唔買都有嘢學 - 金源米業677，低位升咗一倍幾（有Excel！） (Patreon)

金源米業677，低位升咗一倍幾（有Excel！）

金象米 + 越南Circle K．值幾錢？

整埋個Excel畀你，Attachment 有

越南OK，業務已經遠超過疫情前

估下越南有幾多間OK便利店？

越南故事，當然好吹好sell—咁下一步點玩？

不過，估值呢？就教你玩了

隻嘢5年高位插到落低位，都只係三成幾，好多絶大多數大藍籌

資源共享：點解睇唔到報價，會有唔同市盈率？用邊個先好？

資源共享：點知公司有幾多股？市值又點計？

唔好信人地，信自己。睇Google？Google都可以錯

資源共享：點睇有幾多成交？幾多算多？

細價股嘅嘢：理文化工746 vs 金源米 677　之異同

根本舊年12月任你買，正如隻理文化工，2021年3月都任你買

唔想花咁多時間睇股票，咁可以點？

1. 市況靜返少少，可以講下其他我認為更有趣嘅嘢。

金源米業677，低位升咗一倍幾

2. 可能留意到，我在Facebook貼過隻金源米業677。舊文都寫過。首先畀咗結論你先，等你決定睇唔睇落去。第一，絶對講清楚，冇內幕。第二，現價都唔平，我就唔會買（亦冇買過）。

3. 仲有，我嘅原則，呢啲細香港公司，我自己唔會買—唔係覺得有問題。係首先費事讀者以為我唱高散貨搵佢接貨，呢啲公司成交細，你有機會咁懷疑。同樣地，亦費事惹上麻煩，陣間有人以為我係微信女，或者同公司合作（係絶對冇嘅）

4. 以前係寫過呢間公司，當然因為我算係「識」佢地（但你輸錢唔好叫我同佢講），但當然唔係我要唱好佢地。事實之前見佢地，已經係幾年前嘅事。你可以話同理文化工746嘅情況差不多，著實我覺得兩間公司都有啲相似（陣間講點解）

金象米 + 越南Circle K．值幾錢？

5. 公司做乜？賣米，好多人都知，金象米。但除此以外，越南嘅Circle K便利店，都係佢地嘅。

6. 幾年前我去過越南，佢地就有帶我去周圍睇，同啲高管（香港人為主）傾下計，睇下啲唔同舖頭，貨倉等等。就只係咁。而我在呢度都寫過，仲有個Excel，但兩年冇update，而家已update返，attachment 有

整埋個Excel畀你，Attachment 有

7. 留意返，公司係3月底年結嘅。

8. 最偉大嘅地方，係公司有分開將便利店同米業嘅數列出嚟。睇到收入，同埋利潤。留意呢個利潤已經係扣晒開支利息，便利店就應該扣咗稅（在越南交咗，香港唔會又交）

9. 重點當然睇便利店業務，疫情前，半年八九億收入（港紙，唔係越南盾）。疫情下當然受打擊，越南最初封城都幾嚴。但你見好快反彈，最近幾次半年，已經遠高過疫情前。剛剛半年講緊6億收入了

越南OK，業務已經遠超過疫情前

10. 更重要嘅係，睇盈利！只有收入是冇用的。

11. 因為某啲原因，你見便利店業務，之前一路都輸錢。呢個亦係我對公司有啲戒心嘅原因。你可以估下，越南有幾多間OK？答案係400間，而絶大多數都係在河內同胡志明市，好似海防有幾間（海防係越南城市。河內道，海防道，西貢街，都係越南城市）。400間係相當多嘅數目（越南咋大佬），但做到咁大，都仲蝕錢？當然我有問公司，但畀嘅答案並唔係令我十分信服。另一方面，大家亦知越南當然多蠱惑嘢，可能係當地嘅問題。

估下越南有幾多間OK便利店？

12. 咁但，原來上一次業績，2022年4-9月，呢瓣已經賺錢。緊要咯。

13. 正路地，你見米嘅生意越嚟越難做。大家都知而家啲人食少咗飯，全世界都係。所以你見近幾年啲收入，都係上上落落。成本就一路升，米生意嘅利錢，都係上上落落。

14. 但便利店就唔同，你見已經賺錢。同埋最重要係：個故仔好吹！好sell！

15. 越南喎！人口年青喎，「下一個中國」喎，啲廠搬晒去喎，經濟增長好好喎（事實），中美之間搵著數喎。呢啲你請個幾千蚊人仔嘅初級分析員都識講（順帶講埋，舊年越南股市係跌到趴街嘅）

越南故事，當然好吹好sell—咁下一步點玩？

16. 咁然後點？當然係，拆出嚟。一早有人問，一早有人講，當然我冇任何內幕，但傻嘅都知會咁玩。爭在係賣畀人丫，定拆上市丫，定點。

17. 近排股價係咁升，我亦唔知咩事，但好可能同呢啲嘢有關。亦可能係嚟緊個業績會好靚（3月尾結，應該7月出），你睇越南條數，都見到好可能仲靚過上半年。

18. 如果當係一隻「越南股」，個估值又唔同了。你知，好多人鍾意追捧呢啲概念，正如之前大家個個睇咩SASS，元宇宙，Buy now Pay Later，AI。

19. 拆出嚟上市，釋放價值，嘩，不得了。

不過，估值呢？就教你玩了

20. 不過，考你功力時間。你應該問：反映咗幾多？同埋，估值呢？

21. 當然你不能用歷史嘅數去計，但即管進取啲，估下之後嘅事。上半年（2022年4-9月）成檔嘢賺7500萬。求其計，下半年我當9000萬好未？一年即係1.65億。19億市值，12倍市盈率。

22. 好啦，極難答嘅問題：算平定貴？答案：唔知！但只能講，唔係平到笑，又唔係貴到笑。所以可能你買，都仲OK，你話有越南概念，上到20倍市盈率都得，亦唔係天方夜譚。

23. 甚至可能下年（2023年4月-2024年3月）全年可以賺到2億，亦唔係不可能　（個便利店增長幾快）。拉埋就10倍市盈率唔夠。

24. 不過啦喎，升嗰時就爽，但亦唔好忘記，之前吽咗極耐極耐。舊年低位，四毫幾子，而家三份一左右。但，亦即係7億幾市值，嗰時買就發咯。

隻嘢5年高位插到落低位，都只係三成幾，好多絶大多數大藍籌

25. 但話說回頭，隻嘢雖然吽咗幾年。但又唔好以為細價股一定插得勁。高位都只係7毫子，跌到最低4毫4，都只係三成幾，照計咁嘅drawdown，係應該捱得住嘅。老細，蘋果2018年，冇事冇幹，都一季插咗30%，你買股票覺得唔輸得嘅，就永遠冇大錢賺。

26. 我地亦都睇下幾樣嘢

資源共享：點解睇唔到報價，會有唔同市盈率？用邊個先好？

27. 首先，以上我嗰啲「估」賺幾多，都真係亂估，其實好難估。

28. 另外，可能你會留意到，睇返啲圖，有啲報價話隻嘢100倍市盈率，有啲話19倍。邊個啱？兩個都啱！你計舊年（21年4月至22年3月）全年，公司1870萬純利，19億市值，咪成100倍市盈率（我個Excel有全年的，我張圖hide咗啫）。但，你計T12（最近12個月），1.07億純利，咪18倍左右。你計最近一次半年，再年度化，咪7500 X 2，全年1.5億純利，就13倍市盈率左右

29. 冇話邊個「啱」。咁但肯定，比較好就係睇T12，或年度化，甚至「預期」．因為，股票係炒預期。

資源共享：點知公司有幾多股？市值又點計？

30. 另外，話埋你知，見唔見到有兩張圖，寫市值係19億，但有一張寫16億？點解？咁好明顯，有一張係錯的。係19億，唔係16億。點解錯？唔知，你去問Google

31. 但，好似金句都講過，唔好只睇一個source．最好你睇幾個，然後見到唔同嘅，研究下點解。真係唔明嘅，試下問我，睇下我得唔得閒答。

32. 仲有，最好係點？最好，當然唔好靠人地，靠自己。市值好難計咩？咪股數X股價，股價大家都知，好少會錯。股數幾多，邊度搵？你可以搵年報。話埋你知邊度有：講計每股盈利嘅地方就一定有。或者更簡單嘅，搵港交所（答案：17億股）

唔好信人地，信自己。睇Google？Google都可以錯

33. 然後你發現，一間公司有幾多股，咁重要又簡單嘅嘢，多數股票報價都係冇嘅！不過唔緊要，你有我，就教你在邊度搵。

34. 好簡單嘅例子，畀你見到，真係唔好咁懶，股票機寫乜你就信乜。至少你都睇幾個source．咁你話，邊有咁得閒？啱喎。如果係呢啲情況，咁你咪買大藍籌，甚至買指數，就唔使煩呢啲嘢，我向來好贊成的。至怕你一知半解之嘛。你買QQQ嘅，就真係唔使點理呢啲嘢，理得佢幾錢市值，甚至市盈率都未必要點理（雖然，「估值很重要」）

資源共享：點睇有幾多成交？幾多算多？

35. 仲有最後又話你知，隻嘢，2400萬股成交，好誇張下。有幾誇？咪話得17億股。另一方面，亦見到，2600萬錢成交，隻嘢先19億市值。邊度睇幾多股成交？報價機有。但歷史數字呢？Yahoo Finance 幾好用

36. 咁即係多定少？咁好簡單啫，比較下，隻理文化工746，56億市值，成交係…..300萬港紙。

細價股嘅嘢：理文化工746 vs 金源米 677　之異同

37. 好，之前話隻嘢有啲似理文化工，都唔係講笑。首先，「都係細股，冧把有6字有7字」，幾十億市值。另外，都係香港公司，唔係大陸公司。咁當然，亦係因為我真係有機會見下老細管理層，實地望過，雖然亦唔代表乜。

38. 但最後，你見佢地都係有「新業務」，然後獲得重估的。最初嘅746，叫理文集團，係做手袋，後來先搞埋化工廠。最後先拆走隻手袋（後來再賣埋）。而家金源係咪行同一條路？唔知，但唔奇。

39. 最最最後，唔知有幾多讀者會有興趣。之前理文化工就有啲讀者買咗。不過，講真，我講每一隻股票，都住往唔係好多讀者買咗。重點其實係，由呢啲例子你會學到唔少嘢。

根本舊年12月任你買，正如隻理文化工，2021年3月都任你買

40. 越南OK，我一路都知。但一路蝕錢嘛，咁點知佢幾時忽然轉賺呢！當然如果同管理層夠熟，有機會暗示畀你聽（再講一次，選擇性披露係犯法嘅，所以頂多只能暗示）。

41. 不過，根本即使去到12月，都仲係任你買，五毫子左右。點解11月？因為公司11月尾出咗個半年業績，已經睇到晒我Excel嘅數，清楚見到便利店轉盈。甚至乎，其實公司11月中出咗盈喜，入面連賺幾錢都講埋，雖然冇講明係便利店轉賺

42. 類似嘅情況，你見到兩年前理文化工情況都一樣（2021年3 月頭寫的），又係出晒業績，擺明見到業務改善咗，但都冇即時郁，任你買的。

43. 因為呢啲公司，真係被市場遺忘了。但香港管理層，仲要叫做有頭有面嘅，講真應該唔會太蠱惑，亦係一個重點。

唔想花咁多時間睇股票，咁可以點？

44. 呢啲例子你見到，你夠勤力嘅，甚至唔使有內幕，你睇埋業績先買，都仲大把時間。吹脹嘅係，雖然我叫做有留意呢兩間公司，但兩次我都係出咗業績都唔知。

45. 當然，唔想咁煩嘅，正如我上面講，你買大股，就唔使搞咁多嘢的。

46. 之後會講返大市同大股了，但偶然睇下呢啲，都會學到其他嘢。我嘅目的係等大家每樣都會識。