領展供股，新世界17又供唔供？電訊盈科8 純利大跌都照加派息。渣打2888入北水名單？ (Patreon)

領展供股，新世界17又供唔供？電訊盈科8 純利大跌都照加派息。渣打2888入北水名單？

1. 要寫嘅又係唔少，但又係快手寫咗啲比較緊急嘅先。反正市況麻麻地（遲下會講），又係時間可以睇返啲基本知識或想法。

領展供股，新世界17又供唔供？

2. 首先，係新世界17出咗業績。本身冇乜特別，我冇買，亦都冇乜叫過人買（新創建就有）。所以純技術討論。

3. 話說領展供股，滿城風雨。咁領展嘅睇法（管理層親口講過），係高息時期可能比大家預期嘅再要維持長啲，而家都似乎應驗咗。

4. 於是乎，大家就會關心同擔心，其他REIT（領展之類嘅房託）或者地產發展商會唔會都步領展後塵？畢竟之前樓又賣唔去，商場租寫字樓租又跌，酒店又冇乜人住，息又加緊。

5. 不過，香港好多地產發展商，近年都係比較保守，亦都唔少兼做其他業務—未必好賺，但有現金流，逆境時可以吊住下。更唔好講唔少係大股東私下十分富貴，銀行難道會追佢債清佢盤？（我知唔係發展商，但你睇電訊盈科幾高負債！）

6. 而眾多大型發展商中，新世界就係負債比較重嘅。用返我地計Debt to equity，舊年年中43%，舊年年底去到47%，計埋永續債就去到80%（有機會再解係乜，但我個人認為應該唔計嘅）。

7. 而領展講緊去到30%，已經叫供股。

8. 不過啦喎，上面呢啲就死數。唔係唔重要，但首先你識晒呢啲基本嘢，再睇其他嘢。

9. 發展商同REIT，有一個好大好大好大嘅分別：派息政策。

10. 原則上，差不多所有「派息政策」，都係廢話。講過好多次，話改就改，除咗股價跌，同埋畀網友鬧，係絶無後果。盈利倒退或蝕錢固然可以唔派，盈利升好多而派息唔加亦得，甚至乎明明好好業績忽然唔派都得。

11. 有無數咁多嘅例子，例如之前一路話「漸進派息」嘅匯豐同恒生，早已經反口。咁世界變咗嘛，有乜計？即使上市27年冇減過派息嘅長江基建1038，我亦唔敢包會有一日改口。

12. 而新世界正係剛剛改咗口，唔再維持漸進派息，吹咩。

13. 唯一真係叫做「有保證」嘅，正係REIT。有啲人唔明，咁「收租股」（例如希慎，太古地產，九龍倉），同REIT有乜分別？咪又係有啲寫字樓商場收租？

14. 其中一個好大嘅分別，就係REIT一定要將啲「盈利」派息（當然唔包括啲重估收益同虧損）。呢個係規則定咗嘅，你做唔到就不能叫REIT。

15. （順帶講埋，咩係「收租股」並冇嚴格定義，但一般啲公司如果主要係商場寫字樓酒店租金收入，而唔係投地起樓賣樓，就會叫「收租股」—　咁而其實太古同九倉都係有賣樓嘅，希慎就少啲）

16. 亦即係話，領展之類，差不多收咗咁多租，減返開支，就要派九成。到時真係做唔到？我估係會畀人告上法庭的。

17. 但收租股唔同，希慎收埋晒啲租，但鍾意嘅一樣可以一個仙都唔派。當然實際上好少會咁，但你睇個派息比率，REIT就一定八九成，收租股低好多。

18. （所以亦有個講法，發展商只會分啲垃圾嘅場出嚟做REIT。你睇長實分咩場出嚟？唔通分長江中心　和記大廈畀你？）

19. 正是因為領展之類嘅REIT，息差不多要派晒，年年清。所以好難累積子彈。一收購就會對財政造成壓力，一係借錢，一係集資。咁但，借錢總有個極限嘛。

20. 但唔係REIT嘅嘢，就冇呢個問題。

21. 新世界唔係REIT，甚至唔係「收租股」，有唔少樓賣。咁在財務上嘅安排，更加彈性。

22. 講得白少少：你做REIT，就被迫要派晒啲息。但我唔係嘅，我減派息咪得！甚至唔派都仲得！（當然，都係有個極限，如果唔再借錢，一路賺錢當然可以慢慢低返低個debt to equity，但一路蝕嘅話，個debt to equity都係會越升越高—因為你舊equity 因蝕錢越縮越細嘛）

23. 呢個，正係新世界做嘅嘢。以前一路頂住個派息，而家咪減少。其實唔係減好多啫，18%。純利都係跌咁上下，你亦可以話，佢維持返個「派息比率」—但呢個亦唔係硬指引。

24. 然後去到呢個位，你可能會再問，咁會唔會再減派息？呢個問題好易答，當然有可能，咪話隨時可減。又或者你問，減咗派息，甚至唔派息，但會唔會都仲係供股批新股？

25. 呢個問題，短答案當然係唔知。但長答案嘅，可以分兩個角度睇。第一個係narrative方面，有趣啲。第二個係真係講生意方面，冇咁有趣。所以先講第一個。

26. 留意嘅係，新世界出業績，傳媒分析員當然窮追猛打。未減派息已經畀人估佢有機會集資，咁結果業績倒退，又減埋派息，當然更多人問。雖然我依然唔明白，大家期望有乜答案，唔通話你知「會呀，好快供股，你好走人啦」咁？

27. 正路嘅做法，都係答咗第於冇答，「視乎情況」「公司認為現時財務狀況穩健，但不能排除之後情況有變，所以不能排除任何可能」（然後可以由聯儲局講到烏克蘭講到氣球講到台灣講到中國人口下跌乜都得）。

28. 不過，新世界嘅做法，就唔係幾正路。

29. 鄭志剛本尊親自出嚟，講「可預見嘅將來」，都冇配股或供股集資計劃。

30. 固然你可以學我咁，十分cynic，「呢刻冇咁嘅計劃」，「聽朝就有啦」。而咩叫「可預見將來」亦係絶對不能預見　—　下個月就集資一樣得。「嗰時冇預到情況咁變化」（然後再由聯儲局講到烏克蘭）

31. 不過啦喎，就唔一定真係咁滑頭嘅。要知嘅係，其實鄭志剛可以唔使粉墨登場，有啲公司都係踢啲副手出嚟。佢亦都可以唔答，或者帶你遊花園。

32. 即使冇乜留意股市樓市，都應該識鄭志剛。有頭有面嘅人，我估都真係要面嘅，唔係十足信心，照計唔敢咁樣講（不過講明先，人地話唔供股唔批股咋下，冇話唔減派息）

33. 仲有一個重點：佢本人家族，亦係大股東。同領展成班都係打工嘅，又有啲唔同。即係點？即係之後幾年你都仲見佢坐定定。但，打工仔嘅管理層，就算同你講「一定唔供股」　—　扯，下個月換條友咪得，上手講嘅嘢唔使入佢數喎。

34. 所以，我估新世界，真係應該短期內（一年？）唔會供股或批股集資。

35. 而另一樣嘢亦都係，呢啲家族生意，係咪輕言供股？我知長實都供過股。但，供股即係要大股東自己掏私人錢出嚟，佢地未必制。相反冇大股東嘅，CEO係打工仔嘅，供股就十分容易。你睇匯豐渣打領展都係咁。

36. 順帶一提，大股東會唔會唔供？好少的。特別係家族生意，唔通畀人攤薄咩？況且，即使家族唔介意被動攤薄，亦都好少會唔供　—　因為你大股東唔寫包單話供，根本單嘢都好難出到街　—　你其他人見大股東都唔供，仲點會跟？

37. 好啦，以上係narrative啲嘅講法。

38. 正經啲嘅講法，亦好簡單，你咪睇下公司今年嘅情況會點。照計呢，就點都好過2022年，租金會好咗，酒店又好咗，甚至賣樓都會好咗。事實上，公司有唔少賣咗嘅樓，係未入帳嘅。

39. 咁如果今年盈利好返啲，就當然可以減低個財務壓力。咁照計佢呢刻都唔供嘅，睇怕之後都會頂得住。除非再有啲好意外嘅事啦

40. 亦可以留意嘅係，星期五新世界一度跌10%，但收市已經收窄到大約3%。明顯市場係唔太擔心嘅

41. 最後一講：留意公司有講埋，「不時做啲策略檢討」。用人話講，即係可能會賣部份資產，或者分拆上市。

42. 同埋最重要嘅係：新世界自己唔集資啫！下面嘅公司可以嘛！

43. 最後你可以留意下，講T12（過去12個月）嘅股息率，新世界去到9%。但記住，呢個世界係冇「穩穩陣陣」收9厘息呢回事。唔係唔買得，但你真係唔好諗住買1000萬然後每年收90萬息做生活費，會死人的。

電訊盈科8 純利大跌都照加派息。

44. 極速評多兩單

45. 首先，8號仔電訊盈科出咗業績。似乎麻麻地。「好消息」係派息加咗少少，但「壞消息」係盈利大幅倒退。又，點解盈利大跌都可以/都要頂住個派息？你就可以諗下。

46. 同上面講新世界有異曲同工之妙，隻嘢而家，9厘息！但，請將上面講新世界嗰段睇多次

47. 之後會細講，但可能等我返香港先，用部notebook搞個Excel比較難

渣打2888入北水名單？

48. 最後一單仲好玩，恒指季檢。成份股不變。冇乜討論價值。國企指數成份股有少少變，但一樣冇乜討論價值。反而「恒生綜合指數」成份股有變，呢個就有討論價值。

49. 首先搞清楚，「恒生綜合指數」就唔係「恒生指數」，門檻低好多，五百幾隻。但我想你睇嘅係：渣打入咗恒生綜合指數。

50. 會點？我都唔係100%肯定，但似乎代表渣打好可能會入到「滬港通」。即係有北水買，「供求定律」，「需求增加股價就會升」（講笑的，唔好咁膚淺）

51. 留意嘅係，首先我都唔係好肯定係咪會入。二來，亦可能一早預期晒。三來，亦冇話入咗去一定有北水買。四來，亦冇話一定會升。

52. 不過，就畀多個角度你思考。Just in case 可能炒上嚟，唔好又話我冇提你或馬後炮。