大師冇點你：Facebook 業績勁彈，盈利復蘇係咪可以繼續？聯儲局加息，收工未？會加多幾多次／加到咩位？ (Patreon)

港股11個月高位，美股5個月高位，隨時跌10%都唔奇。咁點好？

加完息，道指跌500點，就話擔心加息。但即市收復晒，又話放鴿。點玩？

點都係就快完場，唔好好似啲啲傻仔咁以為要等減息

仲會加多幾次息？主席話A couple more，「即係幾多次」？

上次講Pace of future increase，今次講extent

通脹死灰復燃？應該唔會啦啩

市場又估，到底會加多幾多次息？加到咩位？加到幾時？你估下？

減息呢？又會唔會減息？

如果經濟狀況符合預期，預計今年唔會減息　—即係廢話。定唔係？

教埋你睇，點睇到市場估加幾多次息，加到乜位停

更緊要嘅，就睇美債債息，同美匯指數

大師冇點你：四間科企業績搏一間，我話搏Facebook。績後升25%！

Amazon，蘋果，Google，全部插水

我揀Facebook，因為平。但點平？就教你慢慢計

10月尾嗰時，單位數市盈率添呀。但你又唔敢買，「二十大呀」

盈利按季反彈，但係咪可以持續？應該可以。話你知點解

其實，仲有冇人用Facebook？你話呢？

同樣係做廣告嘅Google，業績後大插。講乜鬼「經濟」「行業」丫

港股11個月高位，美股5個月高位，隨時跌10%都唔奇。咁點好？

1. 簡直係…….我都唔知講乜好啦。原本想講1月總結，但又太多嘢要講了。不過告誡定你，港股美股升咗咁多（特別係港股），忽然跌返10%甚至20%，完全唔奇。唔係叫你唔買，但分段，分散，同埋唔好槓杆。仲有，買得就唔好跌少少又驚。而你大大注買落去就最易驚。

加完息，道指跌500點，就話擔心加息。但即市收復晒，又話放鴿。點玩？

2. 首先，都係講咗聯儲局議息。全無意外（意外會死人的！），加0.25。先講市場表現，當然你見到美股升，於是大家又話「放鴿」，實在係無聊之極。

3. 但如果你好似我咁由頭睇到尾，你會發現，美股在議息結果之前，跌。出完，再跌多啲，道指一度跌500點，但收市係倒升嘅。

4. 我想講嘅係：你想即市day trade，根本係玩死。出結果跌多咗，咪話「仲加緊息」。倒升喎，又話「放鴿」，完全浪費生命，大家切戒。

點都係就快完場，唔好好似啲啲傻仔咁以為要等減息

5. 好啦，加完0.25，之後點？當然係嗰頭近，點都係就快完場。可能仲有幾次？但點都係就快完場。

6. 記住，炒預期。唔好學啲傻仔咁，過去幾個月，不停講仲會加息，股市冇運行。全錯。你唔信港股，你都睇美股。你睇埋美匯指數幾時見頂？你睇埋美債債息幾時見頂？你留意到呢啲，已經叻過好多人。

仲會加多幾次息？主席話A couple more，「即係幾多次」？

7. 仲會加多幾多次息？就考你嘅英文能力（！）。因為，主席講話a couple more，亦有人話佢係講 a couple or more，而中文媒體一般都當a couple more就係「兩次」。呢個就真係……大家自己判斷下。無論如何，只係記者會講，其實不能作準，有白紙黑字先計數。

上次講Pace of future increase，今次講extent

8. 其他值得提嘅重點，都唔少。首先，真係要我揀一邊嘅，我都覺得聯儲局真係「轉鴿」的。又係英文時間，上次係講”pace” of future increase，但今次係”extent” of future increase，難免令人覺得，差不多了。

9. （係，啲人會捉住兩份嘢，每次字咁研究，你可以睇CNBC呢度，好好玩的）

通脹死灰復燃？應該唔會啦啩

10. 仲有，可以留意嘅係，之前公佈咗幾個數字，都顯示出就業市場好似真係降溫（但當然可能係誤鳴）。首先，ADP私企職位，低過預期好多。JOTLS職位空缺，又高過預期。非農單位勞工成本升幅亦都低過預期。呢啲都可能顯示通脹壓力唔會再升溫，當然應該係好消息

市場又估，到底會加多幾多次息？加到咩位？加到幾時？你估下？

11. 另外，又係好多人關心嘅問題（雖然我覺得已經無關重要）。仲有幾多次息加？上面話a couple more，局方講啫。但局方有時都轉軚，市場又點估？

12. 之後仲有3月，5月，同6月嘅會。你睇媒體講會見到（陣間我都會貼圖），市場似乎係估，6月就見頂，4.9厘左右。而家係4.5-4.75，即係加多一次咁大把。似乎係比官方引導嘅”a couple more” 。

13. 點解我覺得無關重要？因為，加一次，兩次，同三次，到底有乜大分別？只係多幾個月停嘅分別，而一定唔使等佢停（股市早兩個月已經升緊啦）

減息呢？又會唔會減息？

14. 同樣地，市場估今年已經會減息，但主席話如果經濟狀況符合預期，預計今年唔會減息。其實你諗真啲，即係冇乜點講過嘢，「到時減息就係經濟狀況不如預期」。不過又唔係完全廢話，你可以睇返，局方大約估啲經濟數據係點（3月嗰次會又會再更新），咁佢都要跟返啲數字做嘢，如果之後偏離好遠，可能你咪見到減息。但同樣地，幾時減，真係未必最重要。原因？上一段講咗

如果經濟狀況符合預期，預計今年唔會減息　—即係廢話。定唔係？

15. 另外，亦都可以好快咁教你睇埋市場估加多幾多次息。簡單方法都有，一樣係睇CME Fed Watch。再講一次，而家係4.5-4.75。

教埋你睇，點睇到市場估加幾多次息，加到乜位停

16. 咁你見下次，3 月嘅位，極大機會都係會加多0.25，去到4.75-5厘。所以呢次幾肯定

17. 好啦，5月先係戲肉喎。見唔見中間,，4.75-5，先係最大機會？即係可能加埋3月嗰次，5月就收工。但當然，仲有一定可能，係加多一次去到5-5.25。你可以話，一半半咁，加，或者唔加。

18. 6月呢？冇了。冇人再估5.25-5。即係，收工。

19. 即係點？即係，至少一次，有可能兩次，應該唔會三次。當然，呢啲預期可以一路轉，但上面就係教你點去睇。

更緊要嘅，就睇美債債息，同美匯指數

20. 反而比較緊要嘅係：你可以睇住啲美匯指數，同埋美債債息，呢啲就最敏感。議息嘅星期三晚，美匯大跌，星期四升返少少，但仲係9個月低位。

21. 債息方面，唔算回得好快，但都係叫做幾個月嘅低位。呢啲都係對市況比較有利嘅。你見到呢啲嘢逆轉時，往往市場就有啲調整。不過多數係一齊郁嘅。

大師冇點你：四間科企業績搏一間，我就揀Facebook。績後升25%！

22. 好啦，第二部份，講Facebook．今次真係大師冇點你．早兩日篇文講到明，四隻今個星期嘅科企業績，我只搏一隻，就係Facebook。

Amazon，蘋果，Google，全部插水

23. 順帶一提，剛剛見到另外三間出晒業績，盤後Amazon，蘋果，Google，全部插水（其實Starbucks都係），估唔到個業績期好似臨尾香。但盤後交易未必完全準（雖然都好有參考價值），睇埋星期五開市先。

24. 四間有三間插水，一間大升，都畀我搏到。當然點都有幸運嘅成份，但你應該估到，我揀搏呢隻嘅原因，係因為估值！平。殘到不堪。

我揀Facebook，因為平。但點平？就教你慢慢計

25. 不過，其實都有啲難計，即管解釋下。睇呢度，你會見到之前三季嘅純利。最新嗰季佢未有，2022年佢都未有。但我人手話你知，46.5億。

26. 仲有，Facebook而家（升咗之後）市值剛好5000億。升咗兩成幾嘛。換言之，未升（未出業績之前），大約4000億。而低位（11月頭），差不多係而家一半，2500億

27. 11月時，你用2021年純利（表嘅左邊）計。2500/394，6倍市盈率呀！呢啲就真係叫平！

28. 但聰明嘅你都知，冇事冇幹唔會咁平，因為盈利倒退緊的。如果11月，我用T12（Trailing 12 months，最近四季）計（表嘅右上角嗰四格），個盈利係288億。2500/288，依然係9倍唔到。

10月尾嗰時，單位數市盈率添呀。但你又唔敢買，「二十大呀」

29. 咁但，真喎，如果繼續跌呢？如果蝕錢呢？係架，會一路越拉越高。但，只要唔係咁，只要個利潤稍為定返啲，就會見到股價反彈了！

30. 業績前，4000億市值嘛。你計T12，4000/288，14倍，依然唔算貴吧？然後一出嚟，計埋數啦喎，出嚟第四季盈利係46.5億嘛。咁即係，2022年，全年純利就232億（留意，得返2021年嘅六成）。咁4000/232，變咗17倍。然後一嘢抽上去，5000億市值，即係5000/232，22倍，又似乎唔係好平。

31. 可能講咗輪，都頭暈。但兩樣嘢：你見到，2500億時，真係極殘，只要佢啲盈利稍為有回穩，已經夠勁升。但嗰時你就梗係覺得公司玩完啦。

32. 另外，可能你都會話，我計2022年都好，4000億市值時，都17倍啦。點解出完仲抽咗兩成？

33. 答案都有啲深，因為去到單位數就真係平，但去到17又好似唔係好平，係咪？

34. 不過，留意一個好重要嘅重點：第四季嘅盈利，係高過第三季嘅。呢個勢頭先重要。雖然你睇到，媒體會講第四季盈利腰斬，按年跌一半，但2021年嗰個高基數嚟了

35. 你用46.5億年度化，即係全年186億。5000億市值，都27倍，又好似唔平？

盈利按季反彈，但係咪可以持續？應該可以。話你知點解

36. 呢度，就取決於到底個反彈勢頭係咪一路可以持續。但似乎係可以嘅，市場都信。

37. 點解？因為幾樣嘢。首先，你見啲用戶數字，係好過市場預期嘅。仲有，公司對今年第一季業績嘅指引，都算係好過街邊估嘅。仲有，公司啲開支指引（被視為「元宇宙燒錢」），亦都比預期低。

38. 不過最重要嘅係：呢次業績，差不多有40億嘅重組成本。呢個就緊要咯，即係，唔計呢啲嘢，你諗下個核心盈利真係幾強下，去到 80億樓上。然後你鍾意可以再玩一次上面啲計數。Quick and dirty嘅，全年320億純利，而家5000億市值，不過份丫。

39. 好啦，係咪有啲頭暈。係咪好難搞？答案：係！梗係啦。之前有人問點睇估值，呢度係一個例子，畀你見到可以有幾複雜。

40. 不過，其實還原基本步，估值往往就係氣氛。你睇11月嗰時，講到世界末日咁，就知道估值梗係唔會貴。

其實，仲有冇人用Facebook？你話呢？

41. 仲有一樣好重要嘅嘢：其實你睇都睇到，Facebook，真係冇人用？作為玩FB Page嘅人，我嘅答案實有偏差。而你見啲後生真係好似唔玩—但佢地玩IG！扯，咪一樣！

42. 仲有，唔知你身邊嘅人係咪，但我目測我啲朋友，例如分享新聞呀，自己啲嘢呀，而家真係未必貼上Facebook。但，除咗IG，佢地仲會點？「放上WhatsApp」，自己朋友圈內嘅嘢　—　咁，咪又係FB集團！

43. 而其實Whatsapp嘅潛能，可能一路都未發揮。一路都唔多賣廣告，亦唔多會收錢，因為啲人會走。而家佢做得最多，就係將啲KOL嘅FB Page同Whatsapp IG連埋一齊，你問我都係有啲用嘅，但我估慢慢都係搵到條更搵錢嘅出路。

44. 又或者，Whatsapp之類根本唔使太搵錢，留得住你啲人用已經夠。

45. 因為你見另一方面，Twitter立立亂，而TikTok（抖音），都係極可能畀美國封殺。Facebook最開心。

同樣係做廣告嘅Google，業績後大插。講乜鬼「經濟」「行業」丫

46. 最後補充：你見Google嘅業績，就完全唔得，盤後都跌得勁。明明真係兩間公司嘅核心業務都係差不多（廣告！），但你見業績開出嚟嘅反應，差天共地。所以，兩樣嘢：第一，估值好重要！第二，你講咩「經濟環境」好唔好，真係冇你想像中咁重要　—　同一個經濟環境，兩間公司業績後股價差天共地。