零，你唔理佢咪得）

36. 如果你夠聰明嘅，會發現，車，咁係因為我仲當個除權前嘅價同base case一樣啫　—　冇錯，所以實際上，照計係唔會現現呢種情況嘅。實情上，咁少折讓，隻嘢唔應該跌到51.7

37. 但，「如果中途射核彈呢？」

點解一般供股都折讓三四成？因為，要搞兩個月！

38. 呢度唔係玩膠，呢度真係半認真，亦係管理層同我講。只係佢唔係講射核彈，講俄烏戰爭。

39. 唔明？咁再講白啲。在你供股呢個過程，個股價會升跌，可能因為供股，甚至因為其他嘢升跌。咁如果除權後跌到一個仲低過估股價嘅情況，就十分難搞，搵鬼供？咁就會好煩的。（就好似我示範呢個情況咁）

40. 而留意返，一個供股，大約搞你7個星期。有晒規定，因為又要宣佈，又要除權，又要寄嘢畀你填，你填完又要寄返去，仲要畀隻威士交易幾日，全部有規定

41. 咁7個星期，你個股價可以好波動的，忽然加息，忽然打仗，都幾頭痕。

42. 所以，呢度就答咗你最初嘅問題：點解多數都畀返三四成折讓？就係要有buffer呀！最好盡能力令到呢7個星期，唔會出現上面嗰啲冇人供嘅慘劇。