東南亞唔使檢測，泰國副總理去迎接大陸客。有乜受惠股？另外講東盟ETF。再講一隻未升嘅香港開關股。仲有睇埋美國星期四通脹 (Patreon)

東南亞唔使檢測，泰國副總理去機場迎接中國客。

咁有乜受惠股？

開關or not，東南亞都肯定大有作為

越南夠個個話好，舊年股市跌到趴街。香港夠個個話玩完，升7000點呀

除非你睇長線咯。咁同時間同你睇下東盟ETF

另外，醒隻未狂升嘅香港開關股畀你

咁未升嘅，當然冇咁靚仔啦。當然係「短期未受惠」

又要百二蚊，又要李嘉欣？升咗嘅話唔敢追，未升嘅又話有缺點。10月你唔買？

港股都7個月高位，咁落後嘅嘢，當然係未即時受惠啦，好心啦

大股東就大手增持過，仲要坐艇。應該係好事

最後，留意星期四晚美國通脹數據。

其實真係半年前話畀你知通脹回落了。等你啲網友個個都「確認」就蚊瞓

東南亞唔使檢測，泰國副總理去機場迎接中國客

1. Facebook 有貼咗段嘢，講東南亞受惠中國開關，泰國副總理直頭去機場迎賓。東南亞會受惠，都幾肯定，首先疫情前本身都係多大陸客（洗費平，語言，距離，文化，飲食）。另外，日本韓國或歐美有啲設限，但東南亞多數無任歡迎（當然背後有經濟考慮，亦有政治考慮）。

咁有乜受惠股？

2. 咁當然有人會問，買乜股？都有啲冧把諗到，但短答案係：可能都升晒啦。真係諗公司嘅，都比較細。最易可能都係航空公司，同埋機場，酒店。星航，泰國機場，Air Asia，曼谷航空，Central Plaza Hotel，全部上市（泰航股票好似半死狀態）。但首先你見全部都近一年新高。另外，亦唔好問我點先買到泰國或馬來西亞股（但新加坡股就在IB買到的，泰國啤酒股亦在新加坡上市）。

3. 頂多諗遠少少，諗埋新加坡嗰啲REIT，但已經好間接了。

4. 所以其實，sorry 潑冷水，都係得個桔，不能只係因為「開關」一樣嘢而買—況且你而家買亦都有啲遲。呢個亦係好多普通人嘅問題：想跟事件跟newsflow，但冇意識到一定係慢人好多，而股價多數都係未有newsflow已升

開關or not，東南亞都肯定大有作為

5. 但話說回頭，亦都好多人講，東南亞大有所為，我都同意，以前都寫過下。中國，美國（你可以話加埋日本嘅），印度，歐盟外，就係東盟。東盟人口多，年青，夠窮，大把增長。可以寫返幾萬字大國博奕。事實亦係左右逢源。

越南夠個個話好，舊年股市跌到趴街。香港夠個個話玩完，升7000點呀

6. 但當然，大家都知，唔係咁簡單，經濟好未必股市好。你睇越南舊年？經濟極好，股市跌到散晒。特別好多人，睇一年已經覺得叫「長線」，更加大鑊。甚至唔好講匯率嘅波動（同樣，渣得長就冇咁擔心）

7. 但如果你真係夠「長線」（三五七年嘅），照計就真係幾睇好，同之前寫過印度股市（自己搵舊文吧）嘅故事一樣。

除非你睇長線咯。咁同時間同你睇下東盟ETF

8. 咁，點買？個股肯定危險，甚至單一國家我都覺得難玩（你睇越南？）。所以又係返去ETF。

9. 詳情只能另文再詳講，但真係小心啲。例如我快手搵到嘅一隻東盟ETF（ASEA），就唔係十分過癮。你見啲top holdings，係乜？星展，Sing Tel，OCBC，UOB—應該同你心目中嘅「東盟概念」好唔同。但亦冇計，因為新加坡太富貴，啲公司大過其他東盟國家太多。「照計應該搵隻東盟走新加坡嘅ETF」，有機會再研究下。

10. 留意埋，佢十大其他，都好多係銀行，泰國馬來西亞印尼都有。最後，即係買晒啲大銀行。搵笨

11. 你見隻嘢，過去5年回報，都係麻麻地啫

另外，醒隻未狂升嘅香港開關股畀你

12. 好啦，可能你都覺得有啲冇癮。喂，隻隻都升晒。但，「係咁架喎」。不厭其煩講多幾次，之前叫你買又唔買？之前你覺得開關無期嘛，就係咁先有機會。到直頭有傳聞講日子，就已經升咗一大截。你仲要「確定」，等真係有大陸人嚟，就死得。

13. 咁有冇啲未升嘅？都有嘅。但當然就冇咁「靚仔」。再講一次，就梗係有啲缺憾先會未係一年高位啦。恒指都7個月高啦，落後嘅嘢，梗有啲原因。但唔代表你就「不能買」。

咁未升嘅，當然冇咁靚仔啦。當然係「短期未受惠」

14. 因為金句都提過，Successful investing is having everyone agree with you………..later。重點係later（所以，真係重覆講咗好多次，你嘅思考比起你揀冧把重要）

15. 即係點？即係好多時你地諗嘅嘢，無論「利好」同「利淡」，都反映咗在股價。到底「有幾多」反映咗，就真係大智慧嘅問題，窮一生都答唔到你，真係只能夠靠 feel．但原則係你要循呢個方向思考。例如你而家先講「開關大陸人會嚟買保險」「開關商場生意會好返」，就算未反映晒，都反映咗一半啦，係咪？

唔好又要百二蚊，又要李嘉欣。升咗嘅又話唔敢追，未升嘅又話有缺點。10月你又唔買？

16. 但，補充少少，不代表呢啲嘢不會再升，不代表唔買得，只係可能最筍嗰浸過咗（正如你而家買阿里巴巴咁），甚至可能你買完幾日唔升，仲要倒跌10%。點解反映咗又可以再升？首先，都話「反映咗幾多」，真係冇得計，永冇答案。仲有，即使反映晒，「股票本身就係會升」，根本唔使任何事件。生意增長咪股票增長。你話蘋果改變世界，OK，但麥當勞過去幾十年有乜突破？咪又係嗰啲嘢。只係人鍾意聽narrative

港股都7個月高位，咁落後嘅嘢，當然係未即時受惠啦，好心啦

17. 仲唔明講乜？即係，咁就算平時，啲公司業務都係增長緊嘛。又或者你可以理解做，佢地會跟返大市升，或者跟返「自己行業」去升，只係冇咗「因為」開關而升嗰浸（已經升咗）

18. 好啦，講一大輪，即係邊隻？即係，大酒店45。耐唔耐都有人問，都係一隻好股票，雖然有啲「難玩」（呢個可能只係我嘅主觀感受）

19. 45做乜？咪半島酒店。留意唔止香港的，所以即使封晒關公司都未死得，況且仲有好有錢嘅香港人去Staycation支持（我都去過！）。個故事大家都估到，開返關，房租自然升。

20. 詳細情況可以之後再講，但睇圖，個Excel就係酒店嘅房價。三個表，最底嗰個係出租率，明啦。中間嗰個係平均房價。咁但，你唔係租晒出去嘛，所以最頂個表，就係「實現」嘅房價。例如我5000蚊晚，但租得50%，咁即係2500蚊間房。亦即係，最頂嘅數字，係中間嗰個乘最底嘅一個。實現房價= 房價 X 出租率。呢個對酒店就最重要，只係房價高但租唔出冇用，只係多人住但房價唔夠高又唔好。

21. 詳情之後細講，但，2018年，未爆社運之前，你見實現房價去到三四千蚊一晚。而家？第三季係一千蚊。任你點豬up咩冇人嚟香港去晒新加坡都好，肯定都唔只一千蚊晚。況且你見到，房價其實都係三千幾，只係入住率得三成咁解。

22. 咁總有啲人自作聰明話：唔係喎，話而家開關都唔多大陸客喎，反而多人北上喎，酒店冇乜受惠喎。係！咁但，過年嘛，我都唔明有乜咁發現新大陸。況且，之後應該點都係多返。十億幾人，真係求其一條村嚟都塞爆半島了

23. 況且，還原基本步，咪就係因為你未見好多人塞爆半島，所以先值得買咯！到住滿人就沒戲唱啦

24. 你睇股價都睇到，唔算好差，但甚至同52星期高位都仲有啲距離。而家8.5，一年高位都9.5。隻嘢低位「只係」升咗5成，其實唔多。

25. 仲有，你可以留意，佢嘅低位係2020年尾—同其他嘢有啲唔同，其他好多係舊年10月低位。原因？當然因為公司唔止得香港，咁其他地方比較早復常。你睇啲房租都見到。

大股東就大手增持過，仲要坐艇。應該係好事

26. 當然仲有一樣嘢，呢隻嘢，亦都係一路傳有機會私有化，甚至賣盤。半島嘅品牌當然值錢，亦都畀人狙擊過（正是大劉，幾廿年前了）。甚至舊年都試過類似情況，所以你見大股東（嘉道理）增持咗，變相就係由人地手上拎返啲貨。（個故事有啲長篇，但反正已經完成咗增持）

27. 重點？嘉道理係12.8買的，而家隻嘢先8.5。當然不能100%話大股東都肯12.8隻嘢就肯定唔止值呢個價錢，但，都係一個指標。

28. 亦都留意，佢唔係一百幾十萬港紙咁買，舊錢都真係大的。

最後，留意星期四晚美國通脹數據。

其實真係半年前話畀你知通脹回落了。等你啲網友個個都「確認」就蚊瞓

29. 又，慎防我唔得閒出文，留意香港時間星期四晚，美國又會出CPI。正路就應該見到再回落，問題係回落幾快咁解，都係睇同預期相差遠唔遠。

30. 懶自己睇嘅，話埋你知。只睇一個數，應該睇物價按月走勢。上次升0.1%，今次街估持平，TE（Trading Economics）估會跌0.1%。如果係嘅，可能市場會幾興奮

31. 睇按年嘅，核心通脹（即係扣除能源同食品），上次係升6%，街估放慢到5.7%，TE估5.8%。Headline inflation 嘅，上次係升7.1%，街估6.5%，TE估6.7%

32. 如果好細心嘅，會留意到，TE估嘅按月數字就低過市場預期，但按年就高過。呢個係十分奇怪嘅。點解？我都唔知點解。但你夠細心嘅會望到呢樣嘢。

33. 當然了，呢啲數字，一定影響加息預期，債息，美金之類。雖然唔係100%話個數字低過預期就 美匯即散 加息預期即跌 債息即跌 美股即彈，冇話包生仔的。都話市場嘅嘢，唔係做科學實驗。

34. 最後，節目預告，不解釋。黃金、日圓、Tesla就真係應該遲下會寫。因為我農曆年前後會在韓國，咁寫呢啲嘢唔使整咁多圖，比較啱我在海外寫。仲有會幫堆金句埋尾。正如我在日本都係咁做，但都有keep到出文，今次更加冇問題。