暫時啲預計都幾準：港股歐洲跑贏美股，但科技股跑出。Google Microsoft 二選一。NetFlix績後大升。Ally Financial 業績後單日升兩成 (Patreon)

暫時2023開局都同預計中幾似：美股跑輸歐洲香港，但科技股跑出

Microsoft 同Google，炒完人股價升得幾好。二選一揀邊間？

科技股業績第一擊；Netflix 大升

點解盈利跌九成，得街估嘅四份一左右，股價都大升？

聽講話人人都cut Netflix，係真唔係？

個個串流台都流失客，但邊個流失得最勁？

但點解Netflix每戶平均收入就係咁跌？

點解上客好過預期，收入同預期差不多，但盈利爭成條街？

原來因為美金跌！所以輸錢！

人人講「管理風險」，其實即係乜？

點解啲人睇Netflix 唔睇盈利，睇上客量？

Ally Financial：業績後一日升兩成

差不多4厘淨息差，「好賺過銀行」

1. 寫呢篇文時星期一年初二朝早，在韓國，香港年初五先開市，但美股星期一晚開，所以寫咗美股先。

2. 先講星期五嘅市況，並無好特別，挫上挫落但依然有得升。可以留意嘅係，暫時2023年同我嘅預測都幾似，港股歐洲跑贏美股，而納指又跑贏標普指數（呢個年頭講咗了，雖然冇寫一大篇文講展望）

暫時2023開局都同預計中幾似：美股跑輸歐洲香港，但科技股跑出

3. 咁你見星期五，都係啲科技股比較強。始終舊年11月開始（二十大！），就係炒通脹見頂放慢加息美金回落債息落，都幾簡單。留意納指就連升三個星期，但道指標指上星期要跌。

Microsoft 同Google，炒完人股價升得幾好

4. 遲下會在Facebook Page寫，但特別可以留意Microsoft 同Google，宣佈完炒人，股價都升得幾好。當然呢個未必係完全因果關係，未必就係話「炒人利好股價」，但至少可以反駁「炒人不利股價」。呢啲位兩隻都應該OK，但二選一我會揀微軟（雖然我唔明點解經常啲人都要二選一），應該呢兩日會再詳細解

科技股業績第一擊；Netflix 大升

5. 另外當然要留意NetFlix，一向都係打頭陣嘅科技股，但留意佢嘅業務性質同其他科企唔係好同（甚至有人唔係好明做乜呢間都叫科企），所以未必對其他業績好有啟示性。

6. 不過你可以睇到嘅係，到底市場對啲業績咩反應。特別係以前估值好貴嗰時。提提你，一年前左右，業績一出，堆科企插晒水．

點解盈利跌九成，得街估嘅四份一左右，股價都大升？

7. 好啦，睇睇NetFlix業績，見到盈利，係遠遜預期嘅！按年跌九成！只係得街估嘅四份一左右，爭成條街！

8. 不過你見市場反應十分正面，股價升8%。留意呢隻我係有嘅，當然潛水中，但不經不覺低位都升返一個開。

9. 首先，個收入係同預期差不多嘅。另外更重要嘅係，上客量數字。第四季上咗766萬客，街係估460萬，咁就真係遠勝預期了，扭轉晒之前嘅頹勢。

聽講話人人都cut Netflix，係真唔係？

10. 亦都可以留意嘅係，訂戶數目，在所有地區，都係有增長嘅（指嘅係「大區」，北美，亞太咁）。

11. 留意啦喎，呢個係咪同你嘅常識有啲唔同？係咪身邊好多人話cut Netflix？似乎我都聽到唔少人講。但首先，講嘅有幾多真係做？仲有，你身邊嘅香港人，唔係全世界。你可以想像到，新增嘅客戶，都係嚟自啲窮啲嘅地方，至少亞太肯定係。

個個串流台都流失客，但邊個流失得最勁？

12. 亦可以留意，串流潮玩咗幾年，啲人開始係發現睇唔晒咁多嘢，當然會開始cut。所以差不多全部台嘅流失率都升，但至少在北美，NetFlix嘅客戶流失率，係咁多個台之中最低嘅。亦即係話，好多人保留最後一兩個，都係揀佢。（留意客戶流失未必等於訂戶數目跌，因為新增嘅客有可能多過流失嘅舊客）

但點解Netflix每戶平均收入就係咁跌？

13. 業績仲有好多好有趣嘅嘢。首先你會見到，雖然話全部地區用戶都有增長，但同時間，啲客嘅平均消費（ARPU，average revenue per user）係跌嘅。係咪同你想像中又好唔同？明明話在美國韓國（香港好似都係？）加價喎。亦即係話你知，啲新增嘅客，係啲收費平嘅地區度嚟，又或者係好多優惠（例如同其他嘢一齊半賣半送）。呢啲當然亦見到係因為競爭對手嘅壓力，要留客搶客。咁而個ARPU跌（都跌咗幾季了），就當然唔係好消息

點解上客好過預期，收入同預期差不多，但盈利爭成條街？

14. 好啦，你夠細心嘅會問，點解訂戶增長遠預預期，收入就同預期差不多，但盈利同預期爭咁遠？

15. 正常嘅估法，當然係估開支。但一般開支唔會忽然間一季升上嚟，亦唔會係分析員完全預唔到（即使拍戲嘅開支都會有指引，況且亦唔係一季入晒帳）。咁所以你好可能估到，係啲撥備之類嘅one off 嘢

16. 答案係：匯率！

原來因為美金跌！所以輸錢！

17. 我冇細睇，但如果冇理解錯，就係因為美金第四季大跌！咁又點？咁公司有發歐元嘅債，美金跌，即係歐元升，咁咪即係還多啲錢！所以有舊數！

18. 之但係，你見市場一於少理。首先，呢啲並唔係營運上嘅東西，另外，大家亦一早知道有呢舊債（雖然你可以質疑做乜分析員又冇估到呢個數，歐元升值人人都見喎）。但同時間亦留意：咁你歐元升，你收歐洲訂戶啲收入又升返補返啫（其他貨幣嘅原理都一樣）

19. 呢度又可以帶去另一個問題啦喎！又係啲人問，「匯率風險」。又畀你見到，你去擔心，都真係多餘。因為根本冇得擔心。

20. 買歐洲股買日本股你話驚匯率風險，但你買美國公司，咪一樣受影響！事實人地做全球生意，就日日都係面對呢啲風險架啦！邊有得避。

21. 仲有，你見好多公司嘅做法，都好簡單，就係大約做個currency match。最明顯嘅例子？領展買英國嘢，咪發英鎊嘅債。盡量令到個net exposure 少啲—升嗰時負債多咗但收入都多咗，跌嗰時亦都係。而唔係自己走去「估」到底英鎊升定跌

22. 亦畀你見到，人地呢啲跨國嘅巨企，都唔會自己走去「估」啲匯率點點點。人地做返自己專長嘅生意，唔係當自己乜都識。所以你自己投資時，走去認為你覺得匯率會點點點，會唔會自視過高？

人人講「管理風險」，其實即係乜？

23. 事實上，「管理風險」真係我聽過最大嘅廢話之一。好多人講，但我懷疑有幾人知係咩意思。就算答得出嘅，亦可能十個人有十個唔同答案。而我理解好多人嘅諗法，以為「管理風險」就係「唔好冒險」，全錯！又或者，「管理風險」就係「我覺得香港經濟差所以唔買香港股票因為風險好大」，又錯！又有啲人，以為「風險管理」就係諗下「最壞情況可以輸幾多」，一樣錯！（買股票「最壞情況」當然係輸晒）

24. 如果你問正宗學院派（即係我），「風險管理」，個重點就係：唔去冒一啲你唔熟悉嘅風險。只去冒啲你熟悉嘅風險。即係點？即係，你做串流咪做串流，諗上客諗平台諗內容，而唔係去自己估下歐元下季升定跌。

點解啲人睇Netflix 唔睇盈利，睇上客量？

25. 最後，會唔會有人問，點解啲人次次都係睇Netflix嘅訂戶數字？而唔係睇盈利甚至收入。

26. 的確係咁。今次你都可以話，個盈利因為匯率問題扭曲咗。但，以往都見到好多次，盈利得，但上客量唔得，股價一樣即插。明顯啲人真係睇「上客」，唔係睇「盈利」，點解？

27. 呢個，都真係有得解的。同業務性質有關。Netflix，本質就係訂閱收入。你可以話有似啲保險公司。最緊要，就係啲人保持科水。

28. 再講白啲，盈利係可以好波動嘅，但對呢啲公司嚟講，啲用戶有相當大嘅黏性（講緊流失率只係3%，以前係2%不到）。換言之，你一季盈利失利，但啲訂戶仲在，就之後長玩長有。相反，你今季盈利得，但用戶流失嘅，之後你都係冇運行。

29. 類似嘅東西，正係保險公司。可能你都會見到，啲人唔睇保險公司嘅盈利。因為保單一簽就幾十年，所以盈利反而短暫嘢，有幾多新單，有幾多退保先緊要。

30. 甚至乎你睇地產商都有咁嘅情況，啲友一樣唔係睇盈利—因為盈利要賣咗樓先入帳，但當你N年前有啲平地，然後嗰區忽然發展（起地鐵之類），咁個「價值」已經創造咗出嚟，幾多尺成本起到幾多單位建築要幾錢賣幾錢，全部有得計，唔使到賣先知

Ally Financial：業績後一日升兩成

31. 最後講講呢隻Ally Financial，極少講嘅一隻嘢，但呢度肯定有寫過的。極少講，除咗因為隻嘢比較細，當然亦因為買完就潛咗水。都潛咗好多

32. 當初買，就係跟畢菲特衫尾，我仲買得平過佢（我大約36蚊買）。你大約見到，佢買完，隻嘢都一路跌，「我買完都係」。高位去低位都跌咗一半，以一隻非科技股嚟講都幾誇張

33. 不過上星期五出完業績，單日就升20%。雖然仲係輸緊15%，但希望在人間。

34. 業績其實唔係咁易睇，公司最主要就做auto finance，幫人上車會，但亦有做其他嘢。今次業績強就係因為保險收入勁，另外，公司對2023年嘅展望都比較審慎，但對2024年就幾樂觀。

差不多4厘淨息差，「好賺過銀行」

35. 仲有可以留意，呢啲公司嘅net interest margin（息差），可以去到近四厘！大銀行都好少會超過三厘。不過事情梗係唔係咁簡單，首先，大銀行嘅貸款量可以做得大好多，年期亦長好多，低啲嘅息差都夠冚啲開支（好大程度都係幾固定嘅開支）。另外，呢類公司嘅壞帳率當然高好多。其實即係財仔同銀行嘅分別。

36. 不過見到，暫時啲壞帳都冇乜急升。所以，你話經濟係咪真係咁差？又似乎唔係喎。