美股又回，港股又回，騰訊阿里巴巴跌7%，搞乜？公用股強勢，買得冇？聯儲局會「放鷹」，係真唔係？銀行高息定期存款冇晒，咩啟示？大陸航空公司，三間蝕1000億，會唔會爆煲？ (Patreon)

港股又回，美股又回，未嘗唔係好事。

騰訊阿里巴巴都單日跌7%，點解回得咁急？

點解唔使驚調整？

而家又話聯儲局會「放鷹」喎，係真唔係？

就梗係冇咁快減息，但點解？通脹會唔會死灰復然？

又，再加0.25，都叫「放鷹」？

港股嘅，跌乜？A股開？明明A股升。期指結算？但星期二都跌

星期五去買騰訊，星期一就輸7%。點避免？

咁但，騰訊跌7%，但大市跌3%，即係有啲嘢可以睇啦。仲有乜？

銀行高息定期存款，曇花一現。有乜啟示？

實例研究：大陸三間Airline，舊年蝕成1000億！會唔會爆煲？

比較下，國泰市值大過呢幾間嘢，但只係蝕70億。而呢幾間係幾百億

「國航300億市值，蝕400億，咪即係爆煲」

「股票機話國航1.3億市帳率，即係帳面值300億唔夠，蝕400仲唔死？」

1. 寫文時星期二中午，卒之個市回返啲，對我嚟講未必係壞事。對你嚟講都係。定期買股票嘅，不停升未必係好。直接啲講，升多3000點你又唔係即時退得休，其實都係冇乜分別。當然日日跌心理上冇咁好過，但跌咗亦即係下個月買平啲。

騰訊阿里巴巴都單日跌7%，點解回得咁急？

2. 你見港股同美股都回得急，但點解？其實冇乜原因（陣間我會畀啲「原因」你），升得多就跌返。代唔代表個升勢告終？唔知，但升咗8000點，中間都冇乜似樣嘅調整，升浪已經比預期中長好多。

點解唔使驚調整？

3. 即使你睇啲升10倍嘅股票，或者升10倍嘅納指，當中都有無數咁多次調整，甚至會有幾次跌兩三成嘅「熊市」。升8000點跌1000就又覺得玩完嘅，咁真係永無脫貧嘅一日　—　你唔去諗下升咗7000點？點解永遠只記住最近兩日發生嘅事（短視！在投資金句亦講過，幾咁有用。不過12月寫時都畀人話廢話，畀啲冧把實際啲　—　結果你有冇買丫？根本你有買就差不多買乜都升）

而家又話聯儲局會「放鷹」喎，係真唔係？

4. 先講美股，三大指數都回，個別嘅跌勢都急。但我當然係跑贏大市的（不太難）。

5. 但點解跌？原因近乎冇。馬後炮講，你見呢排10年債息冇再落，美金又冇再落。咁我真係見到嘅。但，就真係夾硬搵啲理由啫　—　呢啲嘢唔止一日，但上星期美股仲好地地。所以你永冇可能知道去到邊個位回（況且，只係1-2%嘅跌幅）

6. 有趣嘅係，大家都知聯儲局議息，星期三晚有結果，必定係加0.25。不過，而家有個講法，話可能局方唔會釋出暫停加息嘅訊號。

7. 我係相信呢個講法嘅，無疑通脹見咗頂（舊年下半年已講！），但的確就業市場勁，加上啲基數效應慢慢消失，肯定未咁快放心。而你可以話，市場不停咁估聯儲局會停加息或減息，變相係會「破壞」咗大計　—　唔多唔少，股市太好，都本身會「做成」通脹。財富效應喎，雖然個程度有幾大，我係相當懷疑嘅。

8. 但總之，通脹見到有回落，但肯定未完全放心，咁聯儲局當然唔希望前功盡廢。所以當然希望小心啲。

就梗係冇咁快減息，但點解？通脹會唔會死灰復然？

9. 呢個圖以前都貼過，70年代嘅情況，就真係見到「死灰復燃」，明顯呢個係聯儲局嘅惡夢。既然而家經濟似乎OK，不停講衰退但又好似死唔去咁，明顯地唔使咁快引導減息，甚至停加息。

10. 講咗咁多，對股市即係有乜影響？答案：近乎冇！

又，再加0.25，都叫「放鷹」？

11. 只係話定你知，如果美股借勢跌，又會有人話「放鷹」，你又會好亂。其實講乜都假，前一次加0.75，上次0.50，今次0.25　—　當然下次未必係0，可能再0.25。但「放慢」，就已經定局咗好耐好耐啦。而我相信之後再加快，再加返0.50，係……冇乜可能嘅事。

12. 所以，點都係加息周期到尾啦，根本唔使討論。只係好似你睇戲咁，可能起身走，又見到出彩蛋，又企定睇多幾分鐘咁解。但總唔會之後再播多個半鐘。

港股嘅，跌乜？A股開？明明A股升。期指結算？但星期二都跌

13. 港股嘅，更加冇乜好講。你要我講又係重覆啲心法嘢。星期一跌得急的，全無先兆下跌600點（3%喎）．仲要唔好忘記，美股上星期五係升的，而星期一開市都唔差，之後忽然轉急。

14. 又係搵「原因」（其實我極之怕做呢樣嘢，但不停有人問）嘅時間。你可以話因為A股開返，但A股星期一係升嘅。你可以話係期指結算，但你見去到星期二港股都仲係差。所以，除咗係「升得多要回下」，profit taking，都冇乜好解釋。甚至可以拉埋聯儲局議息嚟講（參考上面講美股嗰堆嘢）

15. 可以點？冇乜可以點。咪又係嗰句，升8000點你又話太高唔敢追，話等回返先買，咁回返1000點係咪買？覺得唔夠嘅，係咪回夠6000先買？但我保證，回到6000點，九成人都唔敢買。

星期五去買騰訊，星期一就輸7%。點避免？

16. 所以真係唔使庸人自擾，一向做法都話，想買咪買，有錢咪買。我買嗰時甚至個市升跌都唔睇，隻嘢升跌都唔睇。

17. 不過，實戰分享。星期一十分礙眼嘅，你見到騰訊阿里巴巴都一日跌7%—幾誇張下。咁例如你上星期五飛咗入去，忽然間一日跌7%，都幾係嘢。

18. 可以點避免？答案係：近乎冇！首先，買股票就係有機會你買完第二日輸錢的。第二，即使你10月尾時買，都好可能仲要捱幾日，要捉到個反彈位，係不可能嘅。

19. 點避免「我所有錢星期五買晒落去然後星期一即輸7%」呢類問題？答案好簡單，就係唔好積埋咁多錢一次過買！分散，分散，再分散。有幾難明？

咁但，騰訊跌7%，但大市跌3%，即係有啲嘢可以睇啦。仲有乜？

20. 你可能當廢話，但話埋你知。既然騰訊阿里巴巴都跌7%，但大市只係跌3%，咁明顯有堆其他嘢係冇咁大鑊嘅。你有嗰啲嘢頂住，就冇咁大問題。例如你見匯控近乎唔使跌，友邦直頭有得升。星期一我都係跑贏大市嘅。

21. 仲有，一大堆發晒霉嘅公用股，星期一都跑出。唔知係暫時定點。冇錯係吽咗好耐的，領展823長江基建1038港鐵66等等（港鐵其實離52星期高位唔遠。的）。甚至電盈8香港電訊6823之類。

銀行高息定期存款，曇花一現。有乜啟示？

22. 美債債息就冇乜回落，但另一方面，其實點睇都係加息差不多完場（樓上講美股寫咗）。另外，你見到銀行啲高嘅定期存款，冇晒，曇花一現。當然係因為銀行都知息口差不多見頂　—　唔通我而家仲畀5厘息你畀你鎖一年？

23. 一個通俗嘅講法：我做定期都5厘嘅，你領展嘅息就唔吸引了。雖然其實應該用十年美債比，但原理一樣。況且有啲買港股嘅人，真係拎定期存款去比。無論如何，結論都差不多，呢啲公用股總有出頭天，但你當然係要佢吽嗰時先買。

實例研究：大陸三間Airline，舊年蝕成1000億！會唔會爆煲？

24. 呢壇仲有趣，同你講少少入門嘢。講嘅係大陸三大航企，國航753，東航670，南航1055。買就無謂，但理論上係幾好炒的，因為啲業務大家都知，又相對比較透明。人民幣，油價，機票價，幾多人出行，呢啲你大約都睇到，甚至估到。

25. 最新係點？三間出晒盈警（國航，東航，南航）。舊年咁嘅情況，蝕錢全不意外啦。不過，個數字，都真係有啲誇張。三間加埋，蝕成1000億人仔。國航370億，東航390億，南航300億。

26. 大家見呢啲數字，都冇乜概念。咁大約比較下，國泰嘅盈警，話你知舊年蝕70億。可唔可比？大約還好。你睇市值，國泰好似大過晒呢三間（但有啲古惑，陣間解）

比較下，國泰市值大過呢幾間嘢，但只係蝕70億。而呢幾間係幾百億

27. 蝕幾百億，即係點？你可以幾個角度睇。例如你睇國航，300億市值，但蝕近400億！喂，咪蝕突？會唔會爆煲架？

28. 答案：其實你睇股價表現就知，好似跌少少，但肯定唔係爆煲式。

29. 點解？因為根本係偽命題，拎個市值同個盈利比，根本係兩樣嘢。

30. 然後第二種睇法啦喎，有啲程度嘅長期讀者，可能知道，睇下個book value有幾多，即係個「股東權益」有幾多。你見國泰嗰啲，個權益成700億，一年蝕70億，小小痛，但死唔去嘅。

31. 點搵個帳面值？好多方法，你可以Google，或者睇年報，甚至報價機都大約有。

32. 咁你應該搵到，國航之類，都只係幾百億股東權益。21年尾好似600億咁上下。咁22年輸400億，都真係幾甘，冇左大半喎。應該係拎去ICU 的了。你可以話，輸多年400億，咪負數，資不抵債？

33. 不過，兩樣嘢。首先，照計2023年冇咁差。另外，扯，以前寫過，你估呢幾間嘢未試過資不抵債？（即係負book value）。以前都試過，但一樣照飛。理論上未必即時有問題，還到錢咪得，況且借錢好多係國有銀行，唔通清佢盤咩。

34. 另外，之前點樣由負數變返正數？好簡單，不外乎兩樣嘢。一係你本身賺返錢，一係咪……注資。兩樣同時做亦得。咁呢啲情況下，注資嘅當然係阿公

「國航300億市值，蝕400億，咪即係爆煲」

35. 最後一樣嘢話你知：實情，一季出一次業績嘛。國航輸400億，好意外咩？頭三季都280億啦。記住股市定律，當然炒預期，要插嘅，之前插咗啦。唔會忽然因為呢個盈警又大插的，最多小插。

「股票機話國航1.3億市帳率，即係帳面值300億唔夠，蝕400仲唔死？」

36. 仲有最後一樣，你睇「詳細報價」，可能見到國航市帳率1.3倍。然後你又見到，喂，市值320億喎，咁即係個帳面值應該300億唔夠？上面又話700億？

37. 呢啲真係FAQ。短答案話你知：國航仲有A股上市嘛！你睇個320億市值，只係H股，你要計埋A股個市值，先去計市帳率。唔想出呢啲問題，咁你就唔好睇市值再睇市帳率迫個帳面值出嚟，直接去年報睇帳面值咪得。

38. 呀，仲有真係最後一樣。既然國泰都渣住國航，係聯營公司，會將國航嘅賺蝕按比例share落自己條數，所以，梗係盈警。我未細心計，但你諗到，既然主要係國航拖累，即係國泰「自己」，並冇蝕到好多錢。

39. 應該解得清楚，唔好人云亦云。雖然我一路都話，其實冇人話要識睇呢啲財報。但至怕有啲人半桶水，又或者睇咗啲唔識嘅KOL寫。又或者你好學（好事），但睇到一半唔明，我就用呢啲例子解你知。