愛馬士全方位分析（下）：睇股價（有埋個 Excel） (Patreon)

研究下愛馬士股價圖，順便資源共享

睇下高位低位，發生乜事？點去捉？

遮住個日期同股價，在股價圖中，你未必搵到幾時係疫情

疫情底下，愛馬士只係跌咗兩成多啲。點解？

10蚊跌到5蚊，再升到1000蚊—咁仲點睇到嗰50%跌幅

疫情低位，升返200%。但2022年再跌一半！點解？幾時見頂？

然後2022年低位，又再升一個開。咩位見底？又點解？

20年大插你就話打擊銷售啫，但21年明明收入係咁升

經濟一回事，生意另一回事，股價又再另一回事，你賺唔賺到錢再一回事

疫情銷售急跌股價都只係跌三成，但21年銷售升股價都跌四成！仲大鑊！

睇下啲銷售幾時放慢同回升，又睇下啲股價幾時見頂見底

1900億市值，舊年純利34億。你話貴唔貴？

點解長期咁貴？

疫情前，七年純利先一個開。疫情後，三年純利就一個開！點解？

面對啲從來都冇平過嘅股價，可以點避免摸頂？

我仲賺緊五成

點管理匯率風險？

1. 上篇講完愛馬士啲數字，今篇睇更重要嘅嘢：股價！呢度我都Attach埋個Excel畀你參考

研究下愛馬士股價圖，順便資源共享

2. 我在Excel度做咗個3年嘅股價圖，剛好就由疫情前開始做。邊度搵？其實Yahoo Finance真係好東西，你可以download 歷史股價，有個Excel畀你，即時就整埋個圖。快靚正而且免費。我放埋落自己個Excel度，你可以開嚟睇

睇下高位低位，發生乜事？點去捉？

3. 快手同你睇下個股價圖，然後睇下有乜啟示。點樣捉到低位高位？

4. 首先我想問嘅係，Where is the 疫情？如果呢個圖我遮住股價遮住日期，你搵唔搵到邊度係疫情？都幾難！

遮住個日期同股價，在股價圖中，你未必搵到幾時係疫情

5. 可以睇到，疫前情股價高位大約係725，20年1月中。之後當然跌，去到3月中見底，525蚊。跌咗兩成幾唔夠三成，少過大市（美股跌咗三成）。

疫情底下，愛馬士只係跌咗兩成多啲。點解？

6. 點解打後睇圖，好似睇唔到呢段跌幅？原因兩個。都係同因為拉長咗變咗5年圖有關。首先你睇Google個圖，拉到5年，就變咗用每星期收市價，個低位就冇咁低。另外，亦因為之後股價升返好多！打個比喻，你隻嘢由10蚊跌到5蚊但5年後升到1000蚊，你仲點會睇到10蚊跌到5蚊嗰50%？因為到5年後，呢5蚊，就只係0.5%。（亦所以，回報夠大嘅，根本唔會介意中間買早買遲10%，更加唔會介意嗰日有冇排隊，但你要回報大多數就要坐得長）

10蚊跌到5蚊，再升到1000蚊—咁仲點睇到嗰50%跌幅

7. 打後聯儲局無限QE，美股創新高，好多股票都創出新高，愛馬士都不例外。之後嘅新高，在21年11月中左右，1700蚊，同之前低位，升咗超過200%

疫情低位，升返200%。但2022年再跌一半！點解？幾時見頂？

8. 然後到22年，大家知，聯儲局狂加息，股市大跌。愛馬士22年上半年跌，跌到6月中見底，950蚊左右。高位跌咗超過40%！

然後2022年低位，又再升一個開。咩位見底？又點解？

9. 之後？咪一路升返，到而家近1800蚊，歷史新高，低位再升一個開。

10. 你可以mark低啲日子，然後我地再睇有乜啟示。

11. 首先，好老土但好啱嘅係：股票就係會咁大升大跌架啦！20年頭嗰浸大插，你可以話因為疫情打擊銷售，事實都係，之後因為無限QE同埋鎖售反彈升返。比較易解，雖然當時個個以為世界末日。搞笑嘅係，呢次世紀大災難，先只係跌兩成幾。

20年大插你就話打擊銷售啫，但21年明明收入係咁升

12. 但，21年下半年嗰次先玩死你，擺明係殺估值。你見啲銷售一路反彈架，但就係股價跌足四成，仲大鑊過疫情嗰次。就係因為加息。

13. 於是乎，你見到，果然經濟係一回事，生意係另一回事，但股價又再係另一回事！20年銷售重創，但股價跌幅都冇21年嗰鑊咁勁，而明明21年啲銷售一路創紀錄

經濟一回事，生意另一回事，股價又再係另一回事，你賺唔賺到錢再另一回事

14. 仲有，正如上星期嘅101文先講過：咩叫「A大鑊過B」？都真係唔係咁易量度。點睇疫情都大鑊過加息丫，對銷售嘅打擊亦大過加息好多。但，加息殺咗估值，到頭來對愛馬士股價傷害仲勁過疫情！事前你點估（但當然仲有一個原因：去到2021年愛馬士估值已經貴。所以，金句話頭，「估值好重要」）

20年疫情銷售急跌股價都只係跌三成，但21年銷售升股價都跌四成！仲大鑊！

15. 仲有，睇睇啲銷售。我想你留意Yoy嗰行，銷售按年增長。20年第一季開始走樣，第二季災難，第三季變返正數。好啦，股價幾時跌？係1月中。幾時見底？3月。除咗睇疫情同無限QE外，你亦真係見到，無論變好變壞，股價一定在「生意」之前郁咗！第二季嘅數出嚟死晒，但股價早已經見晒底。唔好咁膚淺以為咩「生意仲好差點解股價升都唔理性脫離基本」，記住，炒將來！

睇下啲銷售幾時放慢同回升，又睇下啲股價幾時見頂見底

16. 但去到21年，就真係冇得估啦。點解21年尾股價見頂？你睇啲銷售數字應該睇唔到。不過你記性好嘅，會記得其實大市都係咁上下，22年下半年就回穩。原因？又係估加息差不多去到中後段。

17. 當然仲可能仲有一個原因，留返最尾講。

1900億市值，舊年純利34億。你話貴唔貴？

18. 十分簡單地，愛馬士啲估值，都貴得幾誇張。唔知點買得落手。

19. 而家你見到，1900億市值，但舊年純利先34億。50幾倍市盈率，點買呢大佬？埃汾又話過咁貴買真係好易中伏。即使你計下半年再年度化，都唔爭得幾多。

20. 更大鑊係，我當你21年嘅低位，股價而家一半左右。我當900億市值，但21年先24億純利，一樣近40倍，都好似貴得很。

點解長期咁貴？

21. 實情，點解長期都咁貴？某程度上就係上面講嘅嘢，食水太深，護城河高，自然好嘢唔會平。啲人見佢疫情下居然咁快就復原，更加願意貴一貴都買。但當然，唔存在幾貴都肯買，去到21年下半年咪由高位插四成幾。

疫情前，七年純利先一個開。疫情後，三年純利就一個開！

22. 仲有，呢個圖更加有趣。好簡單講，re-rating ！

23. 睇純利，12年7.4億，19年15億，7年先一個開。但，19年15億，22年34億，3年就唔止一個開（已經冇拎低基數嘅20年比）。

24. 點解個增速忽然升咗？就真係我都未必識答。可能因為印錢印得多，可能因為貧富懸殊，「可能大家疫情後更加活在當下」

25. 你亦都見到，公司又再宣佈加價了。呢啲不停加價而收入純利都一路升嘅能力，就係「品牌」啦。好多老細都以為「Brand」就係「品牌」，是錯的，你一加價啲客就走晒，你嗰個只係Logo．

26. 但個增長快咗咁多，估值都貴埋，都係可以理解

面對啲從來都冇平過嘅股價，可以點？

27. 之不過，呢個咁嘅增速，係咪可以一路（我當3年啦）維持落去？似乎係唔得嘅。所以，你未買嘅，我就建議你未必好買住。

28. 實務上，對住呢啲從來都唔會平嘅股票，可以點做？其實咪又係還原本步，分段買，或者買完唔好成日睇。

我仲賺緊五成

29. 文初我講過，我係2021年4月買嘅。咁你可以見到，我一度賺過七成，但後來居然係可以跌突！但冇所謂，之後一樣升返。而家我都仲賺緊過五成。

點管理匯率風險？

30. 只要個純利一路增長，正路個股價都係會追返上嚟嘅，雖然冇得保證，亦答唔到你要幾耐。

31. 最後，愛馬士股價，五年升咗200%，你估你仲使唔使理到底歐元對美金中途郁咗幾多？我都冇理過。你渣得耐，回報夠大，呢啲東西自然冇咁重要。