創科669 被沽空機構狙擊嘅嘢：真定假？買唔買得？ (Patreon)

沽空機構話創科誇大利潤，堅定流？

誇大利潤係咪即係「造假數」？又好似唔係

其實期望我答乜？「條數一定假，沽晒佢」定「肯定冇根據，瞓身」？

「睇年報」就知係咪造假嘅，啲尊尼亞屙跌打發晒達啦，使等沽空機構？

留意，個指控針對「毛利率」，唔係收入。點解？

「毛利高得不合理，人人跌佢都升」—人人食兩餸飯，我就唔可以搵大錢？

不過電鑽公司有咁嘅情況，又係比較少見。

金融101：「開支資本化」是咩回事　—　係指控重點

會計101：甚麼是開支？Opex vs Capex

「埃汾啲文好有意義」—球員轉會費咪Capex！份糧咪Opex！

「開支資本化」合唔合法？一時時。可唔可以變大利潤？都係一時時

以前啲公司如果作大，又點收科？（留意，冇爆煲架喎）

「講咗咁耐，即係快手沽走定撈？」

最後你可以留意埋創科嘅股價走勢：之前都跌咗四成了

沽空機構話創科誇大利潤，堅定流？

1. 好多讀者關心嘅創科669．畀沽空機構指佢誇大利潤，即係，講到好似造假數咁啦喎。停牌前跌咗兩成，今日（星期五）復牌。

2. 然後公司都係例牌回應，梗係話失實（唔通話「咁都畀你發現，叻仔」），保留追究權利之類嘅廢話。分析員亦同樣地，一般都係話啲指控失實，唔通話「我睇咗咁多年都唔知係假」（但呢個有可能係事實）。

誇大利潤係咪即係「造假數」？又好似唔係

3. 所以官方回應，多數可以不理，除非公司有啲更有力嘅數字：但偏偏公司因為差不多出業績，就不能提供呢啲嘢（呢點值得你諗下）

其實期望我答乜？「條數一定假，沽晒佢」定「肯定冇根據，瞓身」？

4. 原本未必會寫，但見有讀者點唱，有人買咗，就作答吧。不過可能我嘅答案都係令你失望嘅。

5. 因為其實我唔係好知，讀者期望我會有個乜嘢答案。係咪你會想我話你知：「啲數擺明係假嘅，快啲沽晒佢」。定係想我話你知，啲數係真嘅，完全冇問題，快啲瞓身買。

「睇年報」就知係咪造假嘅，啲尊尼亞屙跌打發晒達啦，使等沽空機構？

6. 啲數真定假？講真，鬼知咩！有啲人企圖走去咩「睇年報」，亦係多餘。如果睇年報可以睇得出有有造假，做audit嗰幾個已經發晒達。好多咩事後話「睇年報教你睇古惑」，都係事後畫返個靶上去啫，真係睇到嘅，你唔一早瞓身沽空？

7. 不過，都可以留意下幾樣嘢嘅

留意，個指控針對「毛利率」，唔係收入。點解？

8. 首先，個指控主要針對「毛利率」。冇針對個收入，理論上收入係比較難做假嘅（但唔係唔得），特別係你面對顧客嘅企業，總有個譜。B2B嘅就易啲，啲業務越傳統嘅越難。瑞幸咖啡咁，打開門做生意，啲數作得太大，人地搵人去你間舖數，好易穿煲。

9. 個指控話個毛利率高得不合理，連升10年，冇一間咁嘅同業可以咁。

「毛利高得不合理，人人跌佢都升」—但，人人食兩餸飯，我就唔可以搵大錢？

10. 咁呢個「超乎尋常嘅毛利率」往往又真係造假會見到嘅東西，但，只係造假公司多見到呢樣嘢，不代表有呢樣嘢嘅公司就多數假。公司亦照例會話你知，係因為自己做得好之類。

不過電鑽公司有咁嘅情況，又係比較少見。

11. 不過可以一講嘅係，做電鑽之類，似乎唔應該同行家爭得極遠　—　你做iPhone 做愛馬士，毛利可以高過同業好多，可以同人地嘅走勢唔同，但做電鑽就似乎可能性低啲（但，未必不可能）

12. 另外，其實係咪真係指控佢「假數」？都未必。

金融101：「開支資本化」是咩回事　—　係指控重點

13. 留意當中涉及一個幾有趣嘅概念，就係所謂嘅「開支資本化」。有小小深，但未必解唔到。

14. 「開支」可以係個好含糊嘅概念，平時日常生活講，你科水出去咪開支，甚至有人覺得買樓買股票供保險都係「開支」。但去到公司嘅會計，就搞清楚，有所謂Operating Expenses（Opex）同Capital Expenditure（Capex）之分。前者，就真係「開支」，即時影響你盤數賺蝕，後者，就唔係咁簡單。

會計101：甚麼是開支？Opex vs Capex

15. 例如乜嘢係Opex？照計易理解，開快餐店，出糧咪開支，電費咪開支（而家有時「交租」都玩到資本化，人都癲！）。咁但，乜嘢係Capex？你中央廚房買部機返嚟炸豬扒，咪Capex

16. 亦即係話，你嗰年出200萬糧，就200萬開支。但你嗰年買部200萬嘅機，就唔會係200萬開支。「所以炒晒啲人用部機會有著數？」—又唔係咁簡單。炸豬扒嘅機，就要「折舊」，將個成本攤返開佢，只係唔使一年食晒落去咁解。

17. 亦都畀你見到，例如國泰有線，炒晒啲人，咁你員工成本咪減晒。但你啲器材飛機，年年折舊，係冇得走嘅，你一個客都冇都要硬食。因為早年你畀咗錢買

「埃汾啲文好有意義」—球員轉會費咪Capex！份糧咪Opex！

18. 順手話埋你知，「其實我在Facebook寫球員轉會費都係咁上下」，所以成日勸你地，睇嘢唔好咁狹隘，「見到XXX我就飛」。球員人工就係Opex，但個轉會費係Capex！（雖然球員識行，唔係「固定資產」，但Technically你唔係買咗個人返嚟，你份買咗份約，right to use）

19. 開支資本化，就係將opex變到capex咁。得唔得？只能答你睇情況。一個例子係：例如球員有簽字費的話，我將呢舊錢打埋落個轉會貴得唔得？理論上好似係得的（我估咋下）。

20. 不過，機器同球員，一般都有固定年份嘅「壽命」，年年折舊，咪年年有開支。但有時有啲「無形資產」，可以攤好耐，甚至唔使年年攤（每年做test喎，有時啲「Goodwill」就係咁，至於甚麼係Goodwill極長篇，我在Facebook寫過下，你慢慢考古）

「開支資本化」合唔合法？一時時。可唔可以變大利潤？都係一時時

21. 好啦，份沽空報告，就似乎話創科啲「資本化」不合理地高。講得直接啲：有啲原本係開支嘅嘢，我當係「研發」（研發費用有時可以「資本化」），咁個開支咪縮細咗，條數咪靚啲。

22. 問題係，你大約都估到，呢啲數字遊戲啫，醜婦終需見家翁。你呢啲操作，唔會變到啲盈利出嚟的，只係今日透支咗將來嘅嘢。講得直接啲，就正如沽空報告所講，收埋咗在啲「資產」中。到有一日你要write off，咪一次爆晒出嚟（你可以搵返我在Facebook講巴塞同祖雲達斯嘅「交換球員」，好有異曲同工之妙）

23. 事實上，以前有啲類似呢類操作嘅公司，亦都係去到有個位，紙包不住火，然後咪出爆大鑊嘅業績。以前我都寫過，差不多所有公司都鍾意衰嘢一舖過爆，唔會唧牙膏

24. 所以去到重點啦喎：沽空機構似乎係話，嚟緊創科啲業績就會爆大鑊架啦。

以前啲公司如果作大，又點收科？（留意，冇爆煲架喎）

25. 問題就嚟啦：咁，其實算唔算造假？我當創科可能真係將所有呢啲前世做過嘅嘢，一次撥晒出嚟。咁，咪可能蝕舖勁嘅　—但，咁不代表間公司就會執笠，甚至不代表股價一定大跌（炒！預！期！）（況且，未出到跌咗一大截）

26. 呢度亦去到最後一點：留意出沽空報告個時機，有人話係「聰明」。因為係出業績之前，公司不能話出啲數字回應（我嚟緊賺幾十億呀！爆你條毛！），亦不能做回購（以前唔少大陸公司就係咁頂住個股價，甚至夾到沽空嘅人輸死）

「講咗咁耐，即係快手沽走定撈？」

27. 冇錯，講咗咁耐，我都係答唔到你，到底條數真定假。但，我傾向覺得真，至少冇咁快爆煲。

28. 如果沽空報告好有信心嘅，使乜等佢出業績冇得回應嗰時先出？正係因為個業績一出嚟，好可能就見到係咪盈利會大跌　—　咁而家都跌咗，人地平倉走人了。到時你先見到冇事，又如何？

29. 不過，對於問我嗰個讀者，其實答案就簡單得多。實情你根本唔使理係「真」定「假」，好可能你永遠都唔會知。正如你唔使研究未來幾十年會唔會世界大戰，你根本可能永遠唔會知，亦唔使知

30. 個讀者原來好似話係15蚊買咗，扯，咁使鬼理佢咩（FYI隻嘢大插完都仲有75蚊）

31. 真係驚嘅，咪教你萬能嘅方法：「拎返個成本」。你咪沽兩成，或者沽一半。拎返晒個成本，剩返嘅咪食花生。

32. 只要你唔係成副身家買晒創科，根本冇乜嘢好驚。但如果你係大半個倉都買晒嘅，咁……就祝你好運。我就從來冇叫人大半個倉買一隻個股的

33. 所以你話，你手痕，想趁低買少少？我覺得係OK的。不過，我就唔會。同埋我自己覺得，跌兩成實在唔係好夠多。

最後你可以留意埋創科嘅股價走勢：之前都跌咗一大截了

34. 最後你仲可以留意一樣嘢：創科本身嘅股價。未有沽空報告前，高位都跌咗一半。

35. 當然在港股嚟講唔算好誇張，但留意嘅係公司再之前股價咁強，好大程度同美國嘅房地產市場有關。但後來嘅事你都知，加息，經濟又放慢咁，房地產市場明顯回落。

36. 唔多唔少，創科本身都跟住呢個趨勢：即係你可以話，沽空機構更加順住個勢。分分鐘冇呢啲報告股價都會照跌，有啲半信半疑嘅人都好可能會沽走先算（如果房地產市道好就可能唔理），亦係我自己就唔會特別敢買嘅原因。