星期四美國債務上限，傾唔掂就違約，驚唔驚？之前冇咗AAA評級都試過，當時市場點？美斯股潛水的教訓。VIX 30仆入去。係咪有用？免費資源共享：講估值 (Patreon)

又話金融危機了，星期四美國到債務上限。

以前次次都傾掂，「但今次會唔會黑天鵝違約？」

扯，2011年美國畀人搣走AAA評級都係咁啦。估下當時債息升幾多？

當時道指跌7%（即係而家嘅2000點），但，之後呢？

美斯股嘅嘢，叫咗唔好買架啦

係呀，開7蚊見過16蚊，但大多數位買都輸錢　—　其實好多嘢都一樣

VIX 30時仆入去，係咪真係掂？

人地啲webcast，又免費又講得好。不過你就只係想2個星期賺10倍

1. 美股放假冇市，港股又靜啲，可以講下其他東西。

又話金融危機了，星期四美國到債務上限。

2. 唔知有冇人會留意，幾年一度嘅鬧劇又再上演。又係講美國嘅債務上限，分分鐘星期四到死線，要國會批准調高，否則就政府停擺。當然又係政客玩嘢嘅時間，咁多年反對黨都係咁玩，玩到最尾又會傾得掂。以往試過玩到政府暫時停擺，啲公園博物館閂門都試過。

以前次次都傾掂，「但今次會唔會黑天鵝違約？」

3. 理論上呢，如果一路唔批，就會連美債還息（或者本）都還唔到，會被視為「違約」。實際上「違約」會發生咩事，就唔知了，可以買定花生（但99.9%都唔會）但你可以想像到都會幾混亂。

4. 咁固然之前從來冇試過違約，咁但，你的確可以話，難保唔會有一次玩出火。呢個可能都真係存在的，至少短期應該大機會過你講港紙變廢紙。

5. 反正一路都話美股唔平，近排又有啲反彈，即使到時唔係違約，但一拖再拖，唔排除市場都會幾波動。反正冇人會話你知，市場「因為」乜跌

6. 但你齋拗，梗係可以講「乜都有可能」「你點保證唔會」「羅素雞」（之前有個讀者講），但實際上，唔好自欺欺人，唔通我就因為「有咁嘅可能」，就永世唔投資？佢耐唔耐就嚟一次架喎，咁你點？正如你話今年有機會衰退，有機會金融危機—年年都有機會架啦。咁點？年年沽空？

7. 況且，無數咁多次嘅經驗都畀你睇到，但凡呢啲乜鬼「危機」，就係最值得買之時。一次係咁，兩次係咁，但你發現每次你地都係唔信的（你睇舊年10月啲港股？）。正常，因為係人性，如果人人都克服到就唔會有機會，所以更加要克服。你去做克服到嗰個。

扯，2011年美國畀人搣走AAA評級都係咁啦。估下當時債息升幾多？

8. 順手睇啲歷史，違約就未試過，不過有一次都有啲近磅。2011年美國就試過失去咗AAA評級，史上第一次。如果你身處嗰一劇，你都會覺得係「金融危機」，特別當時係金融海嘯後三年，都仲好多人話「未解決個根本問題」（2023年都仲係有人咁講！），仲係有人話「美國亂印錢大家對央行冇信心」

9. 更詳細嘅睇英文版維基。呢件事我好深刻，因為唔知點解我睇住件事發生，嗰晚夜晚十點幾十一點仲在公司（但同呢件事本身無關）。

當時道指跌7%（即係而家嘅2000點），但，之後呢？

10. 最有趣嘅係，估下市場點反應？股市一度都跌成5-7%，幾誇張，等於而家道指一日跌2000點。咁但，好快都收復一半失地，然後基本上兩日後已經冇人再討論。

11. 更更有趣嘅係：明明係下調美債評級，咁有啲人以為即係美債畀人掟啦，融資成本升啦，債息升咯，美金玩完咯。

12. 完全錯晒！結果，美金當然係升，而美債亦都係獲追捧，債息急跌！

13. 原因？相信呢度嘅讀者都估到，有乜依郁，大家驚，係都係買美金買美債的！唔通買英鎊人民幣咩。

14. 所以，又係嗰啲教訓。唔好直線思維，你見網上十個有十個都係咁，哦下調評級即係融資成本升即係債息升，全錯。另外，史無前例嘅大事，兩日就冇人講了。你諗真啲，所謂「信貸評級」，只係一種「意見」。只能suggest a price, not enforce a price．

15. 即係，我當美國真係還唔到息，要違約。最後又會點？冇錯金融市場大混亂，但，你未見過金融市場大混亂咩？「分分鐘提早減息添呀」。

美斯股嘅嘢，叫咗唔好買架啦

16. 星期五講過隻美斯股，就當然係潛水的。講明叫你唔好買架啦。咁做乜仲要講？首先，都話畀多個選擇你，你未必信我嘛，我亦未必啱。

17. 另外，亦係當反面教材：故事實可以講架，幾億港紙市值細細粒容易食，有名人效應，容乜易炒上！但，買呢啲股，多多唔夠你輸。

係呀，開7蚊見過16蚊，但大多數位買都輸錢　—　其實好多嘢都一樣

18. 留意，一開已經係7蚊，早段見過16蚊添—但，其實絶大多數位買，你都係輸錢收場。我諗呢點係好重要嘅：再好嘅股票（或者股市）都有人輸錢，再廢嘅都有人可以贏錢。問題係兩個：第一，有幾高難度？呢個「窗口」有幾大？亦即係問，多數位買都贏，定掉轉？

19. 咁你睇美股，呢刻啲人話唔好，啲人話返返去2021年水平—但其實即係話，任何位買你都贏錢，除咗呢兩年，根本容易到不能。你就係要搵啲咁嘅嘢！然後大大力買落去！

20. 同樣道理，你見好多咩meme股ARKK之類，多數位買，你都係輸錢嘅。

21. 至於第二個問題，就係「money weighted」，雖然呢個數字難搵。即係乜？即係你睇Bitcoin，係架，之前買嗰啲理論上都仲贏好多錢。但有幾多錢有幾多人係十年前買？絶絶大多數人，都係頂位飛入去嘛。

22. 順帶一提，今年明顯你見到風險胃納彈返好多。VIX已經去到大半年低位。近期啲網紅股meme股都翻生，但最好唔好沾手。以往嘅教訓仲未夠？贏埋唔夠你輸的。唔好睇啲咩邊個扑中一隻買30萬變300萬。首先，可信性存疑。另外，有幾多個咁嘅人？其他輸晒嘅你又唔睇？第三，都講過，除非你買完可以退休或者轉做買幾十個單位收租食到死（300萬一定唔夠），否則你再玩落去，都係保證會輸晒出嚟。更大問題係，畀你咁樣贏錢後，你必定覺得自己係股神，唔會就咁收手，然後就係嘔返晒出嚟。

23. 我越大越信冤枉來瘟疫去呢樣嘢，唔係迷信，唔係報應，係個心態。

VIX 30時仆入去，係咪真係掂？

24. 話時話，之前有人問點量度「市場有幾驚」，我講過個rule of thumb，以前都驗證過，大約VIX 30嗰時飛入去，回報會幾好。你睇今次見到亦係咁。但兩個重點，首先，當然唔會萬試萬靈，你可以舉好多例子失靈。因為冇包生仔，否則你同我都發咗達。第二，都一定要係有返些少耐性，3個月，甚至大半年先見到。唔好諗住VIX30 仆入去，一個星期就反彈，亦唔好奇怪買完仲要輸錢。投資可以好簡單又好可以好難，視乎你乜心態。

資源共享：估值嘅嘢

25. 不斷有人問估值，係好事嚟嘅。不幸地，只能夠偶然講下。原因好簡單：要詳細講估值，實在冇可能，我亦保證你唔會有興趣慢慢聽，因為可以講幾十年。

26. 我可以做嘅只係得閒講下，你慢慢去領悟。點解係領悟？因為係藝術。其實成個股市都係七分藝術三分科學

27. 可以好肯定嘅話你知，估值唔係一種「科學」，頂多只係一個range，畀你有個譜咁。以前都寫過，估值by definition 只係估估下。點解？因為一個交易，總有人買總有人賣，買嘅即係睇好，賣嘅即係睇淡。咁如果大家同一個估值，根本唔會有呢回事。

28. 最簡單，你可以應用「別人恐懼時我貪婪」。我都話金句系列好有用，嗰時仲好多人柴台，真係好心著雷劈。

29. 樓上講VIX嘅例子就係一個應用（但VIX睇情緒，唔係估值，雖然差不多係同一回事，情緒亢奮時估值實貴）

30. 好啦，真係想學嘅（我再次懷疑，有幾多人想？），可以買書，可以去讀CFA，可以大學去讀Finance。不過，想平靚正嘅，我又畀啲資源共享你（但當然要花時間了，唔好平靚正仲問我有冇速成班）

人地啲webcast，又免費又講得好。不過你就只係想2個星期賺10倍

31. 上面提到，估值可以講幾十年。唔信？呢條友在紐約大學教成世，就只係做呢樣嘢，出咗好多書好多文，以前我都提過佢，「估值教父」。網站好多嘢睇，多到根本冇可能睇得晒。佢仲有教啲Finance, Stat, Account嘅BB班，全部都解得好好，免費webcast免費Powerpoint。

32. 我手痕去睇返，都忍唔住又睇咗陣，不得不能呢條友真係痴線的。又勁，又解得清楚，又勤力！仲免費！

33. 同樣地話你知，你地（同我）絶大多數人大學上嘅堂，真係浪費時間。教嗰個會唔會好得過呢條友？近乎冇可能。人地仲要勤力過你同我（同埋教你嗰班廢柴）N倍。

34. 至於連呢啲都唔識嘅廢柴網上KOL，更加係睇少啲為妙。

35. 順帶一提，佢兩三年前已經講Tesla Netflix之類嘅估值貴到癲，當然又畀啲網友恥笑。「教紐約大學好叻咩？」

36. 不過認真，如果係有時間嘅，真係睇佢啲Webcast，特別係學生哥。但就唔好諗住人地會教你點樣3個星期賺10倍了。

37. 睇邊啲？全部都好睇。我嘅rule of thumb，睇到你完全睇唔明為止。

38. 又，當然係英文的，冇字幕，但佢啲英文已經好易聽。我估我啲讀者水平係高嘅，但如果有讀者覺得聽唔明佢嘅英文，咁畀個真心忠告你：學好你嘅英文吧，對你所有嘢都有幫助，帶嚟嘅得益會大過你日日去諗買乜股票。英文唔得唔係一個問題，最緊要認，唔好自欺欺人。