[ 101 心法文］　調整要幾多先夠？股災跌幾多先夠？咩位撈底？（上） (Patreon)

股市調整，「跌幾多先夠？」—呢啲問題係唔會有答案嘅

以往平均跌幾多，跌幾耐，搵唔到數咩？搵到，但對你冇用的。

2020年3月，點解係跌三成就彈？點解唔係兩成？點解唔係五成？

指標會打交，咁信邊個好？

最好你平時有套指標，唔係臨時先做。否則會點？否則你會搬龍門

指標嘅嘢，就係防止你「太有立場」。太有立場反而唔係好事

如果你覺得「今次唔一樣」，咁就真係乜指標都冇用的

百年一遇，就真係唔係一百年發生一次嘛大佬

世紀疫情，911，珍珠港，金融海嘯，邊次唔係「世界從此唔一樣」？

今日爆氣球聽日打台灣後日核戰冚球鏟。你點保證唔會？

反過嚟講，喪炒嗰時，又係「世界唔一樣」，「以前啲估值冇意義」

世界係咪不一樣？日日都不一樣架啦。根本只係narrative

市比較靜，忽然興之所致，寫咗篇長文。又講啲基本心法101嘢，寫咗成萬字（！），分三篇上。

股市調整，「跌幾多先夠？」—呢啲問題係唔會有答案嘅

1. 市況靜返啲，未必壞事。對我係可以睇下其他嘢，諗下其他嘢，寫下其他嘢。對你呢？除咗同我一樣嘅嘢外，之前嫌股票「貴」嘅，跌市亦有機會可以畀你買。

2. 好多人會問一個問題：「調整跌幾多先夠？」。或者係「跌幾耐先買？」，「跌到咩位先買？」，其實差不多係同一個問題（不過好認真答你，「幾時先買」，係易答過「咩水平先買」）

3. 答定你：「跌幾多先夠」呢啲根本完全唔會有答案，永遠都只係一個「大約」。呢兩篇文，會詳細解你知。呢啲數字搵唔到咩？

以往平均跌幾多，跌幾耐，搵唔到數咩？搵到，但對你冇用的。

4. 你心諗，唔係喎，睇下以往調整要幾耐，要跌幾深，咪知咯。再唔係睇市盈率，睇市帳率，咪會知。當然搵到，但，都係答唔到你「跌幾多先夠」嘅問題。

5. 我甚至可以畀個好哲學嘅答案你：沽畀你嗰個，難道唔識睇上面嘅數字？呢刻你可能唔明我想表達乜。你抄低呢段，睇晒成篇文，再諗多次。

2020年3月，點解係跌三成就彈？點解唔係兩成？點解唔係五成？

6. 拿港股你會話大陸玩完呀香港玩完呀港紙爆煲呀一文不值呀咁（話時話，邊個真係信嘅，歡迎你1蚊賣晒你啲港股或MPF畀我）

7. 但我地講美股，冇上面嘅問題啦OK？例如2020年2月尾至3月尾，疫情全球開花，美股一個月跌咗3成，納指更加唔止。但，大家都知美國唔會玩完，係咪？總會好返。所以個問題都係，跌幾多先撈。

8. 但咁就考起啦。實際上嘅做法，你可以睇以往嘅大調整，平均跌幾多（答案：三成應該大約係中間位）。又或者你可以睇市盈率之類（答案一樣：跌咗三成後，美股當時都唔見得「特別平」）。又或者，耐唔耐都講，VIX升到30，往往係市場相當恐懼嘅表現（但，疫情股災時，見過60樓上）

9. 呢啲都係OK有用嘅指標，但即使事後睇返，點解跌三成就見底，都唔係咁易解釋，似乎係「應該」跌多啲。況且仲有幾個好大嘅問題。

指標會打交，咁信邊個好？

10. 首先，啲指標係會打交嘅。好記得嗰時史兄（你仲識邊個史兄？）講，你諗下，咁大件事，會唔會一個月就調整完？好合理，我嗰時都覺得佢講得啱　—　但就係一個月就完成。吹咩。你睇史上嘅「調整」，計個平均，又發現一個月似乎遠低過平均。但你睇「深度」，就好似叫做平均。咁信邊個好？

最好你平時有套指標，唔係臨時先做。否則會點？否則你會搬龍門

11. 然後你發現，指標嘅嘢，往往都係龍門任搬。最好你自己有套自己嘅指標（所以，平時就要睇文！）。然後例如我整定一堆嘢，真係股災，我就睇呢幾樣嘢，咁反而係有用嘅做法。

指標嘅嘢，就係防止你「太有立場」。太有立場反而唔係好事

12. 否則會點？否則你自己「太有立場」嘅，最後你只會拎啲龍門嚟justify自己嘅立場。即係點？即係你堅持覺得「唔敢買」嘅，跌三成，跌一半，跌七成，你都可以搵到「理由」的　—　大把指標，你要搵到啱自己心水實得。令件事更惡搞嘅係，嗰啲時間你睇啲不同嘅KOL，一樣會不停用啲唔同嘅「證據」去話畀你知，跌三成又未夠，跌五成又未夠，跌九成都係未夠的。

計市盈率，幾多年平均先好？10年？50年？100年？邊個先準？

13. 例如點？最簡單，你去計市盈率之類，你用10年，50年，定100年已經好唔同啦。你要不停搬一定可以搵到證據，達成任何你想要嘅理論。亦都冇話邊一個「特別準」。

14. 第三個問題，亦同上面差不多。冇錯係真係可以計「平均」，平均跌幾多，跌幾耐，去到咩市盈率。但講咗問題啦，首先會打交，二來你用幾耐歷史都係個問題。不過最重要嘅問題係：根本去到一個位，你覺得世界末日嘅，「咁就乜都唔使講的」

15. 即係點？即係我當個跌幅已經遠超平均，跌嘅日子又遠超平均，又長又深。VIX又夠高，市盈率又夠低。但，你一樣可以搵到理由唔買的！好簡單，個理由叫做「今次唔一樣」　—　而呢句嘢可以justify 任何嘢喎。

如果你覺得「今次唔一樣」，咁就真係乜指標都冇用的

16. 負面嘅，的確疫情係「世紀疫情」喎，係百年一遇喎，冇誇張。咁封城法，咁樣經濟停頓，係史上未見過。於是你真係可以話「以前嘅數據都冇用」—咁就即係，任你講了，跌九成都係太貴，因為人類文明會滅亡。而家你梗係覺得好笑，但再講次，你話疫情係「百年一遇」，冇錯喎。

17. 不過，呢度就有少少數學常識嘅問題要講。正如啲人會取笑大陸啲災情，次次都「百年一遇」。但百年一遇嘅嘢，又真係唔係百年先會發生一次嘛！（大約睇呢會解到你知）

百年一遇，就真係唔係一百年發生一次嘛大佬

18. 我地再睇一睇，2001年，911，美國本土遇襲（珍珠港唔係「本土」），肯定係「百年一遇」，「世界從此不一樣」。同樣地，2008年，金融海嘯，亦都係「百年一遇」嘅事件，「世界從此不一樣」，之前應該冇見過咁嘅東西。不過，二次大戰，偷襲珍珠港，亦係「百年一遇」，「世界從此不一樣」。

世紀疫情，911，珍珠港，金融海嘯，邊次唔係「世界從此唔一樣」？

19. 正如我成日講（近排好似少咗講）嘅一句：喂，narrative 之嘛

20. 獨立嚟睇，你聚焦某啲嘢嚟睇，係真係「百年一遇」，但你拉開啲個鏡頭，扯，咪又係咁。同樣地，一方面係「世事如棋局局新」，但另一方面又係「太陽底下無新事」，「歷史驚人的相似」。

今日爆氣球聽日打台灣後日核戰冚球鏟。今日出期權聽日大鱷狙擊後日港紙爆煲。「你點保證唔會？」

21. 所以，只不過係論述，好多你網上睇到嘅吹水評論，都只係咁。數字唔係一切，但真係有數字會實際啲，否則你永世都唔會買股票，因為今日擊落個氣球，聽日台海就打仗，然後核戰，冚球鏟，買午餐肉啦仲買股票。你點保證唔會？今日銀行出賭聯匯嘅產品，聽日大鱷狙擊，後日港紙爆煲，你點保證唔會？

22. 留意，反過嚟講，大家太樂觀嘅情況，一樣有呢嘢發生。正如以前一路話美股估值貴，但好多人總會覺得，「今次會唔同」。「以往嘅模式唔適用」。

反過嚟講，喪炒嗰時，又係「世界唔一樣」，「以前啲估值冇意義」

23. 但你諗下，正如講疫情，金融海嘯，911係「百年一遇」，「世界從此不一樣」，又唔係全無道理喎。同樣地，2000年喪炒科網，2020年喪炒啲網紅股契媽股，又唔係全無道理喎

24. （不過相比之下，互聯絡真係改變世界，相反2020年嗰堆嘢講改變世界，係牽強好多嘅　—　但搞笑在，正係因為互聯網真係改變世界，2000年啲估值先更加癲，先更加死得人多）

世界係咪不一樣？日日都不一樣架啦。根本只係narrative

25. 記住，所謂嘅「世界從此不一樣」，其實都係睇你點演繹。你見好多估值指標，真係幾十年都work，次次你話不一樣，最後啲嘢都係大跌，話畀你知，其實係一樣嘅。

26. 正如我貼過呢兩個圖，不外乎話你知，美股太貴先追入去，比較易瀨嘢（所以你話估值幾咁重要）。仲有，美股持有XX年，必賺無輸。

27. 但，一樣會有人質疑，「今次唔同」「個世界唔同咗」，對不？

28. 呢度一大堆嘢嘅核心思想就係：你去睇「平均」，可能係有用的—但最後都係睇你自己。例如我當平均股災跌三成，咁你飛入去，然後再跌多兩成—你仲唔驚？咁你就會同自己講，平均咋喎，有時可以跌八九成喎。

29. 呢個系列會寫三篇，其實己經寫好晒，只要呢兩日冇乜翻天覆地嘅事發生，就之後兩日貼埋佢

30. 但，「邊個可以保證，呢幾日冇翻天覆地嘅事發生呢？」，況且，咩叫翻天覆地，都係好睇你點定義之嘛。