理文化工，會唔會出盈警（定盈喜）？會唔會供股？3倍市盈率10厘息 (Patreon)

理文造紙2314出盈警，理文化工746呢？

識睇梗係睇盈喜！

出盈喜有咩準則？

化工產品價格又如何？

工業股負債重，公司會唔會供股？

教埋你點睇公司負債多唔多。點先叫高，點先要驚

公司應該3倍PE咁上下…… 10厘息。但當然唔會「穩穩陣陣」

好啦，兩年前唔夠我在Patreon寫，3.8。而家一年派息都0.65！17厘

五年你應該收……40厘息。「但當然可以供股嘔突」

但公司點解可以一路派三四成息，又一路減債，股價仲一路升？

你與其諗里啲咩「穩穩陣陣6厘息」嘅垃圾，不如睇呢啲嘢

嘈一大輪鬧匯豐，又講到好有道理，又話要告上法庭。告咗未？

你見到好多人，係得閒得滯，唔係求財，只係求氣。唔好做呢啲廢柴

「以為」好穩陣，瞓身買煤氣，香港電訊，匯豐，領展。幾多人中伏？

其實我以為係金融101常識。你最好快啲接受，live with the insecurity

最後，少少資源共享。「去邊搵公司資料」

1. 市況靜靜地，今日只有一隻股。冇買嘅都可以睇下，特別係下半截。

理文造紙2314出盈警，理文化工746呢？

2. 首先，話說理文造紙出咗盈警。其實同我完全無關，但我諗起理文化工746，都有啲讀者買咗，2021年3月寫過，絶對係得意之作。寫嗰時先3.8，後來見過11蚊，而家6.6咁上下。

3. 理文造紙同理文化工，近乎係冇關係，雖然最終大老細都係李運強嗰家人，但其實係兩房唔同嘅太子，算係「分咗家」。兩間公司有共用啲發電廠之類，但就只係咁。

識睇梗係睇盈喜！

4. 不過，我係諗理文化工會唔會出盈喜。我都唔肯定，但可以分享下啲想法。

5. 我之前整咗個Excel，未完全update晒，在Attachment都有。咁好快手，呢度睇返以前啲數，2021年純利12.9 億人仔。咁2022年會唔會出盈喜？簡單計數，上半純利 8.9億。留意大陸嘅廠例牌農曆年停工，佢地好似以前會停成個月，加埋舊年上半年上海封過城，公司其中一個大廠在江蘇常熟，唔知有冇影響。總之，一般嚟講，你預下半年盈利好過上半年，應該合理啩？你亦可以睇返公司歷史，我記得好似一般都係下半年好啲。

6. 假設下半年做到同上半年一樣，即係2022年大約17.8億純利，而2021年係12.9億，即係按年升38%左右。

7. 好啦，睇到呢度，你可以問兩個問題。第一，咁即係會唔會出盈喜？仲有，如果係出幾時出？咩情況先會出？出咗又係咪一定升？第二，假設下半年同上半年一樣，合唔合理？

8. 先答第一個問題：出咗當然唔係一定升，但多樣嘢講咁解，況且亦真係有啲人係見到盈喜先衝入去的（「好消息嘛」），而隻嘢極少成交。

出盈喜有咩準則？

9. 至於出盈喜嘅「準則」，我一路都唔係好知！理論上去到升50%甚至升成倍，就多數都會出。但升三成都出嘅亦唔係未見過。掉轉頭講，有啲升50%都唔出又有，所以都好睇公司。

10. 但你可以睇返，公司12月結，一般3月頭出業績。而家都2月17啦喎，仲唔出，係咪即係唔會出？唔知。不過舊年，公司1月20號已經出咗盈喜。所以你真係叫我估，我估今年唔出嘅機會都大。

11. 返去第二個問題，我假設「下半年同上半年差不多」，係咪可靠？一般冇更多資料下，都只能咁。有時你會知道上下半年發生啲大件事（例如2019年香港下半年咁），咁會知啲數實走樣。

化工產品價格又如何？

12. 但如果再勤力少少，其實可以去望下啲化工品價格，就我目測，似乎啲三氯甲烷下半年跌價。所以可能下半年真係差過上半年。但，又有其他產品嘛，仲有可能量多咗，所以都係有啲難估。

13. 一句，如果公司下半年做到好似上半年咁，照計已經相當好。

工業股負債重，公司會唔會供股？

14. 好啦，潮流興講供股。重工業股固定資產投資大（人反而唔使好多），公司一向負債比較重。

15. 順手教埋你點睇，除咗金融公司（銀行保險）外，差不多所有公司都係咁上下睇法。睇佢有幾多現金（或銀行存款，但唔計任何咩「證券」，因為你多數都唔知係乜），然後負債呢，一般只睇銀行貸款，留意好多時要兩個數加埋，在短期負債同長期負債都有，有啲短期還有啲長啲。然後，銀行貸款減咗現金，就係淨貸款（現金多過貸款咪淨現金，net cash）。然後就拎去同個股東權益比，最後得到個net debt to equity（有啲人亦就咁叫gearing，但留意有時啲人係net debt to asset，有啲係net debt to equity，所以記住睇清楚，你完全唔識就會任人點）

教埋你點睇公司負債多唔多。點先叫高，點先要驚

16. 但當然幾多先叫「高」就未必有客觀標準，但可能同行家，或者自己以往比較下。十分粗糙嘅rule of thumb，去到三成幾啲人就開始會留意。而你見到理文化工，近年都係去到三成幾。

17. 會唔會供股？我未睇返啲數前都諗，畢竟供股減債都係幾合理。但你望返，公司嘅gearing，2021年底已經降到17%。2022年中（我冇入落去）甚至去到單位數！犀利，做化工廠做到單位數gearing．

18. 好啦，聰明嘅會問：點解可以減到咁低？好簡單！盈利勁！賺到錢，一來咪多啲現金還債，二來你個book又碌得大。

19. 當然仲有一個玩法，你唔派息，個gearing 自然會低返（大股東冇錢洗或小股東鬧或股價散晒另一回事）。但你見理文化工差不多年年派三四成息，犀利。但點解負擔到？都係因為盈利做得好。其實呢個係所有嘢嘅基本。

20. 順帶一提，例如領展之類嘅REIT，一定要差不多派晒啲息，咁其實係好難減債嘅。

公司應該3倍PE咁上下…… 10厘息。但當然唔會「穩穩陣陣」

21. 然後一雞兩味，可以同你討論多樣嘢。我就當公司2022年做到17.8億純利咁上下。8.25億股（之前教過點搵！），即係每股盈利2.16。

22. 同埋留意返，一般派三成息，即係一股0.65咁上下。留意講三成都算保守，其實年年都差不多近四成　—　但呢啲當然係羅素雞，可以忽然改，甚至唔派。再講一次，冇包生仔。

23. 嚟啦喎，股價？6.6。即係，3倍市盈率唔夠，相當抵，咁當然「平可以更平」，「市場唔睇工業股」，但始終真係相當平，仲要一路有啲增長。總係股價會升嘅，最極端講，N年前隻嘢十幾億市值，而家我一年都十幾億盈利喎！

24. 又或者，你計股息，10厘！但當然冇得保證，可能下年盈利大跌，而甚至盈利升都可以唔派，亦可能人民幣跌，亦可能聽日打使。冇得包生仔。只係睇個margin of safety有幾大（畢菲特嘅名句）

好啦，兩年前唔夠我在Patreon寫，3.8。而家一年派息都0.65！17厘

25. 呢度我仲可以回帶講返，兩年唔夠之前，2021 3月，我在呢度第一次寫，隻嘢3.8。（後來有篇長文）。好啦，你用當時嘅股價同今時嘅盈利同股息比，更加不得了。再提你一次，嗰時3.8。而家一年盈利都2.15，派息都0.65。咁當然，當時未必估到之後公司盈利升咁多啦下，但嗰次的確見到回升緊。

26. 仲有，再計下，過去5年，收嘅息係0.3+0.38+0.33+0.24+0.58 =1.83。收息都收返近兩蚊。我就當你2021年我寫嗰時先買，咁你都應該收0.24 + 0.58 + 0.65（預計2022年），1.47，而你買入價只係3.8，差不多40厘（！）

五年你應該收……1.8蚊息。40厘息。「但當然可以供股嘔突」

27. 當然實際上真係3.8買嘅人唔多（但有讀者真係4蚊邊買咗的），我寫嗰時只係兩年前，你都唔係收到5年息（但嚟緊仲會有），志在示範下個概念。但即使我當你6.6先買，你睇返收息，都係相當不錯。

但公司點解可以一路派三四成息，又一路減債，股價仲一路升？

28. 睇到呢度你應該大約見到，公司市盈率又低，派息又OK，股價表現亦唔差，而家負債差不多去到零。好啦，但背後嚟自乜？就當然係盈利。聽落好廢，但有盈利就乜都有得玩，再殘都會升。冇盈利嘅你最多咪發夢股癲炒一輪，之後就跌返落地下。

29. 之但係，點樣搵到啲一路盈利都會增長嘅公司？呢個就100億嘅問題了。你可以話「護城河」，但往往係事後先見到。況且，大多數人少少短期波動都受唔到，蘋果微軟都夠屈機，但一樣可以一季跌三四成。

30. 你睇理文化工嘅情況，根本唔似會跑出的。做埋啲嘢固然你唔知係乜，亦唔係咩有專利嘅嘢，仲要唔係賣消費者品牌，佢賣畀廠之嘛。咁你仲要講大陸經濟放慢（係），對啲商家又唔多友善（亦係）。你要質疑，真係大把嘢質疑。

31. 但應該唔少人知道最初點解我寫呢間公司。因為以前識佢地。講到尾，就係信佢地。就只係咁簡單。至於你講咩行業呀，經濟呀，其實好多都係廢話。同一行業，啲公司表現都可以差天共地。

你與其諗里啲咩「穩穩陣陣6厘息」嘅垃圾，不如睇呢啲嘢

32. 你與其諗埋啲咩「穩穩陣陣收5厘息」，不如諗呢啲東西。但首先，呢啲就絶無保證。2020年一樣大減過派息，公司唔係做公用事業，會跟大環境上上落落。公司亦唔係定位做高息股（雖然最後因為市盈率低變咗高息股），一向指引都係維持三四成左右嘅派息比率—即係話，盈利跌九成派息咪同你跌九成。甚至忽然間唔派都得。

嘈一大輪鬧匯豐，又講到好有道理，又話要告上法庭。告咗未？

33. 唔好到時又鬧，好心就成熟啲，你見啲友，鬧完一大輪匯豐唔派息，又話示威又話去告，結果點？講就講到有道理，有冇上到法庭？冇。有冇拎得返啲派息？冇。

你見到好多人，係得閒得滯，唔係求財，只係求氣。唔好做呢啲廢柴

34. 咁你見到，呢個世界好多人係好得閒，同埋只係求氣，唔係求財。我成日講心態最重要，是真的，唔好畀自己做咗呢啲人。

35. 至於你要講咩人民幣爆煲呀，大陸打仗呀之類，就更加不用討論。邊有得保證？

「以為」好穩陣，瞓身買煤氣，香港電訊，匯豐，領展。幾多人中伏？

36. 但剛剛嘅101文都寫咗，遲下我會再寫：你追求啲假嘅安全感，先最瀨嘢。你「以為」永世唔會減派息，瞓身買晒煤氣，香港電訊，恒生，匯豐，領展。你睇幾多人中伏？根本三十年前嗰啲玩法就不能再重覆，個世界都唔同咗，但啲人依然仲係不停想「我年年穩穩陣陣收6厘息」。你想就有用？

37. 一方面個個鍾意講咩世局紛亂，但另一方面又仲妄想有咩「穩穩陣陣8厘息」，你唔覺得矛盾？我話你知，係冇呢回事的，你最好早日接受，live with the insecurity．心法文講咗，根本冇得保證，所以唔好奢求保證，雖然人性係想聽呢啲嘢，你睇男女朋友都係，明知假，但都係想要承諾。

其實我以為係金融101常識。你最好快啲接受，live with the insecurity

38. 最後介紹埋，好多人邊度睇啲數，有時叫分享資源。咁各師各法，我不能話我睇嘅就最好，但你平時多睇文咪知道我在邊度搵嘢。

最後，少少資源共享。「去邊搵公司資料」

39. 例如呢啲公司基本數據嘅，最「好」，就梗係自己砌個Excel。「但我唔得閒」。唔得閒嘅，咪搵公司年報。「好難喎，唔識睇」。咁睇你公司有冇Bloomberg，包保靚仔又方便。「公司冇喎」。咁好啦，最簡單，AASTOCK啦，一般都還好，又唔使錢。但你見到啦，多數平嘢冇咁好冇咁易，有取捨。

40. 順帶一提，有一個好短期嘅時間，我有用過EJFQ。「主要係書展佢送兩個月免費」，但之後我就cut咗，「唔係畀唔起但覺得唔抵」。嗰啲乜圖物圖乜訊號就算吧啦，咁準佢唔使賣畀你，自己發達。但佢有啲公司數字，算幾好用，可惜佢冇拆開嚟賣。不過你有興趣嘅都可以留意下，因為我唔睇啲乜圖乜訊號，但可能你想。又，呢個唔係廣告，我冇得分的，但有機會不如我去R下佢地。