美股業績速評（Chervon，US Bancorp，AT&T，波音）。微軟 Tesla 業績。虎年港股跌7%，好多咩？國泰盈警嘅嘢。買股票，應該買幾多？ (Patreon)

美股跌極唔落，業績普遍都不錯

美股業績：Chervon，US Bancorp，AT&T，波音

微軟業績，到底好定唔好？

Tesla業績：收入同盈利都高過預期，「但點解之前係咁跌？」

ASML 業績速評

虎年港股跌7%，好多咩？

新一年記住：股市並唔係賭場，有相似，但有好明顯嘅分別

三大死因：黑心，愚眛，冇耐性

如果你2022年冇輸錢，或者輸咗唔痛，亦唔係好事

應該放幾多錢落股票？令你輸錢夠痛，但又唔會死嘅銀碼

國泰「盈警」嘅嘢

明明就係「盈喜」！

但股價又未必會升喎

睇下過去5年嘅股價，睇下有乜啟示？幾時見頂？幾時見底？

1. 非常多嘢要講，但幾日冇講港股，講咗港股先。稍後先講返多啲美股，亦都會埋尾講埋堆AI ETF之類。

美股跌極唔落，業績普遍都不錯

2. 可以好快講美股嘅係，重點依然係業績期，普遍都唔錯。你見美股唔止一日，係唔肯跌落去，跌咗即市都拗腰上返嚟。業績冇太大拖累美股。

3. 照舊，你可以睇Zachs嘅數字。除咗可以按市值大細去sort 外，仲會見到可以睇下好過預期定差過預期，然後股價嘅反應。

美股業績：Chervon，US Bancorp，AT&T，波音

4. 無論係油企Chervon（大加派息同回購），US Bancorp，AT&T之類，股價都大升。意外虧損嘅波音，都唔使跌。

微軟業績，到底好定唔好？

5. 當然重點係幾間科技公司。首先回帶講返星期三晚收市出嘅微軟，業績其實係好過預期。相當搞笑地，話業績好，星期二晚盤後就抽升，但好快倒跌，於是又有人話個指引唔掂。去到星期三晚開市都大跌，拖低埋啲指數，但之後收窄返好多。整體你見大市嘅底氣幾好。

Tesla業績：收入同盈利都高過預期，「但點解之前係咁跌？」

6. 另一方面，好多人關心嘅Tesla ，亦都出咗業績。照計唔會太意外，因為之前都出咗啲付運數據。 但整體個業績都係好，收入同盈利都係歷史新高。你見盤後股價都好強。

7. 早排都有講過對Tesla嘅睇法，我就唔係睇得太淡嘅。都係貴，但已經唔係痴線地貴。當然面對競爭，又要減價，但技術暫時仲係領先，而你見毛利率都係高嘅（不過一路跌緊，係一個穩憂）。增長一路都有，問題係估值，但已變返正常啲。所以睇法同之前冇變：買咗嘅可以坐下，未買嘅就唔使了。

ASML 業績速評

8. 至於ASML，就真係要留返聽日先講。但一樣，你見業績好過預期。我亦都已經update咗個Excel，你可以自己拎去玩。又或者睇返公司宣布業績份嘢。但一句，業績當然係不錯，前景指引亦都好。但點睇，都真係幾貴。低位都反彈咗一個開了。你係900蚊摸頂買嘅，都唔係好大件事，坐到而家都只係輸兩成多啲　—　但你300幾蚊低位打靶（有啲人叫「止蝕」），就幫你唔到了。

虎年港股跌7%，好多咩？

9. 港股方面，有總結咗虎年嘅表現。就真係半杯水了，有人覺得「苦年」，但如果同2022年比，又好似好咗好多。原因當然係因為今年港股已經升咗2000點（9%）

10. 事實上，虎年港股跌7%，並唔係咩大跌幅。你揀股好啲，而且分段買，再加埋收息，分分鐘全年唔使輸錢　—　至少我嘅港股倉應該係唔使輸錢嘅。

11. 而你亦見到，由「2022年總結」搬到去「虎年總結」，只係多咗十幾個交易日，成件事就唔同晒了。

新一年記住：股市並唔係賭場，有相似，但有好明顯嘅分別

12. 恭喜發財！照舊希望大家今年可以贏錢。首先再強調，股市唔同賭場，股票係可以創富嘅遊戲，最重要係唔係你死我活，係可以大家一齊贏錢，positive sum game，個個讀者可以一齊賺錢，而無損害其他人，係幾咁美好嘅事。相反，如果係賭場，就冇可能個個賭客都贏錢，必定係zero sum game（計埋賭場食你嗰份，就當然係negative sum game）

13. 但你見好多人，反其道而行，諗埋啲奇技淫巧，一般都係因小失大。股市賺唔到錢嘅，多數都係三個原因：黑心，愚眛，冇耐性。

三大死因：黑心，愚眛，冇耐性

14. 舊年輸錢係十分正常嘅，我唔明白點解咁多人咁在意「輸錢」。唔輸得錢的？最緊要你之後可以賺返，而一般都係可以嘅。

15. 所以，一個幾好嘅指標，就真係同「指數」相比。當然好視乎你買股，港股同恒指比，美股同標普指數比（所以分開啲股票叶）。輸錢冇問題，舊年乜指都跌，但如果你爭好遠好遠（超過10%），例如舊年輸到三四成嘅，就又係要睇下出咗咩問題　—　係肯定有啲問題的，一係你買錯嘢，一係時間太差。如果長期都係咁，就不如買少啲個股—聽落好廢，但，買指數，咪唔會跑輸指數。

如果你2022年冇輸錢，或者輸咗唔痛，亦唔係好事

16. 有趣嘅係，如果你2022年冇乜輸錢，冇乜感覺，亦不一定係好事—咁可能只係代表你買得唔夠大！你買幾千蚊，咪唔會痛，但相反就算贏十倍，對你生活質素都全部幫助。

17. 所以順手答埋好多人問嘅問題。有時讀者問，應該買幾多錢落股票，咁你知我嘅答案多數都係100%（但唔好借錢）。不過若要人似我，除非兩個我。唔係個個讀者好似我咁受得痛楚，又或者佢地買嘅嘢唔同（我買QQQ你買TQQQ已經係兩回事），又或者根本讀者比我更加能夠受痛楚。

應該放幾多錢落股票？令你輸錢夠痛，但又唔會死嘅銀碼

18. 買股票應該買幾多？畀個rule of thumb你，甚至用2022年嘅例子最好—你應該買到嘅銀碼，係令你2022年會唔開心，但未去到令你精神好困擾，影響你生活工作。有人問買完股票輸錢，雖然知道只係帳面（其實帳唔帳面都係一樣！），但都係搞到好唔安樂，問我點算。點算？好簡單，你嘅股票令你瞓唔著嘅，咁就買少啲吧。相反，如果2022年，你都冇乜感覺嘅，咁就真係買得唔夠大。

19. 我諗同好多活動一樣（愛情？運動？），太過冒進固然有問題，但太過錫身亦係有問題。就應該去到一個你會痛，會受傷，但唔會做成永久傷害嘅水平。

國泰「盈警」嘅嘢

20. 最後睇睇國泰，出咗個疑似盈警。新聞呢度，份公告呢度。你會見到嘅係，2022年蝕64至70億，係仲多過2021年嘅55億。

21. 話定你知，盈警當然唔一定係壞消息。況且亦冇人話壞消息實會跌。首先，點解唔係壞消息？我直頭話你知，係「盈喜」。好簡單，全年蝕64-70億嘛，但上半年係蝕52億，即係下半年，只係蝕10億多啲。你計半年，仲唔係「虧損　大幅收窄」？

22. 睇詳細啲嘅，公司已經講到明，下半年營運比上半年好（鬼唔知咩），仲要錄得正現金流。不過有聯營公司錄得重大虧損。邊間？當然係國航（753）。但，同樣原理，唔通大家今日先知國航蝕錢？

23. 亦畀你見到，narrative嘅嘢，任你講。但在呢啲情況，一定係睇「半年」甚至「季度」，總之以最新嘅嘢為準。例如公司舊年蝕10億，今年頭三季蝕100億，然後公佈今年全年會蝕20億—唔通你會話係「壞消息」？梗係唔係！因為頭三季嘅嘢已經反映晒啦。

明明就係「盈喜」！

24. 遲下寫ASML，都會有類似嘅情況。照計呢啲係好簡單嘅嘢，我解完你地都會明，但你見街度真係好多人完全唔明，照會話你知「盈警呀，蝕多咗呀，仲唔係壞消息？」

25. 仲有，你見我已經整返好個Excel，update晒了，你可以拎嚟玩。

26. 要講嘅，仲可以好多好多，或者有啲冇咁重要嘅，我會在Facebook Page講，反正不見得好多人有買國泰

睇下過去5年嘅股價，睇下有乜啟示？幾時見頂？幾時見底？

27. 首先你可以睇下個股價，2022年，估下表現點？當然係大升，升33%，遠好過恒指。但照計大家好易明白，當然幾時都唔使等「開返晒先」。到「開返晒」，例如你睇今年，股價就反而落後了。幾時都係呢啲大原則。

28. 不過你仲可以睇下，股價係幾時見底嘅。就同好多其他公司唔同，你見股價，唔係舊年10月甚麼「二十大」嗰期見底。係再好耐之前，2020年秋天左右。

29. 大約發生乜事？再遠少少講起。首先你見2019年下半年股價已大跌，呢個走勢同啲酒店股甚至零售股快餐股應該差不多，好大程度同社運有關。

30. 但去到2020年，當然急瀉落嚟。唔使講，爆疫，差不多停晒客運，對公司係極極極大嘅打擊。大家都知航空公司有極大嘅固定成本，例如你啲機唔飛都要折舊。雖然有貨運幫補少少，但停晒客運，如果乜都唔做，一年半載必定破產。

31. 但，就當然唔會係「乜都唔做」，照計大家都估到，政府點都會幫。亦所以你見，政府注資兼借錢，就係2020年6月嘅事。之前都仲跌咗輪，但就差不多見底了。

32. 咁同樣道理，到疫情好似開始受控，外國開始講復常，咁明顯香港都係會跟的。你見2022年，由頭升到尾。

33. 亦因為咁，雖然今次知道2022年下半年蝕少啲，但股價就唔會再忽然爆升了。

34. 實情公司平時個個月出啲營運數據，運力呀，客量呀咁。甚至就算公司唔出，你上網望下啲班機次數，或者去機場望下，都大約會知。總對唔使等佢出「盈警」或「盈喜」先知。

35. 更甚係，根本未有呢啲嘢之前，股價已經升。幾時都係炒預期嘛。金句系列點解咁重要？因為你見好多嘢都係嗰幾個大原則。