台灣股虎年跑輸廢柴港股成條街，點解？可能就快有得買韓國股，有乜好買？美股又話唔驚通脹，而家又驚衰退了。咁幾時先買得？另外，公司盈利跌90%，估值係咪貴10倍？ (Patreon)

本人去完韓國SFC（！），韓國股就有大動作！

韓國股有乜好買？

台灣股市虎年收爐，亦都收皮。跑輸港股近20%！點解？

點解台股跑輸？經濟唔好咩？

「經濟好，所以股市升」—　係咩？都話多數人，就係多數錯

美國PPI急跌，初段就話「好消息」，尾段原來又係「壞消息」

話咁快，就由「驚通脹」，變「驚衰退」—咁幾時先買得？年年沽空？

點睇估值？今日好似平，「但下年盈利跌90%你個市盈率咪貴咗10倍？」

1. 寫稿時星期四黃昏，在首爾，但汲取上次畀人狂鬧嘅教訓，盡量keep住出文。

本人去完韓國SFC（！），韓國股就有大動作！

2. 無聊新聞一則，話說我今日去完韓國SFC後（是真的，去買朱古力。但唔貼相浪費版位了），就有單咁嘅新聞：南韓將取消外國股票投資者登記要求

3. 當然唔係我功爭取，但，你會問，關你乜事？如果你有開IB或其他「國際」戶口，應該發現係買唔到韓國股票嘅。IB日本買到，新加坡印度都得。但韓國一路都唔得（台灣都係），事實上外國人係極難買到韓國股票。

4. 當中其中一個原因當然係外國投資者登記要求，券商見冇乜特別，就唔會特登同你搞。咁而家取消咗，理論上我估之後有機會買到。

韓國股有乜好買？

5. 但話說回頭，韓國股市不見得有乜公司好值得買。你作為分散買韓國KOSPI ETF都仲可能得，個股就不了。最大嘅三星電子，有ADR買。其他之後嘅已經細一截，排第二嘅LG新能源係佢四份一左右（又，上次呢個網站，都話十分有用）

6. 至於有少數人有興趣嗰啲娛樂經理人公司，就不了。好多古惑嘢，唔見得係為股東利益嘅公司。事實係韓國股票似乎係比較多古靈精怪嘢的。

台灣股市羊年收爐，亦都收皮。跑輸港股15%！點解？

7. 好啦，另一方面，可以睇下台灣股市。點解無啦啦睇台灣股？因為台股已經提早收爐。

8. 估下講到點巴之閉嘅台灣股市，虎年表現係點？當然係大跌。跌15%。留意，呢個跌幅仲勁過港股（大家虎年對虎年），港股同期大約跌10%—而仲未計同期台幣對美金（同港紙）跌咗都差不多10%。一來一回，你睇跑輸幾多？留意我個圖同媒體報嘅數唔同，但結論一樣

9. 點解咁差下話？唔多唔少都因為台積電，同埋你睇台股指數啲權重股，就係呢類電子公司多。

點解台股跑輸？經濟唔好咩？

10. 但，台灣舊年經濟唔好咩？「咁就睇你點定義咩叫經濟好」，但一般理解，經濟都係幾好嘅，似乎點都好過香港先。例如你睇失業率，跌到22年最低，點都冇可能話經濟差。

11. 但，點解跑輸香港？可以再同你講十次：因為，股市同經濟，係兩回事。特別係你地睇短線嘅（一年當然係短線！），更加係嘥氣。咪話舊年越南經濟增長冠絶主要經濟體，但股市跌到趴街

「經濟好，所以股市升」—　係咩？都話多數人，就係多數錯

12. 點解我不停咁重覆類似嘅嘢？正係因為，人類係不停重覆犯錯嘅。差不多每隔幾日，就會有人同我講，覺得邊度邊度經濟會好，「所以」我係咪應該買嗰度嘅股票？你可以睇下台灣同越南嘅例子。

13. 10月時，或者半年前，一年同，有人同你講香港股市會跑贏台灣25%，你應該當嗰條友低能的　—　再一次話畀你知，多數人，就多數都係錯嘅。

14. 一日仲有人同我講「經濟好所以股市會升」或其他嘅變種，我就會繼續貼呢啲例子。

15. 當然仲有最重要嘅：估值

美國PPI急跌，初段就話「好消息」，尾段原來又係「壞消息」

16. 好啦，最後講返星期三晚嘅美股，跌600點喎。今次嘅「原因」比較明顯。美國星期三晚出咗兩個經濟數據，分別係個PPI，同埋零售銷售。

17. 先講PPI，一路都話係”wholesale inflation”，出廠價格，啲人有時會拎呢個作為CPI嘅領先指標：因為出廠價升，自然會慢慢轉落消費者身上。咁但當然唔會係「100%準」（都話金融市場唔係自然科學），因為可能係商家硬食，又可能要啲時間先反映，仲有唔好忘記通脹亦有非貨品（即係服務）嘅成份，而入口價格亦會影響

18. 但，無論如何，個PPI數字按月跌0.5%，亦都遠低過預期。點都好似係「好消息」？你見媒體報導都係咁寫，早段美股升嘛。事實2月1日加0.25嘅機會去到95%，全無懸念。美債債息又再急跌，10年債息去到3.33厘（對股市應該好事）。

19. 不過，你見到尾市道指跌600點—個narrative就變咗係數據弱，擔心衰退。所以，乜嘢係好消息？乜嘢係壞消息？真係唔使咁認真。

20. 另外見到，零售銷售數字，都係差嘅。亦低過預期

話咁快，就由「驚通脹」，變「驚衰退」—咁幾時先買得？年年沽空？

21. 好似好早講咗，好快啲人就會開始「驚衰退」。係咁架喎，之前就一路驚就業市場太勁，驚人工升得快，驚通脹。到而家啲數字唔得，又話驚衰退。

22. 我諗我都唔使多講：經濟好時又驚加息，經濟差時又驚，咁幾時先買？年年都沽空？

23. 如果你話畀我知，經濟好即係股票升，經濟差即係股票跌嘅—咁罰抄啦，你印上面講台灣嗰段出嚟，自己抄一次。

24. 所以真係唔好話成日重覆，因為好多嘢就係嚟嚟去去嗰幾個大原則。而你總不能期望我每日會有唔同嘅睇法：我冇可能今日升1000點，就話你知經濟唔好即係唔加息，你瞓身買股啦；然後聽日跌1000點，我又話你知，經濟衰退啦，企業盈利受打擊呀，今日好似平嘅股票之後盈利跌都會變得貴（呢句嘢實在好多人講），千其唔好買股票。

25. 掉返轉頭，好多人當股市新聞好似娛樂新聞咁，要不停有新嘢，咁只會畀個市場牽住你走。

點睇估值？今日好似平，「但下年盈利跌90%你個市盈率咪貴咗10倍？」

26. 關於經濟衰退，仲可以寫多篇。但首先呢度答埋你一個問題（好似冇答過）：有人話，咁經濟衰退，企業盈利難免跌，

27. 咁你今日平嘅嘢，咪之後又會貴咯。極端嚟講，我隻嘢今日10倍市盈率，點知出年盈利跌9成，「咁咪變咗100倍」。

28. 呢啲都係讀者問嘅問題，而呢啲就係比較高水平嘅問題。但唔容易答（上次咪講咗「估值教父」成世都研究，而佢嘅嘢入面都有講呢啲問題，你又睇咗未？）

29. 好粗略咁答你：講嘅情況，係會發生嘅。不過首先，你應該係睇「預期市盈率」，即係你而家至少係睇2023年嘅市盈率，而唔係你平時上網見到嗰個（好可能係2021年，因為2022年全年業績都未出！）

30. 邊度搵預期市盈率？自己有Bloomberg嘅最好，當然Yahoo Finance都有。

31. 不過，呢啲都只係皮毛，實情估值嘅嘢，唔係睇一年盈利嘛！照計你睇呀教父啲班，應該頭一兩堂已經講到，你可能讀書都讀過，乜鬼discounted cashflow（冇睇舊文嘅，我貼多次。又，唔貼又有人問邊度有，貼又有人鬧重覆，真係做乜都畀人鬧）

32. 事實的確係咁，我唔講公式，講常識。唔通原本10倍市盈率合理，我公司就剛好呢個估值，但忽然一年盈利跌九成，咁唔通股價都要跌返九成先合理？冇可能的。同樣地，唔通我有一年蝕錢，咁公司市值要跌到負數？唔會的嘛。你諗真啲，就會明白，估值係基於未來咁多年嘅盈利（自己抄低呢句了）

33. 不過，個股嘅盈利，真係可以大上大落。分分鐘一個浪打埋嚟，成間公司執笠都唔出奇

34. 所以，如果想簡單啲，睇指數！你估都估到，經濟衰退都好，個別公司可能盈利跌九成，甚至變蝕錢。但，唔會成個指數都係咁！因為總有啲公司冇乜影響，甚至有啲公司逆市有增長。

35. 拉勻晒，你會見到，指數嘅盈利，即使係「衰退」，都唔會插水八九成的（2009年就真係百年一遇了）

36. 順帶一提，呢個網亦都好好用，你可以睇到標普指數每年嘅盈利，但當然用起上嚟要小心啲，得閒再解。

37. 你睇標普指數啲估值，都真係有個譜。特別如果你用「預期盈利」去睇，又或者至少你睇T12的話，嚟嚟去去都係咁上下嘅區間。冇話貴不能再貴，但太貴買當然易中伏