發夢股Palantir：居然賺錢，股價大升．個案研究：土耳其地震，買ETF (Patreon)

發夢股Palantir：居然賺錢，股價大升

2021年9月上市，當時9.2，而家又咁嘅位，好過好多股票了

收入放慢但仲有增長，估值都仲還好。好過好多發夢股

問題係，多數人都係35蚊買的。正如ARKK，都係個個輸錢

成日諗埋啲屎橋「對沖」「管理風險」。Short put，covered call，Short Vol

土耳其地震：「人地死人冧樓啦你仲掛住賺錢真係冷血」。

土耳其地震：「喂好大鑊呀重創經濟」

我地睇睇日本311地震嘅例子。「日本人又點同土耳其人！」

「OK埃汾我是冷血的」。咁土耳其股，點買？

1. 多嘢寫，但又有時間限制，今日索性出多篇。同大市無關，有趣嘅故事，一篇講Palantir，一篇講土耳其地震。

發夢股Palantir：居然賺錢，股價大升

2. 好啦，呢隻Palantir，我有買，但只係好少，應該輸緊錢（但買得太細費事睇輸幾多）。舊文寫過，未上市時已經寫，名堂都幾大，反恐大數據股，而且真係有一定含金量，唔係得個講字。更重要嘅係，創辦人係真正嘅奇人Peter Thiel，怪人兼勁人，真正嘅「contrarian」

3. （又，佢係「科技圈」中極少有嘅侵粉，而且一早己經幫佢站台，唔係侵侵選到先走過去嘅投機份子，如果有人估侵侵可以回歸，更加要留意）

4. （但話時話，我懷疑佢唔係「真心」嘅侵粉，我覺得佢根本睇唔起侵侵。Peter Thiel係科技圈中最出名嘅基佬（Tim Cook打工嘅啫），而侵侵嗰啲擺明係反同恐同。不過矛盾在，唔計LGBT嘅議題，Peter Thiel在其他嘢上明顯係比較「保守右翼」，而我相信佢更加憎民主黨嗰班「左翼」）

5. 講返，冇睇一排，股價昨晚大升。點解？出咗業績，居然賺錢，不得了，完全估你唔到。其實未上市之前我已經寫咗，係唔睇好嘅，因為覺得根本獲利之路遙遙無期，後來仲要又加息又乜。但佢居然未死仲要賺到錢，真係有啲料到，在一大堆發夢股之中，含金量就最高。嗰時我亦都寫咗，公司我就唔多信，但我信Peter Thiel一個人。

2021年9月上市，當時9.2，而家又咁嘅位，好過好多股票了

6. 2021年9月上市。如果冇記錯，介紹上市，冇集資，所以嗰個咩「招股價」只係一個廢嘅參考價。但第一日收9.2，昨晚升完後又返返去咁上下水位！你諗下，已經好過絶大多數公司。

7. 睇返啲數，之前一路蝕錢，但唔算蝕得好過份。收入有增長，係放慢緊，但仲係兩三成。呢個係好重要的，即係冇錢賺都算，你有啲發夢股，收入增長都冇，就真係死得。你一路有收入增長，至少都仲有人肯信。

收入放慢但仲有增長，估值都仲還好。好過好多發夢股

8. 再再返，而家200億市值，一年20億收入，仲有增長，10倍嘅price to sales（留意未抽上嚟之前即係8倍咁上下），唔算平但唔係發癲地貴　—　然後你諗下，35蚊時追嗰啲就梗係出事，但你上市渣到而家，都唔使輸錢。

9. 老生常談，估值好緊要。問題係，你真係未必知公司有幾多增長。所以真係唔熟嘅公司，就少買，或者唔好買咁大。ETF為主。又或者最簡單，人人仆去買時你就唔好買。呢個亦係睇「估值」最簡單嘅方法，個個飛去買，甚至同你講「唔使睇估值」，就當然係最貴嗰時。

問題係，多數人都係35蚊買的。正如ARKK，都係個個輸錢

10. 我甚至可以推介你睇多篇文，中文的，唔深，不過其實訂戶先睇到，我費事成日放上嚟。Attachment有。信報畢老林啲嘢不錯，唔係日日好睇，亦唔係每樣我都同意　—　但唔使去到咁高要求，佢偶然有啲幾好睇嘅，已經好夠。況且好唔好睇啱唔啱睇都好個人口味，我啲Patreon你都唔會覺得日日好睇啦。所以真係，偶然有幾篇好好已經好夠。相比之下，你睇好多垃圾KOL，真係寫100篇都冇1篇好嘢。而且唔好忘記，垃圾文浪費你時間都未係最大件事（雖然都好大件事），錯嘅知識都唔係最大鑊，更大鑊係你成個想法或價值觀都錯晒。

11. 你可以睇返佢篇文，都係講類似35蚊買Palantir嘅嘢，我都成日講。重點係：固然你睇好多股票，好似都係「睇你咩位買」。ARKK又好，加密幣又好。但你見實際上，講money weighted，大多數人都係升晒先飛入去，亦即係大多數「錢」係輸嘅。唔係話「睇時間」有一半時間贏一半時間輸咁，而係真係大多數人一定係高追（順帶一提，呢個亦係之前金句系列嘅核心價值：大多數人，就多數係錯嘅，好靈的）

12. 而我覺得比較簡單，你最好追求一啲，差不多任何位買都贏錢嘅股票。例如？例如你買LVMH，咪過去任何位買都贏錢。

成日諗埋啲屎橋「對沖」「管理風險」。Short put，covered call，Short Vol

13. 呢篇文真係好睇，留意佢仲有講一樣嘢：任何策略皆有辣有唔辣，不過以一種風險取代另一種風險而已。投資者卻「死性不改」，煲快爆時擔心執輸行頭冇人陪自己窮，股價殘到唔瞓身就笨才想到對沖，周而復始高買低賣。

14. 我特別同意頭半句，你搞咁多嘢，成日諗埋啲屎橋，以為點「對沖」「管理風險」。Short put呀covered call呀 Short Vol呀咁，以為「穩陣」，根本就自欺欺人。最多只係啲風險去咗啲你唔知嘅位，根本冇消失到。

土耳其地震：「人地死人冧樓啦你仲掛住賺錢真係冷血」。

15. 呢個東西仲有趣，其實未必有乜投資機遇，都過咗去，我都錯失咗，但一樣案例分享。

16. 話說土耳其大地震，大家知啦。咁當然停市，好合理。停市前當然狂跌，都好合理。但原來，星期三就開返市，我都係星期二先知，走晒寶。

17. 嚟啦喎，三樣嘢值得你留意。首先，出面啲四流KOL嘅講法，有啲會同你講「人地死人冧樓啦你仲掛住賺錢真係冷血」。我對呢啲嘢係無感覺嘅，訴諸呢啲人身攻擊嘅人，即係根本冇point可言。而我相信，大家訂我Patreon，唔係想知點樣捐錢幫土耳其人。

18. 況且，又唔係我整到地震。仲有，你唔買大把人買（雖然你可以話個世界咁衰唔等於你要咁）。而根本，任你講，narrative之嘛。難道股市不停跌對土耳其人先係好事？佢地輸晒錢你覺得幸福啲？怕且唔係。咁如果冇啲「仲掛住賺錢」嘅冷血人去買，點升返？再直接講，如果人地唔想你買，就唔會開返市啦！

土耳其地震：「喂好大鑊呀重創經濟」

19. 另外，冇四流KOL咁廢嘅三流KOL，就會同你講，「喂好大鑊呀 死好多人呀 幾多級地震呀 經濟重創有排搞呀」。於是乎你見到了，「咪正係我早兩日嘅101文講嘅嘢」（所以，再長氣都要再講，記得平時睇文！）。以上啲句子係咪好熟面口？係喎，2020年疫情仲大鑊添。真喎，世紀疫情百年一遇，而地震，講真，第一次見咩？

20. 然後，case study．大家最鍾意留意嘅日本，福島核電廠，311地震，2011年，夠大鑊啦，真係好大鑊。有幾重創經濟？都重重地。但邊個話你知，股市即係經濟？況且，大跌後，乜都反映晒啦，十次有九次呢啲「大鑊嘢」，都係跌過籠。911又好，疫情又好，地震都係咁。911都真係「世界從此不一樣」架，但，咩叫不一樣，睇你聚焦邊個點啫（亦係101文剛講嘅嘢！！！）

我地睇睇日本311地震嘅例子。「日本人又點同土耳其人！」

21. 數字我都幫你搵埋（Yahoo Finance亦係一個不錯嘅免費source）．請睇，311地震後，日經指數跌10%，史上第三大單日跌幅。具體數字，未地震前，日經數10254。3月15開返市，跌到8605，累跌跌16%左右（未計盤中低位，你可以自己再計）。但之後去到3月22號，已經上返9600點。你可以睇下前後，扣埋星期六日扣埋停市，有幾多個交易日？「重創經濟所以股市要大跌呀可？」

22. 當然你要同我講，「過去不代表將來」，「日本人得不代表土耳其人都能」，「你點保證」嘅，我就會起身離場的，無謂嘥我時間，你可以睇返我剛剛先寫過嘅文。「或者再遠少少你睇埋汶川地震，或者南亞海嘯」（BTW，當年南亞海嘯真正死好多人，但你發現當年嘅南亞人都仲係冇人理的，連帶啲股市都冇人理。）

23. 好簡單嘅例子，示範咗好多嘢，同埋畀你睇到好多人嘅想法係幾咁錯。與其不停咁諗冧把，不停咁畀啲短期嘅嘢牽住你走，不如睇多啲呢啲故事。

「OK埃汾我是冷血的」。咁土耳其股，點買？

24. 好啦，但更有趣嘅仲在後頭。你會諗，OK，日本股我都仲可能識買，但，土耳其股點買呀大佬。

25. 我唔會叫你用IB戶口買土耳其股咁神經。首先，唔知買唔買到。二來，都話停咗市，點買？你到開返市，就可能太遲了。其實係應該停震嗰日未停市大瀉時買。

26. 仲有，呢啲情況，你都唔使再細諗買乜股。固然有啲人諗，911喎，俄羅斯打仗喎，搵啲軍工股買。或者日本大地震，咁照計唔用核電，可以睇返啲火電廠，或者睇鋼筋水泥。啱，全部都有道理，但實務上，唔使諗咁多嘢啦。買指數啦！買土耳其都仲要諗個股就人都癲（我畀到盡你識日文識日本公司，你識唔識土耳其文先？）

27. 咁當然係，買指數ETF！同埋，美股有嘛！

28. 我在Facebook貼嗰隻，就係土耳其ETF。美股上市，有美股戶口就買到。就是咁簡單。早幾日任買！又走寶了

29. 留意一個重點：土耳其停市都好 ，呢隻嘢係照Trade嘅，呢個亦係好多人嘅迷思。冇錯，背後啲嘢在土耳其冇trade，但美股ETF照玩，有何問題？正如日本印度放假都好，但你美股港股啲ETF都會照trade

30. 同樣道理，你見俄羅斯嗰時都係咁，停市，但美股啲ETF照玩。不過，又真係每次不同，後來近乎禁晒俄羅斯交易，俄羅斯股市差不多同西方分隔開，咁啲ETF都香晒，就另一回事了。所以，又真係每次有少少唔同。但地震總會開返市，亦唔會畀人制裁嘛。

31. 而仲有最後一個重點：你到最後關頭先又搵土耳其概念股土耳其ETF。可能太遲啦。土耳其我冇講過，但，呢個圖肯定有貼過！篇文叫做「環球股市ETF大比併」

32. 「下次邊度地震，自己搵機會了」。同埋，見到啦，臨急臨忙先搵，就蚊都瞓了。平時就充實好你自己！