領展供股27條FAQ，梗有一條啱你心水 (Patreon)

1. 埃汾會點做？

2. 買咗，應該點做？

3. 未買，又應該點做？

4. 星期一會跌幾多？

5. 係咪跌到供股價44.2蚊買？

6. 除權價59.7點計？其實係咩回事

7. 個供股嘅時機係咪麻麻地？

8. 咁點解公司而家供股？

9. 有人話小股東收嘅息都嘔突

10. 點解個折讓咁大？點解個攤薄效應咁大？

11. 其實供股個折讓價點定？折讓大係咪會拖冧股價？

12. 60蚊供，唔係仲好咩？又發少啲新股。又冇咁大折讓

13. 供完股係咪啲貨源歸邊？

14. 點解話供股最公平？

15. 但好多仆街公司都供股喎。

16. 點解上市公司要伸手集資？

17. 我只係想穩穩陣陣收X厘息啫，點解會搞成咁？

18. 點解公司要高價回購低價供股？

19. 公司係咪做得唔好？

20. 點解話公司長遠前景麻麻？

21. 埃汾覺得前景有啲保留，做乜仲買？

22. 其實點解領展要集資？

23. 咁點解唔發債？

24. 負債比率高有乜後果？

25. 點解REIT都要集資？

26. 啲人話有大項目收購去供股就合理啲喎，而家好似拎嚟唔知做乜咁

27. 點解公司唔拎啲錢去做收購？

FAQ 時間，有啲你見我Facebook Page大約有講，更多係冇講。記住，呢度只會短答，一篇文答27題喎！可能答咗你都會有疑問，詳細答案在上篇文嘅「金融基本嘢」應該有。另外，上篇文啲attachment，我放埋在呢度。

1. 埃汾會點做？

上集答咗，會供。實情我係唔多明，如果你覺得公司唔掂，做乜最初要買？

2. 買咗，應該點做？

實在答你唔到，上面講咗我點做，但你未必同我一樣，況且我可以錯。不過我都係建議你供。唔供嘅，兩個做法，一係快手沽咗佢，一係你照坐但沽威士唔供股。你想沽嘅，我唔太建議你星期一去做，因為照計好多人爭住沽。你可以等多幾日，2月23前甩身就OK。照坐但唔供嘅，記得記得沽咗隻威士佢，少少錢都係錢。

3. 未買，又應該點做？

我亦聽到唔少人講想撈。同樣地，答你唔到，因為根本唔知星期一跌幾多，亦唔知你買幾多，記住大原則係分散。但我估應該係可以買嘅，因為好多人爭住沽。不過公司嘅長遠前景，我覺得係普普通通（陣間解）

4. 星期一會跌幾多？

實在有啲難講。但，唔會跌三成啦下。舊文計數見到，每股帳面值跌8%左右，然後又計過，每股派息可能跌14% 左右（有啲大行計話大約11%）．咁你計埋人踩人呀，計埋星期五晚美股跌，債息升之類，咁可能我估星期一跌10-15%左右？

5. 係咪跌到供股價44.2蚊買？

呢個就好有趣嘅問題了。但我差不多可以肯定話你知，唔會跌到44.2。我唔明點解啲人會覺得個「供股價」同星期一個價可以相比。你諗下，如果領展100供1，但供股價1蚊，會唔會跌到落1蚊？梗係唔會啦！

6. 除權價59.7點計？其實係咩回事

你會見到佢份通告入面都有講，除權價係59.7蚊。點計出嚟？好簡單，最後收市值係62.8。我有100股嘅，就值6280。然後我會44.2供20股，20即係884蚊，6280+884 = 7164。成事後，我會有120股，咁所以個「除權價」，就係7164/120 = 59.7，就我供股前供股後一樣啦。跳 step嘅，即係 (62.8 *100 + 44.2 * 20 )/120 = 59.7。但呢個東西，有乜用？其實冇乜，因為，又唔係星期一除權！個股價會郁嘛。但你用上面嘅計法，睇下2月23日嘅股價，然後你就見到2月24號會點調整

7. 個供股嘅時機係咪麻麻地？

我覺得係，我都幾意外。佢供股我唔會好意外，但呢個位供我有啲奇怪。點解咁講？因為，而家股價都唔係太貴，至少唔係52星期高位，更加唔好話100蚊嘅位。理論上，就梗係高位供好，因為拎得多錢，而且攤薄可以細啲（同樣集資額，如果同40蚊股畀，80蚊供發嘅新股咪只係一半）

8. 咁點解公司而家供股？

我估，好可能係因為……公司係3月年結嘅。有冇留意，照計3月尾年結前，公司已經收晒錢？類似「做靚條數」，亦可能同信貸評級（下面第24解）或者啲貸款到期有關，你再續，就貴好多。

9. 有人話小股東收嘅息都嘔突

又係多Q餘。希望我冇計錯，但，公司一年派50-60億息，今次拎返190億，係咪？咁你最多話嘔返4年嘅息出嚟。但，供親股都係咁架啦。況且，之前十幾年收嗰啲息，你又唔講？仲有，之後你收嗰啲呢。仲有，由始到終，你都係可以唔供的。

10. 點解個折讓咁大？點解個攤薄效應咁大？

我唔知幾大叫做「咁大」，但由之前啲例子睇，三成折讓，肯定唔係算「好大」，當年匯控57蚊，但28蚊供，超過五成。國泰亦係咁上下。你講攤薄，匯控12供5，國泰11供7，攤薄當然亦多過領展好多。其實呢啲一查就知。

11. 其實供股個折讓價點定？折讓大係咪會拖冧股價？

其實真係要講好多次，個關鍵係集幾錢，唔係個供股價。你再諗一次，如果領展100供1，供股價1蚊，咁個股價係咪會跌到1蚊？梗係唔係。所以好多人話「跌到供股價買」，完全係將啲唔相關嘅嘢撈埋。你知唔知點解？因為匯控嗰次嘅印象太深刻。但，你睇明報嘅供股一覽表，跌到供股價，係常見定好個別情況（嗰時仲要金融海嘯）？畀你見到，啲人嘅水平係幾咁之低。心法系列一路都講，唔好圍咁多爐，上少啲社交媒體，正係因為咁。

12. 60蚊供，咪仲好？又發少啲新股。又冇咁大折讓

呢個就好問題，我強調建議你開個Excel玩。可以肯定嘅係，集資額係新股數Ｘ供股價。咁你話，60蚊供，咪仲好？又發少啲新股。又冇咁大折讓，唔係咩？首先，你睇以往嘅供股都見到，個世界唔係咁運作。點解？因為，折讓細，啲人又係咪肯供？仲有，當領展60蚊供，190億，即係發3億股，大約七供一。好似幾好？但，你可以計下，一手，總數咪又係供咁多錢！數字遊戲之嘛！

13. 其實供完股係咪啲貨源歸邊？

呢個就好問題。好難答，但，的確散戶多數係唔會供嘅。所以有時每股一次股，大股東就會渣得更多，因為佢供你唔供，佢佔比咪多咗。不過，領展冇乜單一大股東，最大嘅大股東係啲ETF，而佢地係咪會供股，都真係冇人知。另外，你亦大約可以諗下，唔供嘅人，沽威士，咩人買？一般都係啲「大戶」。所以似乎係供有著數的

14. 點解話供股最公平？

首先，公司可以借錢，亦可以做股本融資（印新股拎錢），取決於息口貴唔貴，股價高唔高（讀金融嘅會聽過WACC之類）。咁但，上集講咗點解唔發債（下面第23會再解）。咁而你做股本融資，一係定向，發畀某啲人，一係齊齊供。明顯齊齊供係好過定向，你多個選擇之嘛，冇可能worse off．好多人嘅迷思係，「我要拎錢出嚟」。但你可以唔拎嘛！「會畀人攤薄」，扯，人地定向批新股，你咪一樣攤薄！硬食，你想跟都冇得跟。呢個又係人性嘅一個弱點，有得畀你揀，你反而鬧。

15. 但好多仆街公司都供股喎。

呢個Facebook答咗，好簡單嘅邏輯問題，咁都搞唔清嗰啲，真係要睇多啲101文。阿媽係女人，但唔係凡女人都係你阿媽嘛！仆街公司鍾意供股，不等於供股就係仆街公司。明報個圖入面嗰堆，你不能話係極好嘅公司，但照計唔係太老千嘅公司。

16. 點解上市公司要伸手集資？

其實，唔集資，上市嚟做乜？股市用嚟做乜？

17. 我只係想穩穩陣陣收X厘息啫，點解會搞成咁？

而我不知道有「搞成點」，之前收咗N年你又唔計？之前股價一路跑贏。而家最差情況，咪插兩成，然後你畀人攤薄。但幾肯定嘅係，咁多年計埋，照計都係有賺冇輸。當然，買股票係冇「穩穩陣陣X厘息」呢回事的，你最好快啲接受呢個現實。

18. 點解公司要高價回購低價供股？

As said，偽命題嚟的。個「供股價」係好arbitrary 嘅一樣嘢，難道我100供1供股價1蚊，你又拎個1蚊同啲回購比？你鍾意嘅，供股價有溢價都得架。唔通領展100蚊供股，你就覺得好有良心？100蚊供股又係咪有人供？

19. 公司係咪做得唔好？

我估問嘅，唔係講地產霸權迫死小店之類啦下，呢啲另一類問題。作為股東，我覺得不完美，但可接受。你計1年又好，5年又好，公司股價都跑贏恒指，仲未計你年年收幾蚊息。咁都不滿嘅，我唔知你點先滿意。

20. 點解話公司長遠前景麻麻？

實情領展最開心最成功嘅年代，當然係在香港將啲公屋商場改造。但其實做得七七八八。所以你見公司向外闖。咁但係咪得呢？暫時都係普普通通，你話好差又唔係，但好好亦唔係（睇股價咪知）

21. 埃汾覺得前景有啲保留，做乜仲買？

咁其實，有邊間公司係「全無保留」嘅呢？係冇嘅。正如上面講，你睇股價表現不失禮，但就唔係好似十年幾前咁升法了。收下息還不錯

22. 其實點解領展要集資？

好簡單，因為負債重，而又加緊息。唔集就利息開支會升得好快。集咗減返債，利息開支會好啲。上集解咗

23. 咁點解唔發債？

你睇上一條咪明，發債，你個負債比率咪仲高，利息開支咪仲重。

24. 負債比率高有乜後果？

好問題，咁首先係利息開支會高。但仲有一個問題，聽聞有機會畀人下調信貸評級。一來會嚇走某啲投資者，但更重要嘅係，個舉債成本可能更重。

25. 點解REIT都要集資？

其實完全問錯問題，應該話，正係REIT，先要集資。年年派九成息畀你，咁點樣買新嘢？錢何來？當然可以借，呢個咪領展之前做嘅嘢，但有個盡頭，利息又會升。所以而家咪供股。咁你話，唔係喎，其他REIT冇供股喎。咁但，至少你睇香港，邊隻REIT表現最好？領展之前嘅增長，亦因為收購得嚟。當然你亦可以話理解而家要「還」，係可以咁講嘅，下一題會答，買完先供，但同咗先買，其實有乜分別？

26. 啲人話有大項目收購去供股就合理啲喎，而家好似拎嚟唔知做乜咁

其實多Q餘。睇圖，咁領展之前咪買咗好多項目咯。「咪搞到高負債咯」。咁到底買完先集，同集咗先買，同公佈買時順手集，對公司價值嚟講有乜分別？你覺得「合理」啲，係你自己嘅觀感啫。

27. 點解公司唔拎啲錢去做收購？

首先，之前咪買咗唔少，咪就係負債高，要減債。冇錢又點收購呢？另外，留意公司只係拎一半錢還債，係有可能再做收購嘅。不過亦有話，可能3月個業績都會難睇，你啲物業重估虧損，雖然唔影響派息，但會影響個負債比率，所以而家cap定就啱。