愛馬士全方位分析（上）　（有埋個Excel） (Patreon)

2021年買咗LV同愛馬士．LV之前講過，呢篇愛馬士（有埋Excel）

由「倉頡」講起

泛歐指數創新高，就靠法國。法國就靠LVMH同愛馬士新高

「經濟唔好」「驚加息」「能源危機」「打緊仗」

收入純利新高，市值咪新高咯。但，點解收市純利咁勁？

「旅客未返到疫情前」—收入高過疫情前七成，純利高過疫情前成個開！

愛馬士七成毛利率，三成純利率。有幾高？高過LV同蘋果

當然，純利率高唔係大晒。LV幾錢市值？愛馬士呢？

「疫情重創經濟」「封關奢打擊侈品銷售」「求生存啦仲掛住買LV」

「通脹壓力中產冇錢買LV」「人工成本高打擊盈利」「高息打擊消費意慾」「裁員打擊消費」「旅客未返到疫情前水平」「股市大跌影響高端消費」

聽落So smart，吹水個個叻，但一睇數字就勝過幾萬字廢話

疫情有冇打擊愛馬士？梗係有啦。但有幾大，幾耐回復，先係重點

4Q19 十九億收入，1Q20 十五億，2Q20十億都冇，「好快清零」

不過，3Q20，公司收入已高過疫情前。20年下半年，純利高過疫情前

點解會咁快反彈？但知咗又點？

2021年買咗LVMH同愛馬士．LV之前講過，呢兩篇講愛馬士

1. 今日呢個唔知算唔算「專題」，但夠晒嘔心瀝血。不過，一勞永逸，做咗嘅嘢，學咗嘅嘢，始終係你自己嘅。

由「倉頡」講起

2. 唔知點解諗起「倉頡打字」，開頭嘅過程痛苦，進步緩慢，難上手，但克服咗佢，之後你就成世都贏晒人地。亦即係拳王阿里嘅名句。

3. 掉轉你用速成或者手寫嘅，易上手，門檻低。但個上限好低，點都快唔到，我認為倒頭嚟係蝕嘅。後生嘅可能話，語音啦，仲輸入法仲筆劃，但即使語音我都冇見到可以快得過我打字，仲要改嚟改去。

4. 固然你可以話唔係個個好似我打咁多字，但個原理可以應用落好多嘢。門檻低嘅嘢，一般都唔係最好。因為好簡單一個道理：如果門檻高嘅嘢唔係最後最好，仲有人肯做？

5. 講遠咗，呢篇文上下集。都唔使一次睇晒嘅。

泛歐指數創新高，就靠法國。法國就靠LVMH同愛馬士新高

6. 話說港股升咗8000點後回返啲，美股又驚通脹又驚加息。但反而歐洲股市就做得好好，早排英國法國股市都創新高。法國股市今年升咗14%，所以真係唔好以為咩「經濟唔好」「驚加息」「能源危機」「打緊仗」，呢啲咁嘅咩「經濟大事件」，唔係你想像中咁影響股市。

「經濟唔好」「驚加息」「能源危機」「打緊仗」

7. 法國股市咁強，大家都估到，同啲奢侈品股有關，早排我已經日貼夜貼，LVMH同愛馬士創新高。做乜股價咁強？咁好簡單啫，因為業績強咯！收入同純利創新高，股價咪創新高咯，好合理啫！（但，有時啲公司純利唔創新高但股價會新高，有時純利新高股價又唔新高，就涉及「估值」，所以講咗多次，唔係你讀自然科學或者歷史嗰啲直線思維關係）

8. LVMH以前都講過寫過（今次個Attachment 有埋個Excel），今次就講愛馬士，以前冇獨立講過。可能遲下先回馬槍再比較返兩間公司，兩間我都有買，2021年4月買的

收入純利新高，市值咪新高咯。但，點解收市純利咁勁？

9. 話說早排愛馬士出咗2022年業績，咁就梗係好啦。你鍾意可以去網站睇下，有乜新消息邊度開舖都會話你知。份嘢在呢度，但當然我幫你整晒啲數了，個Excel在Attachment 有

10. 上面都講咗，收入創新高，純利都創新高。但睇多啲嘢。

「旅客未返到疫情前」—收入高過疫情前七成，純利高過疫情前成個開！

11. 首先，睇收入。22年116億，19年69億。留意特登用19年，因為係疫情前，唔係疫情下嘅「低基數」。你見到，三年間收入升咗七成。

12. 另外你可以留意，即使20年，收入都有63億，同19年比跌一成都唔夠，極硬淨，然後21年已升到去90億。

13. 再睇純利，22年34億，19年15億，三年間純利超過一個開。

14. 呢度仲涉及一樣更重要嘅嘢，既然三年間收入升七成，但純利升超過一個開。純利升得快過收入，即係個「利錢」越嚟越高，食水越嚟食深。你見我幫你計埋，愛馬士嘅毛利率講緊超過七成，純利率都去到近三成，係非常誇張嘅數字。

愛馬士七成毛利率，三成純利率。有幾高？高過LV同蘋果

15. 識問嘅，當然係問同LVMH相比如何？答案係高過LVMH好多，不過可能下篇比較兩間公司先再講。

16. 同時可以比較下，同樣係「強勁品牌」嘅蘋果，一年都未有30%純利率，講緊25%左右，而唔好忘記，蘋果仲要有啲服務收入，呢部份嘅純利率係高嘅，換句話講你只計賣硬件產品，蘋果毛利率更低。

17. 另外可以講，微軟毛利率就高啦！高過愛馬士。但真係有啲唔同，因為微軟唔係主要賣硬件產品，係賣軟件。早期啲研發成本當然高，但一搞掂後，之後等於印錢咁滯，Office 同Word你年年畀錢，佢唔使交租唔使賣廣告，仲要差不多賣幾多套都係一樣成本，唔似iPhone Mac機咁部部都有成本。

當然，純利率高唔係大晒。LV幾錢市值？愛馬士呢？

18. 但其實以上種種，市場都一早知，純係畀你識多啲嘢。呢啲知識其實不能直接幫到你有乜回報（但識多啲嘢可以減少做錯決定），唔存在話「純利率高就大晒」，就幾貴都買得。不過一般嚟講，純利率高嘅公司，又真係比較少死錯人。因為往往背後就係「護城河」，冇咁易畀人打殘。

19. 另外，當然「純利率」高唔係大晒。愛馬士純利率高過蘋果同LVMH，但市值爭好多。蘋果嘅量做得極大，LVMH都大，愛馬士就賣唔到咁多了。

「疫情重創經濟」「封關奢打擊侈品銷售」「求生存啦仲掛住買LV」

「通脹壓力中產冇錢買LV」「人工成本高打擊盈利」「高息打擊消費意慾」「裁員打擊消費」「旅客未返到疫情前水平」「股市大跌影響高端消費」

20. 好啦，上面講咗純利率有幾咁高，而且越嚟越高。收入同純利都極之強勁。你發現咪又係返到去金句系列嗰啲核心嘢：你網上睇嗰啲，真係相當垃圾。多數人講嘅，就往往係錯。仲有，大家每次都係誇大咗啲危機。

21. 疫情初時，有人話你知「疫情會嚴重打擊經濟」「冇晒人外遊實會重創奢侈品股」「求生存啦仲掛住買LV咩」。疫情中段，會有人話你知「通脹壓力中產冇錢買LV」「人工成本高打擊企業盈利」「高息打擊消費意慾」。甚至去到而家，一樣有人同你講「世界從此不一樣」「裁員潮打擊消費」「旅客仲未返到疫情前水平」「股市債市大跌影響高端消費」

聽落So smart，吹水個個叻，但一睇數字就勝過幾萬字廢話

22. 以上種種，你總會聽過。不過可惜，多數呢啲嘢就係錯，或者不重要。Narrative之嘛。有冇留意呢啲講法，全部聽落so smart，但係相當空泛，不能量化，又可能冇time frame？現實就係愛馬士嘅盈利同收入創新高。一個好簡單嘅數字，勝過啲友講幾萬句廢話，係咪？

23. 又係鑑古知今時間，我地睇返，到底疫情下，同埋加息下，公司會係點。特別留意，我仲會分兩部份。呢度先睇生意，下篇睇股價。係喎！生意同股價都唔係同一回事，正如經濟同生意又唔係同一回事！（而股價同你賺唔賺到錢亦唔係同一回事！）

疫情有冇打擊愛馬士？梗係有啦。但有幾大，幾耐回復，先係重點

24. 我地睇下，疫情下愛馬士嘅情況係點。我貼多次個圖。

25. 打擊？梗係打擊啦。19年第四季，19億收入。開始爆疫嘅20年第一季，跌到15億。20年第二季跌到10億唔夠。用啲「清零L」嘅思維，好快跌到零啦，公司仲唔執笠？（咩係「清零L」？例如講銀行體系結餘1000億一個月跌100月一年唔使就見零嗰啲）

4Q19 十九億，1Q20 十五億，2Q20十億都冇，「好快清零」

26. 但你見，去到20年第三季，就已經反彈到18億。打後更不用講，最新已經去到近30億一季。

27. 嚟啦喎，說好了的「有排回復唔到」？再睇一次，20年第三季，公司嘅收入，已經返到疫情前嘅水平！實情20年下半年，公司純利已經高過疫情前嘅半年了（個Excel有半年嘅數，我只係hide咗）

不過，3Q20，公司收入已高過疫情前。20年下半年，純利高過疫情前

28. 點解會咁快反彈？有好多原因，但「報復式消費」又是真的。亦即係話。啲人之前封晒城買唔到，到開返就買得更多，「補返」之前冇買嘅金額，可能一年就係預咗買咁多。情況同你去旅行差不多，之前冇得去，而家去返夠。

29. 順帶一提，其實成個「經濟」似乎都係有呢啲嘢。好似個波咁，呢度壓落去，第度又脹返上嚟。例如之前2019年社運，對經濟嘅打擊，係冇想像中咁大的（但當然個別行業就大），你嗰時出唔到街買嘢，之後出返自然買返夠，或者轉去網上。

點解會咁快反彈？但知咗又點？

30. 至於係咪「封關唔開心更加要買貴嘢心理平衡下」，就好難驗證。不過再強調一次，你睇，啲生意話咁快就返晒嚟。於是你諗下，最初話「唔會咁快回復」嘅，係幾咁錯！

31. 好啦，其實呢啲都係過咗去嘅嘢。知嚟有乜用？就重要。首先，真係有一定參考價值。歷史照計唔會咁簡單重覆，但下次又有啲咩類似情況，你都大約有個譜，知道啲數會點郁。冇得完全一樣，但大約有個概念。

32. 同時間，更重要嘅係，畀你睇到啲人係幾咁錯—唔係話叫你「唔好信佢」（雖然有啲不停錯嘅人你就小心啲），而係下次你再聽到以上嗰啲「XXX打擊消費」嘅廢話，不妨諗真啲。