美國銀行股業績，BlackRock業績，大陸拎騰訊阿里巴巴「黃金股　」，Miniso市值大過無印良品 (Patreon)

美股業績期：資源共享

美國銀行股：利息收入升，但撥備大升，投行收入大縮。

美國銀行股：業績一半半，但點解全部都倒升？

BlackRock：股市又死債市又死，流失晒啲客未？

AUM「得返」8.6萬億美金，定係「仲有」8.6萬億美金？

可以留意埋，BlackRock股價幾時見頂？有啟示的

美股跑輸，但都連升兩星期，納指更強，可以留意

港股連升4星期，2300點。火車頭居然係匯控。明明經濟仆街

然後講下，大陸政府入股騰訊阿里巴巴「黃金股」

「黃金股」係乜東東？即係動物農莊，使橫手

「黃金股」就當然唔係中國發明，但外國又有其他玩法

實際上拎咗「黃金股」會點？唔知。「但股價唔呃人」

Bonus：點解係拎「本土子公司」嘅「黃金股」？唔係拎騰訊阿里巴巴？

節目預告：Miniso 市值仲大過無印，玩乜？不過，總之唔好買

1. 實在非常多嘢寫，唔知邊度寫起。講咗啲有時間性嘅先，最緊要講咗市。

美股業績期：資源共享

2. 美股方面，首先留意返星期一放假。另外，都唔記得同大家講，上星期五已經進入業績期。打頭陣嘅依然係一堆銀行。花旗C，摩根大通JPM，富國WFC同美銀BAC全部都出咗。詳細你可以慢慢睇，我就已經貼埋link。我就只係有JP Morgan一隻，佢業績勝預期，美銀都係勝預期，花旗一半半，富國就肯定差過預期。

美國銀行股：利息收入升，但撥備大升，投行收入大縮。

3. 但重點係乜？全部都升。仲要係先跌後升，可以好多演繹，但見到市底不錯，業績差嘅都唔會大插，甚至有得升。當然銀行股向來唔會好似啲科技股咁貴，亦都極少一日跌兩三成咁。

美國銀行股：業績一半半，但點解全部都倒升？

4. 至於你睇業績細節，可以話你知，間間都係咁上下嗰啲嘢：債息升當然對銀行有利（都話銀行食息差），但舊年咁嘅市況，投行收入當然唔好。仲有，幾間銀行都大幅撥備，有啲係損失，有啲亦係對今年嘅情況「提早做定」。

5. 順手講埋，你見其實間間都係呢啲嘢，但出嚟業績都可以好唔同。所以同樣地，有時你講「行業」，都真係有啲多餘。行業趨勢大家都係咁，但做出嚟係有唔同的。當然亦因為大家業務重點唔係完全一樣，例如富國就冇乜做投行，而做好多按揭的。

6. 嚟緊當然仲有唔少業績。同新讀者資源共享下，睇呢個網就比較好，最重要係可以跟市值去sort，唔會走甩啲大公司。星期二有大摩同高盛（仲有IB！），星期四有P&G同NetFlix，

BlackRock：股市又死債市又死，流失晒啲客未？

7. 另外，BlackRock亦都出咗業績，呢隻係我有嘅嘢。業績睇呢度。以前有個Excel，未得閒update，我attach埋上嚟，你得閒嘅自己玩。

8. 睇返業績，公司就只係代客管理，從中抽水，例如做啲ETF咁，收你少少管理費。但以前都講過，個AUM（Asset Under Management）極大，所以都好係嘢。高峰時AUM，10萬億（10 Trillion）美金，正係2021年尾。咁去到2022年尾（即係今次業績），當然係大跌，但都仲有8.6萬億（第三季末係8萬億）。

AUM「得返」8.6萬億美金，定係「仲有」8.6萬億美金？

9. 留意下，AUM升跌有兩個要素，首先係本身啲嘢升跌，另外就係啲錢有冇出入。咁你整體見到，啲錢都係入嚟嘅。你好粗略咁計，10萬億跌到8.6萬億，跌14% —　舊年股市債市邊止咁跌少？

10. 最後可以幫你快手望下估值，舊年純利，52億左右，市值就1130億。大約22倍市盈率，即係平定貴？都唔係咁易答，普普通通。

11. 但你可以留意嘅係，而家股價750蚊，但2021年見過近1000蚊，而舊年試過跌到500蚊。剛好就跌50%，又反彈50%，「但當然跌五成後升五成唔係回家」。咁你想像下，1000蚊時，真係近30倍市盈率，就肯定唔平。（當然難搞嘅係，其實去到500蚊，都十幾倍，有啲人都唔覺得叫「平」）

12. 另一樣嘢你可以留意：股價幾時見頂？2021年11月嘛。留意，正係當時，個AUM去到10萬億！所以你諗真啲，其實「好消息」，真係未必應該買。

可以留意埋，BlackRock股價幾時見頂？有啟示的

13. 留意AUM跌14%，但整體你見收入，亦都只係跌8%，成個業績算係好過預期嘅。股價都先跌後反彈。我就550蚊買的（再之前，唔記得2019定2020），所以當然仲賺緊。你見都有潛過水，但我先冇走去「止蝕」。

14. 你望返個圖，都見到大多數位買，你都係有錢贏嘅。就係有一段短時間買你會輸錢，偏偏好多人係嗰時買。

美股跑輸，但都連升兩星期，納指更強，可以留意

15. 咁在呢啲公司嘅帶領下，美股亦由跌轉升，近排都唔止一次。雖然話美股好似略為落後，但新年都係連升兩星期，上星期道指升2%，標普指數升3%，納指升5%，11月以嚟最好嘅一星期—留意之前已經講可以睇返啲科技股（至少係有錢賺嗰啲），原因主要都係債息落。

16. 留意上星期四晚嘅CPI數字出咗後，咪話市場預2月1日90%會加0.25（其實即係肯定了），暫時都冇見聯儲局有乜嘢講，似乎就已成定局。正路地呢次會唔會太多嘢講，3月就可能見真章，因為又有經濟預測同點陣點出。

港股連升4星期，2300點。火車頭居然係匯控。明明經濟仆街

17. 至於港股方面，抖下又上，話冇力但又上到。連升四星期，2300點。都話低位升咗7000點，近50%。匯控係一大火車頭，估唔到呢？

18. 持別可以留意嘅係，再早兩日咪見啲科技股冇力嘅？亦都見大市高位回。但你見抖一抖，又再上過。暫時我都仲覺得啲大型科技股OK，如果你唔想買騰訊阿里巴巴嘅，咪買啲科指ETF（再講一次，唔好買槓杆ETF）

19. 整體我對科技股，特別係大型公司，睇法就正面咗好多。首先最大原因當然係美國債息跌，相信仲有得跌。呢啲對估值好大幫助，特別係科技股。但呢個因素對中美科技股（甚至係所有貴估值嘅嘢）都係正面嘅。

然後講下，大陸政府入股騰訊阿里巴巴「黃金股」

20. 然後仲有啲因素，就係中資特有。首先可以留意下，人民銀行講到明14間平台已經完成整改。當然係好事，有問題就改，有得畀你改即係有得傾。你要明白以大陸嘅國情，成間嘢要你摺埋都得，亦唔係未試過。安邦之類真係差不多成間摺咗，海航恒大都摺咗大半。教育股直頭差不多成個行業同你冚檔。

21. 另一壇嘢，當然係「黃金股」。話政府會持有阿里巴巴同騰訊旗下本土公司（留意，係旗下嘅本土公司）嘅「金股」。

「黃金股」係乜東東？即係動物農莊，使橫手

22. 「金股」是甚麼東西？就係所有股票平等，「不過有啲股票更加平等」。廣義嚟講，亦都係一種同股不同權，不過往往權力更加大。原則上，就係override平時我地講嘅「同股同權」。理論上，設計到佢渣1股，但可以否決晒所有嘢都得。就係使橫手咯。

23. 金股呢啲東西，當然唔係中國發明，鬼佬古已有之。其實變相就係政府干預（反正可以象徵式只係畀一蚊）。例如港交所，一路都有類似「金股」東西，政府可以提名啲董事。

「黃金股」就當然唔係中國發明，但外國又有其他玩法

24. 講歷史啦喎，首先係好多國有企業私有化（留意「私有化」可以有兩個相反嘅意思，對國有企業嚟講，即係上市。但對上市公司嚟講，即係退市！），過程中就會有呢啲嘢，港交所都係類似嘅例子，地鐵都有些少，領展都係有的（之前咪話拆售晒商場但唔成功），並唔係完全任你點玩都得。

25. 一般嚟講，一啲所謂「戰略行業」，就有呢啲限制。交易所好可能係，鐵路，發電廠都可能會。當然，更加多亦係歷史遺留嘅問題，你睇英文維基見到，例如福士車廠，都有州政府嘅「黃金股」，西班牙政府更加係乜都叉一手。不過又要講，在鬼佬地方，呢啲就有機會畀人上法庭挑戰嘅。另外，人地啲黃金股，多數係上市嗰時已經有，作為一個條件。咁中國玩到上咗市咁多年先忽然要拎，當然又係國情不同。

26. 實際上會點玩法？真係唔知，由於「黃金股」即係使橫手，可以拎到嘅權力好多。但合理猜測，反而最主要唔係分錢（要錢就簡單啦），主要真係插條友入去董事局，你話監視住你又好，乜都好，總之唔畀你亂咁嚟，有乜都要知，唔好動搖阿公嘅利益。大約係咁玩。

實際上拎咗「黃金股」會點？唔知。「但股價唔呃人」

27. 理論講完一大輪，實際即係點？當然都係利好。再講一次，有得傾有得拆就係好消息。否則嘅，要成間摺咗你都仲得。當然去到阿里巴巴同騰訊呢啲，似乎真係「大得不能倒」，要小心啲處理，一唔小心就社會不穩啦。

28. 況且，都講過多次，唔好太執著於咩「好消息」「壞消息」。都要睇情況，睇估值。換著隻騰訊700蚊時，爆呢啲新聞，就肯定畀人覺得畀人整治，股價實散。但去到而家，又另一回事咯，有得活命就好消息啦。

29. 證據？你睇啲中概股，都係狂升的。

30. 你見整體，真係吹暖風了，短期內都係對企業，特別係科企，會友善啲。但有個講法話，經濟真係差，發現之前玩過籠，要放返。我都係信呢個講法嘅，咪同你講過，「一放就亂　一亂就收　一收就死　一死就放」，又係咁玩過。

Bonus：點解係拎「本土子公司」嘅「黃金股」？唔係拎騰訊阿里巴巴？

31. 又，如果你好學又聰明又有好奇心，聽到啲報導講，黃金股係拎「本土子公司」。你就會諗，做乜咁奇怪？做乜唔係入股間上市公司？咁咪冇錢分？

32. 原因？都冇人講過，我都係估估下。但首先，都話分錢唔係重點。第二，我估好可能因為啲公司在香港上市，Technically 係「開曼群島註冊公司」。我懷疑係驚呢啲拎黃金股嘅過程，會遇上法律挑戰。「咁在大陸嘅子公司就冇呢啲問題啦」。我估咋下，可能永遠冇答案

節目預告：Miniso 市值仲大過無印，玩乜？不過，總之唔好買

33. 話時話，在Facebook 寫咗呢堆Miniso，市值大過無印良品。其實一早已經大過，但之前插水，冇諗過又翻身。過幾日先詳細寫，不過真係純學術討論，千萬唔好買。

34. 講定個重點畀你，公司係有錢賺，但無印賺嘅錢更多，但點解反而Miniso市值大啲？因為，估值！去到咁嘅估值，就咪玩啦。大把其他公司買。