AI，ChatGPT，微軟 (Patreon)

美股業績：Johnson and Johnson，Verizon，3M

微軟業績：盈利跌，但依然好過預期，股價盤後大升

有排都未驚螫，又個個問Open AI嘅嘢有乜好炒了。

「之前Metaverse BNPL未輸夠？」

微軟增資Open AI嘅嘢。仲整合落去Bing，Office同Azure添

點解忽然又個個AI？「因為啲科技股升返」

本人唔係抗拒科技，亦唔係輕視科技。不過投資就係另一回事

嗰時Deep Blue Alpha Go都鬧得熱烘烘的。我知，「今次唔同」。上次都咁講

係咪我「發明」樣嘢，就坐定定收錢？電力，中文輸入法，QR Code

微軟，就梗係玩嚟玩去都係嗰招。仲使講？

技術？Netscape最初勁過微軟好多。「而家幾錢市值？」

我地細個做功課都冇得上網冇維基。咁而家啲小朋友係咪唔使做功課？

Summary

下篇預告：AI主題ETF，得唔得？

1. 寫文時星期二年初三半夜，已回香港，但香港仲未開市，所以繼續寫美股

美股業績：Johnson and Johnson，Verizon，3M

2. 美股方面，進入咗業績期（再分享多次，呢個網好用），最初一大堆銀行打頭陣（只買咗JP Morgan），上星期到NetFlix（有買），暫時都OK，最重要係股價普遍都升。

3. 今晚（星期二）開市前就有Johnson and Johnson，Verizon（呢隻有買），3M。頭兩者股價變動不大，冇乜好講。3M就大插，道指成份股添，但因為冇買，亦不講太多。

微軟業績：盈利跌，但依然好過預期，股價盤後大升

4. 收市後就有微軟（買咗唔少），寫時未出，但無論業績得唔得，無論股價升定跌，都值得留意。上篇文講Google 同Microsoft 二選一，我會揀Microsoft（雖然我兩隻都有，亦唔明點解要二選一），呢篇文會講。

5. （寫完篇文剛見到，業績係得嘅，股價盤後勁升。早早叫你買架啦），之後先細講）

有排都未驚螫，又個個問Open AI嘅嘢有乜好炒了。「之前Metaverse BNPL未輸夠？」

6. 好啦，今日嘅正題，Open AI，亦即係有啲讀者問我嘅ChatGPT。早幾個月爆紅，都幾耐唔耐有人問。

7. ChatGPT係乜？有乜用？慎防有讀者仲係唔知係乜，有位讀者summarize 得好好：Wikipedia + Google．理論上係一隻ChatBot，但高智能過啲白痴銀行Chatbot好多。

8. 實際上，最多見啲人拎嚟寫文，同搵資料。「我想知道智利經濟好唔好？」「德國點解成日好似唔支持烏克蘭？」「曼聯近排咩環境？」，之類。出啲文相當流輰，有時都未必分到人寫定AI寫。

9. 當然更重要嘅係，最近微軟增資去Open AI，講緊幾十甚至過百億美金。另外亦都會將Open AI整合去Bing 同埋Office，仲有Azure．

10. 「咁你諗下，第時你開個Word寫文，可以即時gen晒呢啲資枓，其他對手仲點鬥？」

微軟增資Open AI嘅嘢。仲整合落去Bing，Office同Azure添

11. 其實心急又膚淺嘅，睇到呢度，都唔使點睇落去。「買微軟啦」。

12. 不過兩樣嘢，首先，以上種種東西，完全唔係新嘢，但你見微軟股價係冇乜反應的，今年一路跑輸大市。但呢個可能係好事，唔好升晒先仆入去。亦變相話你知，離「成事」（帶嚟任何有趣嘅嘢）仲好遠，仲有好多變數。但咁先好，當然係冇消息時買。反映晒，仲有乜好買？

13. 另外，你見我講得「唔係咁簡單」，當然之後會有好多其他嘢講。不過，費事你冇耐性，話定畀你知。上面嘅結論：「買微軟啦」，都係成立嘅。因為呢間本身已經係一間相當值得買嘅公司，估值亦唔係神經地貴，即使咩Open AI之類最後泡湯（唔好低估呢個可能），都冇問題。

14. （話時話，投資切忌冇耐性！唔信？睇呢單新聞。成件事最「可惜」嘅係，可能捱多一陣佢啲嘢已經升返）

15. 好啦，有耐性嘅，可以睇落去。

16. 呢排，的確好多人問關於AI嘅嘢。令我諗起乜？「就係之前嘅Metaverse，Buy Now Pay Later，加密貨幣」，顯然大家係冇吸取任何教訓嘅，嘻嘻。

點解忽然又個個AI？「因為啲科技股升返」

17. 實情有冇諗過原因係乜？做乜忽然間又個個AI？好簡單，因為個市好返！特別係啲科技股！同以往每一次都一樣。升咗，咪有人講啲Fancy嘢。實情啲「技術」（如有），並唔係忽然間有乜大進展（咁當然，微軟增資同整合落去，係一個新嘅消息，但，照計一早預咗啦下話）

18. 先講個「技術」本身，我就無謂班門弄斧，相信讀者或網友畀我知得更多（But again，我使唔使識整光刻機先可以買ASML？隻嘢我賺緊200%）。

嗰時Deep Blue Alpha Go都鬧得熱烘烘的。我知，「今次唔同」。上次都咁講

19. 但你可以諗下，N年前IBM嘅Deep Blue捉棋捉贏人類，或者冇咁耐之前嘅DeepMind Alpha Go捉圍棋（Google嘅嘢），當時一樣鬧得熱烘烘。但然後呢？

本人唔係抗拒科技，亦唔係輕視科技。不過投資就係另一回事

20. 不過要澄清返，你見我成日質疑啲科技L，但我並唔係抗拒科技或輕視。只係搞清楚兩樣嘢，技術還技術，投資還投資。無數咁多例子畀你見到，係兩回事。

21. 而件事似乎唔會係「我有個AI好勁，然後就收錢，不斷印銀紙」。至少你見到IBM打後就走下神壇。

22. 當中其中一個重點係：你唔賺錢，而家個個免費試玩，就好地地。你搵錢又要做普及嘅，就涉及好多問題。

23. 首先係普及嘅問題，你見「互聯網」本身，如果可以暴利，又點做大？社交平台要收錢，又何來Network Effect？

係咪我「發明」樣嘢，就坐定定收錢？電力，中文輸入法，QR Code

24. 又或者諗下，發明電力嗰個，係咪就咁發咗達，人人用我就收錢？好似冇咁簡單（又，愛迪生當然唔係發明電嗰個，實則電力唔係被「發明」嘅）

25. 或者再退一萬步，諗啲好low tech嘅嘢：中文輸入法。你用倉頡用速成用手寫用語音都好，因為唔使錢。要錢嘅輸入法（以往出現過丫），點普及？QR Code亦係咁，有人話日本人「唔收錢」，但實情，收錢就普及唔到了。

26. 你可以諗下，「加密貨幣」都係面對類似嘅問題。

27. 在AI呢啲領域，更加難搞，涉及更多倫理政治問題。Open AI 十分聰明，開頭non profit。到你要賺錢，保證大把是非（而家其實開始變咗「profit capped」）．

28. 除非，你係將佢嘅技術，用落其他嘢度，然後再賺錢。咁就有數圍。

29. 其實IBM同Google嘅玩法都係咁。捉棋呢啲，示範單位啫，邊會搵到錢。但用嚟公告天下話你知我套嘢有幾勁，然後其他方面諗方法收錢—就係收mass market 了

30. 例如？Google背後嘅業務，都係廣告，而最強始終係search ad。原因亦同佢地自己嘅AI有關，你見其他search engine 學唔到的（當然同先行者優勢亦有關）。但IBM就一路都搞唔起，畀人過頭，背後就唔係你早早估到

31. 咁，寫到呢度，你都應該知道，「將其他嘢用落自己度賺錢」，當然係Big Tech識得做，同埋做得到嘅嘢。

微軟，就梗係玩嚟玩去都係嗰招。仲使講？

32. 微軟好可能係最成功嘅一間，最初做Browser唔夠Netscape，但又如何？我綁埋Windows一齊，加上財雄勢大，出各種拿渣手段，最後而家應該好多讀者唔知咩係Netscape．

33. 同樣嘅情況，你會見到微軟「一路都係呢招」。Microsoft Team可以打殘Slack同Zoom，就係咁簡單。大客係乜？大客係啲巨企，唔係啲Geek。Slack 要收錢，點解唔用Microsoft？支援又多，你唔識用，搵人上嚟教到你識為止，錢多。

技術？Netscape最初勁過微軟好多。「而家幾錢市值？」

34. 順帶一提，蘋果就用佢硬件嘅優勢，封閉系統，自己乜都做晒。玩到Facebook 殘。而上面都講咗，Google都係用自己 search嘅優勢去保住收入甚至養大其他嘢，全部都係咁玩

35. 上面講咗Deep Blue同Alpha Go（Deep Mind），好可能有讀者已經講：今次唔同！（介紹返，投資世界中，最危險嘅四個字）。

36. 的確，真係唔同。Deep Blue 再叻，AlphaGo再叻，最多拎嚟捉棋，最多搞到啲棋手失業同冇癮，對地球上99.9%嘅人，似乎冇乜影響。

我地細個做功課都冇得上網冇維基。咁而家啲小朋友係咪唔使做功課？

37. 但ChatGPT，就好似唔同。正如上面講，Google ＋Wikipedia。學生做功課/抄功課恩物。仲有，本身好似係記者恩物。但諗真啲，如果得你一個知就有用，日日叫佢寫稿，你自己白出糧。但到連讀者，老細都知有呢啲嘢，就會變咗係取替你職位嘅殺手了。

38. 事實上，有啲財經新聞體育新聞，早早用AI寫。昨晚阿仙奴對熱刺，幾多分鐘邊個先開紀錄，幾多分鐘邊個扭過邊個追平。賽後兩隊幾多分，排第幾。港股年初五開市升幾多，一度高見幾多，最強藍籌邊隻，專家點睇後市。

39. 不過我自己嘅睇法，傾向覺得「冇咁易取代」。或者應該話，就真係啲人類去做其他更有意思嘅嘢。你當好似我做分析員做記者咁，初入職嘅，咪寫上面嗰啲嘢，但到你資深啲，就發掘故事啦，自然搵啲其他嘢。然後呢啲低端嘢咪踢畀助手做　—　只不過將來你嘅助手係隻Bot，唔係個人之嘛。

40. 同樣地，我地細個做功課時，冇網上，冇維基百科抄料。咁到有咗之後，啲友係咪唔使做功課？係咪上去抄就得？又好似唔係。個世界會不停轉的。

41. 呢篇文夠晒雜亂，似足我在Facebook 寫嗰啲，「照計好難被AI取代」。但可能分分鐘讀者覺得呢篇先好。

Summary

42. 總之，我整理下一啲想法：

43. 首先，唔會係咁簡單，唔係「我有個技術你冇然後我就坐定定不停收錢」，你做光刻機都仲可能得，因為你面對嘅客好少。但做大眾市場嘅，冇乜可能咁。所以應該並唔係「Open AI之後就賺到笑然後分拆出嚟上市就好值錢」。或者「你用我一次我就收你十蚊好快發達」，你見真係唔係咁運作的

44. 第二，呢啲東西，唔會一兩年帶到好多盈利畀你，必定睇長線，亦都冇包生仔。你睇返IBM嘅例子，當年一時無兩，之後呢？

45. 第三，正路地，你都係買大公司。Big Tech，In this case，微軟。一個唔該，會唔會谷得起佢地Browser業務？（打殘Netscape後，就到Google打殘佢。但微軟勝在有Windows 有Office！長期現金牛）

下篇預告：AI主題ETF，得唔得？

46. 最後，同時都有人問，有啲AI主題ETF買，得唔得？答案係：應該唔得，亦唔需要。下篇我會解。但唔係好明嘅，你可以重溫我嘅舊作（attachment有）。嗰篇正係2021年尾，講Metaverse元元宙．當時我已經係比較「保守」，但結果都係太樂觀。你睇一大堆ETF，都係死晒。細公司尤其死得勁，反而你睇Nvidia之類，低位反彈成倍了

47. 講到尾，文入面講Metaverse嘅，而家你講AI都適用：

48. 元宇宙之戰，肯定是中期長戰爭，靠的不是一下奇襲，或幾個好點子，而是兵精糧足。取勝之道，在於人才，以及資金，而Big Tech公司兩者兼備。

49. 下篇會講AI ETF（順手重溫返Metaverse ETF嘅教訓），仲有同你講，唔買微軟，可以買邊隻。