[ 101 心法文］　調整要幾多先夠？股災跌幾多先夠？咩位撈底？（中） (Patreon)

上篇sum up：如果覺得「今次唔一樣」，就乜指標都冇用。但往往歷史係相似

次次股災，都係「前所未見嘅危機」

睇多個例子，舊年10月，估值點都平到笑，但一樣好多人唔敢買，點解？

「香港已經唔係以前嘅香港」，「以前嘅估值冇意思」

一般嘅「今次唔同」，最後發現都係「咪一Q樣」

放開「非黑即白」嘅二元思維，以前嘅數字「要調節」，不等於「完全冇用」

17000抵，16000仲抵，15000超抵，14000喪抵　—我點知邊個位先見底？

17000點你覺得抵，飛入去，跌到14000點，你仲唔嚇到「止蝕」？

而最大鑊係：就算你唔信「今次唔同」，你信歷史，都仲係有問題的！

七成機會17000見底，九成機會14000見底，但我咩位飛入去？最終難題係：太早飛入去，要捱，賺少咗，輸多咗。太遲呢？錯失機會！

2020年美股，一個月跌三成就見底。唔算深唔算耐。你要等五成，就錯失晒

就係像極了愛情：太低要求，會出事。太高要求，又怕錯失機會

不過有個好消息—重婚犯法，一拖幾會畀人斬，但股票唔使all in

即使股災，都答唔到你要跌多先夠。何況普通調整？所以，唔好鑽牛角尖

講到尾，應該點做？畀啲實際方法你！

1. 正如上次講，近期市況靜啲，回返啲，反而又係可以講下其他嘢嘅時間。呢個系列三篇文，已寫完，第一篇在呢度。

2. 呢個系列，主要就係答好多人每次跌市或回調都想知嘅一個問題：跌幾多先夠？短案案係：真係唔知。呢三篇文會詳細討論，同埋話你知應該點做。

上篇sum up：如果覺得「今次唔一樣」，就乜指標都冇用。但往往歷史係相似

3. 未睇上篇嘅，我sum up一次（但當然，睇文要睇成篇，睇要點係學唔到嘢的），睇咗嘅，你可以skip，跳去第9

4. 每次調整，大家都想知跌幾多先夠，當然係唔會知。但，要有個大約，又唔係唔得。低手啲嘅，會睇「之前升上嚟嘅位」，「舊年嘅位」之類，完全冇用。好少少嘅，例如你可以睇每次股災平均幾耐，跌幾多，跌到咩市盈率，VIX去到幾多，呢啲數字都有啲用。亦不太難搵

5. 但關鍵始終係你自己。

6. 因為首先呢啲數字會打交，你唔事先整好指標，驚起上嚟嘅，又會越搵越多指標去說服自己唔好買。另外，10次有9次都跌四成見底，但你都會驚自己係第10次，亦不能保證唔係。仲有，你可以世事如棋局局新，但又可以話太陽底下無新事。每次股災，好似次次都唔同。每一次你都可以同自己講，「今次唔同」。而以上講嘅嘢，亦都適用於升市。總之去到一個位，你就冇晒理智，會覺得「歷史數字唔可信」。「今次唔同」—咁如果你次次都話「今次唔同」，又真係任何數字都冇意思。

7. 呢度係上篇文嘅要點，就係話你知大家嘅心魔。係咪講中你嘅想法呢，因為我都經歷過，將來亦都係再經歷，因為大家都係人，呢啲係人性嘅弱點。

8. 記住，理論易講，數據而搵，但你真係身處其中，就知係另一回事。所以我嘅文唔只係同你講數字，更重要係思考，心理。

次次股災，都係「前所未見嘅危機」

9. 記住，每次股災，就梗係有啲大鑊嘢，而每次你都可以話係「前所未見」。所以即使100次有99次係跌九成見底，甚至100次有100次都係跌咗九成實見底，你都係會同自己講，「今次唔同」。

睇多個例子，舊年10月，估值點都平到笑，但一樣好多人唔敢買，點解？

10. 仲唔信？我地再睇多個例子。港股。登登，正係「二十大」。你開始明白舊年10月11月我整一大堆金句系列。

11. 冇錯，10月時，你睇港股啲估值，肯定平絶咁多年啦。但你係咪敢買？一樣唔敢。正常，但當時你會用乜理由說服自己？不妨諗下。

「香港已經唔係以前嘅香港」，「以前嘅估值冇意思」

12. 同第一篇講嘅差不多咯，「香港已經唔係以前嘅香港」，「以前嘅估值唔管用」。「大陸經濟玩完所有盈利都會歸零」。

一般嘅「今次唔同」，最後發現都係「咪一Q樣」

13. 見到冇，正是如此，「今次唔同」。亦都見到，果然每次都係一樣，之後港股就彈返8000點。一般嘅「今次唔同」，最後發現都係「咪一Q樣」

14. （我知高位回返1500—你問我，「會調整幾多？」—呢個問題咪就係我寫呢篇文嘅原因！）

放開「非黑即白」嘅二元思維，以前嘅數字「要調節」，不等於「完全冇用」

15. 留意，話「港股已經變質」呢句嘢，唔係錯晒。等於你老公你老婆話「你以前唔係咁」，實啱架喎。問題係只講呢句近乎係冇意思。你就係要踢走啲非黑即白嘅二元思維。

16. 舉個例，你可以話，而家係人口老化年代，同以前唔同。係丫。但難道你就話，美股之前啲估值「冇意思」？OK，可能唔係100%有用，但，「冇意思」唔代表完全冇用。可能以前市盈率15倍公平，而家你話「人口老化人工成本高通脹長期高企」，可以拗只值13倍（但你一樣可以拗話應該值17倍！narrative之嘛。「人口老化需求下降通脹唔會高」）。但，你總不能話我知，以前啲數「完全冇意義」，所以去到100倍都唔貴，或者去到5倍都太貴。

但事實係：17000抵，16000仲抵，15000超抵，14000喪抵　—我點知邊個位先見底？

17. 你可以save 低呢段：於是乎，實際上你見到嘅情況就係咁：17000點抵，16000點仲抵，15000點超抵，14000點喪抵。係真係咁架喎。點解係喪底先見底，唔係超抵就見底？而又唔係13000點嘅痴Q線地抵先見底？。

18. 而個值搏率亦真係越低越平。問題係，你係17000點飛入去嘅，跌到14000點，你係咪捱得住？（20%呀下，講「止蝕」嘅一定已經打靶）。

17000點你覺得抵，飛入去，跌到14000點，你仲唔嚇到「止蝕」？

19. 而當然好肯定嘅係，17000嗰時你都仲可能好有信心，根據以前嘅估值點點點。但跌到14000你就真驚，覺得「今次唔同」。

20. 當然仲有另一個問題，亦係最後想講嘅一樣嘢：點解係14000見底，唔係15000？呢個係永世唔會有人答到你嘅問題！事後都唔會知，何況事前？何況你嚇到日日腳震嗰時？

而最大鑊係：就算你唔信「今次唔同」，你信平均，都仲係有問題的！

21. 即使我地真係信「歷史」，可能你計估值，七成機會17000見底，九成機會14000見底，而你又唔會諗「今次唔同」。但，都仲係有問題。

22. 聽住啦喎，我真係計數，信七成機會17000見底，九成機會14000見底，我完全信歷史重演

七成機會17000見底，九成機會14000見底，但我咩位飛入去？

23. 問題係；咁我幾多點飛入去好？都係答唔到！我點知今次係七成定九成？

24. 即使計晒數，太早飛入去，17000飛入去，仲要捱多20%，而且萬一真係「今次唔同」，損失更大。記住，「萬一你錯呢？」

25. 但，太遲飛入去呢？等到14000先飛呢？咁今次事後你梗係見到係14000見底，但事前點知？可能17000已經見底，咁你就錯失咗機會。

最終難題係：太早飛入去，要捱，賺少咗，輸多咗。太遲呢？錯失機會！

26. 美股在2020年嗰次股災，正係咁上下。雖然跌得好快，但三成跌幅真係唔算特別多，估值亦唔係特別平　—　不過，跌咗三成後，聯儲局就爆出「無限QE」嘛，然後就一路升了。你想等「安全啲」，就變咗永遠等唔到。

你睇2020年美股，一個月跌三成就見底。唔算深。但你要等五成，就錯失晒

27. 於是你見到，係一個永世嘅矛盾：我當歷史上五成嘅股災跌三成就夠，而七成股災跌一半就夠　—　咁應該「幾多成」先夠「安全」？當然等得越深越安全，但個標準放得太嚴，又永世等唔到。

就係像極了人生：太低要求，會出事。太高要求，又怕錯失機會

28. 其實，「即係揀男朋友揀女朋友咁」，太低要求，又怕未遇到真命天子，平賣咗畀個MK仔MK女。但太高要求，又怕等到死。係冇完美方案的。

29. 不過：男女朋友就最好唔好同時搵幾個，但錢，你係可以分幾注嘅！！

不過有個好消息—重婚犯法，一拖幾會畀人斬，但股票唔使all in

30. 見到冇？即使係「股災」，要答你「跌幾多先夠」，都根本近乎答唔到。更何況係普通嘅調整？港股升咗8000點後，回1500點，你問夠未，實在好難答到你。或者最好唔好問啲冇答案嘅問題。正如你問我恒指會升到幾多點，都係冇乜答案嘅問題。

即使係股災，都答唔到你要跌多先夠。何況普通調整？所以，唔好鑽牛角尖

31. 講咗一大堆問題，話咗畀你知點解咁難，點解好多嘢唔work。你問，大佬，咁點好呀？，放心，我係有答案嘅

32. 實際上應該點做？好啦，首先例牌菜，長期讀者一定估到。當然係分段買。比較好嘅真係每個月供，做唔到嘅，收入唔穩定開支唔穩定嘅（例如我而家咁），咁就一有錢就買落去，唔好理平同貴

講到尾，應該點做？調整幾多先夠？點撈底點入市？畀啲實際方法你！

33. 真係唔得都好，都真係分幾段。有啲人係真係做唔到每個月買嘅，例如有啲讀者話「手頭上有2000萬現金，但冇收入」（我的讀者好富貴），咁呢啲其實係好頭痕嘅問題。因為2000萬瞓落去，一個月輸你30%，你又冇收入，包你瞓唔著。但呢啲一個月跌30%係真係會發生（2020年咪發生咗），仲要係指數咋喎，個股可以唔止，Facebook Netflix 往年，一兩日就冇咗30%啦

34. 所以，分段買吧。可以係時間，例如2000萬你分幾年，個個月買。

35. 仲有，畀啲有建議性啲嘅建議你：我知好多人係唔會聽我講，鍾意自己time the market—都得，但你就平時做定啲指標了。呢個肯定有用

36. 仲有，到時真係打中呢啲指標，就真係執行。真係VIX見30你就買，真係見到你阿媽都買股票就沽（下面講，呢啲係「非數字指標」），否則即係自己呃自己。又跌返落「今次唔同」嘅陷阱

37. 仲有，有啲大行分析員嘅做法，我覺得值得你參考。你可以睇定堆指標，可能有五個。然後你咪睇下著咗幾多盞燈。一盞你冇信心，三盞你咪多啲，五盞著晒咪飛入去。

38. 但當然一樣會遇到之前嘅問題：一盞就飛入去可能太早，等夠五盞可能永遠都等唔到。呢樣嘢係永遠都冇可能解決的，死咗條心吧，太高要求就自然會搵唔到另一半，太低又唔甘心，冇得搞的。

39. 當然你嘅指標都可以分段，例如VIX到30買第一注，到40再買第二注，如此類推，可以一早寫定。呢個亦都可以幫你解決嗰個「太鬆又怕太早飛入去，太緊又永世買唔到」嘅兩難，就係鬆時買啲，緊又買啲。

40. 仲有，唔多信數字指標嘅，或者唔識計嘅，亦可以用「非數字指標」。舉個例，Cathie Wood潛水一排，早排又出嚟也文也武，又話佢隻嘢係新納指，又話比特幣見100萬—果然就係大市調整嘅位！

41. 你話，即係搵燈神？某程度係。其實都係恐懼與貪婪啫。例如舊年我有一排冇再整啲股票Excel，寫啲金句文，「果然係見底訊號」。正如有一排我會賣Facebook 廣告，「咁就可能係見頂訊號」，

42. 不過，哲學嘢—「非數字指標」可以用，但都係要夠客觀。好多「非數字指標」嘅問題係太模稜兩可。例如「師奶入市」「少年股神當道」就爆煲，係，但邊個師奶？只係你屋企嗰個，定係要成個村嘅一半師奶？點先叫少年股神？

43. 反而，如果你話「我個爛賭老母入市我就即沽」—拿，呢啲就係「客觀」了。就唔好到時又呃自己「佢買少少啫，都唔係瞓身家」—一係你就預先諗，佢一買我就沽。一係你就話，佢拎埋啲啲積蓄去買先沽。記住，越清晰越好。

44. 仲有，我一路強調，平時就要好做好啲「指標」，或者平時就好多啲思考，睇多啲文，例如今篇。因為到大跌市時你先搵，你先聽人地講，就會出現第一篇文最初我講「搬龍門」嘅問題。你係決定跌三成買，就跌三成買。唔好到時跌三成又話等四成先，跌五成又話跌九成先（當然，分段就可以幫你解決呢個問題）

45. 最後，「撈底」真係overrated，個個月買，咪個個月撈底咯。當然仲有，真係想捉底位嘅，你又夠膽買幾多落去？你2000萬在手，你就拎2000萬去撈底？我唔信，因為跌多20%你會嚇到瀨屎。所以，你咪又係可能買少少！咁，畀你撈到又點？

46. 寫文寫過幾次，唔好只係睇回報。回報高不如買得大。

47. 當然仲有啲以前都講過嘅，不再重覆。保持樂觀啦（邊有咁多「今次玩完」），睇少啲垃圾啦。

48. 順手講埋，結局預告：有讀者問嘅問題（原文照錄）：

49. 「睇左你最新兩篇講後生all in 股票，見到主要係提美股，點睇all in 股票，特別係美股，有冇可能做左Russell’s turkey？」

50. 十分好嘅問題，於是我寫足一篇文去答。已經寫完。如果市況冇乜大波動就聽日出。