Patreon Index 已執好！領展823供股follow up．美國通脹係咪死灰復燃？ (Patreon)

Patreon Index已經執好咗！

教訓：唔好臨急先嚟搵嘢問嘢呀，會出事的

領展follow up幾個：點樣超額供股？乜嘢係超額供股？定係掃威士好？

領展follow up幾個：我得一手，係咪應該掃多四手等唔會有碎股？

美國通脹死灰復燃嘅嘢

點解按月啲通脹數字就符合預期，按年就高過預期？經濟師計錯數？

點解通脹高過預期，美債債息唔跌，美匯又唔多跌，納指仲要升？

又話炒減息，又落空。又話估通脹走低，又再落空。咁係咪唔應該買股？

經濟差又話驚衰退，經濟好又話驚加息，咁幾時先買得？日日沽空？

1. 會連續出兩篇，因為聽日未必得閒，同埋多嘢寫。

Patreon Index已經執好咗！

2. 首先有個好大嘅好消息畀大家：個Patreon嘅Index，已經執好咗。呢個真係十分重要，因為好多時我會refer返以前嘅文，再加上呢個Patreon已經兩年半，總有啲嘢係之前講過。你可以去搵返。遲下可能我會再整理下。

3. 最重要嘅功能係你可以去search返以前嘅文，例如想搵講港紙嘅文，一般search題目就會搵到（所以我有時啲文章題目整到極長，就係方便你地搵）。將來我可能只係會講可以用乜keyword search，或者話埋你知大約幾耐之前。但同時間，有咗呢個Index，對我亦都好有用，比較容易搵返啲舊文貼link出嚟畀你地

4. 所以十分多謝讀者義務幫手。有邊啲讀者得閒又可以幫到手嘅，都話我知，仲可能有其他嘢搵人幫手。義工性質。但感激不盡。

教訓：唔好臨急先嚟搵嘢問嘢呀，會出事的

5. 成功將個「調整要跌幾多/今次唔同」系列埋咗尾，上中下三集，絶對值得你睇。冇時間睇？唔緊要，你咪留返開會先睇，週末先睇，甚至下個月坐飛機先睇。唔急，但重要。

6. 長氣都要講，N咁多人都係臨到大跌大升先問點好，先去諗嘢，先去搵資料，是錯的。去到嗰啲位先臨急就太遲。況且好多人都估到：你心情太興奮或太驚恐時做決定，多數都會做錯，諗嘢亦諗埋一邊。所以平時個市靜靜地就好睇多啲文。舊年10月11月好多人文都唔睇，話市差唔想睇，就係錯嘅。你怕影響心情可以唔睇報價，專心打工亦都重要，但唔應該唔睇文（無論係我嘅文定其他人嘅文）

7. 可以畀啲生動嘅比喻你。例如我用倉頡打字（後生讀者可能唔知係乜），唔通去到打隻字先睇返字型諗點拆碼？不可能的。實情根本唔使望到隻字，只係腦中諗到，隻手已經識自動反應啦。同樣地，你睇運動員都係，我高台跳水嘅，唔通到時先諗個動作諗幾時轉完圈收返埋？死得。當然係平時已經練咗幾萬次，去到就自動波（但當然，都會失手）

8. 正如週末我都完成埋兩篇領展大作。你睇到我個舖排，第一篇寫咗啲「悶嘢」先，第二篇先寫FAQ。我知好多人會跳去睇FAQ，但其實你睇完第一篇，多數問題都自己識答。況且，下次第隻嘢供股時，照計你都會有個概念—而我唔係話你知所有供股都供得過！剛剛嘅101文先講咗。你要識分邊啲嘢會重覆，邊啲未必會，雖然有時唔係咁易判斷。咪就係靠你平時多睇多想。

領展follow up幾個：點樣超額供股？乜嘢係超額供股？定係掃威士好？

9. 嗰兩篇極長嘅領展823，照計都解答咗你地六七成嘅問題。最迫切嘅應該答咗，例如你問我星期一跌幾多，己經話埋你知，極之準。滿意未？記得推介多啲朋友睇。我亦都有同你講，唔好一開市走去人踩人，咁你見即使你想沽走，都係尾段沽啲價靚啲。

10. 剩返嗰啲問題，應該冇咁迫切，但我呢度快答幾題。仲有其他疑難嘅，歡迎PM，隻埋一齊我得閒會答。仲有，因為我都有，我都供，所以之後我收到威士呀，交錢呀，都會繼續跟進。

11. 好啦，仲有幾個都有啲人問嘅問題。

12. 點樣超額供股？乜嘢係超額供股？定係掃威士好？

13. 好簡單，100股供20股，係default．但首先你可以唔供。又或者，你想供多啲得唔得？得！有錢就得。

14. 想供多啲嘅，兩個方法。首先有人問，係咪可以買威士。係得嘅，都講咗，最後係認威士唔認人，你買晒啲威士返嚟，咪供多啲。但初哥我就唔多建議，因為一個好大嘅問題：威士成交疏，差價大，分分鐘佣金你都蝕埋，而且比較難計。

15. 另一個方法，仲簡單，你供股嗰時，填表可以超額的。但當然係要畀咗錢先（所以冇乜閒錢就冇得玩）。實際上，就係總有啲人唔會供股，咁你可以話嗰啲嘢就大拍賣，大家去競投咁。就唔使價高者得，但你出多啲錢咪分多啲咁。於是問題就嚟啦，如果你只係拎幾萬蚊去「抽」，我估係分得好少嘅，以前供股我都試過，搞一大輪，可能分多一百幾十蚊畀你，真係多餘。唔好忘記，仲要係碎股。

16. 所以，除非你講緊係幾十萬甚至幾百萬錢咁玩，否則不如慳返啖氣（但當過下癮了解下市場又另一回事）。雖然話說回頭，我又係唔明啲人點解可以幾十萬現水在手嘅。咁但當然你個個月出幾十萬糧就你叻啦

領展follow up幾個：我得一手，係咪應該掃多四手等唔會有碎股？

17. 最後一個常見嘅問題，有人問，我得一手，係咪應該買四手「儲齊」佢？因為五供一，我唔係五手十手，咪有碎股。

18. 呢個問題真係yes and no。如果你只係問我技術細節，咁肯定係五手十手就會冇碎股。

19. 問題係，有一手然後買多四手，件事好似有啲本末倒置？你話有四手買多手好似正常啲。但有一手買多四手？為咗避免碎股，然後買大四倍！仲要供多四倍。我就覺得有啲奇怪。難道你十分睇好公司前景？但即使係咁，點解最初又只係買一手？

20. 以下講嘅未必一定啱，但我型住啲人對於「碎股」係太敏感。係，啲價係差啲，但多數港股都月供，差不多全部都碎股，有何問題？甚至乎，如果你玩以股代息嘅，都必然係碎股架啦。

21. 你收息嘅冇影響，你一路儲都冇乜影響，例如一手領展100股，咁你去到1001股，有何問題？嗰1股，沽出去可能個價差少少，咪豪畀佢。但當然你可能120股就澤洗啲。但，其實爭得幾多錢？真係值得你去買多四手？

22. 另一種避免呢啲問題嘅方法，好簡單，就係買股票買得大！120股你梗係好介意嗰20股，但1020股你咪唔會介意。

23. 至於隻威士值幾錢呀，點計除權價之類，遲下教。不過簡單答你，其實隻威士都唔會太值錢，好過冇咁咯。渣得少嘅，分分鐘佣都蝕埋。點解決？睇多上一段一次。

美國通脹死灰復燃嘅嘢

24. 昨日最重要嘅新聞，當然係美國嘅通脹數字。冇耐性嘅，話定你知，個數字係幾差嘅，值得你去驚，但你見市場又唔係真係好驚。雖然嚟緊都會有人繼續講。

25. 首先睇數字，原本係好值得留意嘅，可惜冇時間寫（掛住寫領展）。因為首先年尾多變數，另外個計法其實變咗少少。市場嘅預期都高，點知出嚟仲高（但唔係差好遠），難怪有人又開始講通脹壓力又嚟過，雖然之前我嘅文都有提你呢個可能性。

26. Headline CPI，預期係按年升6.2%，上次係6.5%，結果出嚟係6.4%。係2021年以嚟最低，亦都放慢咗，但冇預期咁快。不過按月嘅，預期物價升0.5%，上個月就跌0.1%，出嚟亦係0.5%，又即係同預期差不多。

27. 扣除能源同食品嘅core CPI呢，按年升5.6%，上次係5.7%，預期係5.5%，即係放慢，但冇預期咁快。另外，按月升幅預期係0.4%，上次係0.3%，今次係0.4%，加快咗，但都符合預期。

點解按月啲通脹數字就符合預期，按年就高過預期？經濟師計錯數？

28. 即係，你睇按月嘅數字，核唔核心都係大約同預期差不多。點解按月就同預期差不多，按年就高過預期？係比較少見嘅，同啲計法郁咗有關。所以我認為啲數字未必真係咁差

29. 之後會詳細講，但留意推動通脹嘅，主要係住宿成本，即係主要係租金，照計對利率幾敏感，應該好難勁升。另外，早排啲油價低位彈返，亦都影響CPI入面能源價格3個月以嚟第一次反彈，但同樣地，早前已經又回落返啲。

點解通脹高過預期，美債債息唔跌，美匯又唔多跌，納指仲要升？

30. 咁你見到，美股都係跌，但亦真係唔係多，收市道指先跌200點，納指仲要升，實在冇乜特別。即市低位道指跌過400點，收市縮窄一半，但即使400點都只係1%多啲。反應唔太大，可能同上面我講嘅原因有關。

31. 仲有相當有趣嘅係，出完啲數字，美債債息冇大升（一度跌添），美匯亦冇大升（亦係一度倒跌）。原因亦可能因為之前都升咗一浸。近期美債債息同美匯強勢，亦都拖累近排環球股市麻麻地。

32. 至於你話加息預期，當然上升咗啲，3月5月應該各加0.25，而家估可能6月都有一半機會加0.25，即係「加多兩次半」。當然個利率峰值Terminal rate又再升多啲，去到5厘25咁上下。然後今年有得減息嘅預期又降啲。

33. 睇到呢度，唔知你會有乜感想。留意之前出嘅就業數字都仲幾靚，所以幾明顯可以預計，早排「驚衰退」又開始降溫，嚟緊一排都會有人同你講「通脹死灰復燃」，但真係唔使太驚。

34. 其實都真係睇你點演繹，有啲人會覺得，喂，減息遙遙無期喎，班友都傻嘅，炒減息，又落空，而家又推遲啲。炒通脹放慢嘅預期，又落空，又話等多幾個月，龍門任搬。呢個係一個講法

35. 但對我嚟講，兩次又好，三次又好，點睇都係差不多停加息。對我嚟講，五月先停定六月停，其實有乜分別？

又話炒減息，又落空。又話估通脹走低，又再落空。咁係咪唔應該買股？

36. 仲有好多嘢都係咁，例如港股反彈8000點後，冇乜力啦，你見回返千幾近兩千。問題係，就真係有排都未返返去之前嘅低位嘛。所以你不能話啲「睇好」嘅嘢冇實現！即係可能太樂觀，而家冇咁樂觀，但都係樂觀嘛。

37. 所以，雖然唔使成日睇市，但講到尾市場就最現實，好過你齋講。你話炒減息一路落空，但美股暫時仲係明顯地高過低位，港股更加唔使講。

38. 你話落空？根本冇落空到，只係不停咁會調節。正如你一樣可以拗香港仲要戴口罩，航班仲未恢復晒，遊客有排都未返到以前水平　—　但港股低位升咗8000點啦。

39. 更特別嘅係，雖然近期債息都升，不經不覺去到3.7厘，差不多返到年頭嘅位。但你話納指同科技股係咪特別差？又好似唔係喎。微軟剛重上返2萬億市值了

即係，經濟差又話驚衰退，經濟好又話驚加息，咁幾時先買得？日日沽空？

40. 所以，咪又係老規矩，分散，分段，而家我都相當放心買。大災難時就多數最好，呢排陰晴不定亦都係幾好，最亢奮時買反而易出事。

41. 仲有，亦係成日講嘅嘢：好啦，而家唔驚衰退，咁你又話驚通脹驚加息。到唔加息又話驚衰退。咁幾時先可以買呢？

42. 你見股市同經濟，當然都有周期，但一般都係一浪高過一浪嘅，唔通納指跌到1000點咩。