渣打2888 新地16 維他奶345 百勝中國 9987一年新高．仲有乜未升？美國今星期議息，睇啲乜？繼講AI股：Buzzfeed 一日升八成，五日升幾倍。因為用AI寫稿，炒晒啲記者。真係咁簡單？ (Patreon)

恒指低位都升返8000點，60%，仲有乜好講？但你有冇分享到？

渣打2888 新地16 維他奶345 百勝中國 9987一年新高了，滿意未？

美聯1200 直頭1月1日寫的，16日升16%，滿意未？

港股16日都升咗2500點，13%。你跳出跳入，諗嚟諗去，又係咪捉到個浪？

錯過最好嘅時間，有乜後果？一早貼過啦

咁真係錯過咗，點算？仲有乜好買？都仲係有嘅

早排推過美團3690，十連跌後都反彈了

不過最好玩隻商湯20，星期五升兩成。話美國「撤銷制裁」喎。咩回事？

美股方面，都講咗科技股跑出。但整體美股差過其他市場

點解炒咁多人，但勞工市場仲係咁勁？

今個星期聯儲局議息，會講乜？話埋你知

四大科企出業績，邊間最值搏？

AI股嘅嘢：Buzzfeed 大升喎！單日升8成，5日升4倍

話你知有乜AI ETF好買。又有乜股好買

炒晒啲記者慳返成本就有得升？不如又睇下CNET嘅例子

你識用bot，人地就唔識？既然人人識，咁有乜用？

實情，點拎嚟賺錢，先係最大嘅問題

1. 非常多嘢寫，但當然係好事，亦證明市況比較好。VISA Master AE業績（AE勁升），仲有LV，就留返下篇先寫，希望夠位。

恒指低位都升返8000點，60%，仲有乜好講？但你有冇分享到？

2. 先講港股，「其實都冇乜好講」。低位升咗8000點，近60%，升到11個月嘅高位，跌極唔落，連升6星期。只係今年（講緊16個交易日），都升咗2500點，13%

渣打2888 新地16 維他奶345 百勝中國 9987一年新高了，滿意未？

3. 你見有提過嘅，渣打2888（個個月買），新地16（走寶），維他奶345（有讀者買咗），百勝中國9987（KFC 同Pizza Hut，之前寫復常時寫過），全部都52周新高了。

美聯1200 直頭1月1日寫的，16日升16%，滿意未？

4. 當然仲有美聯1200，1月1日寫的，升咗16%，跑贏埋大市，滿意未？

港股16日都升咗2500點，13%。你跳出跳入，諗嚟諗去，又係咪捉到呢個浪？

5. 你見到嘅係，股市要升起上嚟，一樣可以好得人驚，而一樣冇乜先兆。無論你係不停諗，定係低位打靶，定係跳出跳入，都係好易錯失嘅

錯過最好嘅時間，有乜後果？一早貼過啦

6. 以上呢個圖（或類似嘅東西），我貼過好多次，你又可以細心領會下。

咁真係錯過咗，點算？仲有乜好買？都仲係有嘅

7. 好啦，錯過咗嘅，一來應該吸取教訓。二來又係，問有乜未升得太多嘅？除咗以前都講過，我有買嗰堆，長實1113，長和1，領展823，地鐵66等等（但真係好落後的！）。

8. 二來嘅，仲有啲落後啲，而近期有啲升勢嘅。例如你睇啲內房股，或者水泥股。照舊，穩陣就華潤置地1109中海外688華潤水泥1313。又係呢啲？係呀，但舊年跑贏大市的（華潤水泥唔係啦）。咁你買啲細啲嘅，當然有機會升多啲，但跌又跌多啲咁解。好難兩全其美的。但我目測，大多數讀者都完全高估自己忍痛嘅能力，所以買大公司算啦。

早排推過美團3690，十連跌後都反彈了

9. 另一方面，年頭已經講睇好啲科技股。美股陣間講，但見到中資嘅都強。最早就係騰訊阿里巴巴，近排見到其他都強。早排講過嘅美團3690，十連跌後反彈了，照計仲可以睇。

不過最好玩隻商湯20，星期五升兩成。話美國「撤銷制裁」喎。咩回事？

10. 不過星期五最特別係隻商湯20，升咗兩成。個故事幾有趣，大約就係話，忽然間話美國「撤銷」制裁，令人充滿聯想。

11. 再睇多少少個故事，要搞清楚，「制裁」有好多種。正路地，以商湯做嘅東西，美國「撤銷」制裁，近乎不可能（如果係就有排升）。而家「撤銷」咗嘅，只係投資嘅禁令。即係，原本美國人或美資基金唔買得，而家買得。

12. 咁但，亦都影響埋另一樣嘢：入指數。之前因為投資嘅禁令，入唔到指數。而家既然無禁令，應該就有資格入返，所以估啲基金要買，大家偷步打尖咁話。

13. 不過，潑個冷水，我就唔會買嘅。固然呢期成堆科技股都強，再短期衝上去未必唔得。但，首先一路都話公司冇盈利，已經係個問題，好危險的。第二，入唔入指數，美國佬買唔買得，其實對公司價值，應該係零影響。而最後，點解忽然放生，都係夠耐人尋味，大家可以發揮聯想力。可能係釋出善意，可能係放個位畀你抖下氣，但亦可能係啲好無聊嘅原因（例如有條自己友買咗唔少）。佢要忽然間又話禁，一樣可以。

美股方面，都講咗科技股跑出。但整體美股差過其他市場

14. 美股方面，亦係做得好，亦唔使我多講。不過就冇香港咁好，亦同我之前預計差不多（今個月估嘅嘢暫時好準）。仲有，納指係明顯強勢過標指道指嘅。Tesla繼續強勢，但整體啲科技股都強，特別係啲二三線嘅，或者啲之前超貴畀人狂掟嘅。你睇ARKK堆嘢都係，NetFlix Nvidia亦係。

點解炒咁多人，但勞工市場仲係咁勁？

15. 另外，星期五出咗個PCE通脹數據，但實在冇乜特別，都唔想花太多時間講。總之通脹見頂就肯定，但的確有可能係有第二波，特別係你見其實勞工市場都好緊張。Walmart又要加人工。你話明明見到其他公司炒人？係，但好多係高薪才俊，呢啲友係唔會填埔到Walmart麥當勞唔夠人的。所以，仲加緊息，就好應該嘅。

今個星期聯儲局議息，會講乜？話埋你知

16. 而講開加息，話咁快又到議息，星期二同三，睇都唔使睇，係會加0.25。固然你可以留意埋會後講乜，但我相信都係廢話，今次連經濟預測都唔會出。講嘅嘢，多數就係「已經見到通脹回落，但未係好肯定，而勞工市場緊張，仲有機會重燃。所以利率在高位一段時間係合適嘅。」「而經濟呢，暫時都仲係可以，不過都要提防一啲衰退嘅風險，如有需要呢，局方都係會有預備嘅」

17. 你到時睇下係咪咁上下，我估都係。係咪好廢？我都識講，你都識講。到時九成就係市跌就話放鷹，市升就話放鴿，完全浪費生命，仲會令你越嚟越低質。

四大科企出業績，邊間最值搏？

18. 另外，業績期話咁快去到尾聲，似乎今次無風無浪，甚至算係幾好。唔好每一次都擔心「業績唔得點算」。今個星期係四間大科企，希望唔會臨尾香。星期三有Facebook，星期四就Amazon, Google, 蘋果一齊嚟。其實星期三都有埃克森美孚，輝瑞藥廠，麥當勞，UPS，AMD等等，不過少啲人留意。

19. 我就覺得呢啲位，Facebook似乎係OK抵買嘅。不過我就好早買咗，你會唔會買就自己估。係平的，但當然係近期好多問題先會咁平。

AI股嘅嘢：Buzzfeed 大升喎！單日升8成，5日升4倍

20. 最後，甚麼ChatGPT股，在韓國寫咗第一篇，又搞咗幾日。應該唔會爛尾，但畀定結論你先：之前炒元宇宙股，仲未輸夠？

21. 你真係買嘅，上次講過，買微軟。另外仲有間，賣個小關子。但其實都係買Big Tech。啲ETF你根本唔知佢用乜準則揀，搵笨。細公司嘅，生唔生存到都成問題。

22. 近期你見好似熱炒啲AI股，我認為只係假象　—　近期乜科技股都炒架啦。其實好多細股都返返晒嚟。

話你知有乜AI ETF好買。又有乜股好買

23. 比個例子你，BuzzFeed，可能你有聽過呢間公司，但我都唔知上咗市。好細的。做乜？做媒體的。

24. 你睇，一嘢炒咗上嚟。一日升八成，五日升幾倍。做乜事？原來只係用 Open AI寫稿。好特別咩？一路唔少媒體都有用，特別係報天氣，體育賽事結果，金融市場變動之類嘅嘢。

25. 不過就係炒咗上嚟，我可以話你知，全無理由可言，只係近期市場氣氛好。你估真係用AI寫炒晒啲記者慳晒成本？就算係，你識用，其他人唔識用？

炒晒啲記者慳返成本就有得升？不如又睇下CNET嘅例子

26. 根本早早地，媒體可以賣錢嘅，就唔係上面講AI可以寫嘅呢啲嘢。雖然媒體要報英超賽果，天氣報告，但冇人係為咗呢啲嘢畀錢的。

27. 比另一個例子你，明報嘅文，林康琪寫咗篇很好嘅（係要訂戶先睇到的。見到冇？好嘢點會免費）。我就費事成日save啲文然後畀你地，始終侵權係唔啱的（呢個亦係點解Good Read好難做嘅原因，因為我訂嘅嘢你未必有訂）

28. 我試下幾句講完篇文嘅重點：佢講CNET都係用啲bot新文，但最後都係錯漏百出，要啲人手去執返嘅。而且，仲要係抄文。固然當時唔係用Open AI，但ChatGPT，都係抄文多，亦都成日計錯數。

29. 咁做乜要咁玩？就更有趣了。可以睇呢篇。個故事大約係，根本CNET只係拎啲文嚟做content farm。然後為乜？就係啲啲文可以在Google 上排名高，即係所謂嘅SEO（search engine optimization）。大約點做？個機械會睇最多人Google search乜，就跟住去寫嗰啲嘢（以前啲人都係咁玩，但人手做），同埋知道Google最鍾意嘅格式係乜，邊啲嘢佢會排得高（所以你見有時有啲網站入面放好多自問自答）

你識用bot，人地就唔識？既然人人識，咁有乜用？

30. 爭到排頭位又點？爭到就勁，因為有信用卡開戶referral（冇錯，其實香港好似網站都係做類似嘅嘢），有錢收。就只係咁。

31. 故事嘅「得著」，可以再寫好長。但我好快話你知：第一，點去賺錢，唔係你想像中咁簡單，可以好曲折。第二，你睇Google幾惡！但第三，正如上次篇文講，係啲大公司（無論係Google定係CNET）用呢啲技術再去賺錢。而唔係向普通用戶收錢。

32. 當然，你可以想像，如果隻AI夠勁，我咪收啲內容農場錢，都係得的。咁但你都要人地賺到錢先得。

33. 成個鏈係咁的：香港人有錢（或者懶），人流多，又忙，飲得起四十蚊杯咖啡。咖啡店好生意，賣貴一貴都有人買。然後交好貴租都仲有錢賺。然後啲租就貴　—　當然實際上唔係完全單向，但亦唔係商場鍾意收幾錢租都得，都要有人交得起，咁交得起都要有人買得起。

實情，點拎嚟賺錢，先係最大嘅問題

34. 所以同樣地，CNET點解要畀錢Open AI（假設）？就係因為佢賺到錢。佢點賺到錢？因為銀行畀錢佢。然後佢先可以夠錢去用呢啲嘢，再畀錢去衝個Google排名。

35. 當中邊個先最有話事能力，都不好說。但你大約見到，Google就真係好惡嘅。而在呢個例子，AI都可能有啲話事能力。最被動反而係網站，你識寫，人地唔識？

36. 所以，再講一次，並不是你個技術強，間公司就實賺到錢。往往都係睇其他人點用。