領展供股點算好—上集。下集有FAQ，同時出埋，但建議你睇上集先。 (Patreon)

領展供股，滿城風雨（有個Excel，以後任何公司供股你都可以用）

之後升定跌唔知，供唔供得過都未必100%答到你

但肯定好多人基本嘢都錯晒

一張圖解明所有嘢

你又可以點做？有貨想供又點？有貨唔想供又點？冇貨想撈又點？

星期一去撈底？「要供股架喎」

供股時間表：首先話你知，有兩日個股價會大跌。係唔同嘅東西

供股時間表：幾時要走人　幾時科水　幾時賣威士，除權日是甚麼？

我原本想供點知最後冇錢咁點？我唔記得沽威士又會點？我改變主意又點？

領展到底發生甚麼事，供股有乜影響

少少金融基本嘢（呢部份最重要）！

金融基本嘢：每股帳面值，跌幾多？梗係唔係30%！甚至唔係20%！

金融基本嘢：公司嘅負債比率，又會跌幾多？

金融101：你話減債冇用下話？咁同你計下，一年慳返幾多利息。

金融101：所以梗係幫到派息，不過股數多咗嘛，又計下數，會減幾多

「過去唔代表將來」：以前供股嘅公司，幾個月後股價點？

Case study：匯控當年，一手供4700，但多咗167股。賺唔賺得返？你話呢？

供同唔供嘅分別：匯控當年升咗一個開，咁你話夠唔夠冚？仲有之後派息呢？

領展供股，滿城風雨

1. 領展供股，滿城風雨，我寫咗兩篇長文，有晒最重要嘅嘢。啲心法教訓遲下得閒先寫。兩篇我都寫完，同時畀晒你。

2. 下集全部係FAQ，你地問嘅嘢我已盡答，篇文出咗，上面係問題清單，自己對號入座。但FAQ一定答得短，所以你好可能要返嚟呢篇睇。

3. 所以我建議你睇咗上集（即係呢篇）先，呢篇會答你最基本嘅嘢。到底發生咩事，我會點做，你可以點做，時間表，供股到底對公司有乜影響（呢部份最重要）等等財務嘢。

之後升定跌唔知，供唔供得過都未必100%答到你。但肯定好多人基本嘢都錯晒

4. 一如所料，你在網上睇嘅，絶大多數都係垃圾，KOL都仲好少少，網民真係完全唔識，基本概念都錯，但又要講埋一份。不過話說回頭，供定唔供，之後會升定跌呢啲，就真係大家估估下。即使你基本概念都錯晒，都可以right for wrong reason，掉轉亦係。估中有幾難？唔係升就跌架啦。

5. 以前金句系列都講過，唔好「結果論」，你樓下個阿嬸估中今年美股升定跌，但不等於佢識嘢多過估錯嘅人，係咪？幾時都話，啲基本想法最重要，可惜冇人聽。

一張圖解明所有嘢

6. 首先，好似煮食節目咁，畀啲基本嘢你。你可以睇返供股份通告，仲有領展嘅中期報告，留意公司係3月尾年結嘅！我都放咗在Attachment．

7. 另外你見到有啲傳統媒體做嘅圖，亦係幾好，你可以save低。應該講咗幾萬次，睇傳統媒體，好過你睇網上啲所謂專家。好多人知我日日睇三份報紙，由頭睇到尾，兼且再畀埋錢訂網上，仲未計鬼媒。

8. 仲有，呢張圖就勁咯，你可以save低都得，個Excel亦在Attachment，你會睇到晒啲數點計，我陣間都會快講，留意另一個tab仲有埋以前啲數，但我未得閒update。

9. 好，開始入正題

埃汾會點做？

10. 好簡單，照計讀者一定估到，我當然會係照供，諗都唔使諗。我拎住大約20萬港紙嘅領展，咪供28000左右（你渣一股就供8.84，自己計，下面解你知點計）。至於超額我就不會搞（陣間解係乜）．至於點解我會供，就係你睇呢篇文嘅原因。

你又可以點做？有貨想供又點？有貨唔想供又點？冇貨想撈又點？

11. 留意你未必同我一樣，可能你真係冇錢，咁都冇計。你嘅做法，應該係以下幾種。

12. 首先，有貨而又供嘅，同我一樣，咪準備你嘅錢。1股就預備8.84，自己計。點交呀，幾時科水呀，之後會點呀，稍後解。只要你決定咗供嘅，唔會太急，最急只係撲水。申請供股，應該網上按個制，或者打電話去券商，或者填form寄都得，呢啲不急。最緊要諗咗自己想點，同埋預備錢。

13. 有貨但唔想供嘅，固然畀人「攤薄」（陣間解），但真係冇人可以迫你畀錢。但你唔係乜都唔使做！因為你會收到啲叫做「威士」（rights，正式名叫做「供股權」）嘅東西，實際上即係你股票戶口多咗一啲奇怪嘅嘢，你係要沽咗佢，然後拎返錢的。

14. 你乜都唔做，又唔科水供，又唔記得沽咗佢的話呢？到期（好快到期！）仲在你手上，你一係畀錢供股（可以回心轉意嘅），一係變廢紙。所以，唔供嘅，沽咗隻威士佢，有少少錢拎返。雖然真係唔會拎到多錢。而我講咗我會供。

15. 當然你亦可以星期一沽晒佢，但星期一就正路會跌的。咁你沽晒之後，咪拎返啲錢，從此所有嘢都唔關你事。但我認為，你係沽，都唔好使星期一沽。你2月23日或之前沽走，打後嘅供唔供股，都同你無關。

星期一去撈底？「要供股架喎」

16. 冇貨嘅？「咁其實唔關你事」。但你問我可唔可以星期一買？梗可以。不過唔該一定要記得，你星期一去買嘅，到時你都係在個「供股名單」上面的。下面會詳細解。

17. 有啲話想買威士呀，想做超額認購嘅，再高深啲，遲下先解。

供股時間表：首先話你知，有兩日個股價會大跌

18. 呢樣嘢亦係好多人搞錯嘅。不過我首先要話你知，個股價「跌」，會有兩個日子，係唔同嘅事。首先，星期一就應該會跌，但呢啲同「除權」無關，就只係市場對呢個消息嘅反應，同埋好多人急急腳沽。但第二，去到「除權日」，又會忽然調整，但呢個係交易所避免混亂嘅做法。即係你會見到 2月23日個收市價，去到2月24日會忽然冇咗一截，但個股票機唔會話你知跌咗幾多。之後細解「除權」係咩回事

供股時間表：幾時要走人　幾時科水　幾時賣威士，除權日是甚麼？

19. 「除權日」是甚麼？你當係個「供股名單」嘅cut off 日期。2月23 日或之前買嘅，你就在「名單」上。最後你一係科水供股，一係唔科水就畀人攤薄但沽隻威士執返少少錢。亦即係話，在名單上，就會收到威士（威士就係「供股權」，一個權，但你不一定要行使）。如果你唔想搞呢啲嘢，你就2月24號或之後先買。上面解咗，2月24號隻嘢個價會忽然調整到平咗，就係「除權」，同派息「除息」一樣。

20. 仲有一堆日子，渣住但唔想供嘅人要留意，你亦可以睇返我貼嘅傳媒圖。「除權日」後，知道咩人在名單上，但未使科水。之後你會收到隻「威士」，股票戶口會多咗一隻有冧把嘅嘢。3月9日至3月14日可以買賣（得幾日咋！！！）。

21. 最後咩人供股，就睇邊個渣住呢堆威士，憑票入場。

22. 即係話，你仲在名單但唔想供嘅，收到呢堆威士，就要沽咗出街，等其他人供，咁你會收返少少錢。我再講一次，得幾日咋下，唔好唔記得，因為你唔沽就冇機會。

23. 想供嗰啲？唔使做嘢，威士交易完（記住，得幾日），就可以申請科水。到時再教學。留意3月21號前就要畀錢，你仲有一個月去撲水。

我原本想供點知最後冇錢咁點？我唔記得沽威士又會點？我改變主意又點？

24. 有人問，我唔想供，但又唔記得沽威士，拎住威士去到尾，咁點？到時唔畀錢供得唔得？又或者，我原本想供，威士坐到尾，但後來改變主意，或者忽然冇錢，唔畀錢得唔得？得，再講一次，係冇法迫你拎錢出嚟的！唔會追你數。但你笨之嘛。因為到時你應該係用折讓價買的。所以最後渣住威士嘅，一定畀錢。

25. 科完水，去到3月30日咁上下，你咪會收到更多嘅領展股份。

26. 好快sum up：無論你有貨定冇貨，都仲可以退出或參加個遊戲，2月23日就cut off。不在名單嘅人，自然打後嘅嘢同你無關。在名單嘅，會收到威士。想唔供嘅，沽走佢拎返少少現水，但你會畀人攤薄，你啲股票會冇之前咁值錢。供嘅，拎住啲威士，之後畀錢，之後就會多咗股票在你手。

27. 呢啲到時你可以再問。其實真係唔使咁急，星期一可能人踩人，你離場個價都未必靚。真係離場嘅，再等都仲可以。

領展到底發生甚麼事，供股有乜影響

28. 有好多人連供股係乜都唔知嘅，快解。好簡單，5股供1股，即係你拎住一手100股嘅，就可以供20股。留意係「可以」，唔係「要」，因為冇人可以迫你做任何嘢。上面講咗你有乜選擇，唔供可以點做，有乜後果。

29. 供股價44.2，即係你有1手100股嘅（最新股價62.8，即係而家一手6280），就可以供20股，亦即係拎884蚊出嚟。事成後，你就會有120股。唔供呢？你可以2月24號前沽咗佢，退出呢個名單。唔想沽，留在名單又唔供得唔得？得，上面寫咗，冇人可以迫你科水，你就依然係有100股（但好多人都知，會攤薄，仲會除權，股價跌，陣間解），同埋你會收到威士，沽出街有錢收。

30. 你畀出去嘅每股44.2，會去咗邊？就係去咗公司入面。睇圖睇Excel，同你計埋，公司而家21.1億股，5供1，即係會發多20%，即係4.22億股。44.2供股價，即係公司會多咗190億現水。呢190億，亦變咗係公司嘅「股東權益」。會計101，Asset = Liabilities + Equity，而家就係A同E都多咗190億。留意，我個股數同你睇通告睇新聞小小唔同，因為我用咗中期報告嘅數，免得你亂。同埋，集資幾錢亦同你睇通告睇新聞小小唔同，除咗因為股數有啲唔同，仲有啲開支，但只係爭些少，唔好執著於呢啲位

少少基本嘢（呢部份最重要）！

31. 你可以開返個圖（上面剛貼多次）甚至個Excel，呢部份你唔睇都至少copy低，下篇FAQ會用到。

32. 先講底下，計發幾多股拎幾多錢，好易明。睇返左上，領展嘅資產負債表，最新去到中期（2022年9月）。供股後，公司會多咗190億現水，最頂黃色格，好易明啦。資產亦多咗190億，而因為負債冇多到，淨資產（資產減負債）也多咗190億。另外，供咗股，股數會多咗啦。

金融基本嘢：每股帳面值，跌幾多？梗係唔係30%！甚至唔係20%！

33. 呢度你可以留意兩樣嘢，第一，個每股帳面值。跌咗，原本係80.9，供完係74.8。但跌咗幾多？8%。留意，唔係新股發水嘅20%，更加唔係折讓嘅30%。點解？因為股數多咗，但個帳面值都大咗嘛。當然拉勻後，個每股帳面值都係跌的。

34. 呢度亦即係話，如果公司嘅price to book 估值不變。咁星期一就應該跌8%大約公平。當然，呢個「如果」並太合理，實際上應該跌多啲。但重點係，對個每股帳面值嘅攤薄，係8%，唔係20%，更唔係30%

35. 第二，留意下，公司嘅淨負債（net debt，帶息負債減現水，帶息負債會係銀行貸款同埋發嘅債），當然就少咗190億，你拎咗億現水嘛。

金融基本嘢：公司嘅負債比率，又會跌幾多？

36. 有啲人冇為意，領展都係一間負債有返咁上下嘅公司。未供前，個net debt to equity，三成咁滯。再升上去，可能會有啲問題。供完股，就會變到17%，呢個亦係集資嘅主要目的。你總不能話我知，減債冇用。

37. 你依然話減債冇用，要搵新項目先好嘅。咁我地睇右手邊，領展嘅profit and loss，超濃縮版。咪收入，然後有啲物業開支。減完後，半年40億左右。

金融101：你話減債冇用下話？咁同你計下，一年慳返幾多利息。

38. 好重要嘅係，利息開支都唔細，一年過10億。仲有見唔見升得好快？之前上半年先5億有找，一年後嘅半年已經去到6億樓上。點解？估都估到，當然係因為加息！

39. 呢個，亦係領展集資嘅主要原因。有人問點解唔發債點解唔借錢。好直接地講，減咗負債，咪慳返利息開支。再借多啲，利息開支咪仲高！

40. 大約慳到幾多？只係估，但畀你有個譜。唔難計，睇返左邊，公司原本533億債，集190億，話拎一半還債，咁大約會減到440億左右，低咗17%。你當利息開支跟呢個比例，即係半年利息開支，由6億變到5億，慳返成億嘢咁咯，一年就兩億。

41. 你發現，個個只係講攤薄，但彷似啲錢倒咗落鹹水海咁。正如我Facebook寫，你放定期，190億都收幾億一年啦下話？固然應該不能完全補返個攤薄效應（否則公司就半年供一次啦），但都有幫助嘅

金融101：所以梗係幫到派息，不過股數多咗嘛，又計下數，會減幾多

42. 呢啲，當然係去咗盈利度啦！亦都幫到派息！只不過股數多咗咁解之嘛。同上面每股帳面值一樣，又計下數。

43. 留意收入減物業開支減埋利息嘅嘢，我叫做「核心」。你見到，最底嘅分派（派息），就主要同呢個數有關。唔完全一樣，因為仲有少少其他開支，同埋交稅。但，一定係剔走舊「公平值」變動，嗰舊嘢一般唔拎嚟派息，多咗又唔會派多啲，跌咗又唔會減晒你啲派息。

44. 其他嘢不變下，按比例計返，個「核心」因為利息開支細咗，多返1億，分派應該大約多8000萬（跟返以前嘅「分派」/「核心」比例）。所以，個派息係會多咗的。

45. 不過，個股數多咗20%嘛！你見到，個半年每股派息，會由1.55變咗1.33咁上下，跌咗14%（我見有大行分析員計到11%，差不多啦），但就唔係跌足20%或30%嘅。

46. 而又唔好忘記，供股嘅，你手上嘅股數又多咗喎。所以計收嘅息，應該唔會少咗。只係你又拎咗舊錢落去供股嘛。

47. 但不過，同唔供股嘅人比，你又多咗股數，股價之後升你又賺多過佢，之後收息你又多過佢。所以個計法，就相當複雜嘅，去到FAQ我會解。但正路地，你覺得公司長遠有前途，股價同派息會升嘅，似乎都係供股好

48. 而我想問一個問題：如果你覺得公司長遠冇前途嘅，咁最初買嚟做乜？

「過去唔代表將來」：以前供股嘅公司，幾個月後股價點？

49. 最後，明報呢個圖真係好，記得save低。畀你見到幾樣嘢，首先，N咁多公司都供過股，呢堆只係比較大嘅。股價表現固然唔係每一間都好（港股有邊間真係表現好？）。但，至少呢堆唔係太過老千嘅公司。

50. 更加重要嘅係，以上呢堆股票，由公佈供股開始計，大多數之後幾個月都係升嘅。唔會包生仔，亦唔係每一間都係，但你話「供股攤薄利益股價會跌」，明顯冇乜支持。你睇匯控？你睇國泰？

Case study：匯控當年，一手供22800，賺唔賺得返？你話呢？

51. 要計都真係有點難計，但就講匯控，當年1手400股，收市57蚊，12供5，供股價28蚊。一手即係22800港紙，供就供167股，4700蚊左右。

供同唔供嘅分別：匯控當年升咗一個開，咁你話夠唔夠冚？仲有之後派息呢？

52. 嚟啦喎，同唔供嘅人比，供嘅人多咗167股。問題就係，供股嘅人，之後係咪拎得返嗰4700蚊？即係，一股係咪賺得返28蚊？（個4700正係167 X 28）

53. 睇圖，匯控供完股後，低位彈咗一個開。固然拎個最低位計未必準，我亦懶去仔細計，但照計可以肯定，供股後，股價彈超過28蚊。所以，供股嘅當然有著數。

54. 但你話，扯，咁係因為嗰時金融海嘯股價殘，個股價彈都好合理。咁但，你唔供嘅，咪錯失咗呢個機會咯。

55. 就算我只係計收息，供股嘅人，歷年有冇收返28蚊息？梗係有啦。詳情你自己去睇（我幫你計埋了，睇Excel）

56. 亦即係話，我最初嘔多咗錢，但我股數多咗，後來收息，咪會補得返。實際上，收8年息咯。「嘩！咁耐！」。淨計收息咋喎，你計股價嘅，上面咪解咗，當年已經賺返晒，但你又話唔包今次都會，咁想點？

57. 當然你可以話，「我沽咗匯控走去買QQQ升幾倍喎」，咁就唔使討論。但我地而家討論，供股vs不供。似乎都係供比較著數，但肯定唔係必然。邊有包生仔？

58. 下篇就FAQ。但，其實你睇完呢篇，至少一半問題都唔使問我，下次供股都唔使再問