領展823 除權，香港電訊6823業績，Nvidia績後大升 (Patreon)

快手小小匯豐跟進。「有講派50美仙息咩？」

領展除權，股價跌幾多？

而家甩身太遲了，你會收到威士。咁會值幾戔？

一手領展先五千幾銀，你想啲威士值幾錢？值幾千好未？

NOW台嘅嘢：香港電訊6823業績極速評

Nvidia：有埋個Excel玩

Nvidia嘅嘢：大！師！冇！點！你！　早早買咗，亦叫你買

明明盈利跌一半，「壞消息呀」，做乜股價仲大升14%？

AI，就梗係買大公司。講完

但，估值呢？冇平過！正如VISA 愛馬士一樣，長期咁貴

對住啲長期咁貴嘅公司，可以點買先避免到摸頂？

1. 忽然間又好多嘢寫，用咗我好多時間，所以我索性一篇拆兩篇。費事到時又鬧太長冇心機睇，又或者鬧出唔夠文。一般我都控制在兩千幾字之內。

快手小小匯豐跟進。「有講派50美仙息咩？」

2. 之前匯控嗰篇，啲圖出唔到。實情耐唔耐都有呢啲問題，原因可以好多，有時係我問題，有時係Patreon問題，有時係社會嘅錯（唔同手機或唔同OS）有時我又會唔記得Attach啲Excel或者文章（呢個就一定係我問題）。

3. 留意返，最有效嘅方法就係：你之後再開嚟睇。因為Email就肯定出咗冇得改，但一般漏圖漏File我都會之後改返．

4. 另外，例如有讀者質疑，喂，匯控個業績冇講派息50美仙喎—實情，在我啲link嘅Page你咪見到有講。個「業績」出嗰時冇講，但之後管理層有講嘛。

5. 但當然，我亦認為唔使咁執著於呢啲嘢—就算真係有講，難道你就瞓身飛入去？文咪寫過，你不可能全靠一年嘅派息。況且，我唔係玩嘢，而係：講咗都係可以唔派的。人地話「如果冇大意外」啫，咁到時唔派，「咪好意外咯」。唔好天真到以為咩「嘩管理層公然講大話都得」　—　之前出埋公告講埋派幾多除埋淨都可以彈弓手啦！

6. 真係要由歷史汲取教訓呀，除非你死拗「今次唔同」「以前嘅經驗冇意義」

領展除權，股價跌幾多？

7. 首先兩單快嘅。領展今日（星期五）會除權（你亦可以話係星期四收市後除咗）。

而家甩身太遲了，你會收到威士。咁會值幾戔？

8. 兩樣嘢，首先，生死線已過。你星期五買嘅，供股唔關你事，唔想供嘅唔使你供，想供嘅亦冇得你供（除非之後你買威士）。同樣地，星期四未沽嗰啲，頭已洗濕，一定有威士收，一係供股，一係沽威士。

9. 第二，除權價，其他嘢不變的話，就係（53.2 X 5 +44.2） / 6，即係51.7（53.2係乜？就係星期四收市價）。你星期五開市就會見到咁嘅東西，但唔會計入去「股價升跌」。

一手領展先五千幾銀，你想啲威士值幾錢？值幾千好未？

10. 最後，你隻「威士」嘅市價，就大約會係（領展股價　- 44.2），呢刻大約值7.5。不過留意返，因為5供1，所以一手領展100股，只係收到20隻威士，即係百幾蚊，未計你沽出去嘅佣金。但，差不多啦，一手領展都係5320蚊，隻威士咪百幾蚊，唔通幾千蚊？

11. 但留意仲未派畀你仲未有得Trade，所以只係呢一刻。之後當然以當時領展股價為準。

12. 有乜問題可以再問。

NOW台嘅嘢：香港電訊6823業績極速評

13. 第二單亦都快寫，香港電訊6823出咗業績。我係有買些少嘅

14. Attachment 有個Excel，未更新啲數但你可以玩住先，或者自己入。阿媽8號仔電訊盈科就今日（星期五）先出。

15. 好啦，你最需要知道嘅嘢，就係：冇減派息。其他都可以之後先講。

16. 另外，關心時事嘅你，提提你，佢冇再將NOW台條數分開報出嚟，只有個收入，但冇EBITDA（盈利更加從來冇公開）。呢種安排係2022年中期先開始的，原因你可以估下。

17. 仲有留意，NOW台嘅業務，係8號仔踢畀6823的（當然係「賣」，但老母賣畀仔，左手交右手咁）。時為2020年8月，你亦可以估下點解。

Nvidia嘅嘢：大！師！冇！點！你！　早早買咗，亦叫你買

18. 好啦，最後，NVIDIA。拿，早早買咗架啦（新讀者可以搵Index搵返我啲持股名單，呢排都冇乜變）。年頭都提過，出業績前都有提你（OK，篇Patreon比較遲，但我總不能就咁一句嘢出篇文，所以留意我Facebook都係好的）

19. 結果出完業績，即時升14%！

20. 只能快寫，下一篇再詳細啲。一句：呢啲先係AI股。

明明盈利跌一半，「壞消息呀」，做乜股價仲大升？

21. 之前啲友熱炒啲咩AI股，雖然冇Metaverse咁流，但本質冇乜分別。而我1月嘅文都寫咗，當然最後都係買Big Tech　—　講乜都假，你拎到嚟賺錢先得。

22. 可以話畀你知嘅係，ChatGPT在技術上，並唔係咩最大嘅突破，以前一路都有呢啲東西啦。但你話，今次隻嘢好勁喎。冇錯，點解？因為用得多Data！

23. 你可以問返專家，但呢啲AI訓練，就好似打機練功咁（甚至係練毒），靠食得多嘢，靠練得耐。你不停train佢，咪會做得好，咪唔會亂答嘢。

24. 咁而做呢啲咁嘅東西，就當然係要晶片。Nvidia就係做呢啲東西。

AI，就梗係買大公司。講完

25. 於是一個好通俗嘅講法：美國淘金熱之中，乜人發咗達？去淘金嗰啲，當然淘唔到金，好多死晒。但，咩人發達？賣鏟嘅人，同埋賣牛仔褲嘅Levi’s

26. Nvidia就係賣鏟買牛仔褲嘅公司。

27. 你睇到，既然ChatGPT佔咗先機，微軟自然會加大投資。對手Google一樣不甘示弱，唔會想落後　—　反正呢啲公司有的是錢同人材，可以燒（所以，細公司死得啦，你有幾多錢燒？我當你有都好，你啲人都畀人搶晒啦）。仲有連中資嗰啲都加入戰團。人人軍備競賽，發嘅當然係軍火商。

28. 不過如果長期讀者可能會發現：喂，上面嗰啲，narrative嚟咋喎。係啱的，我好有信心Nvidia會大大受惠，我甚至幾相信呢個軍備競賽會玩到一段日子。

但，估值呢？冇平過！正如VISA 愛馬士一樣，長期咁貴

29. 之不過，估值呢？幾時個矛盾都係平嘢冇好，好嘢冇平。係好考功人的。

30. 又送埋個Excel畀你，但好快話你知，你睇數，就好難買得落手的。舊年純利，44億。留意前年係98億，即係跌咗超過一半。市值就5820億，你用98億計都很貴，用44億更加癲。

31. 係喎，埃汾話過唔好太貴買啲嘢。咁你高位買Nvidia，係插咗七成的！包保你嚇到沽走。但我冇。

32. 但，又真係見到好多好動聽嘅股票，都係相當貴的。愛馬士固然係，VISA亦係，Nvidia亦係—　留意呢啲已經係好「實業」嘅公司，仲要係好大嘅公司，有晒盈利，唔係啲蝕錢嘅發夢股。

對住啲長期咁貴嘅公司，可以點買先避免到摸頂？

33. 咁點？實情都好簡單。老規矩：壞消息嗰時買。你睇舊年又講乜鬼晶片寒冬（係喎，你睇Nvidia純利得返一半！），嗰時股價大插，你買就最好。舊年10月100蚊多啲，又話晶片寒冬又話加息又乜，而家250蚊。

34. 事後講就得，邊有咁易？正是如此。咁簡單啲，冇乜消息嗰時買。其實舊年任何位買，渣到而家都仲贏錢。

35. 都做唔到？都唔奇。但講過，就避免「好消息」時買得太多。

36. 但，而家係「好消息」喎！冇錯。而家買，肯定值搏率唔係好高。

37. 咁可以點？實情咪還原基本步，想買嗰時，咪買！唔使睇佢有乜消息。冇錯，可能你都會有時係「好消息」飛咗入去，但，你總唔會每一次都係咁啩！

38. 定期投資，或者有錢就買啲心水股，係十分有用的。好過你自作聰明咁，見到「壞消息」又唔敢買（甚至沽走），「好消息」就飛入去，然後最後變咗低位沽高位追。

39. 我講嘅東西，好多時都係教你點去避開啲人性弱點。

40. 下篇先同你詳細講返啲數。但你真係見到，根本就係應該啲業績唔得時買入去。或者至少你見到好似最壞時間已過，就可以買。例如舊年第三季。