留意Nvidia，領展星期五除權，匯控業績，同埋「派息」是甚麼回事 (Patreon)

領展供股提提你

是日重點：匯控業績勝預期。不過食飯講起都冇人理

係喎，內房撥備大增，但大陸都仲賺34億。歐洲蝕錢唔見人講？

加息有利銀行嘛，係真唔係？同你睇下

今年淨息差應該只會更加靚。但係咪就飛入去？

匯豐今年跑贏大市成條街，舊年都係，其實2021都係跑贏一大截

2020年「彈弓手」取消派息嘛　—　咪就係嗰時飛入去，打後3年都跑贏！

你2020年「彈弓手」後買，一定畀人當你智障。所以，你話主流啱定錯？

「公司冇誠信　估值會永遠受損」，「唔知幾時先派得返息」

所以，「壞消息」唔買，唔通「好消息」先買？

股票，就多數都係升又升過籠，跌又跌過籠。「真相」就在兩者之間

「彈弓手」派少咗8蚊。但股價跌咗19蚊。明顯跌突。點解？

另一角度睇，「彈弓手」後，股價跌咗40%—　你有冇派少40厘息？

Dividend Irrelevance Theory

公司打晒開口牌，五成派息比率，今年0.5美金股息 —　疫情前水平了

匯豐5年跌24%，但好過恒指。計埋收息同分段，贏錢絶對唔難。

我匯豐執超過20%，有圖有真相

如果有人留意到嘅：星期三晚收市Nvidia就會出業績，可能有啲好嘢。就算冇嘅，如果大跌嘅，就更加係買嘅機會。呢啲就AI股啦，遲下深入講。可惜我睇錯咗日期，今日先記得提你。

領展供股提提你

1. 之前週末冇停過，出咗兩篇愛馬士，休息返兩日。昨晚同咗領展啲管理層食飯（唔止我一個啦），CEO都親自出現，比較少見。當然冇內幕，但都有啲新嘢可以update，聽日或後日再寫，有嘢都可以再問

2. 不過提定你，星期五24號除權，亦即係23號星期四就cut off。亦即係話，你唔想供股嘅，最遲星期四好賣咗佢，星期四賣都仲得。如果去到星期五，你賣咗都會照收到威士。掉轉頭，嗰啲想儲夠5手唔要碎股嘅，亦即係星期四你就要買，星期五買係冇用的，星期五你買嘅嘢冇得參加供股遊戲。

3. 再同埋，亦即係星期四收市後　星期五開市前就會「除權」。唔好大驚小怪，唔好奇怪做乜星期五開市個價忽然間冇咗一截。因為星期四冇沽，星期五仲渣住嘅人會收到威士，亦即係你一係可以沽咗佢收返少少錢，一係你可以用44.2蚊去買領展。所以同星期四嘅人比，你有「多咗啲嘢」。

4. 除權價點計？講過了，咪就係　（星期四收市價Ｘ5 + 44.2）／6

是日重點：匯控業績

5. 首先講返，匯控業績，實在太長篇，但亦唔係極多人有興趣。即使今年升咗25%，我食飯同講起，都冇乜人有興趣。所以係咁意講一篇。

6. 不過值得講一樣嘢：同我食飯嘅，兩個都係科企工程師（人工高我幾倍嗰啲）。唔多唔少佢地應該對科技股有啲偏好。而其實咁係唔好的，升26%嘅微軟，同升26%嘅匯豐，帶嚟嘅錢係一樣的。

7. 簡單嚟講，個業績係幾好嘅。雖然唔多唔少受累於內房撥備（香港啲銀行仲勁），但整體還不錯。難道你就唔做大陸生意？公司話個情況應該改善緊，怕且都係。

係喎，內房撥備大增，但大陸都仲賺34億。歐洲蝕錢唔見人講？

8. 況且，你睇到大陸業務都仲係幾賺錢嘅，相反北美貢獻好細，歐洲直頭蝕錢。所以你見到好有趣，啲友會聚焦於內房撥備，但人地撥備完都仲相當賺錢。相反，冇乜人會提歐洲輸錢。再一次畀你見到，多人講嘅嘢，未必係重點

9. 亦因為明顯亞洲先係profit center，所以係會不停有人講要分拆亞洲業務出嚟的。

加息有利銀行嘛，係真唔係？同你睇下

10. 你見到今年唔少銀行股表現幾好（唔係每一間都係），匯控尤其係，今日（星期三）都仲逆市升5%，年初至今升咗25%，跑贏港股美股成條街。好可能係因為加息之下，你見到銀行啲淨息差真係升得幾好。由1.24厘，升到1.48厘。第四季去到1.74厘添！

今年淨息差應該只會更加靚。但係咪就飛入去？

11. 舊年全年先1.48厘，但第四季係1.74，好可能仲有得升。就當今年都係1.74，都會見到之後出啲業績仲靚。但反映咗幾多就另一回事

匯豐今年跑贏大市成條街，舊年都係，其實2021年都幾好。

12. 講開個股價表現，唔止今年強，舊年表現亦都唔錯，有得升，仲有少少息收，亦係跑贏港股美股成條街。甚至2021年都係相當唔錯。

13. 問題係，呢幾年同人講你渣匯豐，保證你畀人恥笑。由專家到朋友，個個都會笑你。

14. 所以又係返返到最核心嗰啲嘢：睇你係想要賺錢，定係圍爐。但你見股市真係輸錢嘅人多過賺錢，跑輸嘅佔絶大多數，所以真係多數人就多數係錯嘅。

2020年「彈弓手」取消派息嘛　—　咪就係嗰時飛入去，打後3年都跑贏！

15. 然後又睇下，2020年匯控就跑輸好多，亦係當年爆出「彈弓手」取消派息嘅鬧劇。但搞笑在，正係嗰年你買，打後三年你都跑贏大市。但我可以200%保證，你2020年4月打後買匯控，一定畀人當你智障。唔好忘記當年仲要啲meme股喪炒。但拉勻兩年，邊個笑到最後？甚至都唔使等好耐。

你2020年「彈弓手」後買，一定畀人當你智障。所以，你話主流啱定錯？

16. 於是又係嚟嚟去去嗰樣嘢之嘛，壞消息唔買，唔通好消息先買？聽落好違反常識，但咪講咗，多數人多數係錯。就係「壞消息」，先會平，而好消息就貴。而多數「真相」介乎兩者之間，股票差不多一定係升又升過籠，跌又跌過籠。

「公司冇誠信　估值會永遠受損」，「唔知幾時先派得返息」

17. 你完全想像到，2020年4月匯控呢次「彈弓手」後，啲人會點講—而其實在嗰個時空，你又不能話佢地完全冇道理喎。就係咁先死！嗰一刻，大家當然會講到「公司冇誠信　估值會永遠受損」，「唔知幾時先派得返息」（留意英國的確唔畀佢2020年派息），疫情唔知幾時完。要幾悲觀有幾悲觀—而再講一次，雖然事後證明係過度悲觀，但嗰一刻咁樣講，你又真係覺得幾有道理喎。

所以，「壞消息」唔買，唔通「好消息」先買？

18. 可惜，結果都係唔係咁。「主流」嘅嘢，唔使太認真。正如上次講愛馬士你都見到，有幾多人會覺得個銷售跌兩季後就即時反彈返去疫情前，之前越升越有？你最好be humble，接受自己好多嘢都唔識，未來就係不可知，我都成日咁同你講。

19. 你見我成日恥笑啲「主流」講法，並唔係我話自己點叻。但我的確就係好相信大家都係唔知，所以但凡有人講到點咁肯定，我就必然會質疑。然後無數次你都見到呢啲「肯定」多數係錯。

20. 疫情後股市固然話咁快返生。香港封關零售死晒嘅2022年太古升六成，跑贏港股美股十幾條街。俄烏開戰後油價一度仲低過開戰前。俄烏開戰後而家盧布仲高過開戰前水平。大陸內房爆危機但中海外華潤置地舊年又係跑贏晒美股港股。全部都可以將啲「主流意見」大巴大巴打。你見到，嗰啲人嘅思考方式，係錯嘅。

股票，就多數都係升又升過籠，跌又跌過籠。「真相」就在兩者之間

21. 係咪好難捉摸？唔知啲嘢幾時會升？係的。所以，升時唔好太興奮，跌時又唔係太悲觀。唔想咁煩嘅，買多啲ETF，買少啲個股，多數都對你有好處

22. 仲有，你諗真啲，要你2020年買匯控，真係要極大勇氣，仲要畀人恥笑。呢啲壓力，唔係正常人可以容忍（唯獨係我呢啲咁反社會嘅人先容忍到）。所以，就不如買指數，或者定期買。我就個個月買匯豐，已成為一個指定動作，唔會因為啲人講到世界末日買少啲，但亦唔會因為啲人講到佢返生而買多啲。（但當然，你可以調較多啲少啲，但唔好太離譜咯）

「彈弓手」，對派息有幾大影響？但股價跌咗19蚊。明顯跌突。實係咁的

23. 講返呢個派息，絶對激起千重浪。我到而家都唔係好明，當年點解取消咗2019年個末期息，股價可以跌咁多。你都思考下，例如下次再有高息股唔派息，你可以參考返呢個歷史（除非你又話「今次唔同」）

24. OK，你話影響到2020年都冇派。甚至你話2021 2022都派少咗。但，其實嗰度有幾多錢咁大把？

25. 況且，你個股價唔應該係受一年，或者兩三年嘅股息咁大影響　—　會有影響，但當年肯定係跌多咗。金融101話齋，金融資產嘅價格，一般都係現金流折現，Discount cash flow．冇咗兩年，唔應該咁大影響

26. Attachment 有兩個Excel（遲下我會整埋一個），你可以睇下啲派息（呢度都有，但我幫你加埋全年）

另一角度睇，「彈弓手」後，股價跌咗40%—　你有冇派少40厘息？

27. 極之粗略咁計，未彈弓手之前，一年4蚊港紙息。2019-2022呢四年，總共只係8蚊，原本「應該」係16蚊。咁你頂多話欠咗你8蚊息。

28. 但你可以睇下當年彈弓手後跌咗幾多（留意我已經冇計彈弓手前嘅跌幅）？係19蚊。另一個角度睇，股價跌咗40%—咁你有冇派少40厘息呢？

Dividend Irrelevance Theory

29. 況且嚴格嚟講，呢個「派少8蚊息股價跌8蚊」係相當錯嘅，只係一個講法。首先，嚴格嚟講呢，派唔派息，係唔應該影響股價的（呢個比較深嘅金融嘢）。因為你派咗息咪又係要除淨，況且派咗息公司咪少咗錢。冇派到嘅，可以之後派返。亦即係，上面講discounted cashflow，你前面冇咗，後面加返大，照計影響唔會好大。

30. 不過我諗呢度就太過深了。我估你應該記住嘅係：股價，唔應該咁受一年嘅派息影響。當然你可以由一年唔派延伸到「之後年年都唔會派」，但你會見到，多數呢啲諗去都係錯嘅，呢啲就真係「羅素雞」啦。你將一年嘅嘢當係永遠。正如年年派息你又以為唔會停。

31. 講咗一大輪幾空泛嘅嘢，畀返啲實質嘢你。

32. 留意，匯控業績前股價已經好強，但在香港中午出完業績後，又係跌落去，好多時都係咁。更奇怪到英國同美國時段又大升返，唔好忘記星期三晚美股仲要係大跌。你話「大戶」咩？又未必。而家我冇計，但匯控早幾年，在香港嘅成交仲多過英國。

公司打晒開口牌，話五成派息比率，今年派0.5美金股息 —　疫情前水平了

33. 另一個市場對匯控業績幾興奮嘅原因，又係同派息有關。管理層畀咗幾清晰嘅指引，比較難得，特別係而家好多公司都唔鍾意將啲嘢講到咁實。以前可以側側膊，而家會畀人cap晒圖錄音片第時拎出嚟翻舊帳

34. 話說匯控講返，未來兩年會維持大約50%嘅派息比率。呢個已經係幾難得嘅指引（2022年係44%，2021年係40%）。但當然唔包括一啲one off嘅項目。

35. 更難得係公司幫你計埋數，話今年會派到50美仙。3.9港紙左右。留意返，呢個差不多係疫情前嘅水平了，亦係公司希望做到嘅。計落到6厘幾息，但當然，上面咪講咗，你不可能只睇一年嘅派息啦，亦冇得保證之後幾年唔會減，甚至冇得保證唔會供股。

36. 最最最後，仲打算會派特別息添。一股0.21美元，但應該2024年先派。

5年跌24%，但好過恒指。計埋收息同分段，贏錢絶對唔難。我咪例子

37. 最後可以講一講，匯控過去5年，你見股價跌咗24%。但首先，呢個表現已經跑贏恒指不少。仲有唔好忘記，中途你都收咗唔少息。計計數，5年跌咗19蚊，但5年收咗12蚊息，即時蝕少好多

38. 再加埋分段買嘅，實情買匯控要賺錢，完全唔難　—　我就係賺錢嘅。畀你睇埋。我呢度甚至未計收息添。