MasterCard/VISA業績速講。港股11個月高位。太古19 新鴻基16 渣打2888 一年新高。LVMH業績速評．Tesla業績。ASML業績 (Patreon)

MasterCard/VISA業績：舊年大幅跑贏大市，從來都冇平過。

點解長期咁貴？30倍市盈率

跌唔落，咁點買？

港股11個月高位，低位升8000點，仲有乜好講？

不過仲有啲落後股可以睇嘅

太古19 新鴻基16 渣打2888 都一年新高了

不過我都估唔到啲「開關股」咁強，正如都估唔到港股咁強。有乜啟示？

記住，多數人，就多數係錯嘅。創富路上就係孤獨

快講LVMH業績，股價又新高了

19年盈利72億，20年47億，21年120億，22年148億。今年呢？

貴買當然會「捱價」，但10%止蝕嘅，點搵大錢？

Tesla 業績：收入同盈利都新高。不過上季都係。點解之前大瀉，今年大升？

之前又話減價係「壞消息」，而家又話見效了

半杯水：增長一路放慢，毛利一路受壓。

ASML：純利按年跌，做乜仲話業績好勁？（有埋個Excel）

「晶片寒冬」嘅嘢，公司話需求不知幾咁強勁。你就寒冬

極粗略咁計，純利今年升多3成。咁其實即係平定貴？

隻嘢我贏緊近200%，買咗幾年，而佢嘅盈利亦升咗130%，仲要派息

1. 繼續係美股嘅業績期。呢兩晚（星期四五）出嗰堆冇之前咁值得留意，重頭戲係下星期堆科技股，包括蘋果，Facebook，Google同亞馬遜都係。

MasterCard/VISA業績：舊年大幅跑贏大市，從來都冇平過。

2. 比較值得睇嘅，係MasterCard開市前出咗業績，應該都係叫好過預期，但股價就跌了。我有長渣嘅Visa，就收市後先出，照計唔會爭好多。

3. 可以留意下，兩間公司都冇乜點「平」過，舊年股價都好硬淨。即使你「低位」買，而家都只係彈咗唔夠三成。

點解長期咁貴？30倍市盈率

4. 貴而跌唔落，原因可能係個「護城河」太強。基本上兩間Duopoly，你見我在Facebook 成日講，過河濕腳，每單交易抽小小水，發過豬頭。但當然，呢啲「護城河」有幾強，有時真係未必事前好易睇到　—　大家都一度以為Facebook 有好強「護城河」

跌唔落，咁點買？

5. 而面對呢啲，又貴，又好似跌極唔落嘅公司，都係幾難去「買」的。我嘅做法就係：唔理咁多，合埋眼買入去。咁但，咁樣做，「捱價」嘅機會當然大。所以更加係要長期持有，令個增長（希望做到）慢慢消化個估值。

港股11個月高位，低位升8000點，仲有乜好講？

6. 港股方面，兔年有個相當好嘅開始，升到11個月高位。亦即係過去一年近乎位何位買都贏錢。

7. 實在冇乜特別需要講嘅，之前講過睇好科技股。嫌騰訊阿里升晒嘅（其實唔係好多啫），可以睇啲細少少嘅，咁你見美團3690小米1810呢排都發力（但我兩隻都冇，其實阿里巴巴都冇，只得騰訊，所以呢期係跑輸大市嘅）

不過仲有啲落後股可以睇嘅

8. 其他？咪睇啲落後啲嘅大公司，以前都提過，長實1113長和1之類。其實好多公司都近1年新高。你有睇文，夠分散，又一路stay invested嘅，就冇咁多煩惱。點都在呢個8000點嘅升浪中分享到啲成果。

9. 另外，可以留意啲大陸嘅「復常股」，機場，旅遊，免稅店，電影，甚至餐飲。雖然好多都升唔少，可能睇返香港公司仲好。

太古19 新鴻基16 渣打2888 都一年新高了

10. 你會見到我在Facebook 貼　新鴻基16同太古19都52星期新高（太古地產1972都係），而太古我係有嘅（仲有渣打2888都52星期新高，都係有嘅）。友邦1299呢期都幾好

11. 要講嘅係，我都估唔到啲商場股咁強，原本真係以為到開得關就升完。所以，又真係唔好太早take profit（如有）。特別係唔好升幾日，跌一日，就即時嚇走。股票跌起上嚟好恐怖，但升起上嚟亦可以好誇張。騰訊咁大隻都低位升成個開啦。

12. 同樣地，雖然11月12月我已經寫投資金句，同你講港股見底，通脹見頂，加息放慢美債債息落美金回落。但都估唔到1月港股做到咁好。月尾埋單計下，但應該係幾十年最強嘅1月。所以，睇多次上面最後嗰句嘢。

不過我都估唔到啲「開關股」咁強，正如都估唔到港股咁強。有乜啟示？

13. 但你唔一早買定，唔買得大，就錯失晒了。

14. 順帶煩氣講多句，你睇舊年（特別係10月）好多人講嘅嘢，當時好多人同意，你都可能覺得言之成理。3個月後，係錯到不堪嘅。例如講香港經濟差，食兩餸飯，開關無期，經濟唔會好股市唔會好之類。

記住，多數人，就多數係錯嘅。創富路上就係孤獨

15. 記住，多數人，就多數係錯嘅。雖然個副作用係，你會開始發現自己冇乜朋友，成日講嘢都冇人有共鳴，朋友當你有問題的。「咁我諗你訂我Patreon係為咗創富，而唔係搵更多人同你圍爐嘅」。不幸地，你發現創富嘅過程，真係比較孤獨。亦證明到呢段第一句嘢

快講LVMH業績，股價又新高了

16. 同時間，LVMH亦都出咗業績。有樣嘢好有趣：你見媒體，係冇乜報的，因為歐洲公司。明明星期四美股未開市都出咗業績，但你睇新聞往往星期五日頭先見到，睇報紙直頭去到星期六。我都係因為有望住Zacks個日曆，先知星期四晚出業績。

17. 好啦，篇幅關係，實在不能細講。但，你見股價又創新高，已經不用解釋任何嘢。你可以睇媒體報導（反而AASTOCK夠快手），甚至睇返公司份嘢。

18. 我之後會詳解，但好簡單一句：公司2019年，純利72億。疫情下嘅2020年得返47億，2021年已經去到120億（高過疫情前一截）。2022年，係148億。咁所以，股價創新高，有幾奇？

19年盈利72億，20年47億，21年120億，22年148億。今年呢？

19. 你仲可以留意嘅係，個增長放慢咗。但原因係因為中國啲需求壓低晒，今次業績根本未反映中國放棄清零復常。而集團就似乎相當有期望。

20. 呢隻嘢同埋愛馬士，我都講咗好多日，一路話貴，一路升（好彩有買！），兩隻只係今年都升15%。事後睇返當然就之前買最好。而家未買又想買嘅，可以參考下我上面講VISA嘅做法。

貴買當然會「捱價」，但10%止蝕嘅，點搵大錢？

21. 但升咗咗咁多買落去，當然係有機會「捱價」的。我知一買就輸錢，唔過癮，但呢啲經常都會發生。抵消呢啲波動嘅能力，先係你可以獲得回報嘅原因。若果永遠買完跌5%跌10%又叫救命「止蝕」嘅，點搵大錢？

Tesla 業績：收入同盈利都新高。不過上季都係。點解之前大瀉，今年大升？

22. 再講多少少Tesla，星期三晚收市後出業績，盤後已經勁強。星期四暫時見到升10%。

23. 其實業績本身冇乜好特別，因為Tesla向來更早會出付運數字，咁一般當時個股價已經郁咗。今次話純利同收入都創新高，並唔係好奇怪嘅事，反正之前一季都係咁架啦！

24. 但點解之前係咁瀉，到今年先反彈？（今年升咗近50%！）。主要都真係…..估值。雖然答你唔到，會去到邊個位就止瀉。況且，仲要留意埋成個市場嘅情況（咁近期債息落美金落當然利好）。但你真係見到，一個月前先一大堆咩「壞消息」，又話減價，好唔掂。但而家升，啲人又話減價係「好消息」。任你講

之前又話減價係「壞消息」，而家又話見效了

25. 幾肯定嘅係，早排都寫過，公司嘅估值已經回落好多。你話貴就幾時都貴，但三四十倍，只係幾貴，唔係發神經地貴。何況，你見公司其實仲係相當高增長。你有幾多公司收入同純利而家可以創新高？

半杯水：增長一路放慢，毛利一路受壓。

26. 好多嘢，真係只係半杯水，睇你集中睇乜。另一方面你亦可以話，公司嘅增長不停放慢，利潤率亦一路跌。呢啲係必然嘅發展，亦因為競爭對手追上嚟，亦因為要減價。但另一方面，你亦都見到仲係有幾好嘅增長，今年都仲估交付量可以升37%

27. 留意好多時股票，都係升又升過籠，跌又跌過籠咁。而家反彈返，照計就係去返比較合理嘅水平。其實成個股市都係咁，但程度上冇咁誇張

28. 照舊，買咗嘅不用驚（我都買咗，原來剛剛上返水面！），但未買嘅可以不必了。

ASML：純利按年跌，做乜仲話業績好勁？（有埋個Excel）

29. 最後，ASML，話咗會詳細講下。你可以開埋個Excel睇，但根本個故事好簡單，就係一間依然有相當優勢嘅公司。之前啲股價上上落落，只係跟個市，升又升過籠跌又跌過籠。最重要係公司持續增長（咁而佢一路都有利潤，唔係Tesla之類由蝕大錢變轉賺，所以波動唔會咁大）。

30. 收入同埋純利，都係超過預期（留意似乎個利潤率高過市場預計好多）。而今季嘅指引，似乎亦都比市場預期好。

31. 你睇個全年純利，就見到係倒退的。但，正如之前講國泰一樣，當然係睇最新嘅趨勢。咁你睇到，無論係銷售，定純利，都係每季拾級而上

32. 更重要嘅係，公司預今年收入增長25%起碼（留意舊年係14%，之前幾年拉勻都只係大約20%），亦都預毛利率會改善。呢個係相當好嘅訊號。公司講到需求相當強勁，根本咩「經濟衰退」「晶片業寒冬」，唔會影響公司

「晶片寒冬」嘅嘢，公司話需求不知幾咁強勁。你就寒冬

33. 話時話，而家又有人講返「晶片荒」，真係任你講。我諗最重要嘅係，產業有上中下游，有好多唔同嘅公司。咁就睇邊個議價能力高啦，就唔係一句「行業好景」「行業差」就講得完。

34. 順帶一提，唔好以為公司冇中國生意，而家都仲係大約有15%嘅收入嚟自中國。又話禁令？其實一半半，都係賣啲舊機，最勁嘅就唔畀賣。都係中間落墨方案，否則荷蘭政府唔會咁易答應。

隻嘢我贏緊近200%，買咗幾年，而佢嘅盈利亦升咗130%，仲要派息

35. 係喎，台積電嘅情況都係差不多，我冇買，但你鍾意嘅可以買。11月時已經講,亦有讀者跟咗。但好多時係咁，升嗰時你就不停講啲技術點先進，但高位跌你六七成，就你自己都懷疑人生。

36. 事實亦係咁，估值嘛，你一路增長，估值一路跌，股價都可以大跌。但只要你坐得夠長，公司又一路成長，就應該係回到家嘅。

37. 你見呢隻嘢，我大約仲贏緊200%，幾年前買。咁你見公司純利就大約升咗130%左右，大約都有個譜的。

極粗略咁計，純利今年升多3成。咁其實即係平定貴？

38. 好粗略咁計，你當佢嘅銷售今年升25%，而既然毛利率仲會改善，分分鐘純利增長可以去到30%。即係2023年大約賺73億歐元（其實就大約係舊年第四季嘅4倍）。而家市值大約2700億美金，即係都仲係30倍市盈率樓上，絶對唔係平。

39. 一個好粗略嘅講法，你每年增長有30%，咁你一路30倍市盈率，都大約可以維持住。否則就會越嚟越貴，終有一日會畀地心吸力拉落嚟（但呢個只係一個概念，肯定唔係rule）

40. 但，亦真係可能同VISA一樣，你見真係有優勢嘅公司，就好難會特別平。