美國通脹。友邦5連跌反彈。港股仲有乜落後股？台積電。美斯股 (Patreon)

美國通脹連跌6個月，去到1年低位，仲唔「確認」？

不過，仲係有少少隱憂，點解？

Wells Fargo估今年通脹跌到2.2%，真唔真？

通脹見咗頂，但會唔會再反彈？

2月加息0.25已無懸念，幾個月前已講咗會放慢。但，會加到幾時停？

債息跌到3厘半，明明又話聯儲局加息加到5厘6厘

美匯跌到9個月低位，明明又話聯儲局仲加緊息

但，美股做乜一度倒跌？

LVMH愛馬士又歷史新高添，我費事再重覆。

畀你估到通脹落，加息慢，美金落　—但估唔估到美股跑輸港股？

港股連升兩日，友邦撐市。但之前5連跌喎，點解？

可以留意下啲落後股

維他奶345 都 52星期新高了

快手講下台積電業績。好定唔好？任你講。

之前夠話晶片荒，話咁快又一個屈尾十話行業寒冬。你係工程師又點？

不過，我10月已經講可以買台積電，早過畢菲特。而早幾日先再講過

最後，美斯股今晚美國上市。實有得炒架，波都個個星期有得買啦

美國通脹連跌6個月，去到1年低位，仲唔「確認」？

1. 首先第一樣要講嘅，當然係通脹數據。簡單講，好，但唔係冇隱憂。或者應該話，都反映咗唔少利好。

2. 先講數字，你可以睇呢度。早兩日篇文講過，只睇一個數字，就睇物價嘅按月走勢，即係Headline CPI month on month．咁你見到，上次係升0.1%，街估係持平，而真實出嘅數係跌0.1%。夠晒靚仔啦

3. 睇按年嘅，Headline CPI，按年升6.5%，同街估嘅一樣，上次係7.1%。扣除食物同能源嘅核心CPI，按年升5.7%，亦係同預期一樣，上次係6%。

4. 留意個Headline CPI（一般人講嘅「通脹」），已經回落到12個月新低，亦都連跌6個月。

不過，仲係有少少隱憂，點解？

5. 不過呢，仲有少少隱憂嘅。留意，雖然headline CPI按月都跌，但核心CPI，按月反而係升0.3%，仲要係高過上個月。亦即係，按月跌嘅物價，主要係食品同能源。但，近期都見到啲油價低位反彈返，係有可能之後會反映在CPI。

Wells Fargo估今年通脹跌到2.2%，真唔真？

6. 仲有，以前都寫過基數效應，所以你見到核心物價按月升，但核心CPI嘅升幅放慢。不過，呢啲效應又係慢慢會消失。雖然有啲行估今年會跌到2.2%，過兩日得閒同你分析下。

通脹見咗頂，但會唔會再反彈？

7. 詳細可能過兩日再講，要啲時間消化。短期個通脹肯定見咗頂（半年前咁講），但你話會唔會低位反彈，就真係未必講得埋。

2月加息0.25已無懸念，幾個月前已講咗會放慢。但，會加到幾時停？

8. 好啦，帶到去市場反應。首先，利率期貨，通脹數字一出，2月1號嗰次議息加0.25嘅機會，去到九成以上。收得工。

9. 但係咪代表市場好滿意？就一半半。之前都講過，係放慢咗加息嘅力度，應該之後一路都0.25—但可以加好多次喎。聽日同你睇睇，但個terminal rate，係有可能再上嘅。我會話，呢個月嘅數字（例如核心物價按月仲升緊0.3%），肯定並未令聯儲局覺得差不多夠皮。

債息跌到3厘半，明明又話聯儲局加息加到5厘6厘

10. 債市同美匯，就相當靚仔。10年債息又去返3.5厘左右嘅水平，差不多3個月低位，睇下會唔會跌穿12月嘅低位

美匯跌到9個月低位，明明又話聯儲局仲加緊息

11. 至於美匯，更加係一早弱勢，去到差不多9個月最低。咁而無獨有偶，你見到歐元差不多升到9個月新高。日圓都大反彈（之前同你講咗易升難跌架啦）

12. 不厭其煩講多次，資產走勢，行在事實之前。以前都寫過，債息美匯之類，行早半年至一年不等。唔使等你減息，甚至唔使等你停加息。

但，美股做乜一度倒跌？

13. 然後睇股市反應，收咗市你當然見到升。LVMH愛馬士又歷史新高添，我費事再重覆。不過你可以睇下，中途一度倒跌。點解？當時媒體就話「因為降溫未似預期」。但喂，明明啲數字同預期差不多一樣喎。即係講乜？即係，可能係「某啲人」預期更低，佢預期會低過預期　—　你估到了，都真係任佢講，narrative嘅嘢。媒體報導就係會咁，所以自己要思考下。你見，到即市反彈返，又有呢一個講法了。

LVMH愛馬士又歷史新高添，我費事再重覆。

14. 最後一講，我在Facebook有自吹自擂，但新讀者可以留意，我的確舊年7月已經在呢度講通脹見頂，剛好捉到個頂（都話之後連跌6個月），亦都有講炒減息。你見大約個劇本都係啱的，但你只能慢慢等。

畀你估到通脹落，加息慢，美金落，美債回　—但估唔估到美股跑輸港股？

15. 同埋，通脹落，債息落，美金回，都唔係太難估。但即使你估中晒都好，你都未必估到，係港股歐股，升得多過美股。個教訓係乜？就係，唔好以為啲嘢係咁直線發生。你估中頭九步，第十步都可以錯。所以，記得分散，否則我任你再叻估中晒啲事，都係有可能輸錢。當然仲有，估值十分重要。

港股連升兩日，友邦撐市。但之前5連跌喎，點解？

16. 可以快寫下港股，叫做連升兩日。但你可以話個勢麻麻地，唔多夠力。但留意呢啲唔係鐵律，可以唔夠力抖兩日忽然又彈幾日，只係畀你參考下。

17. 點解咁講？首先，你見到近兩日嘅升幅已經比較窄。最主要你見到，之前嘅火車頭，中資科技股，已經要跌，科指亦都要跌，騰訊阿里巴巴都回2%。但即係再跌，並唔係話你唔可以買，跌時唔買，唔通升晒先買？

18. 但你睇其他公司，又唔係太差。76隻恒指成份股，都有51隻升。

19. 星期四支持大市嘅，主要係友邦1299。特別留意，之前就5連跌。乜事？正係「開關」。再一次畀你見到，有時真係buy on rumors sell on facts，一定係啲嘢發生之前你買。發生咗之後你先買，就要捱五連跌了。雖然根本唔係咩問題，但總有啲人，見到開關，覺得友邦受惠，去買，然後五連跌，就問乜事。

可以留意下啲落後股

20. 而你睇其他嘅股票，亦都見到有啲「接力」嘅現象。升嘅係長實1113，長和1之類。仲有早排同友邦一樣，回咗幾日嘅開關股九倉同太古，又彈返上。

21. 甚至仲有大落後嘅領展823。而真係畀你見到，而家呢啲位，炒落後都似乎OK，因為啲落後嘅嘢都真係仲算平。

維他奶345 都 52星期新高了

22. 另外留意，維他奶345都不經不覺52星期新高。仲有以前提過嘅百勝中國9987（中國KFC兼Pizza Hut）同金源米業677，以前有睇呢兩隻，但我冇買的。

快手講下台積電業績。好定唔好？任你講。

23. 唔知之後有冇時間細睇，但值得快講嘅，係台積電。出咗業績兼指引。好定唔好？其實任你講，有啲話個業績好過預期（呢度都係），你睇台仔寫更加係超無敵。另一方面又話今年收入跌利潤縮，好似盈警咁滯。今季個指引又差。上個月收入又話低過預期。

24. 即係點？即係，都係唔係太好。至於你話講行業，得罪講句，更加係廢話。舊年早段先個個話晶片荒有排炒，半年唔夠就變到寒冬。我當你自己係半導體工程師都好，又係咪估到？正如俄烏開戰，人人話油價升糧價升。結果呢？

之前夠話晶片荒，話咁快又一個屈尾十話行業寒冬。你係工程師又點？

25. 不過，舊年10月，我都有寫過可以買台積電。「冇耐就畢菲特都跟我支笛」，仲有讀者有跟住買。見到冇？估值很重要。同樣地，我早兩日先講過可以睇返啲科技股，亦都有提台積電。

26. 咁而你見股價在美國都大升。講到尾，公司嘅核心技術有冇受挑戰？唔多覺。咁周期上上落落嘅嘢，有何奇怪？壞消息時唔買，好消息先去追？

不過，我10月已經講可以買台積電，早過畢菲特。而早幾日先再講過

27. 然後你亦大約可以計下，睇台積電嘅估值，都唔似點貴。你可以自己計，但應該係12倍左右，美股可能有啲唔同（向來有折讓同溢價）。

28. 咁可能會有讀者話，唔係喎，啲盈利會跌喎，咁你個估值咪會又貴咗？係！但，唔係因為有呢啲因素，又點會平？最重要係，作為技術領先嘅公司，照計啲盈利唔會長期走晒樣。

最後，美斯股今晚美國上市。實有得炒架，波都個個星期有得買啦

29. 唔係叫你買，但介紹下嘅，係球王美斯自己品牌間公司MGOL今晚會在美股上市。講真，就梗係唔好買，況且得嗰幾億港紙市值，不過，話題就十足，又夠細，擺明係meme股。而近期啲meme股都好似有翻生（迴光反照？）嘅跡象

30. 再講一次，絶對唔係叫你買。我只係話你知有啲咁嘅東西。不過如果大升，我都會在Facebook 講。