Tesla Nvidia 反彈，美團8連跌，LVMH 再創新高，高盛大摩業績，抽新股 (Patreon)

港股美股回返啲，又係咪「等調整買」？

LVMH 4000億市值，再創新高。大過Tesla．仲有人嚟投訴話冇畀冧把

Tesla 「壞消息」照升，可以睇返啲大型科技股

講騰訊阿里巴巴又話升咗嘅，亦可以睇下落後嘅中資科技股

大摩好勁，高盛好雞　—　其實講「行業前景」，有乜意思？

抽新股嘅嘢

你幾耐冇抽新股？對上抽嘅一隻新股，係邊隻？

順手資源共享，睇新股，睇邊度？

抽新股，唔係要「睇招股書」，唔好扮啦

講解抽新股到底睇乜

咩人先適合抽新股？窮人！（即係我）

講埋而家玩新股嘅方法

港股美股回返啲，又係咪「等調整買」？

1. 完稿時星期三朝早，在韓國。市況方面，唔算太特別。港股美股都係，回返些少。但總唔會每日不停咁升（亦唔見得係好事），之前想話等回少少買嘅，又睇下係咪真係會買

2. 一兩日嘅弱勢冇乜值得講，都係嗰幾味，美元略為回穩，人民幣弱返啲，美債債息升返少少。一兩日嘅走勢，實在唔使太特別解讀

LVMH 4000億市值，再創新高。大過Tesla．仲有人嚟投訴話冇畀冧把

3. 另一方面，你亦見到LVMH再創新高，居然仲有讀者要投訴話冇畀冧把，我都唔知想點。

Tesla 「壞消息」照升，可以睇返啲大型科技股

4. 比較值得留意嘅係，普遍科技股都比較強，特別係美股。唔止一次見到道指跌但納指升。你見Tesla開始回穩返（雖然不停有「壞消息」，例如話減價，但早早都講呢啲消息去到你都知，往往反映咗大半），Nvidia低位升返五六成了（只係今年都升咗23%）。都同之前講可以睇返啲大型科技股嘅講法吻合。

亦可以睇下落後嘅中資科技股

5. 港股你亦見到，科技股相對地都強，但之前騰訊阿里巴巴已經升咗一浸好多嘅，抖下氣。唔想買騰訊阿里巴巴嘅（其實我都唔明做乜會唔想買，低位升咗成個開）。可以留意隻美團3690，8連跌，可能係因為騰訊派美團，亦有話因為怕滴滴都做埋外賣仔。前者就同公司基本完全無關，後者就好難判斷。

6. 但我自己就普通，應該唔會買，只係費事有啲讀者不停話講嚟講去都係嗰啲（實情，好股幾隻就夠，何況我個名單都已經好多股票）。長期嚟講，外賣平台相當難賺錢，所以只能搏短期反彈。

大摩好勁，高盛好雞　—　其實講「行業前景」，有乜意思？

7. 至於美股業績方面，兩間投行出咗，都真係一天一地。你見摩根士丹利就做得好好，高盛就不太好。股價亦係一間大升一間大跌。所以我都唔係好明講「行業」好唔好景有乜意思？

8. （其實係有嘅，但至少你講幾個月甚至一年半年，你睇幾日或者炒業績就嘥氣了，因為好多「行業」嘅嘢都在分析員估嘅數字反映咗）

抽新股嘅嘢

9. 趁市況靜啲，我又外遊（但唔會甩稿！），可以講下啲「細主題」。

10. 問下大家，「你幾耐冇抽新股？」「你對上抽嘅新股係邊隻？」。我估絶大多數人，至少兩年都冇抽過新股，包括我。你對上嘅一隻，好可能係撻咗Q嘅螞蟻集團（我都係）。

你幾耐冇抽新股？對上抽嘅一隻新股，係邊隻？

11. 點解無啦啦講新股？唔係因為螞蟻，未有耐，照計2023年都唔會上得返。而係近期見到有個別新股，表現幾好

順手資源共享，睇新股，睇邊度？

12. 我指第一日啦，大家都係睇一日，頂多兩日，新股嘅嘢，多數都垃圾，只能睇一日。順手資源共享，你睇表現嘅，aastock嘅表不錯。

13. 先講結論：錢多又身痕嘅，而家呢啲位，係可以諗下抽新股的。然後同你講下，抽新股大約係咩回事，又或者，「唔係咩一回事」。

抽新股，唔係要「睇招股書」，唔好扮啦

14. 你見有啲人會同你講，「要做功課」「睇招股書」。答案係：Yes and No．對於KOL呃like，當然好有幫助，最好搵到個CEO以前在邊度種田，或者個CFO在香港住邊（以前見過有件住嘉湖山莊）。對於金融從業員，或者想學多啲嘢嘅人，當然都係有幫助。

15. 不過，你去決定抽邊隻，抽唔抽，抽幾多—咁樣睇招股書嘅作用，近乎係零。我講真的。話你知要「做功課」嘅，唔係黑心，但亦只係太天真。只係聽落好聽，實際上冇用，同你考試前拜神差不多。

16. 點解？首先，in general，「睇年報」對你投資係冇乜用嘅。30年前可能有，而家咩年代啦？個個搵幾千蚊人仔嘅大陸尊尼亞都識，普通一個印度仔都識。人人都知嘅嘢，近乎冇意義。

17. 更何況，大佬，十個抽新股，十一個都係第一日沽架啦，「你渣到過10點鐘已經係長線投資者」。亦都好多係用孖展，基本上一定要第一日沽（留意，以前我講過唔好借錢買股票，但可能抽新股係例外，雖然我都唔算十分主張，但當然我都試過唔止一次。絶對係贏多輸少　—　不過，好似輸一次就輸得甘）

18. 咁你只係炒幾十分鐘，講乜鬼基本因素睇乜鬼年報扮認真丫。

19. 大家要明白，新股係一個極之咁有「周期性」嘅玩意。個周期同成個股市會有啲關係，但唔係完全重疊。

20. 即係點？講白啲，就一定係有一排好靜（過去兩年），完全冇人抽，唔足額，只係靠國際配售（基金佬）同自己友搭夠，仲要可能好多都潛水。但然後，就會進入一個開始有啲嘢有得升嘅階段（而家應該就係！）。之後，就係你估到嗰啲，隻隻都升，開始多人留意，報紙出攻略，同事飲茶都會講。最後就當然係爆煲期，有幾隻嘢，人人輸錢，然後玩完。

講解抽新股到底睇乜

21. 點解有咁嘅周期？首先，就同股市大圍走勢一樣，理論上新股就只係「供求」。但實際上，你個市日日跌1000點（好似舊年10月咁），你啲新股好難發圍。相反亦係，個市日日升，啲垃圾新股都有人買。

22. 當中亦同估值有關，留意新股絶大多數都涉及「定價」，就係投資銀行定。以前都寫過，在間公司嘅立場，就梗係永遠都上限最好，我錢收晒，隻嘢上市插水關我鬼事。但投行就平衡各方嘅利益，會勸公司leave some money on table，畀啲錢人地賺咁。

23. 咁而呢啲定價，都係同大圍嘅估值有關。市唔掂嘅，定得平啲。市好好嘅，定到貴一貴。所以一定係市比較殘嗰時抵玩。

24. 咁然後就亦都衍生去到另一種現象：到隻隻都升嗰時，就成堆人仆去抽。個個抽盡孖展，咁你發現就會好難抽得中，借到「頭槌飛」先分得少少—然後就係音樂椅，在狂喜中爆煲。就會去到一啲位，有隻嘢大熱倒灶，穿底，或者上上下市外圍出啲好大嘅壞消息（打仗，雷曼爆煲之類）。但最衰嘅就係：去到嗰啲位，你就會分得好多，因為啲「大戶」縮晒飛，你分到成手都係，仲要孖展。

咩人先適合抽新股？窮人！（即係我）

25. 個遊戲大約係咁。睇完你應該同意，根本同你抽邊隻，甚至咩「招股書」，係冇乜關係嘅。最重要就真係「時機」。睇下自己在個周期嘅咩位。而我相信，而家係「死水一片開始有起色」嘅位，應該係相當好嘅位。

26. 不過，整體嚟講，我都係唔太建議人抽新股。我反而話你知咩人最啱抽新股。就係新手，同埋學生。總之就係冇乜錢嘅人。我以前抽得最多都係嗰個年代，拎一萬出去，一個星期搏幾千，其實幾好。真係好大鑊嘅，其實都係輸錢千蚊啫，係接受到的

27. 但即係埃汾啲讀者咁富貴，當然多幾千蚊都係好，但你未必值得咁去勞心勞力。特別係，都話去到後期，你發現分配率好低—於是好多人受誘惑，借大大孖展去抽，人人都咁做，就軍備競賽，益咗券商（真係無本生利咁滯）。但如果隻嘢大跌，你又分到好多，係可以幾大件事的。輸你幾十萬，絶對唔奇

講埋而家玩新股嘅方法

28. 所以我反而建議嘅做法，就係即使你有錢，都好似冇咁錢咁玩！即係點？即係，依然係唔好做孖展，咪照舊隻隻去抽下，幾千幾千。係可能中簽好低，但唔中咪算，中嘅可能執一千幾百，輸亦係一千幾百，當幫補下食飯錢咁—冇錯，好似抽iBond咁（但當然新股風險高好多，iBond理論上唔會輸錢）

29. 況且，而家息貴咗，做孖展成本高以前好多。雖然你亦可以話，人人都有呢個問題，變相亦都少咗人同你爭嘅。

30. 至於抽邊隻，就真係冇乜咩準則。真係case by case，都話你炒嗰幾十分鐘，擺明係賭博。雖然呢，要嘅都可以有路捉嘅。以往都有啲嘢見到，例如太大隻嗰啲，多數唔會升得太多。又或者睇保薦人往績，都勉強有啲路捉到嘅，有機會再講