愛馬士　LVMH 金源 日日新高梗係爽，但唔好以為必然．美國就業數據強勁，觸發回調。Starbucks Google 蘋果 Amazon 業績 (Patreon)

愛馬士　LVMH 金源 日日新高梗係爽，但唔好以為必然

你要做嘅，唔係在個浪升到一半飛入去，然後在佢未完前沽走

金源今年升咗160%，幾時落車好？

未必放心持有嘅股票，應該點操作？

今個星期市況應該差啲，但唔係因為氣球啦下

真正值得睇嘅，係兩樣嘢。市值＝估值ｘ盈利

而家又話加息了，因為出咗個好勁嘅就業數據

但，個就業數據真係咁勁？魔鬼在細節啦

失業率低，但人工壓力唔大，咁即係點？

業績一抽：Starbucks美國強勁，外國唔掂。當然係因為中國。

Google：YouTube廣告收入跌8%，低過預期

但Google Cloud係個亮點

點解同樣係靠廣告開飯，Facebook 業績咁勁，Google就唔掂？

蘋果：7年以嚟第一次盈利低過預期。但股價升喎，點解？

Amazon：點解業績好過預期都跌8%？

Amazon：廣告收入增長係亮點

整體堆Big Tech業績，即係點？

1. 寫呢篇文時星期一朝早，港股就回調中。

愛馬士　LVMH 金源 日日新高梗係爽，但唔好以為必然

2. 呢排嘅新讀者明顯多咗，好大程度應該因為市況好，同埋我成日貼LVMH，愛馬士，金源等等新高有關。不過都告誡下大家，並唔係咁簡單。

3. 固然你在我開始貼嗰時（一月尾）追入去，幾隻都仲有OK嘅回報。但更加好，當然係你再之前買，舊年年尾買就最好。金源就應該不可能年尾有人買，我亦冇講，但LV愛馬士呢啲都耐唔耐講。

你要做嘅，唔係在個浪升到一半飛入去，然後在佢未完前沽走

4. 你要做嘅，唔係在個浪升到一半飛入去，然後諗住未完前沽走—首先並唔易捉，另外，咁買法，你亦往往唔買得大。你應該做嘅，係在啲嘢完全未升時就儲，然後升嗰時你可以食到盡，之後到回調嗰時你亦唔會太擔心，因為回調後都仲係高過你買嘅位

5. 當然呢個係理想嘅情況，你舊年10月買就做到。但你話：如果買完升咗又冇沽之後倒跌輸錢呢？其實都冇乜嘢。重要嘅係如果你隻股票夠好，一般就買貴咗，捱下都仲有機會浮上水面

金源今年升咗160%，幾時落車好？

6. 另外，都跟進下隻金源。今年升咗160%，而家追入去就當然唔太抵玩。故事要講嘅都差不多講晒，可以睇返舊文，或者我在經濟一周同明報寫嘅文（Attachment 有）

7. 實務上呢啲東西點操作？未必係可以長期持有嘅股票。升咗又幾時走？以前寫Tesla（有一期升得好癲），或者理文化工746都寫過。最好就做到差不多「零成本」法，例如隻嘢升咗100%，我買5萬蚊，變咗10萬，就沽走5萬先。剩返嗰啲你可以慢慢碌過世，反正只係意外得嚟嘅盈利。

未必放心持有嘅股票，應該點操作？

8. 如果冇升到100%呢？原理其實都差不多。升到50%嘅，5萬蚊變7萬5，你一樣可以沽走5萬先，只不過你剩返睇結局嘅部份就比較少。

9. 升得太少？咁就當然係做唔到呢樣嘢了。但，如果升得10%嗰啲，就根本唔好諗「take profit」吧。呢個都係好多人會出現嘅問題，你贏先贏得10%，點夠補輸嗰啲？而有時即使你「止蝕」都冇用，往年Facebook Netflix之類，出完業績一下跌20%，你點「止」都至少輸咗20%。

今個星期市況應該差啲，但唔係因為氣球啦下

10. 講返市況，上星期好地地，今星期就似乎麻麻地。唔係壞事，亦都冇可能日日升。而你睇呢幾日就好多「壞消息」可以畀你去講，借勢回調下。

11. 基本上可以肯定，會有好多人拎氣球事件嚟大造文章，但依我看來根本無關重要，不過都講過，好多人都鍾意搵理由，特別有政治事件就更加啱。切戒呢啲思維方式。

12. 真正比較值得講嘅，除咗係1月真係相當強勁，有超買，有獲利盤外。仲可以留意美股方面嘅兩樣嘢。

真正值得睇嘅，係兩樣嘢。市值＝估值ｘ盈利

13. 首先係息口前景（亦影響債息美匯），第二係業績。話時話，以前咪寫過，市值 = 估值 X 盈利。息口前景就同前者有關，業績就同後者有關了。睇呢啲比較重要，而唔係個氣球。

14. 先講前者，亦真係只係兩日嘅事。之前議息後，市場都仲相當興奮（舊文有寫），一兩日後，情況又即時唔多同。

而家又話加息了，因為出咗個好勁嘅就業數據

15. 但亦不能怪市場啲期望轉嚟轉去，因為星期五的確有個相當唔好嘅消息：美國嘅非農職位增長，遠超市場預期。街預18.5萬個，結果實數係51.7萬個。仲有，失業率降到3.4%—衰退？衰乜嘢退？

16. 咁就真係令市場震驚了　—　特別係之前一堆數字仲係見到職位增長麻麻地，一路仲係講就業市場開始降溫。忽然出個咁勁嘅數字，難怪市場郁得勁。

17. 大家都知，呢排嘅論述，都係「通脹降溫　加息差不多收工」，觸發咗股市反彈。實情「貨物」上嘅通脹，好早已經見到回落晒，問題係「服務」嘅通脹一路都比較頑固。亦因為就業市場強勁，請唔到人，僱主要出高人工，咁加人工又會拉高通脹同服務價格之類。

18. 咁而家見到個非農職位咁強，當然係一大打擊。你見到加息嘅預期又升咗（但都只係預加多兩三次），另外，10年美債債息上返3.5厘，美匯指數亦升到3個星期高位。呢啲東西一般都不太利好股市

但，個就業數據真係咁勁？魔鬼在細節啦

19. 不過啦喎，我就唔係睇得咁淡。首先，就真係只係一個月嘅數據，加上之前大風雪，仲要今次嘅數字有啲計算上嘅調整，含金量應該冇咁高。而之前有唔少公司宣佈裁員，好似都未反映晒落去最新數字度

20. 仲有可以留意嘅係，雖然職位多，失業率低，但見到人工升幅，其實放慢緊。按月只係升0.3%，而按年升幅4.4%，亦都低過上一次（12月）嘅4.9%。所以我傾向同意呢篇文嘅法（唔知要唔要訂戶先睇到），照計通脹落回落嘅大勢，係冇變嘅。

失業率低，但人工壓力唔大，咁即係點？

21. 不過，都話港股美股已升咗咁多，調整下都正常。何況星期五仲有一堆唔太好嘅業績。

22. 美股嘅「業績期」其實好長，唔同公司又唔同年份年結，今個星期都仲有迪士尼，百事，家樂氏（Kellogg's）等等。不過一般嚟講，可以話當嗰堆大銀行嘅業績係開始，Big Tech就叫做收尾。

23. 咁今次業績期，都算係「衰收尾」—整體業績都係不錯，差過預期嘅唔多，即使差過股價都不見得大插。但最後幾隻就差啲了。可以快手睇睇

業績一抽：Starbucks美國強勁，外國唔掂。當然係因為中國。

24. 首先係Starbucks，呢隻冇買，業績係差過預期嘅（但唔算爭好遠），主要原因都係中國嘅防疫政策—但呢個明顯只係暫時嘅因素。公司嘅展望似乎都幾正面，不過股價照跌。我估係因為之前都創咗52星期高新高。星期五大約跌4%

Google：YouTube廣告收入跌8%，低過預期

25. 然後係有買嘅Google，係麻麻地嘅。

但Google Cloud係個亮點

26. Google就收入同盈利都低過預期，廣告收入直頭要倒退（大約4%）。主要係YouTube，廣告收入按年跌8%，低過預期。Search Ad收入亦按年跌2%。比較強嘅係Google Cloud—收入都係低過預期，但按年升32%。而且個虧損收窄咗，舊年蝕9億美金，今次蝕4.8億啫，轉虧為盈不是夢（雖然都講咗好多年）。整體嚟講，就真係唔係非常差，但估值高嘛，冇乜點跌過的。業績後跌返3%啫，濕濕碎。

點解同樣係靠廣告開飯，Facebook 業績咁勁，Google就唔掂？

27. 你發現，同樣靠廣告收入嘅Facebook，業績就好似「勁靚」。但其實Facebook 嘅廣告收入，一樣按年跌4%左右，同Google差不多。咁點解Facebook 業績又話好？當然係因為市場期望低。呢個亦都解釋咗點解估值爭一截，然後業績後股價嘅反應，就同估值有關了　—　原來兩間情況差不多，咁低期望低估值嗰間就爆升，高估值高期望嗰間就跌了。

蘋果：7年以嚟第一次盈利低過預期。但股價升喎，點解？

28. 然後睇睇蘋果，亦都係收入同盈利都雙雙低過預期。7年第一次差過預期。但股價升喎，完全唔知點解，可能覺得個業績差只係因為中國防疫嘅因素影響，係個別事件啩。亦可能因為公司嘅指引好似幾樂觀

29. 見到收入按年跌5%，2016年以嚟最大嘅跌幅，主要就係同中國生產線受阻有關。大多數業務嘅收入都低過預期，包括最重要嘅iPhone收入，不過服務收入就出奇地高過預期，仲要有得升（仲有iPad都係好過預期，但佔總收入唔多）

Amazon：點解業績好過預期都跌8%？

30. 最後係Amazon，業績好過預期，但指引相當保守。另一個問題係AWS嘅收入亦都低過預期（雖然有20%增長，但放慢咗）。留意公司一路都唔係十分賺錢，嚟緊一季分分鐘冇盈利，難怪股價大跌8%。

Amazon：廣告收入增長係亮點

31. 有趣嘅係廣告收入做得唔錯，好過預期，其實都差不多佔總收入10%了，增長甚至同AWS差不多

整體堆Big Tech業績，即係點？

32. 整體，即係點？即係你見到幾明顯，啲盈利大多數都係倒退嘅，收入又放慢晒。明顯個經濟情況唔係太好。但同時間失業率又低，人工壓力依然有。呢啲夾埋真係唔係太好嘅組合。

33. 成日都講，市值＝估值 X 盈利。以前咪講過，你太貴買嘅，即使公司盈利有升，個估值嘅收縮都夠輸死你。而家呢堆科技股嘅情況，就係盈利增長唔強，但估值升返高　—　一來之前跌咗唔少，二來亦因為估就快加完息，債息低咗。

34. 所以，都係要睇之後嘅通脹同利息情況點。但整體上，都覺得美股應該會跑輸其他市場。